MIGI KIITAHAY 8
8
Efrayimey mijam mevel angi Zedeyoŋ
1Mizli Efrayimey a ɓaka Zedeyoŋ na: «Ki gi ti ndra kahana vur mike? Ka muru nga kiɗa Madiyanay na, ki zila ndra ta vur mike?» A slikiɗam himaˀ fõh fõh ng'araŋ. 2Amma Zedeyoŋ a ɓa taŋ: «Ya vuna i mi gi ngi ndila ngi kumo ka? Holok ngi gudubun Efrayimey migaka na, a funa Abiyezer miga sifi naŋ vuna ta kwa? 3Bumbulvuŋ muvula buy Madiyanay, Oreɓ ati Zeɓ na, asi haŋ kum ngbaŋ. Gwat ya miga ngi wi ati ngi kum vuna, i gwat mike?» Zedeyoŋ miɓa taŋ ɓi hana na, a tisla taŋ mevel so.
Zedeyoŋ misi tisi pas ngi miprik ngi Zurdeŋ
4Zedeyoŋ ati mizli naŋhay miskat skat makir tuwa, a ndilam a mi mizaw Zurdeŋ, a tuwuɗakaŋ. A giram le ngbaŋ, amma ara sipaka Madiyanaya na si. 5A ra ndilam ar walahay Sukot, Zedeyoŋ a ɓa mizli ngi digahaya na: «Inga vulaka helelem makala da mizli ngisi yahay na so, ani a giram le. I sipi di i buy Madiyanay, ti Zeba ati Salmuna.» 6Amma buy Sukotoy a ɓakaŋ: «Ɓa i vulaka gwat ngi zum da mizli ɗikey na, ki wa Zeba ati Salmuna vuna le si kwa?» 7Zedeyoŋ a mbiɗa taŋ di: «Naŋ kuy! Da Bumbulvuŋ misa vuliy Zeba ati Salmuna le asi haŋ ɗu na, i sa cupukum ti hadaw waɗ ti titif ngi wuzlaɓuh mikirɗak kirɗak.» 8Zedeyoŋ aru ti kẽh nga Penuwel, a ɓa mizli ngi digahaya kanah ma. Mizli Penuweley a mbiɗakaŋ di misi purla ati ngi mizli Sukotoy tuwa. 9Zedeyoŋ a ɓa taŋ: «Da yi mo le njiraŋ na, i sa mbizla hay musubur hana avra.»
10Zeba ati Salmuna a roko a Karkor ati soje taŋhay, a gam gwat ngi durmuk ti skat skat zlum gu. Mizli misi tisi pas ngi miprike, soje taŋhay mindirama, i taŋ tewle. Naŋ kine, mizli taŋhay misinaka kiɗa vu le ti maslalama, taŋ durmuk skat ti kukur cuw zleˀe, a kiɗaka taŋ le vagay vagay. 11Zedeyoŋ a ja jiviɗ ngi mizli maslikiɗam aka aka, misi tisi pas ngi miprik ngi Noba ati Yogboha. A kiɗa sojeheye, sojehey a puraka zleˀe kaɓa a roko piyaŋŋa a diga. 12Zeba ati Salmuna, a hilaka kil, amma Zedeyoŋ, naŋ ɓaˀ asi taŋ, a ja buy Madiyanay mucuw tuwa, Zeba ati Salmuna. A Ya zluwun cak cak da soje taŋhaya gar.
13Zedeyoŋ mangal ngi Yoˀasa, ara mo tir li kiɗa vu, baɗ tir li jiɗ ngi Heres. 14Zedeyoŋ a ji gawla Sukot pal, a cufuɗaŋ, a tohoŋ slimiɗ ngi buy Sukotoyo cek waɗ mizli micawwahaya. A gam jom gar, mizli kukur tarnaˀ ti tarnaˀ. 15Akẽh na, Zedeyoŋ aru ng'avi mizli Sukotoyo so, dar a ɓa taŋ: «Ki ɓikiy vur ɓi ngi Zeba ati Salmuna: ‹ki wa Zeba ati Salmuna le, ɓa i vulaka gwat ngi zum da mizli ɗikey migiram le kwa tuwa na, ki sinaka le aruŋ ya?› Yawwa! Na Zeba ati Salmuna t'ani.» 16A hil hadaw ati titif ngi wuzlaɓuh mikirɗak kirɗak tuwa, a kuta mizli micawwa ngi Sukotoyo ti naŋ. 17A waha hay musubur ngi Penuwele, a kiɗ mizli ngir walahaya sunok sunok.
