ZEREMI 50
50
Babiloŋ mitiri diŋ, yo Israyeley milaham
1Mingiɓi Bumbulvuŋ miɓa ti balam mijiviɗ Zeremi vur hirwuy Babiloŋ.
2«Ɓaka ɓi ani a wuzla sukwi ngi mizli,
ɓaka ɓa mizli a sinaka, yo bigaka ti gwat ɓa mizli a sinaka ava,
ɓaka ɓa mizli a sinaka, ki ɗumoko ta,
ɓam na: a tiɓaka Babiloŋ le,
walahay Bel a pi mesem le,
kuli Marduk a diɗ le ndirɗaɗ a ruwuy.
Kuli dum naŋhay a pam mesem le,
kuli naŋhay a susuymom le.
3Haˀaw, sukwi ngi mizli vay muŋhoy, ara soko ngi so lumaŋ,
i sukwi ngi mizli masa tiram ti hirwuy naŋ cay daŋ daŋ,
ko mbur masa ru nga cifi ti hay a diga anta:
mizli titirahay, ginewey,
gwatay gar a kilam le, ko gwat masa ndir anga anta mata!
4Tapasa, ar nah vuna si na,
Israyeley ati Yudehey a sa ram arleˀe.
A sa ram bal ti tuwuy,
a sa gam welele ngi ru ti sipa Bumbulvuŋ, Buymisemuŋ taŋ. I ya Bumbulvuŋ maɓi.
5A sa cufuɗaka jiviɗ ngi ru nga Siyoŋ,
yo taŋ misi hiri pulaˀ pulaˀ na,
ngir ti diga vuna.
A soko a jumom ati Bumbulvuŋ,
jum ngi jumoˀay ngi sete,
misi ko t'anta sa puyukom di hirnga ta ndiɗaˀ.
6Mizli ɗuwoy a tiram tumuŋ mizizahay le zleˀe.
Mijigin taŋhay a zizaka taŋ le zleˀe,
a laˀam ti taŋ zleˀe a muwãhay.
Tumuŋhoy a ram digi a muwãhay, ar li miɗigaray,
a sinaka gezleŋ taŋ mata.
7Mizli mulumaka taŋ le gar na, a humbuɗam ti humbuɗ na si,
mizli mazliram ti taŋ tahaya, a ɓam:
«Ko i gam di i malambaˀ ta,
asi a mizli tayna a zluɓam ɓi le avu Bumbulvuŋ.»
Li cifi taŋ mijeŋŋe i Bumbulvuŋ,
yo cine taŋhay muɗuvaka wuluk taŋ taˀ zleˀe na aseˀeŋ!
Babiloŋ
8Kilam tir walahay Babiloŋ avra,
bam tisi hirwuy nah!
Ndiram kaɓa bazuwayay
a mbuŋ ˀaway taˀ gezleŋ.
9Haˀaw, i wuɗ i slikiɗo sukwi madiɗa madiɗahay
tir vay muŋ, ɓa ara zlaka kiɗa vu ati Babiloŋ.
A sa cinjaham ngi kiɗa vu ati naŋ,
a sa tiɓakaŋ, naŋ Babiloŋ vuna!
Luvut taŋhayakaɓa ngi bugawla miwirwirey,
anta moko haŋ kavbar kine ta.
10Hirwuy Babiloŋ a tiri gwat ngi lum ngi vurum le,
mizli mivi naŋhay gar na, a mbam di le.
I ya Bumbulvuŋ maɓi.
11Kum mizli Babiloŋhoy, ki zumaka hirwuy ɗu le,
haˀaw, kum mumulom, jiɗam mececẽleŋ so!
Haˀaw, kum zluzluɓam kaɓa bulkoŋ ar giziŋ miɗiɗi le,
huhumom kaɓa pilisey migweˀ ngi cifi!
12Mesem a kiɗa mumuŋ kumo le,
ngwas miyi ɗike, busukum ngi vi dangwal naŋ a diɗ le!
A tiri hirwuy ngi dirba le wãˀ:
wuzlaɓuh mikirɗak kirɗak, li papala, li muˀuloŋ!
13Mizli anta a diga mata,
asi Bumbulvuŋ miji mevel anga na,
a tiri le cay, daŋ daŋ cek.
Mizli macohom a ciki Babiloŋ gar na,
a zuma taŋ hirnga:
keɗ keɗ gwat mihiryahay na, a wudam widi ngi zluwun.
14Kum mizli misi lekey gar,
cinjaham gun Babiloŋ.
Mulakaŋ, ki wam vu ti luvutoyo ta,
asi Babiloŋ a zluɓ ɓi le avu Bumbulvuŋ.
15Hizigaka widi ngi vurum gun Babiloŋ.
Asi ara pa gwat ngi vurum naŋ a ruwuy!
Ɓamtal naŋhay ara ndilam,
mohol naŋhay ara mbizlam.
I Bumbulvuŋ mapul cuwal!
