ZEREMI 48
48
Mingiɓi ngi Bumbulvuŋ vur walahay Moˀap
1Bumbulvuŋ misi gidaŋ wãˀ, Buymisemuŋ ngi Israyele, a ɓi vur walahay Moˀapa na:
Kay, bonoy madiɗa avu mizli Nebohoyo,
walahay taŋ i mihirya le njakwãy njakwãy!
A tiɓaka hirwuy Kiriyatayime le, mesem a kiɗaŋ le ɓaˀa.
Walahaya, mesem a kiɗaŋ le ɓaˀ, ara mbizli.
2Moˀapa, slimiɗ naŋ mazil na, a kiɗ mi le!
A ɗiyaka ɓi ngi gi vagay ngi walahay Heseboŋ le, a ɓam:
‹Akum, i ra susuyumoko sukwi ngi mizli tayna!
Ka kwana Matmen, a gucukuw mi le,
maslalam a ro ɓaˀ asi ka.
3Widi ara cino ti Horonayim: ‹gawla kilawa›,
ara musukuɗokoŋ, i bonoy madiɗa ava!
4A wahaka walahay Moˀapa le,
ziri naŋhay ara wudam cǝruw cǝruw.
5Mizli ara jiɗam ng'ar jiviɗ miɗingir ngi Luhite
bal ti tuwuy.
A jiviɗ muzugudum ngi Horonayime,
widi ngi bonoy ara cin.
6Kilam! Mbur malih gu na, a lihi!
Ndiram a wuzlaɓuh kaɓa zungu ɓuh.
7Asi ki ra pula vu ɗike mbak vur gidaŋ ɗik ati zlili ɗike,
ani a jukuw le so.
Kuli ɗik Kemoso, ara ram di nga hirwuy mulak,
waɗ masay naŋhay ati buy naŋhaya jom ma.
8Muzuma li ara zuma walahayaya gar,
walahay masa lih loŋ le ava anta.
Gwat ngir sozohoy ara susuymom,
hirwuy micaya, i muzuma le.
I Bumbulvuŋ miɓa.
9Vulaka zlara da walahay Moˀapa,
ɓa a slikiɗ kileŋ.
Walahay naŋhaya, a sa ndiram daŋ daŋ,
mizli anta sa ndiram ara mata.
10Mbur maga slra ngi Bumbulvuŋ ti sefel na,
i minisa le.
Mbur mangum ɓa pumbus a gi avu maslalam naŋ ta na,
i minisa le.
11Moˀapa, diga naŋ mipi sek na, naŋ zleˀe zuy zuy,
a cufa virzi le ndasl kuy kuy,
kaɓa mambuɗam gwat tir magayak ng'ar magayak mekelem na, a mbiɗakaŋ naŋ ɗaˀ ta,
a mbiɗeˀvra, a kil ɗaˀ nga ɗum a hirwuy mulaka ta.
Yo ma na, a ro ti ndum naŋ kine,
zĩˀĩ naŋ mundum na, a ro ngbuˀo.
12Yo mbak ɗagay so, hin ara ndilawa, i sa slin ti mizli ng'avaŋ ti mingiɓi ɗu ɗaˀ si na, ɓa ara mbiɗakaŋ avra, ara mbiɗaka magayak taŋhaya, yo ɓa ara wahaka kukulum taŋhaya.
I ya Bumbulvuŋ maɓi. 13Moˀapa, kuli naŋ Kemoso, a sa paŋ mesem, kaɓa kuli Betel mipa mesem da mizli Israyeley mupulakaŋ vu taŋ na ya!
14Mizli Moˀapay, ki ɓam ma na:
«Ndr'i bugawlahay,
ndr'i soje mihĩˀĩ ngi vurumoy» mbri mbri maka?
15A ngizlaka Moˀapa le, ara kiɗaka walahay naŋhaya.
