LEVIHEY 7
7
d. Mikuli ngi ɗiya ɓi
1«Mikuli ngi ɗiya ɓi na, gi mezegwel naŋ ani: I gwat mipal wãˀ. 2Ar li maslaka ˀay ngi ginew ngi mikuli ngi zlum ti zlum na, ginew ngi mikuli ngi ɗiya ɓi, a slaka ˀay naŋ anga ya. Dar masay a kuca pumbuso da ciki li gi mikuli gun gun zlar. 3Li misi mal naŋhaya, a vuliy taŋ da ya Bumbulvuŋ: i dangwal naŋ, mungul misirit hirnga gwat ngi kwacay naŋhaya, 4ɗugur dubahaya cuw taŋ paɗ paɗ ti mungul taŋhaya, waɗ guzluzluk ngi mevele torro bac ng'avu ɗugur dubahay tuwa. 5Dar masay a wura taŋ ar li gi mikuli. Hana i gwat ngi zum mizlam zlam wãˀ da ya Bumbulvuŋ. Mikuli ngi ɗiya ɓi na, a gaka kahana so. 6Mbur ngir sukwi ngi masay gar na, a zuma zuy. Yo a zumaka ar li mipal. Hana i gwat mipal wãˀ. 7Mikuli ngi pula mungra ati mikuli ngi ɗiya ɓi na, mezegwel taŋ i misi purla. Masay maga mezegwel ngi pula mungra na, useˀ nah i mi nga naŋ.
e. Migir ngi masay
8Masay miga mikuli ngi zlum ti zlum ngi mburo le na, garak ngi ginewe da naŋ. 9Mikuli magaka ti gwat ngi migamay gar, mususulo ti susul ar vu ngi di ɗaf, ar gaˀay ngi ɓiri malla ar goŋgoŋ ngi di ɗaf gar na, naŋ da masay miga mezegwel nah na. 10Mikuli ti gwat ngi migamay gar, mufukuɗa hapa nah le ti mal malla mufukaɗ fukaɗ kine gar na, naŋ da ziri ngi Aroŋhoy gar taŋ, a wuɗkaka ar wala taŋ rak raka.
f. Mikuli ngi ngiɓiˀay
11Gwat ngi gi mikuli ngi ngiɓi ˀay mavulaka da ya Bumbulvuŋ na, gi mezegwel naŋ ani: 12Da a vulaka ngi hunumiy ya Buymisemuŋ na, sey a soko di aseˀe i hapa manja ˀis ara, fukaɗ fukaɗ ti mal waɗ tos tos ar vu, helelem mikefer kefer manja ˀis ara, pay pay mal ava, yo waɗ hapa mufukuɗa le kuy kuy ti mal, waɗ tos tos ar vu. 13A soko ti ɗaf misi ˀis ara, jom ng'avu hapa mufukuɗa ti mal waɗ tos tos ar vu tuwa, ɓa ngi ga mikuli ngi ngiɓiˀay ngi hunumiy ya Buymisemuŋ. 14Sukwi ngi hapa mufukuɗa ti mal waɗ tos tos miwal wal tayna gar na, a wuɗam avu taŋ neˀneˀ ɓa ngi vul da ya Bumbulvuŋ, waɗ a sa ndiram da masay makuca pumbus ngi ginew ngi mikuli ngi ngiɓi ˀay na. 15Useˀ ngi mikuli ngi ngiɓiˀay, muhunumam di ya Buymisemuŋ tuwa na, a zumaka kalla tapas gi mikuli vuna, anta a wam di vu ngi tiprike ta. 16Mikuli, mbur muso le nga gi naŋ, da i mikuli ngi ‹ji mi ngi Buymisemuŋ›, malla ‹i ngi mongoy naŋ› na, a zumaka gwat ngi gi mikuli nah kalla tapas vul naŋ vuna si. Is naŋ mandire, li naŋ muwun le na, a zumaka zuyo ma. 17Amma useˀ ngi mikuli mindir le na, angi hin mimakir naŋ na, a wuraka avra. 18Useˀ ngi mikuli ngi ngiɓiˀaya, ar hin mimakir naŋ, da mbur a zuma le gbaˀa si na, Buymisemuŋ anta tiɓa mbur miga mikuli nah vuna ta, anta slufa kaɓa i mikuli ta, asi useˀ nah a tiri le i useˀ misi dili. Mbur muzuma le na, a jijira zayɓi ngi malambaˀ naŋ nga hirnga naŋ. 19Yo ma na, useˀ muru le duk avu gwat misi dili gar na, a zumaka ta, a wuraka avra.