Pulaka cuwal kum avu Babiloŋ,
gakaŋ gwat naŋ miga da mizli na ya!
16Mbur mizligi daw ngi Babiloŋ gar na, kiɗakaŋ avra,
waɗ misina gi slra ti slagway ngi gi gwat ngi sifiheye ma.
Maslalam ara gi slra,
anja mbur gar aru ng'avu mizli naŋhay,
mbur gar a kil ng'asi ruwuy naŋ.
17Ti nana, Israyele, naŋ ka tumuŋ miziza le,
moboroy a ɓulakaŋ le.
Mizla zum naŋ dumbuŋ i buy Asiri.
A dirba nah, i Nabukodonozor buy madiɗa ngi Babiloŋ,
a kurɗoŋ kuruɗ kuruɗ hã avu tesl.
18Bumbulvuŋ misi gidaŋ wãˀ, Buymisemuŋ ngi Israyel a ɓi na,
«yo mbak ɗagay so, i wuɗ i ga kiita da buy madiɗa ngi Babiloŋ waɗ da hirwuy naŋ,
kaɓa ya miga kiita da buy Asiri na ya.
19I wuɗ i mi ti Israyele ng'ar li zum naŋ a muŋ,
ɓa a sa luuma li zum naŋ a muwã Karmel ati Basaŋ,
a sa zum hã a mbi pecek wãˀ,
a muwã Efrayim waɗ a muwã Galaˀata.
20Ti di nah, ar pas nah vuna si na,
a sipam ɓa a lumaka malambaˀ ngi Israyele,
amma a sa lumaka na, a susuyum le.
A sa sipam ɓa a lumaka malambaˀ ngi Zuda,
amma anta sa lumam mata.
Naŋ kine, mizli ya masa pula taŋ ti siifa na,
i sa pula taŋ mungra taŋhaya.
I ya Bumbulvuŋ maɓi.
21Aru, zla kiɗa vu ati hirwuy Maratayime!
Zlaŋ naŋ vuna ngi kiɗa vu,
waɗ ati mizli ngi ruwuy Pekot ma!
Mizli mindiram ti siifa a diga na, ngizla taŋ, vuliy taŋ,
yo ga kaɓa ya muɓuw di le ɗaˀ le na gar.
I ya Bumbulvuŋ maɓi.
22I ra cinam hurum ngi vurum asi ruwuyo,
gwatay ara hiryam haɗa wãˀ!
23Kay! Babiloŋ, tel ngi waha hirwuy keɗeɗe tuwa,
a wahaka le meɗ meɗe!
Kay! Babiloŋ a tiri le daŋ daŋ
a wuzla sukwi ngi mizli!
24Haya Babiloŋ ɗu, i ci a kwacay ɗike na,
ani ki ci le ar kwara manja ki sina.
I lumuw le, i juw le,
asi ka mizla kiɗa vu ati Bumbulvuŋ na!
25Bumbulvuŋ a wuna li wi vu ti gwat ngi vurum naŋhaya,
a bo ti gwat ngi vurum ngi ji mevele na.
Haˀaw, angi hirwuy Babiloŋ,
nah na, i slra ngi Bumbulvuŋ, Buymisemuŋ misi gidaŋ wãˀa.
26Soko tisi gazlavay kurzluˀ ng'avaŋ,
wunakaŋ mi ngi dirgwaɗ naŋhaya.
Cikilaka gwat ngi vurumo tiŋ tiŋ, vulaka da Bumbulvuŋ!
Anja ko gwat mandir anta!
27Ngizlaka gusoŋhoyo gar,
anja a ram taŋ ng'ar li kiɗ taŋ!
Kay i bonoy avu taŋ! Hin taŋ a ndila le,
hin ɓa sey a slufaka gwat ngi gi taŋ.
28Cinam ɗi! I mizli makilam,
i mizli mulohoko ti ruwuy Babiloŋ,
a soko nga tila mi a Siyoŋ,
ti labara ngi pula cuwal ngi Bumbulvuŋ Buymisemuŋ ndra,
pula cuwal ngi hay naŋ.
29Mizli misi haŋ taŋ a ngi a ruwuy ta gar,
yo misina hila lekey le gar na,
zilaka taŋ ɓa ara lumaka Babiloŋ.
Pam walahay guɗukoy gun hirnga naŋ,
anja ko mbur a lih pal ta!
Makaŋ ti malambaˀ naŋ miga na ya,
gakaŋ gwat ngi kwacay mombroŋ, kaɓa naŋ miga da mizli na ya.
Asi a pura vu naŋ zleˀe kaɓa naŋ fineˀ Bumbulvuŋ,
kaɓa naŋ fineˀ Buymisemuŋ mipal ngi Israyele.
30Haˀaw, tapasa, gawla migi vurum naŋhaya, a ndilam ɓaˀ ɓaˀ ar li ngi lumahaya,
a gucoko mi le da migi vurum naŋhaya cek.
