MIGI KIITAHAY 9
9
Abimelek micifi buy a Sikem
1Abimelek mangal ngi Yerubaˀala, mbiɗeˀvra Zedeyoŋ, aru ng'avu gumseˀ naŋhay ati muy ngi mumuŋhoy a sikem, a ɓa taŋ: 2«A ra cufuɗaka mizli Sikemeye: A wuɗam ɓa mawaka taŋ i ziri ngi Yerubaˀalay mukukur tarnaˀ na kwa? Malla a wuɗam pal asi taŋ kwa mbrike? Amma sinaka sin le ɓula, yi bo ti kwacay kum.» 3Gumseˀ naŋhay tuwa, a slufaka ɓi ngi Abimelek na, cek da mizli Sikemeye. Joˀ taŋ a jinaka Abimeleke, asi a ɓam: ‹i sukum ndra.› 4A vulakaŋ suloy kukur tarnaˀ, dala magam di slra ar hay Baˀal-Berit. Abimelek a hila dala nah, a wuruk di mizli kesefey ati sulomehay ɓa a sipakaŋ.
5A dirba nah, a mi ngi hay cine a Ofra, a kiɗa sukum naŋ mizilehey, ziri ngi Yerubaˀalay mukukur tarnaˀa pay ar li purla. Misa ndir i tuboˀ taŋ Yotam tewle, asi a ɗum le zleˀe ɗum. 6Mizli Sikemey ati Bet-Milohoy gar a kusom, ara caka buy da Abimeleke asi miter, a ciki ɗugur mikaˀ a Sikem na.
Yotam mikiɗ mambaˀ
7A faka ɓi nah fẽt da Yotama. Naŋ a jiɗ ng'ar mesengel muwã Garizim, a til mi ˀay ngar ngar, a ɓi: «Mizli Sikemey, cinaka mingiɓi ɗu ani, yo anja Bumbulvuŋ kwana, a cine mingiɓi kumo!
8Ti di numuŋ ada na, widisey a juwaka le ɓa a wunam buy taŋ. A ɓaka tutumburo: ‹Zum buy ar ndra.› 9Amma tutumbur a ɓa taŋ: ‹Mal ɗu, kulihey ati mizli mawuɗam haɗi na, ki waka na, i sa pula gi nah, ɓa i ra gir vu ɗu lambaˀ ar li jigina widis mekelemey sukwani?› 10Widisey a ɓaka ˀurufo: ‹Ka, sawa zum buy ar ndra.› 11Amma ˀuruf a ɓa taŋ: ‹Yi ɗu mimezleŋ, mideɗek haɗa na, ki waka na, ɓa yi pula yi, ɓa i ra gir vu lambaˀ ar li jigina widis mekelemey sukwa?› 12Widisey a ɓaka gudubuno: ‹Ka, zum buy ar ndra.› 13Gudubun a ɓa taŋ na: ‹Mbaazla ɗu maga kulihey ati mizli mumul na, ɓa i pula gi nah, ɓa i ra gir vu ɗu lambaˀ ar li jigina widisey sukwa?› 14A kẽh so na, widisey gar a ɓaka sisime: ‹Ka, so zum buy ar ndra.› 15Amma sisim a ɓa widiseye: ‹Da ki wuɗam ya le ngi buyo gisiŋ na, soko nga su suɗuk ɗu! Da kanah ta na, anja vu a bo tir hadaw ɗuwoyo, ɓa a wura miter ngi Libaŋhaya.›
16Yotam a ɓa taŋ ma: «Wurenna ki waka na, kum micaka Abimelek angi buy na, naŋ jeŋŋe, naŋ kaslsla sukwani? Ki gaka na, kaslsla kaɓa Yerubaˀal ati hay naŋ mawuɗo sukwa? Gwat naŋ mugukum di tuwa, ki sinaka le aruŋ ya? 17Na baha a gi vurum le asi kum ngbaŋ, a vula vu naŋ taˀ da mucu, a luhukum le ti haŋ ngi Madiyanaya. 18Pura ani dana, kumo ki cicam lak lak avu baha, ki ngizlakaŋ zirie pay, ziri kukur tarnaˀ ar li purla, dar Abimelek, mangal naŋ miya ti mangasla, ki cam di buy a ruwuy Sikeme, asi i sukum kum. 19Da kaɓa gwat kum migaka hana, naŋ jeŋŋe, yo naŋ kaslsla kaɓa Yerubaˀal ati hay naŋ mawuɗo na, mumulom asi Abimeleke, ɓa naŋ kwana, a mumul asi kum ya. 20Da naŋ kanah ta na, anja vu a bo biw tivi Abimeleke, a zuma mizli Sikemey ati mizli ngi Bet-Milohoyo pay, yo anja vu a bo biw tivi mizli Sikemey ati ngi Bet-Milohoy, a zuma Abimeleke ya.»
