ZEREMI 49
49
Mingiɓi ngi Bumbulvuŋ vur mizli Amoŋhoy
1Bumbulvuŋ a ɓi vur Amoŋhoyo na:
Israyele naŋ anta ti ziri mizileheye mata kwa?
Mbur ngi zuma hay naŋ anta kwa?
Na i kuli Milkom mazuma hirwuy Gata vur mike?
Yo i mizli naŋhay macifam ar walahay naŋhaya vur mike?
2Bumbulvuŋ a ɓi: «Yo mbak ɗagay so!
Hin ara ndilawa,
tapasa, i sa ga ɓa a cinam widi
ngi vurum a Raba, walahay ngi Amoŋhoyo.
Walahay Raba a sa tiri daŋ daŋ,
a sa ɗuvaka vu div div da walahay migweˀ gweˀ ngi cikeˀehey a wuram.
Israyele, mizli muzumaka hay naŋ zleˀe na, dar a sa zuma taŋ avu taŋ a muŋ.
I ya Bumbulvuŋ maɓi.
3Mizli Heseboŋhoy, kuɗumam tuwuy!
Walahay Ay i mihirya le!
Walahay migweˀ gweˀ ngi ciki Rabahay, wudam fuk fuku!
Kam zana ngi vagay! Tuwam irslik irslik!
Kilam ti ka ti ka a ciki moholoyo!
A ra ram ti kuli Milkomo nga hirwuy mulak,
jom ati masay naŋhay waɗ buy naŋhaya cek!
4Ka mahuhum vu asi gidaŋ ɗik na vur mike?
Gidaŋ ɗik anta mata so,
ka Raba miziza le,
ki pula vu ɗike mbak vur zlili ɗike,
ki ɓi na: «Mazliy gu i waka?»
5Yo mbak ɗagay so! I sa ga ɓa walahay midigwi ɗikey gar a yukuw zluwun cak cak,
Ki sa waham hirnga, mbur gar a kil cirre a mbuŋ naŋ,
mizli makilama, ko mbur ngi sa cikila hirnga taŋ anta.
I ya Bumbulvuŋ misi gidaŋ wãˀ maɓi.
6A dirba nah, i sa ɗiya mizli Amoŋhoyo hiri taŋ a muŋ.
I ya Bumbulvuŋ maɓi.
Mingiɓi ngi Bumbulvuŋ vur walahay Edom
7Bumbulvuŋ misi gidaŋ wãˀ a ɓi vur Edomo na:
«Misi sinmijileŋ anta a Temana mata kwa?
Misi lesleye, t'anta ti mingiɓi ngi kuti vuhoyo mata kwa?
Sin taŋ mijileŋ tuwa, a hiryi le wãˀ kwa?
8Mizli Dedaŋhay, mbiɗam duba, kilam,
ara ɗumom ar vigiɗey!
Asi i ra so ti hiryi ng'ar Esawa,
hana i hin ɓa a slufa gwat ngi gi naŋ muduba.
9Da mingila yi ngi gudubunoy a sa soko le a hay kumo na,
anta sa pulam yi naŋ doc ko purla le ta.
Da muhuloy a soko le ti duvuɗ na,
gwat zliv taŋ mahiryaka gu gar na, a sa hiryakaŋ.
10I ya vuna ti haŋ ɗu masa tiɓa gwat ngi Esawaya,
zlili naŋhay muɗum ɗum na gar, i sa bugo taŋ ngbay ar li babara.
N'anta sa ɗum gu ta.
A sa zumaka tizer naŋ, sukum naŋhay waɗ midigwi naŋhaya kap,
mbur masa ɓi ka misi ani na anta:
11«Ki lika mutuhu ɗikeye ta,
masa gila taŋ i ya.
Yo wudiga ɗikeye, a njaham hiri asi ya gu.»
12Haˀaw, Bumbulvuŋ a ɓi na:
«Mizli, misi anja a sam ar sikiɗ ngi bonoyo zleˀe ta na, kiita a ja taŋ le ɓa a sam na, ɓaka kisa bi njiraŋ zleˀe sukwa? Ndiɗaˀ, ko k'anta sa bi njiraŋ ta: kisa sa cummo na si. 13Haˀ aw, hadam ti slimiɗ ɗu vuna a muŋ, walahay Bosra a sa ndir daŋ daŋ, diŋ hilgim, joˀ mizli a sa zam vu ti naŋ, yo a nisam vu ti naŋ. Prok naŋhay gar, a sa ndiram i diŋhey hilgim hilgim ngi set.