I ya Bumbulvuŋ maɓi.
31Ka Babiloŋ mahuhum vu,
i wuɗ i guw malambaˀa.
Hin ɗik a ndila le,
hin ɓa sey ki slufa gwat ngi gi ɗike.
I ya Bumbulvuŋ, Buymisemuŋ misi gidaŋ wãˀ maɓi.
32Mbur mahuhumvu, anja sar a baŋ, a diɗi,
ko mbur loŋ ngi slikiɗ naŋ anta.
I ɗuva vu div div da walahay naŋhaya,
a wura prok naŋhaya pay pay.
Bumbulvuŋ milaha Israyel
33Bumbulvuŋ misi gidaŋ wãˀ a ɓi na:
«Israyeley ati Zudahaya jom arleˀe,
i muguzuvurahay le.
taŋ kaw asi haŋ ngi mizli miji taŋhay,
a ngumam pul taŋ ta.
34Amma micika vu a hirnga taŋ naŋ gidaŋ,
a zilaka Bumbulvuŋ misi gidaŋ wãˀ.
A ra cik vu a hirnga taŋ ti gidaŋ,
ɓa a mo ti zuy ng'asi ruwuy naŋ a muŋ,
ɓa a jijika mizli Babiloŋhoyo.
Bumbulvuŋ mujuwa ɓi ngi waha Babiloŋ
35Maslalam ara zuma hirwuy Babiloŋ,
waɗ mizli ngir berne naŋ,
ara zuma mizli madiɗa ngi slra naŋhay ati misi sinmijileŋ naŋhaya!
I ya Bumbulvuŋ maɓi.
36Maslalam ara zuma mupura daˀasaya, i gilaway!
Maslalam ara zuma bugawla naŋhaya, a roko ndirɗaɗ ndirɗaɗ a ruwuy!
37Maslalam ara zuma pilisey ati mota ngi vurum naŋhaya,
ara zuma sukwi mijihiɗahay gar,
anja a tiram ngwas hĩhĩyahay!
Maslalam ara zuma viŋ ngi wi vu ti gwat naŋhaya, a vakaŋ gwataya le!
38Maslalam ara zuma yam naŋhaya, ara hisikam!
I hirwuy ngi kuli miciɗa ti ciɗey,
foto ngi gwat ngi gi zluwunoy ara zliɗa taŋ lesle.
39Vurˀe, miliyamay ara cifam ar hay purla ati biigaɗay,
maduulihey ara cifam virzi hǝrǝk hǝrǝk.
Ko mbur masa pi a diga anta mata ndiɗaˀa,
walahay nah a sa ndir njoŋ hã ngi sete.
40A sa gi kaɓa Buymisemuŋ muso ti mendere
ar Sodom, ar Gomor ati walahay ngi ciki taŋhay na.
Ko mbur masa pi ti hay a diga anta mata,
ko mbur titira masa cifi ngi hin neˀ a diga anta.
I ya Bumbulvuŋ maɓi.
41Mizli ara soko tir vay muŋ,
sukwi madiɗa waɗ buyoy haɗi
a zuɓoko jiviɗe le zle asi diˀisi.
42Taŋ ti lek ati ziwitey kaw kaw a haŋ,
i misi moˀorehey haɗi, ircece anta avu taŋ ta.
Hurum taŋ kaɓa ngi yam ar mubuliy,
taŋ gilaˀ gilaˀ ar pilisey,
ka Babiloŋ, a cinjaham le ar ka,
kaɓa mizli macinjaham ngi gi vurum.
43Buy Babiloŋ micina labara nah na,
a pula vu giziɓat.
A muɗaŋ didak le,
vu a jaŋ kaɓa kwacay maja ngwas ngi yi.
44«I sa so kaɓa mobor mabo tisi kalaf mingiriɗ a mi mizaw Zurdeŋ,
ɓa ngi ru ng'ar li ngi yam mivi:
naŋ kanah, gurjik si na, i ɓula taŋ ti Edomo,
i slin ti gawla migi vurumoy kutum ɓa ara lumakaŋ.
Asi misi kaɓa ya i waka?
Masa ziliy gu ng'ar kiita i waka?
Mijigin ngi mizli, masa cici gu a mbuŋ ɗu i waka?
45Gwat Bumbulvuŋ ɓi micica ngi gi vur Edomo,
yo slra naŋ mujuwa ngi gi
vur mizli ngi Temaŋhaya, cinaka ɓi nah.
A sa ɗiɗaka taŋ gisiŋ gisiŋ kaɓa ginewey,
hã avu memeɗe taŋhay wãˀ.
A sa waha hirwuy taŋ gisiŋ gisiŋ vur taŋ.
46Taŋ mitiɓaka Babiloŋ tiɓeˀ si na,
hirwuy a jijik gbir gbir,
salalay a bi kiɗ kiɗ
a wuzla sukwi ngi mizli.
Currently Selected:
ZEREMI 50: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