21A dirba nah, Yotam a zuɓa kil, ara ɗum a Beˀera, asi a zluwun ti sukum naŋ Abimeleke.
Mizli Sikemey mimbiɗam hirnga avu Abimeleke.
22Abimelek a gi vi makir ar li zumabuy ar Israyeleye. 23A dirba nah, Bumbulvuŋ a slino setene ng'ar wala ngi mizli Sikemey ati Abimeleke, dar mizli Sikemey a mbiɗam hiri ng'avi Abimeleke. 24Naŋ kine, taŋ mikiɗaka ziri ngi Abimelekey kukur tarnaˀ na, sey a wurkaka gar taŋ, yo anja pumbus taŋ a mbiɗi nga hirnga Abimelek sukum taŋ, mikiɗa taŋ vagay vagay na, waɗ nga hirnga mizli Sikemey, mipaka mi da Abimelek ngi kiɗa sukum naŋhay na. 25Mizli Sikemey a pam mizli sek a hirnga muwãhay, ngi pa hiri da Abimeleke. Mizli macohom a ciki taŋ gar na, a tiɓaka taŋ gwataya, ara ɓaka ɓi naŋ da Abimeleke.
26Ti di numuŋ ada na, Gaˀal mangal ngi Ebet, a ndiloko ati sukum naŋhay a Sikeme, mizli Sikemey a pulakaŋ mevel taŋ. 27Sikemey a ram nga gi holok ngi gudubun ar guva taŋhay, a ɗucoko taŋ, dar a gam muguzlum. A soko hay kuli taŋhay, a zumam, a sam, a dirba nah, a nisaka Abimeleke. 28Gaˀal mangal ngi Evet a ɓi: «Abimelek vuna, i wa avu Sikemeye ɓa i gam gawla naŋ ka? I mangal ngi Yerubaˀal, a zuma buyo tisi Zebul ta kwa? Mahor mbur mipa Sikem na, soje madiɗa ngi Abimeleke, a gi gawla naŋ takwa? Na ndr'i gam gawla naŋ vur mike? 29Kayya! Da a vulikiy mizli Sikemeye da ya na, i sa putukuso Abimeleke.» Dar a ɓa Abimeleke ma: «Wuɗ sojehey ava, sawa i kiɗam vu.»
30Zebul, buy miwi li ngir walahaya, a cine mingiɓi ngi Gaˀal mangal ngi Ebet miɓa na le, a slikiɗ himaˀ fõh fõh. 31A slin mizli ti yaŋ yaŋ ng'avi Abimeleke, ɓa a ɓakaŋ na: «Pura Gaˀal mangal ngi Ebet, a ndilo le a Sikem ati sukum naŋhaya, ani ara pa mi da mizli ar walahaya vur ka. 32Wurenna, slikiɗ ti duvuɗ dana ati mizli ngisi kahaya, ara ɗumom ɗum ɗum a ɓuh. 33Yo ti miprik prik, pas mabo ndurro na, kisa zla walahaya ngi kiɗa vu. Da Gaˀal ati mizli naŋhay gar, ara soko nga zlir dibiɗ ati ka na, kisa ga taŋ gwat taŋ mawuɗama.»
34Abimelek ati mizli naŋhay gar, a slikiɗam ngi duvuɗo, a wuɗukam ngay mufaɗ, ara ɗumom ɗum ɗum gweˀ avu Sikeme. 35Gaˀal mangal ngi Ebete, a bo deŋ a mizlingre ngi walahay. Akẽh na, ti Abimelek ati mizli naŋhay muɗum ɗum tuwa, a boko. 36Gaˀal mupura taŋ na, a ɓa Zebulo: «Pura mizli ani taˀ ngay, ara poko sar ti hirnga muwã.» Amma Zebul a ɓaŋ: «Ka mapur ka mizli na, i musuɗuk ngi muwã.» 37Gaˀal tuwa, a mahiri naŋ, a ɓaŋ ma: «Mapoko sar tir muwã ngi wuzla na, i mizli gisiŋ, yo ngay mekelem, ara sawa tir jiviɗ ngi kuli miterey.» 38Zebul a ɓaŋ: «Mi ngi irne ɗik tuwa naŋ maka? Ki ɓi zleˀe: ‹Abimelek i wa, ɓa i gam gawla naŋ ka, kini ta kwa?› Mizli ka mapura taŋ hiris le tuwa, i taŋ, bi, ara kiɗam vu so!» 39Gaˀal a bi ɓaˀ a mbuŋ Sikemeye, a kiɗam vu ati Abimeleke. 40Amma Abimeleke, a gidiɗa Gaˀal makil di. Mizli misi waˀa madiɗahay, a ndilam zik zik a jiviɗe, hã sesẽŋ a mizlingre ngi walahay. 41A dirba nah, Abimelek a cifi a Aruma. Yo Zebulo kwana, a ɓula Gaˀal ati sukum naŋhaya, a cifam a Sikeme mata.
