LEVIHEY 13

Jiji mabo avu vu ngi mburu

1Bumbulvuŋ a ɓa Moyis ati Aroŋ na:

2«Da kaɓa mburo, vu naŋ a hisl le liw liw, malla gwat a bo le avu vu naŋ kop kop malla piɗwir piɗwir, a wucuɗ, a bam vu ati kukula na, sey a ram ti mbur nah ng'avu masay Aroŋ, malla ng'avu masay purla a wuzla ziri naŋhaya. 3Masay a pura jiji ngi vu vu ngi mbur nah. Da kaɓa ngwic ngi raˀa a mbiɗi le babaraŋ, yo ara pur kaɓa li naŋ kuɗoˀo na, naɓa i jiji ngi kukula. Masaya, a dirba naŋ mupura le na, a ɓa njah: i mbur misi dili. 4Da li mukop kop ngi vu vu naŋ na, ara wucuɗ, naŋ babaraŋ, naŋ anta pur kuɗoˀ avu vu ta, yo ngwic ngi raˀa a mbiɗi babara ta ma na, masay a cifa mbur misi jiji tuwa pal naŋ, hã hin tarnaˀa. 5Angi hin mitarnaˀ naŋ na, masay a pura jiji ngi mbur tuwa sar mucuw naŋ ma. Da jiji mukop kop tuwa, naŋ da nga naŋ nga naŋ, a ndih nga mbuŋ ta na, masay a cifa mbur tuwa pal naŋ hã hin tarnaˀ ava ma. 6Angi hin mitarnaˀ naŋ ma na, masay a pura jiji tuwa ma. Da a pura le vu mukop kop tuwa, ara muca hiri naŋ, yo naŋ anta ndih nga mbuŋ ta na, a ɓa njah: i mbur manja dili. I ngweɗek ngatara lambaˀ. Mbur misi jiji tuwa, a buna zana naŋhaya, ɓa a ndir naŋ manja dili. 7Amma, masay mupura mbur tuwa, a ɓa le njah, i mbur manja dili, a dirba nah ma na, gwat mubo kop kop avu vu tuwa, ara ndih nga mbuŋ ava na, sey mbur tuwa, a mi ng'avu masay, ɓa a zla pur naŋ kaˀ a ruwuy ma. 8Masay a puraŋ ava ma, da ngweɗek tuwa, ara ndih nga mbuŋ na, masay a ɓa njah: i mbur misi dili, i kukula.

9Da mburo, jiji mubam vu ati kukula a lumaŋ le na, a ram di ng'avu masay. 10Masay a puraŋ. Da hisl ngi vu vu na, naŋ babara, a mbiɗa ngwic ngi raˀa le babaraŋ, yo vu naŋ mubo kop kop tuwa, i waˀa virngis virngis na, 11naɓa i kukula mukuyta wãˀ. Masay a ɓa njah: i mbur misi dili. Masay anta gir vu gar le ɓa a cifaŋ pal naŋ mata, asi a njik le njak, i mbur misi dili. 12Amma, da kukula nah, ara ngi kaˀ kaˀ avu vu, hã tisl vu ngi mburo gar, zle a hirnga sesẽŋ avu saray, kaɓa masay mupura na, 13a purakaŋ kuy kuy ava. Da masay a pura le, waˀa naŋ kaˀ kaˀ zlar vu gar na, a ɓa njah: mbur nah naŋ ti dili ta. Dum vu naŋ gar babaraŋ, naŋ anta ti dili ta na, vurˀeŋ. 14Amma tapas taŋ misa puraka le waˀa ada virngis virngis, hã vu naŋ tisl na, naɓa a tiri le i mbur misi dili. 15Masay a pura waˀa naŋ mivirngis virngis tuwa, a ɓa njah: mbur nah naŋ ti dili, waˀa mivirngis virngis tuwa i kukula na, vurˀeŋ. 16Malla ta na, da waˀa mivirngis virngise, ara pusluɗa hiri babara na, mbur tuwa, a mi ng'avu masay a muŋ ma. 17Akẽh na, masay a pura, da waˀa mukop kop tuwa, ara pusluɗa hiri babara gisiŋ na, a ɓa njah: jiji nah, i jiji ngi dili ta. Mbur nah, naŋ manja dili.