18Dar Zedeyoŋ a ɓa Zeba ati Salmuna: «Mizli kum mikiɗaka taŋ ar muwã Tabor na, taŋ mbrike?» A mbiɗakaŋ di: «A bam vu ati ka. Mbur gar asi taŋ a gi kaɓa zuŋ ngi buy.» 19Zedeyoŋ a mbiɗa taŋ di: «I sukum ɗuwoy, mumuŋ ndra purla! Ti slimiɗ ngi Bumbulvuŋ misi ti siyfa, da ki kiɗaka taŋ zleˀe ta na, anja y'anta kuɗukum ta ya.» 20Dar a ɓa Yeter mangal naŋ modogomo: «Slikiɗ, kiɗa taŋ vagay vagay!» Amma gawla tuwa, a muɗa maslalam naŋ ta, asi i zuŋ aruŋ, ara zluwun. 21Zeba ati Salmuna, a ɓakaŋ so na: «Ka vuna slikiɗ, kiɗa ndra tihaŋ ɗike, asi maga gwat hana gu na, sey i mbur mindila le!» Dar Zedeyoŋ a slikiɗ, a kiɗa Zeba ati Salmuna vagay vagay, a dirba nah, a cuko gwat ngisi ˀay ngi zlogomo taŋhaya.
Muc ngi Zedeyoŋ
22Mizli Israyeley a ɓaka Zedeyoŋ na: «Ka vuna, cifi buy ndra ati mangal ɗike, waɗ dideˀ ɗik nga mbuŋ, asi ki laha ndra le tisi haŋ ngi Madiyanaya.» 23Zedeyoŋ a mbiɗa taŋ di: «Masa cifi buy kum i ya ta, yo i mangal ɗu ta ma. Anja macifi buy kum i Bumbulvuŋ!» 24Dar Zedeyoŋ a ɓa taŋ: «Yi wuɗo cufuɗukum gwata ani ɓula: Vulikiy dangwa kum mulumoko taŋ ar vurum na pal pal!» Naŋ kine, mizli taŋ mipaka taŋ hirnga na, t'ada ti dangwa ngi ɓiri tapasl tapaslay, asi taŋ i Israyeley zleˀe. 25A mbiɗakaŋ di: «Haˀaw i vulukuw taŋ!» A ciyam godo cay, yo mbur gar a hizig dangwa naŋ mulumo di ar vurumo pal pal ng'araŋ. 26Dangwa ngi ɓiri tapasl tapasl Zedeyoŋ mucufuɗa tuwa, a cikil kilo kukur cuw. Gwat ngi wuyahay, gwat ngi slimiɗey, zana munduva naŋ ndezze ngi buy Madiyanay maka ka na, a slufa taŋ ta. Yo virzle ngisi ˀay zlogomo taŋhaya, a slufa ta ma. 27Zedeyoŋ a ɗiyi di kuli, a jika jak a, walahay naŋ. Israyeley gar a huruk hurukam a mbuŋ kuli nah. A tiri avu Zedeyoŋ ati mizli ngi hay naŋhaya, i diɓel ngi kiɗ taŋ.
28Naŋ kine, Madiyanay a hinam hirnga a mbuŋ Israyele, ko a zuɓaka hirnga kaˀ a muŋ gu ta. Hirwuy a cifi zuy zuy ar siyfa ngi Zedeyoŋ hã vi kukur mufaɗa. 29Yerubaˀal, mbiɗeˀvra Zedeyoŋ mangal ngi Yoˀasa, a cuh, ara cifi a hay naŋ. 30Ziri mikwanay ngi Zedeyo hoyo, taŋ kukur tarnaˀ, asi naŋ ti ngwasay haɗi. 31Ngwas mangasl ngi Zedeyoŋ ada a Sikeme, naŋ kwana, a yaŋ mangal mizile le pal, a caŋ slimiɗe Abimelek. 32Zedeyoŋ mangal ngi Yoˀasa, a sa muc na, naɓa a gi midigila le ar wuya. A dikaka a Ofra, walahay ngi sukwi Abiyezer, ar zivi ngi cine naŋ Yoˀas.
33Amma a dirba Zedeyoŋ mumuc na, Israyeley a zlaka huruk huruk a mbuŋ Baˀala si ma, a puraka Baˀal-Berite kaɓa Bumbulvuŋ. 34Israyeleye, Bumbulvuŋ Buymisemuŋ taŋ, miloho taŋ tisi haŋ ngi mesene taŋhay migun hirnga taŋ na, a puyukom di hirnga le. 35Zedeyoŋ a ga mezle le haɗi da Israyele ngbaŋ, ɓa a ɓam taŋ i muy ngi Zedeyoŋ mazilaka Yerubaˀal ma na, ko a ɓam ɗaˀ ta.
Currently Selected:
MIGI KIITAHAY 8: BEGDC
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.