42Li naŋ muwun na, mizli Sikemey a juwam vu ɓa ngi ru ng'ar guvahay. A faka ɓi nah fẽt da Abimeleke. 43Abimelek a hila mizli naŋhaya, a wunka taŋ taˀ taˀ makir, ara ɗumom ɗum ɗum a ɓuh. Ti naŋ mupura Sikemey maboko tir walahay tuwa na, a bi ti taŋ gur ngi kiɗa vu. 44Abimelek ati ngay ngi seˀe, a wusam vu nga tika mizlingre ngi walahaya, yo ngay mekelemey mucuw na, a waham ngbuw ng'ar mizli mise ɓuh, a ngizlaka taŋ kuɗup. 45Abimelek a kiɗ vu ar walahaya hiipas, a tiɓa walahaya, a ngizla mizli ngi raˀahaya kuɗup. A zliɗa mandaŋ ar walahay tisl gar.
46Mizli Migidal-Sikemey micinaka ɓi nah na, a ram gar ng'ar butum muguro asi virzi ngi hay ngi Baˀal-Berit. 47A faka ɓi nah fẽt da Abimeleke, a ɓakaŋ: Migidal-Sikemey a roko ar butum nah. 48Akẽh Abimelek ati mizli naŋhay gar, a jiɗam nga muwã Salmoŋ. A zuɓ zlimbe, a buk mihaŋ ngi dum, a zuɓa paɗ ng'ar pepesl naŋ, a ɓa mizli ngi seˀeheye: «gwat ya miga, kum mupuraka na, gaka kanah ya.» 49Mizli gar a ngumam mihaŋ ngi widisey, a sipaka Abimeleke. Dar ara paka ɗip ɗip a mi butum tuwa, a wuraka jom ti mizli ngi raˀahaya. Mizli ngi Migidal-Sikemey gar, a micam kahana ya so, mizli mizilehey ati ngwasaya, a gam gwat ngi durmuk gu.
Muc ngi Abimelek
50A dirba nah, Abimelek a zuɓ jiviɗ nga Tebes. A walahaya, a tiɓaŋ. 51Hay musubur ada zleˀe a wuzla walahaya, i muguno le gun gun ti mohol. Mizli ngir walahay gar, diga ziley, diga ngwasay gar, ara ɗumom ara. A gicaka miviŋ giceˀ a hirnga taŋ, a jiɗam nga hirngi hay vuna. 52Abimelek aru sesẽŋ a ciki haya, a girjih ng'avi miviŋ, ɓa a nduvuɗa vu da haya. 53Dar ngwasa ada, a hizigo ngurvuŋ nga hirnga Abimeleke, a kuyupoŋ hirnga kuyop. 54Abimelek a zilo gawla mijijira gwat ngi vurum naŋhay, a ɓaŋ: «Muɗo maslalam, tikiy hutuŋ, vur taŋ masa kiɗaka slir ɗo: ‹i ngwas mikiɗa na› mesem.» Dar gawla naŋ a zligaŋ ti maslalama gor njoŋ, a mucu. 55Mizli Israyeley mupuraka, Abimelek a muc le na, mbur gar a cuh ngi hay naŋ ngi hay naŋ.
56Malambaˀ Abimelek miga da cine, naŋ mikiɗa sukum naŋhay kukur tarnaˀ na, Bumbulvuŋ a mbiɗa le nga hirnga naŋ tehhe. 57Moˀore ngi mizli Sikemey gar na kwana, Bumbulvuŋ a mbiɗa le nga hirnga taŋ ma. Yotam mangal ngi Yerubaˀal minisa taŋ tuwa, a sa kiɗ mi kahana, a hirnga taŋ so.
Currently Selected:
MIGI KIITAHAY 9: BEGDC
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.