LEVIHEY 14

Ɗiyi ngi mbur misi kukula

1Bumbulvuŋ a ɓa Moyise na: 2«Mbur misi kukula, tapas taŋ masa ram di nga biga da masay na, mezegwel ngi gi vur ɗiyi naŋ na, ani: 3Masay a bi tir walahay guɗuko, ɓa ara puraŋ. Da mbur misi kukula tuwa, a ɗiyi le gisiŋ na, 4mbur miɗiyi tuwa, masay a ɓi ɗaˀ, a sakaŋ ti gwatay ani: ɗiyuw misi titirihey cuw, misi i mupula jiviɗ naŋ le ngi zumoy, dum ngi miter, ngwic ngi tumuŋ, munduva ndezze, waɗ mihaŋ ngi widis mazilaka izop. 5Akẽh na, masay a ɓi ɗaˀ, a slaka ˀay ngi ɗiyuw mudumbuŋ a hirnga gandaf misi ti yam munuwoko di ar miviɗiviɗi naŋ. 6A zuɓa ɗiyuw misi titiri tuwa, dum ngi miter, ngwic ngi tumuŋ, munduva naŋ ndezze, waɗ mihaŋ ngi izop tuwa, jom gar taŋ ati ɗiyuw misi titiri na, a ca taŋ jugoɓ ng'ar pumbus ngi ɗiyuw mislaka ˀay naŋ a hirnga yam munuwo di ar miviɗiviɗi naŋ tuwa. 7Masay a kuca da mbur miɗiyi tuwa, hã is tarnaˀa. A ɓa njah: mbur hana, naŋ manja dili. Waɗ a pula ɗiyuw misi titiri na, a slikiɗ a cuh nga wuzlaɓuh. 8Ar nah na, mbur misi kukula muzuɓakaŋ dili naŋ avra tuwa, a buna zana naŋhaya, a hija ngwic ngi vu vu naŋhaya gar avra, a bun, dar akẽh na, a tiri le manja dili muduba. A dirba nah na, aru ng'ar walahay guɗuko, amma a cifi ti vra hã hin tarnaˀ, a ci ng'ar guɗuk naŋ t'aruŋ. 9Angi hin mitarnaˀ naŋ na, a hija ngwic ngi vu vu naŋhaya gar a muŋ ma, hirnga, mazlamay waɗ ngwic ngi didak hiri ati ngwic mekelemey mindiramaya cek. A buna zana naŋhaya, a bun, akẽh so na, naŋ manja dili muduba.

10Angi hin mindangafaɗ naŋ na, a ji ziri tumuŋhoy cuw, manja hereweɗ avu taŋ, yo tumuŋ mongoso pal ngi vi purla, manja hereweɗ ava, a vul hapa kilo ngoltir, fukaɗ fukaɗ ti mal, waɗ mal reta litir. 11Masay maga mezegwele, a cica mbur miɗiyi tuwa ati gwat ngi vul naŋhaya, deŋ a mbuŋ ɗu, ya Bumbulvuŋ, a mizlingre guɗuk ngi zlir ti ya Buymisemuŋ. 12Masay a ji zuŋ tumuŋ tuwa purla, a gi di mikuli ngi ɗiya ɓi, jom ati mal reta litire, a biga taŋ a mbuŋ ya Bumbulvuŋ ti gi mezegwel ngi vula gwata. 13Akẽh na, a sla ˀay ngi tumuŋ ngi gi mikuli, ar li maslaam ˀay ngi gwat ngi gi mikuli ngi pula mungra, waɗ ngi mikuli mizlam zlam wãˀa, angi li mipal. Naŋ kine, gwat ngi gi mikuli ngi ɗiya ɓi ati ngi gi mikuli ngi pula mungra na, i sedege mipal wãˀ da Buymisemuŋ, yo da masay ma. 14Mikuli ngi ɗiya ɓi tuwa na, masay a wuɗ pumbus naŋ, waɗ a ga da mbur miɗiyi tuwa, avu melewer ngi slimiɗ naŋ vay hazum, yo avu muzuŋ haŋ naŋ madiɗa vay hazum, waɗ avu muzuŋ sar naŋ madiɗa vay hazumo ma. 15Masay a zuɓa mal reta litir tuwa, a pi sek neˀ nga hur haŋ naŋ vay gula. 16A ca muzuŋ haŋ naŋ mijinga ngi madiɗa yop ng'ar mal misi a hur haŋ naŋ vay gula tuwa, waɗ a kuca kwic kwic a mbuŋ ɗu, ya Bumbulvuŋ is tarnaˀa. 17Masaya, is ngi mal misi a hur a haŋ naŋ tuwa na, a ga da mbur miɗiyi tuwa avu melewer ngi slimiɗ naŋ vay hazumo, yo avu muzuŋ haŋ naŋ madiɗa vay hazum waɗ avu muzuŋ sar naŋ madiɗa vay hazumo ma, jirngasl nga hirnga pumbus ngi tumuŋ ngi gi mikuli ngi ɗiya ɓi tuwa. 18Masaya, is ngi pumbus misi a haŋ naŋ tuwa, a pa nga hirnga mbur miɗiyi tuwa. Masay a gaŋ mezegwel ngi vula jiviɗ ngi pula mungra naŋ a mbuŋ ɗu. 19Masay a ga mikuli ngi pula mungra a mbuŋ ɗu, ya Bumbulvuŋ, yo a ga mezegwel ngi vula jiviɗ ngi pula mungra ngi mbur miɗiyi na. A dirba nah, a sla ˀay ngi gwat ngi mikuli mizlam zlam wãˀ na. 20Ginew ngi gi mikuli mizlam zlam wãˀ tuwa ati hapa ngi vul ngi gi sedege, jom cuw taŋ, masay a zluma taŋ cek ar li gi mikuli. Dar akẽh ma na, a ga mezegwel ngi vula jiviɗ ngi pula mungra naŋ. Ar nah na, naŋ manja dili wãˀ muduba so.