«Ɓa mbur a zum useˀ ngi mikuli na, sey da naŋ manja dili. 20Amma da mburo naŋ ti dili, da a zuma useˀ ngi mikuli ngi ngiɓiˀay magaka da ya Bumbulvuŋ na le na, a sa gwahaka ti wuzla jum ngi Israyeley avra. 21Yo gwat wanaka gar misi dili: mburu, gwat misãmi malla mevreŋ misi dili mitika jiviɗ nah le ngi zum gar na, mbur mija haŋ le ava, yo da a sa zum useˀ ngi mikuli ngi ngiɓiˀay magaka da ya Bumbulvuŋ na le na, mbur nah, a sa gwahakaŋ ti wuzla muy naŋhay avra.»
Jiviɗ ɓa mizli a sipakaŋ
22Bumbulvuŋ a ɓa Moyise na: 23«Ɓa Israyeleye na: Mungul ngi sla, ngi tumuŋ malla ko ngi ˀaw na, ki zumaka ta. 24Gwat misãmi mumuca le ti muc malla misi gwatay mikiɗaka le ti kiɗ gar na, ki zumaka mungul naŋ ta, amma ki gam di gwat gar zuy ɓula. 25Ginew muvula le kaɓa i gwat ngi zum mizlam mizlum wãˀ da ya Bumbulvuŋ, da mbur a zum mungul naŋ le na, a sa gwahakaŋ ti wuzla jum ngi Israyeley avra, asi naŋ muzuma na. 26Ar li kum misa cifam le gar na, pumbus gar, ko ngi ɗiyuw malla ngi gwat misãmi gar na, ki zumaka ta. 27Da mbur a zum pumbus le ko ngi gwat wanaka gar na, a sa gwahakaŋ avra ti wuzla jum ngi Israyeleye.» 28Bumbulvuŋ a ɓa Moyise: 29«Ɓa Israyeley na: Da mbur ara vul gwat ngi gi mikuli da ya Bumbulvuŋ, da i mikuli ngi ngiɓiˀay na, sey a vulaŋ mi nga naŋ. 30Li misi mal naŋhay ngi zlum zlam zlam da ya Bumbulvuŋ na, aru taŋ ti haŋ naŋ. A vula taŋ jom ati didak naŋ ti mezegwel ngi bigi gwat a mbuŋ ɗu. 31Li misi mal naŋhaya, masay a wura taŋ ar li gi mikuli, amma didaka da Aroŋ ati ziri naŋhay. 32Yo angi mikuli kumoy ngi ngiɓiˀay na, ki zuɓaka tuwal naŋ vay hazumo, ki vulaka da masay, i mi nga naŋ. 33Mbur gar a wuzla ziri ngi Aroŋhoyo mabiga pumbus ati mungul ngi mikuli ngi ngiɓiˀay na, tuwal vay hazum ngi ginewe, inga naŋ. 34Naŋ kine, didak naŋ ati tuwal naŋ, Israyeleye mazuɓaka angi gi mikuli taŋhay ngi ngiɓiˀay gar na, yi hila taŋ le avu taŋ, yi vula taŋ le da masayay, Aroŋ ati ziri naŋhay. Hana i mi nga taŋ ngi caˀa avu Israyeleye. 35Zle tapas mucufaka Aroŋ ati ziri naŋhaya le ngi gi gwat ngi zum mizlam zlam wãˀ da ya Bumbulvuŋ vuna si na, mi nga taŋ, i nah so. 36I mi nga taŋ, ya Bumbulvuŋ muwuɗ ɓa Israyeley a vulaka taŋ di, zle tapas naŋ misa pa taŋ mal ngi vula sla le vuna si. Hana i ɓimujuwa mandir caˀa kine vur taŋ hã ngi sete.»
37Hana i mezegwel ngi mikuli mizlam zlam wãˀ, mezegwel ngi gi ti gwat ngi migamay, mezegwel ngi pula mungra, mezegwel ngi ɗiya ɓi, mezegwel ngi ci masay ar slra waɗ mezegwel ngi mikuli ngi ngiɓiˀay. 38Bumbulvuŋ a vula ɓi nah da Moyis a muwã Sinay, tapas naŋ miɓa Israyeley ɓa a sakaŋ ti gwat ngi vul taŋhay a wuzlaɓuh mikirɗak kirɗak ngi Sinay na.
Currently Selected:
LEVIHEY 7: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