18Mburo, da kaɓa digwi a ngi le ava, a gi waˀa le zleˀe, a kuf le, 19amma da li ngi digwi tuwa, ara hisl liw liw babara, malla ara gi kop kop gagaza cuhho na, sey mbur vuna, aru ng'avu masaya, ɓa a puraŋ a muŋ. 20Masay a pura: Da a pura le, vu mukop kop tuwa, li naŋ naŋ kuɗoˀ kuɗoˀ, yo ngwic ngi raˀa a tiri le babara ˀufroho na, sey a ɓa njah: mburo, naŋ ti dili, i sukwi ngi kukula mabawa ar vivi ngi digwi mukuf tuwa. 21Na, da kaɓa masay a pura le, a lum ngwic babara ar li nah ta, li naŋ kuɗoˀ ta, yo vu naŋ anta gi ˀufroho ta ma na, masay a cifa mbur tuwa baˀ pal naŋ, hã hin tarnaˀa. 22Da gwat mukop avu vu tuwa, ara ndih nga mbuŋ gisiŋ na, masay a ɓa njah: i mbur misi dili, i kukula. 23Amma, da gwat mukoppo mawucuɗ tuwa, naŋ da nga naŋ nga naŋ, anta ndih nga mbuŋ ta na, naɓa i vivi ngi digwi mukuf tuwa. Masay a ɓa njah: i mbur manja dili.

24Mburo, vu a wuraŋ le. Ar vivi ngi vu muwuraŋ tuwa na, gwat koppo mawucuɗ, gagaza cuhho malla babaraŋ, 25akẽh, masay a puraŋ. Gwat mubo koppo avu vu mawucuɗo, da ngwic ngi raˀa a mbiɗi le ˀufroho babaraŋ, yo da li naŋ a gi le kuɗoˀ na, naɓa i kukula mabawa ar vivi ngi wur tuwa. Masay a ɓa njah: i mbur misi dili, i sukwi ngi jiji ngi kukula. 26Da kaɓa masay mupura le, gwat mubo koppo avu vu ngi mbur tuwa, ngwic naŋ anta babara ta, li naŋ anta kuɗoˀo ta, yo naŋ ˀufroho na, masay a cifa mbur nah baˀ pal naŋ hã hin tarnaˀa. 27Hin mitarnaˀ naŋ na, masay a pura ma. Da a ndih le gisiŋ nga mbuŋ na, masay a ɓa njah: mburo, naŋ ti dili, i sukwi ngi jiji ngi kukula. 28Amma, da gwat mubo koppo mawucuɗ tuwa, naŋ da nga naŋ nga naŋ, anta njih nga mbuŋ ta, naŋ da ˀufroho na, naɓa a hisl ti hisl, i vu muwuraŋ. Masay a ɓa njah: mburo, naŋ manja dili, i vivi ngi vu.

29Mbur mizile malla ngwasa, da jiji a bo le avu hirnga malla avu mudungu na, 30masay a pura jiji nah. Da kaɓa li naŋ, naŋ kuɗoˀo, yo ngwic ngi raˀa naŋ gagaza cuhho, yo njirwãyya na, masay a ɓa njah: mbur nah, naŋ manja dili. I movroko, mbiɗeˀvra, kukula ngivi hirnga malla ngi vu mudunguˀ. 31Malla ta, da masay a pura movroko nah tuwa le, kuturkuy ngir li naŋ anta gi kuɗoˀo ta, yo ngwic titra anta ar li naŋ ta na, masay a cifa mbur misi movroko nah baˀ pal naŋ, hã hin tarnaˀa. 32Angi hin mitarnaˀ naŋ na, masay a pura movroko tuwa ma. Da movroko na a ndih nga mbuŋ ta, yo ngwic ngi raˀa, naŋ gagaza cuhho ta, yo li nah naŋ kuɗoˀo ta ma na, 33mbur nah a hija hirnga, amma a pula li misi movroko na mbak kine. Akẽh na, masay a cifa mbur misi movroko tuwa baˀ pal naŋ, hã hin tarnaˀa ma. 34Angi hin mitarnaˀ naŋ ma na, masay a pura movroko tuwa ma. Da movroko a ndih nga mbuŋ ta, yo li naŋ kuɗoˀo ta ma na, masay a ɓa njah: mbur hana, naŋ manja dili. A dirba naŋ mubuna zana naŋhaya le na, naŋ manja dili. 35Amma da masay minjika le, i mbur manja dili tuwa, a dirba nah, movroko ara ndih nga mbuŋ ma na, 36masay a puraŋ ava ma. Na zle movroko mandih nga mbuŋ si na, masay anta gir vu gar le ngi pura ngwic ngi raˀa, naŋ gagaza cuhho kwa mbrike mata, dar a ɓa njah: mburo naŋ ti dili. 37Amma, da movroko, hiri ra pura, naŋ da nga naŋ nga naŋ si, anta ndih ta, yo ara puso ngwic titra ar li nah na, naɓa movroko a kuf le, yo naŋ ti dili mata. Akẽh na, masay a ɓa njah: I mbur manja dili.

38Mbur mizileŋ malla ngwasa, da gwat ara bo avu vu naŋ kop kop babaraŋ, a wucuɗ na, 39masay a puraŋ: Da gwat mabo kop kop avu vu na, naŋ babara ˀufrohho na, naɓa i gwat mubo ngatara lambaˀ kine si, i mbur manja dili.

