ZLI VIRZI 18

Bumbulvuŋ Buymisemuŋ miɓi: Sara a sa yi mangal mizile

1Bumbulvuŋ a biga vu da Abrahama gweˀ avu widis madiɗa a Mamre. Hirak ngi pas mazlum cãˀcãˀ na, Abram aro a mi guɗuk naŋ. 2Keɗ na, mizli makir deŋ deŋ zar neˀ acikeˀe. Naŋ mupura taŋ na, a kil baɗ ti mi guɗuko nga ji taŋ hirngaŋ, a huruk huruk a ruwuy. 3Dar a ɓi: «Aw Buymisemuŋ ɗu, ambuh, ki cuh deŋŋe avu hay ngi gawla ɗike ta. 4Anja a sukum ti yam neˀ ɓa ki bunaka Saraya, yo ɓa ki musukom vu asi widis hana. 5I sa gukum gwat ngi zum neˀ, ɓa a vulukum gidaŋ, a dirba nah, kisa zuɓaka jiviɗ kumo, a tiɓaŋ ɓa ki cohom a ciki gawla kumo kine ta.» Taŋ a mbiɗakaŋ di: «Kuy! Ga kaɓa ka miɓa.» 6Akẽh na, Abraham a wus vu kutum ng'ar guɗuko, a ɓa Sara na: «Kutum! Hiric hapa mimezle kurkwasl makir, fukuɗaŋ, do di helelem mikefer kefer.» 7Joˀ a kil ng'avi ginewey, a jo zuŋ sla mezle ngi sli. A vula da gawla naŋ, ɓa a wus vu ti slra naŋ kutum. 8Slra ngi useˀ mikiɗ mi na, Abraham a wuɗ ɗuwa mikiɗa naŋ waɗ mawayaŋ, aru taŋ taˀtaˀ a mbuŋ mulakay tuwa, naŋ a cici zlumbaˀ asi widis gweˀ avu taŋ, taŋ ara zumam. 9A ɓaka Abraham tuwa: «ngwas ɗik Sara naŋ amaka?» A mbiɗa taŋ di: «N'ada ar guɗuku.» 10Mbur pal a wuzla mulakay tuwa, a ɓaŋ: «I sa mo didirba li kana ngi hay ɗike na, naɓa ngwas ɗik Sara naŋ ti zuŋ a duba. Dambalaka Sara ara cine zlumbaˀ avu miviŋ ngi guɗuk ti dirba Abrahama.» 11Abraham ati Sara a gam gal le haɗa, yo Sara naŋ anta juw mata. 12Sara a zla singir tehhe ar vu naŋ a muŋ, a ɓi: «Ya mikircak hana vuna, ɓi ngi zil ada avu ya aruŋ ma kwa? Yo zil ɗu a gi gal le kucup wãˀa!» 13Dar Bumbulvuŋ a ɓa Abrahama: «Sara a singir vur mike? A ɓi: i gi gal le, yo i yi gu ta vur mike? 14Gwat mafucuka Bumbulvuŋ ada kwa? Ya masa mo didirba li kahana ngi hay ɗik na, naɓa Sara naŋ ti mangal a duba.» 15Sara a zluwun, a ji mi, a ɓi: «Yi singir ta.» Naŋ a mbiɗaŋ di: «Ĩˀĩ! Ki singir le kuy kuyoy ɗi.» 16Mizli tuwa, a slikiɗam ti kẽh, a ram jik dibiɗ nga Sodom. Abraham a kisa taŋ, a mbiɗa taŋ mi. 17Bumbulvuŋ a ɓi ti kwacay naŋ: «Gwat ya maga na, i ɗumo avu Abrahama ma kwa? 18Anja sey Abraham a ɗuv sukwi madiɗa taˀa, sukwi migidaŋ. Sukwi ngi mizli ngisi ruwuyoy gar a sa lumam ɗuwula mi ti seˀeŋ. 