I ya Bumbulvuŋ maɓi
14mingiɓi ani i cine le, i mi muso ti vu Bumbulvuŋ,
a slinam di mbur bugawla le ng'avu sukwi ngi mizli, a ɓaka taŋ na:
Kusom! A ra lumakaŋ!
Slikiɗam ngi kiɗa vu!
15Haˀaw Edom, i wuɗ i tiri ti ka sukwi mikic le a wuzla sukwi ngi mizli,
i vuluw ɓa mizli a purukuw hiris le.
16Ki ra ga zluwun da mizli gar,
ki wakaɓa ki funa mizli le ceke,
dambalaka ki gi gilaw le,
ka mujoˀ ti hay ar butum a muwã na,
yo ka muro gilaˀ a hirnga muwã musuburoy tuwa.
Da ko ki ɗiya hay ɗike le a hirnga muwã
kaɓa kilkandaŋ kwana,
i sa po haŋ ɗike baɗ a diga.»
I ya Bumbulvuŋ maɓi.
17Edom a tiri le cay daŋ daŋ. Mizli macohom a cikeˀe gar na, a zuma taŋ hirnga: a puraka gwat mihiryahaya le keɗ keɗ na, a hizigaka widi ngi zluwun fuk fuk. 18Bumbulvuŋ a ɓi: «A sa gi i gwat ngi mendere madiɗa, kaɓa naŋ migi zleˀe a Gomor, a Sodom waɗ ar walahay ngi midigwi taŋhay na ya.
Ko mbur masa cifi hay a diga anta mata,
ko mbur titra masa cifi moholoy a diga anta mata.»
19«I sa so kaɓa mobor mabo tisi kalaf mingiriɗ a mi mizaw Zurdeŋ,
ɓa ngi ru ng'ar li ngi yam mivi:
naŋ kanah, gurjik si na, i ɓula taŋ ti Edomo,
i slin ti gawla migi vurumoy kutum ɓa ara lumakaŋ.
Asi misi kaɓa ya i waka?
Masa ziliy gu ng'ar kiita i waka?
Mijigin ngi mizli, masa cici gu a mbuŋ ɗu i waka?
20Gwat Bumbulvuŋ ɓi micica ngi gi vur Edomo,
cinaka ɓi nah,
slra naŋ mujuwa ngi gi
vur mizli ngi Temaŋhay.
A sa ɗiɗaka taŋ gisiŋ gisiŋ kaɓa ginewey,
hã avu memeɗe taŋhay wãˀ.
A sa waha hirwuy taŋ gisiŋ gisiŋ vur taŋ.
21Hurum ngi diɗ taŋ na, a jijika hirwuyo ngbir ngbir,
widi taŋ a cin sesẽŋ a mubuliy lavaɗa.
22Naŋ kaɓa kilkandaŋ maslikiɗ, a ki makapal,
kirpasl cay cay angi Bosra.
Tapasa,
soje miwirwir ngi Edomoy a sa zluwunam a mevel taŋ,
kaɓa ngwas mayi mazluwun.
Mingiɓi ngi Bumbulvuŋ vur walahay Damas
23Ɓi vur Damas:
Walahay Hamat ati Arpata, mesem a kiɗa taŋ le ɓaˀ:
asi na, a cinam labara le.
A wusam haɓay haɓay kaɓa yam ar mubuliy:
i zluwun mukuyta wãˀ! A cicam teˀ teˀe gu ta ndiɗaˀ!
24Mizli Damasay a ndilam le ndirɗaɗ ndirɗaɗ.
A ra mbuɗam duba le ngi kil,
zluwun ara jijika taŋ.
Muɗa didak ati gir ngi vu a diɗo le ar taŋ,
kaɓa ngwas mayi.
25Ĩˀĩ, ka walahay hirnga, ka walahay mavuliy mumul tuwa,
ki mupula le fuku!