40Mburo, da ngwic hirnga naŋ a pi le ndoh na, anta i dili ta. 41Da i ngwic ngi midibiɗ mipi, mbak midibiɗe fec fec na, naɓa i dili ta. 42Amma, da hisl babara cihhe, a bo le ar li mundoh tuwa malla a midibiɗ mifec fec tuwa na, naɓa i kukula mabawa a wuzla hirnga malla a midibiɗe. 43Masay a puraŋ: Da hisl mijiv a wuzla hirnga malla a midibiɗ na, naŋ babara, gagaza cuhho, yo a bam vu le ati kukula na, 44naɓa i mbur misi kukula, naŋ ti dili. Masay a ɓa njah: mburo, naŋ ti dili, asi waˀa misi a hirnga naŋ na i kukula.

45Kanah so na, mbur, kukula mulumaŋ tuwa, sey a ki zana miyaraɓ yaraɓ, a sla ngwic hirnga ta, a sirit gwat sirit ar mazlamaya, a til mi: «Yi misi dili! Yi misi dili!» 46Kukula misi ada ava aruŋ gar na, naɓa i mbur misi dili na si. A cifi ti hay naŋ a duba gala.

Duduf avu zana

47«Zana mija ti ngwic ngi tumuŋ malla ti gugumaya, da duduf ava na, 48da ko i gabaga malla zana mija ti ji ti haŋ ti gugumay mislirkeɗ malla ti ngwic ngi tumuŋ, da ko i kwitiɗ malla gwat ngi garak wanaka gar, 49zana malla kwitiɗ, gabaga malla zana mija ti haŋ malla gwat ngi garak gar, da duduf misi avaˀa na, naŋ kalaf kalaf neˀneˀ malla gagaza cuhho na, naɓa i duduf ngi kukula, sey masay a puraŋ. 50Duduf nah tuwa na, masay a puraŋ, akẽh, a gica gwata giceˀ ɗum, hã hin tarnaˀa. 51Angi hin mitarnaˀ naŋ na, a pura duduf nah tuwa ava ma. Zana, gabaga malla zana mija ti haŋ, kwitiɗ malla gwat ngi garak gar, da duduf misi ava tuwa, a ndih le nga mbuŋ na, naɓa i duduf ngi kukula mazuɓ avra ta. Naɓa gwat nah, i gwat misi dili. 52Akẽh na, zana, gabaga malla zana mija ti haŋ ti ngwic ngi tumuŋ malla ti gugumay mislirkeɗ, gwat ngi garak gar tuwa na, sey a wurakaŋ. Asi duduf misi ava na, i duduf ngi kukula mazuɓ avra ta. 53Zana, gabaga malla zana mija ti haŋ malla gwat wanaka gar ngi garak, da kaɓa masay mupura le, da duduf misi ava tuwa, a ndih nga mbuŋ ta na, 54masay a vula jiviɗ nah, ɓa a bunaka gwat mududufo tuwa, yo a gica giceˀ, ɗum hã hin tarnaˀ ava ma. 55A dirba mubunaka duduf nah le tuwa, masay a pura ma, li mududufo na, da a mbiɗi ta, yo ko a ndih nga mbuŋ ta tekeɗe kwana, naɓa i gwat misi dili na si. Sey a wuraka avra, ko da duduf naŋ na, naŋ ti vra malla ko ti seˀe gar kwana, i misi purla si. 56Zana malla kwitiɗ, gabaga malla zana mija ti haŋ gar na, masay mupura le, li mududufo misi ava tuwa, a dirba taŋ mubunaka na, a tiri le ˀufurohho na, sey a munjuɗo li nah avra. 57Zana, gabaga malla zana mija ti haŋ, malla gwat ngi garak gar, da duduf naŋ a mo hiri le ava a muŋ ma na, naɓa i duduf ngi kukula mabawa. Gwat mududufo nah na, sey a wuraka avra. 58Zana, gabaga, zana mija ti haŋ malla gwat wanaka gar ngi garaka, da a bunaka le, li mududufo naŋ na, a susuyum le na, a bunaka sar mucuw naŋ ava, naɓa dili naŋ a zuɓ le avra.»

59Zanahay mija taŋ ti ngwic ngi tumuŋ malla ti gugumay mislirkeɗ, gabaga, zana mija ti haŋ, malla ko gwat wanaka gar ngi garaka, da a duduf le na, da i duduf ngi dili malla i ngi dili ta gar na, mavula jiviɗ ngi ɓa ɓi nah njah na, i dubun hana.

Currently Selected:

LEVIHEY 13: BEGDC

Highlight

Copy