Gawla hirnga ngi raˀahaya,
ara pam taŋ sar nga sli ˀay.»
- Maɓi I ya Buy madiɗa mazilikiy: Bumbulvuŋ misi gidaŋ wãˀa.
16Moˀapa, a ndir mata ngi tiri diŋ,
bonoy ara kiɗo vu nga hirnga naŋ.
17Kum midigwi ati yeme naŋhay gar,
soko jakaŋ haŋ ngi vagay,
ɓakaŋ: «Gidaŋ matik ˀay ta hana,
yo dudok mihaɗa hana, a gi mbri ɓa a pakaŋ hirnga naka?»
18Mizli Diboŋhoy,
poko sar tir dudok kum na, cifam ar madalyam,
mihirya Moˀapa, ara ru nga zlukum ngi kiɗa vu,
ara waha mohol ngi walahay mugun hirnga ɗike.
19Mizli Aroˀer,
cicam a ciki jiviɗi, jiɗaka mizli.
Mizli makilam ati mizli mindiram ti siifa na, cufuɗaka taŋ:
i gwat mi migi ka?
20A sa mbuɗukum di na: «Mesem a kiɗa walahay Moˀapa le ɓaˀ, a mbizli le.»
Wudam! Gawla kilawa!
Tilam mi a Arnoŋ:
a wahaka walahay Moˀapa le.
21Kiita ara ja hirwuy miɗigaraya, walahay Holoŋ, Yahas, Mefaˀat, 22Diboŋ, Nebo, Bet-Diblatayim, 23Kiriyatayim, Bet-Gamul, Bet-Meˀoŋ, 24Keriyot waɗ walahay Bosra. Na a ja walahay Moˀapaya keɗeɗe, migweˀ gweˀ ati mikileŋ kileŋhey gar.
25«Walahay Moˀap a tika gidaŋ naŋ le wãˀ, gidaŋ naŋ ngi wi mizli a kiɗ mi le.
I ya Bumbulvuŋ maɓi.»
26Moˀap mawa vu naŋ fineˀ Bumbulvuŋ na, wakaŋ duwlak ti mbaazla. Puraka ara kiɗ vu ti vunuh naŋ na. A ndir ɓa mizli a singiram angi naŋ ya! 27Moˀapa, Israyel a tiri gwat ngi singir le gisiŋ avu ka takwa? Ka mira ɓa ɓi naŋ gar, sey ti hira hirnga na, ki luuma le ɗaˀ a wuzla muhuloy kwa mbrike?
28Mizli Moˀapay,
bam tir walahayaya, ara cifam a muwãhay.
Ndiram kaɓa gonokoy maɗiyaka hay taŋhay
ar li misi mbur a luuma gu ta, a mi butum.
29Moˀap mahuhum vu na, i cinaka ɓi nah le!
A huhum vu haɗa!
Kay, a hiris vu, a huhum vu teˀe!
A kuw teˀe! A pura vu naŋ muk si!
30Bumbulvuŋ a ɓi: «Yi si na wuluk naŋ le,
jijiwiɗ a cifi avu mi naŋ ta wãˀ,
gwat mupuɗaw anta ar gwat ngi gi naŋ ta.
31Yo ma na, i ra tuwa Moˀapa ma.
I ra widi da duniya kurzluˀ vur Moˀapa: ‹gawla kilawa.›
I ra hislik ti tuwuy vur mizli Kir-Hereseye.
32Gudubun ngi Sipna,
i ra tuwuw ka fineˀ mizli Yazerey.
Muzuŋ haŋ ɗik madiɗa, naŋ ɓaˀ hã a duba mubuliy,
hã a ndila Yazer.
Mihirya gwat a diɗ vu le kpis avu gwat ngi migam ɗikeye,
a diɗ vu le ar yi ngi gudubun ɗike.
33Cira hiri mifineˀ gidaŋ
a kiɗ mi le ar guva ngi gudubuno, yo waɗ a Moˀapa!