Ɗiyi ngi mbur misi kukula misi murga

21«Da kaɓa buy nah i misi murga wãˀ, a luuma gwat tayna gu ta na, a ji zuŋ tumuŋ purla ngi gi mikuli ngi ɗiya ɓi, ti mezegwel ngi vula gwat a mbuŋ ɗu, ya Bumbulvuŋ, ɓa a gakaŋ mezegwel ngi vula jiviɗ ngi pula mungra naŋ avra. A wuɗ hapa kilo makir, fukaɗ fukaɗ ti mal ɓa ngi vul ngi mikuli, waɗ mal reta litir, 22waɗ gonok gazahay cuw malla ɗiyuw dirgwaɗay cuw, gwat zliv naŋ maluma gu. Ɗiyuw pal mekeleme ngi gi mikuli ngi pula mungra, yo mipal numuŋ ngi gi mikuli mizlam zlam wãˀ. 23Angi hin midangafaɗ naŋ na, a so ti gwat tayna da masay a mbuŋ ɗu, ya Bumbulvuŋ, a mizlingre guɗuk ngi zlir ti ya, ɓa ngi gi mezegwel ngi zuɓa dili. 24Akẽh na, masay a tiɓa zuŋ tumuŋ mizile ngi gi mikuli ngi ɗiya ɓi waɗ mal reta litir tuwa, a ga mezegwel ngi vula gwat a mbuŋ ɗu. 25Zuŋ tumuŋ ngi ɗiya ɓi tuwa na, mbur migi mikuli a sla ˀay naŋ, a wuɗ pumbus naŋ neˀ, dar a ga da mbur maɗiyi tuwa, avu melewer ngi slimiɗ naŋ vay hazumo, yo avu muzuŋ haŋ naŋ madiɗa vay hazum waɗ avu muzuŋ sar naŋ madiɗa vay hazumo ma. 26Masay a pi mal tuwa neˀ nga hur haŋ naŋ vay gula. 27Mal misi a hur haŋ naŋ tuwa na, a ca muzuŋ haŋ naŋ vay hazum, mijinga ngi madiɗa yop araŋ, a kuca kwic kwic is tarnaˀ a mbuŋ ɗu, ya Bumbulvuŋ. 28Masay a ga mal misi a hur haŋ naŋ tuwa, da mbur miɗiyi tuwa avu melewer ngi slimiɗ naŋ vay hazum, yo avu muzuŋ haŋ naŋ madiɗa vay hazum, waɗ avu muzuŋ sar naŋ madiɗa vay hazumo ma, jirngasl nga hirnga pumbus ngi tumuŋ, naŋ migaŋ di ngi gi mikuli ngi ɗiya ɓi tuwa. 29Masaya, is ngi mal misi a hur haŋ naŋ tuwa na, a pa nga hirnga mbur miɗiyi tuwa, ɓa ngi gaŋ mezegwel ngi vula jiviɗ ngi pula mungra naŋ a mbuŋ ɗu. 30Da mbur mazuɓakaŋ mungra, a so di i gonok malla ɗiyuw dirgwaɗ na, masay a zuɓ purla. 31Purla asi taŋ, a gi di mikuli ngi pula mungra, yo mupurla numuŋ ngi gi mikuli mizlam zlam wãˀ, waɗ a vul hapa aseˀeŋ. Masay a ga mezegwel ngi vula jiviɗ ngi pula mungra ngi mbur miɗiyi a mbuŋ ɗu, ya Bumbulvuŋ tuwa.»

32Mbur misi kukula malum gwat ngi gi mezegwel ɓa a ɗiyi gu ta na, ɓi mudubuna vurˀe, i hana.