26Haˀaw, tapasa na, gawla migi vurum naŋhay a sa ndilam ɓaˀ ɓaˀ ar li ngi luma, soje naŋhaya gar i muguco taŋ mi le. I ya Bumbulvuŋ misi gidaŋ wãˀ maɓi. 27I ka vu ɓaˀ ɓaˀ da mohol ngi walahay Damasa, ara wura hay ngi buy Ben-Hadata.
Mingiɓi ngi Bumbulvuŋ vur sukwi Arapay
28Arap ngi Kedaray waɗ zumabuy vay Hasor, Nabukodonozor buy madiɗa ngi Babiloŋ mipa taŋ hirnga tuwa na, Bumbulvuŋ a ɓi vur taŋ na:
Slikiɗam! Akum nga kiɗa vu ati Kedar!
Mizli ngi wuzlaɓuhoy na, hiryaka taŋ gwataya cek!
29Tuɓukum guɗuk taŋhay ati ginew taŋhaya,
zlavaɗ ngi zana taŋhay waɗ gwat taŋhay gar.
Akum ti zlogomo taŋhaya, i wudam ar taŋ, i ɓam:
«Zluwuno ɓaˀ li!»
30Mizli Hasoroy,
kilam! Kilam kutum! Ɗumom ar butumoy!
Asi Nabukodonozor buy madiɗa ngi Babiloŋ, a juw ɓi le vur kumo,
a mbizi ɓi le a kwacay vur kumo.
I ya Bumbulvuŋ maɓi.
31Slikiɗam! A ra kiɗam vu ati sukwi ngi mizli malikam ta wãˀ,
yo misi t'anta zluwunam neˀ ta tayna.
Asi t'anta ti miviŋ ta, t'anta ti magandaŋ ta ma,
a pam le baˀ pal taŋ!
I ya Bumbulvuŋ maɓi.
32Mesene taŋhay a sa tiɓaka zlogomo taŋhaya,
yo a sa tiɓaka ginew taŋhay muˀurnok urnoko ar vurum.
Mizli mufuca li tinik tayna, i sa zliɗa taŋ hirnga suɓulak si li gar,
i so ti hiryi nga hirnga taŋ tika tika gar,
I ya Bumbulvuŋ maɓi.
33Walahay Hasor a sa tiri hay ngi biigaɗay,
li midaŋ daŋ cay ngi sete.
Ko mbur masa pi ara anta mata,
mbur titira masa cifi moholoy ara anta.
Mingiɓi ngi Bumbulvuŋ vur walahay Elam
34Ar ɗuva virzi ngi zumabuy ngi Sedekiyas buy Zuda na,
Bumbulvuŋ a ɓa mijiviɗ Zeremi vur mizli Elamaya na:
35Ya Bumbulvuŋ misi gidaŋ wãˀ i ɓi na:
«I sa ngila lek ngi mizli Elamaya,
taŋ malumam gidaŋ na, aseˀeŋ.
36Tir vay muŋ, yo tir vay ruwuy,
tisi pas ngi miprik, yo tisi pas ngi pastaˀa,
i sa go himiɗ mumufaɗay na ng'ar Elama,
i sa zliɗa taŋ hirnga suɓulak si li gar,
mizli Elamay mizliɗam hirnga na, a sa ndilam angi sukwi gar,
sukwi masa ndir manja a ndilam a diga na anta. 37I sa guco mi da Elamay a mbuŋ mesene taŋhaya,
a mbuŋ mizli mawuɗam zizaka taŋ hutuŋ na.
I sa so ti hiryi nga hirnga mizli Elamaya:
ji mevel ɗu ka vu,
i sa sipa taŋ ɓaˀ ti maslalam,
hã i ngizla taŋ teleleˀ wãˀ.
I ya Bumbulvuŋ maɓi.
38I sa ɗuva janga ɗu ngi buy a Elama,
yo i sa susuymo buy ati mizli madiɗa ngi slraˀahaya.
I ya Bumbulvuŋ maɓi.
39Amma nga mbuŋ na, i sa ɗiya Elamahiri naŋ a muŋ.
I ya Bumbulvuŋ maɓi.
Currently Selected:
ZEREMI 49: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