I hisika mbaazla le ngbasl ar magayakaya:
Salalay ngi ɗuco yi ngi gudubun a kiɗ mi le!
34Heseboŋhoy mawudam ‹gawla kilawa› na, ada cin sesẽŋ a Elale. ˀAy taŋ a cin sesẽŋ a Yahas, zle a Soˀara, hã sesẽŋ a Horonayim, a Eglat-Selisiya. Asi ko li ngi yam misi a Nimrim na kwana, a ndir le daŋ daŋ. 35Mizli ngir li miɗigirey, magam mikuli mizlam zlam waɗ mawuram urdihey ngi ɗuva hirnga da kuli taŋhay na, i sa ngizla taŋ pay a Moˀapa. I ya Bumbulvuŋ maɓi.
36I ra tuwa Moˀapa a mevel ɗu, kaɓa tuwuy ngi bozloro, i ra tuwa mizli Kir-Hereseye, kaɓa tuwuy ngi bozloro, ara zizam asi gwat ngi lum taŋ mulumaka. 37Yo ma na, hirngahay i mihicahay le ati mazlamayaya kurzluˀ kurzluˀ gar. Haŋhay i micirahay le car car, yo zana ngi vagay ɓaˀ ɓaˀ avu vu. 38A hirnga gbale misi a Moˀap gar waɗ ar li ngi lumahaya, sey tuwuy tewle: i waha walahay Moˀapa kaɓa gwat mawuɗam mata. I ya Bumbulvuŋ maɓi. 39Njiɗaka tuwuyo: «Kay, Moˀap a diɗ le! Kay, mesem mikiɗaŋ ɓaˀ tuwa na, ara mbiɗi duba!» Moˀap ara gi gwat ɓa midigwi naŋhay a singiram ara, yo ɓa a ga taŋ zluwun.
40Bumbulvuŋ a ɓi na: Moˀapa, mesene naŋ ara sliɗam a hirnga naŋ kaɓa kilkandaŋ maki makapal, yo a ro zlara njar njar a hirnga naŋ.
41Walahay Keriyoto, i mitiɓa le,
walahay naŋhay muguno ti moholo, i muzumahay le.
Tapasa,
soje miwirwir ngi Moˀapaya,
i bonoy a mevel taŋ, kaɓa ngi ngwas mayi.
42A wahaka Moˀapa le,
t'anta i mizli sukwi taˀ mata,
asi a ga vu naŋ kaɓa a funa Bumbulvuŋ le.
43«Zluwun, vigiɗ ati gadaŋ gun
a hirnga kum mizli Moˀapaya.
I ya Bumbulvuŋ maɓi.
44Mbur makil ti zluwuno,
a diɗ ng'ar vigiɗi.
Mbur mabo tir vigiɗe,
a ci ng'ar gadaŋ.
Haˀaw, vi ɓa sey Moˀap a slufa gwat ngi gi naŋ na,
i ra gaŋ di.
I ya Bumbulvuŋ maɓi.
45Mizli makilamay, migiram le na,
a sa musukom vu a susuɗuk a Heseboŋ.
Amma vu a bo bivbiw tir walahay Heseboŋ,
vu mihilɓiɓ, a bo tir mugum ngi buy Sihoŋ.
A wura Moˀapa zle ar maakwaya,
hã sesẽŋ a wuzla walahay.
46Aw Moˀap, i bonoy mi mulumuw ka!
Mizli ngi kuli Kemosoy a zizam le.
A jaka ziri mizile ɗikeye le,
a ram ti ziri mongoso ɗikeye le ng'ar dangay.
47Amma nga mbuŋ na,
i sa ɗiya Moˀapa hiri naŋ a muŋ
I ya Bumbulvuŋ maɓi.»
Kiita ngi Moˀap a kiɗ mi aka.
Currently Selected:
ZEREMI 48: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