Duduf avu dalam

33Bumbulvuŋ a ɓa Moyis ati Aroŋ na: 34«Hirwuy Kanaˀan, ya mavulukum di, ɓa a ndir da kum na, ti kum misa cam le anga na, hay kum ngir hirwuy nah, da i sa bo ti duduf le kop avu dalama kaɓa kukula na, 35buy ngi hay ara ɓa ɓi nah da masay: ‹I pur gwat le koppo avu dalam ɗu.› 36Masaya, ɓa a sa ci nga pura gwat mukoppo avu dalama na, a ɓi ɗaˀ le, a bam ti gwat ngi hayaya gar avra kwaɗay. Kanah na, gwat gar misi a haya na, anta sa puraka kaɓa i gwat misi dilihey ta. Da a boko ti gwataya le cek so na, naɓa masay a ci nga pura haya so. 37Masay a pura gwat mukoppo avu dalam tuwa. Da kaɓa dalam vuna a hur le, yo gwat mukoppo ara na, ara pur kaɓa naŋ kalaf kalaf neˀ neˀ, malla gagaza neˀ neˀ, yo hirak ar li nah, ara pur kaɓa naŋ kuɗoˀo na, 38masay a sa bo ti haya, naŋ mubo le a miviŋ wãˀ na, a gica miviŋ giceˀ ngi hin tarnaˀa. 39Angi hin mitarnaˀ naŋ na, masay a sa mahiri ngi pur naŋ ava ma. Da gwat mukoppo avu dalam ngi hay tuwa, a ndih le nga mbuŋ kwana. 40Ɗugur mududufohoy tuwa na, masay a ɓi ɗaˀ, a muɗaka taŋ avra, ara zliɗaka taŋ a duba gala, angi li ngi dili. 41A gira hur hay tuwa gar gar cek avra, dar ara paka muyuŋ migiraka tuwa, a duba gala, ar li ngi dili. 42A hilam ɗugur mekelemey, ngi ca taŋ ar li ngi ɗugur mudumbuŋhoy tuwa, yo a wuɗam hohoy mekelem, ɓa a kupaka hiri ngi hay a muŋ.

43Taŋ mumuɗaka ɗuguroyo le avra, taŋ migiraka dalama le avra, yo taŋ mukupaka hiri ngi dalama le a muŋ na, a dirba nah, da dalam tuwa, a zla le, ara duduf ma na, 44masay a sa ru, ara pura a muŋ ma ni: da gwat mukoppo a vu dalam tuwa, ara ndih nga mbuŋ na, naɓa i kukula malambaˀ misi avu haya. Hay nah na, naŋ ti dili muduba. 45A wahaka haya gar avra, ɗuguroy, dumoy waɗ hohoy mukupaka ti naŋ gar na, a hilaka taŋ avra, dar ara paka a duba gala, ar li ngi dili. 46Angi hin tarnaˀ, hay muro giceˀ tuwa, da mbur mici le ng'ara gar na, a tiri le i mbur misi dili, hã pastaˀa. 47Da mbur mihin le ar hay nah, yo mbur muzum gwat le ara na, sey a buna zana naŋhaya ceɗ ceɗ le. 48Da kaɓa, a dirba taŋ mukupaka hay a muŋ tuwa, masay a ci le nga pur naŋ ma, da gwat mukoppo tuwa, a mo hiri a muŋ mata na, masay a ɓa njah: i hay misi dili ta, asi mike na, duduf misi ava tuwa, a susuyum le.

49«Ɓa ngi zuɓa hiryi ngi haya na, masay a ji ɗiyuwoy tap cuw, dum ngi miter, waɗ ngwic ngi tumuŋ, munduva naŋ ndezze, waɗ mihaŋ ngi widis izop. 50A sla ˀay ngi ɗiyuw mudumbuŋ a hirnga gandaf misi ti yam ngir miviɗiviɗi. 51A sa wuɗ dum ngi miter, ngi izop, ngwic ngi tumuŋ, munduva ndezze waɗ ɗiyuw misi titiri tuwa, a ca taŋ jugoɓ ng'ar pumbus ngi ɗiyuw, naŋ misla ˀay naŋ tuwa, waɗ ng'ar yam ngir miviɗiviɗi misi ar gandafa, a kuca haya kwic kwic is tarnaˀ. 52Naŋ kine, naŋ masa zuɓa hiryi ngi hay avra na, kahana so, ti pumbus ngi ɗiyuw, ti yam ngir miviɗiviɗi naŋ, ti ɗiyuw misi titiri, ti dum ngi miter, ti mihaŋ ngi izop waɗ ti ngwic ngi tumuŋ, munduva ndezze tuwa. 53A sa pula ɗiyuw misi titiri na, a slikiɗ tir walahaya, nga wuzlaɓuh gwaɗ naŋ, waɗ a gi mezegwel ngi vula jiviɗ ngi pula mungra vur haya. Akẽh na, hiryi ngi hay a bi le avra.»

54Dubunoy vur sukwi ngi kukulahay gar, movroko, 55yo gwat mukoppo avu zana waɗ avu dalam ngi hay, 56hisl avu vu, ngweɗek ati gwat mabo kop kop avu vu, a wucuɗ, 57gwat misi dili malla misi dili ta gar na, mabugukum di, i dubun hana. Dubun vur ɓi ngi kukula gar na, i hana so.

Currently Selected:

LEVIHEY 14: BEGDC

Highlight

Copy