19Ya muwunaŋ na, ɓa a ɓa ziri naŋhay ati dideˀ naŋhaya, ɓa a jaka ɓimuɗuva ɗu kuy kuy a hirngaŋ, ɓa a gam gwat mijeŋŋe, yo mi kaslsla. Vurˀe, i sa gaŋ gwat ya miɓaŋ di ɗaˀ le tuwa.» 20Akẽh na, Bumbulvuŋ a ɓa Abrahama na: «Mizli matuwam ti Gomor ati Sodom na, a fini gidaŋ le, mungra taŋ a gi le haɗi teˀe. 21Vurˀe, sey i po sar nga puraŋ, tuwuy ngi mizli mundulo sesẽŋ avu ya na, da a gam le gisiŋ kanah kwana. Da i gisiŋ, i gisiŋ ta ma, i sa sinaŋ.» 22Mizli cuw mekelemey a ram nga Sodom. Amma Bumbulvuŋ a ndir deŋ avu Abrahama. 23Abraham a kirih ng'ava, a ɓaŋ: «Bumbulvuŋ, ani kisa ziza mizli mijeŋŋeheye jom ati migi mungraˀahaya gisiŋ kwa? 24Asinta, kisa lum mizli mijeŋŋehey kukur zlum a Sodomo kwani! Ki sa ziza walahaya gbaˀ na si kwa? Ki sa pula ɓi nah teˀ asi mizli mijeŋŋehey mizli ngir zlum na ta kwa? 25Kay, ɓa ki ga kanah na, naŋ kuy ta! Ɓa ki kiɗa mbur mijeŋŋe jom ati migi mungra sukwa? Naɓa mbur mijeŋŋe a tiri le rak rak ati migi mungra. Kay naŋ kuyta wãˀ! Migi kiita da duniya keɗeɗe, ɓa a ga kiita kaslsla ta na, a gi ta.» 26Bumbulvuŋ a mbiɗaŋ di: «Da yi lum mizli mijeŋŋehey le a Sodomo kukur zlum na, naɓa i sa pula mizli ngir walahaya gar asi taŋ.» 27Abraham a ɓaŋ ma: «Ya matum vu ngi ɓuw ɓi na, wereke Bumbulvuŋ ɗu. Yi murɓuku, yi fucu ngataraŋ. 28Asinta, a sa kic mizli zlum ngi gi kukur zlumo kwani! Ki sa ziza walahaya gar, asi mizli mikicam zlum na kwa?» Buymisemuŋ a ɓaŋ: «Da i lum mizli mijeŋŋeheye le kukur mufaɗ nga zlum a diga na, y'anta sa ziza walahaya ta.» 29Abraham a hurdum hirdam, a ɓaŋ: «Asinta, da taŋ a diga kukur mufaɗ si na mbrike?» Buymisemuŋ a ɓaŋ: «Da i lum le kukur mufaɗ na, y'anta sa ziza ta.» 30Abraham a ɓaŋ ma: «Aw Bumbulvuŋ ɗu, da i ra ɓuw ava na, ki ji mevel ta. Asinta, da i mizli kukur makir a diga tewle na mbrike?» A ɓaŋ: «Da i lum le kukur makir a diga na, y'anta sa ziza ta.» 31Abraham a ɓi ma: «Wereke Bumbulvuŋ, i ra tum vu ngi ɓuw ava. Asinta, da taŋ a diga kukur cuw tewle na mbrike?» Buymisemuŋ a mbiɗaŋ di: «Da i lum le kukur cuw a diga na, y'anta sa ziza ta.» 32Dar Abraham a ɓi ma: «Aw Bumbulvuŋ, ki ji mevel ta, yi wuɗ i ɓuw ngi kiɗa mi naŋ wãˀ. Asinta, da taŋ a diga kuruˀ tewle na mbrike?» Buymisemuŋ a ɓaŋ: «Asi mizli mukuruˀ tayna, y'anta sa ziza walahaya ta.» 33A dirba Buymisemuŋ mitika mingiɓi naŋ ati Abram na, a cuhu, joˀ Abram kwana a mi ngi hay naŋ.

Currently Selected:

ZLI VIRZI 18: BEGDC

Highlight

Copy