ZLI VIRZI 17

Slimiɗ ngi Abram mimbiɗi Abraham

1Bumbulvuŋ mibiga vu da Abrama, naɓa naŋ ti vi kukur ngoltir ngaŋ ngoltir, a ɓaŋ: «Buymisemuŋ misi gidaŋ wãˀ i ya. A rudigi a mbuŋ ɗu, cifi kaslsla. 2I sa jumˀay ati ka, i sa ga ɓa dideˀ ɗikey a sikam haɗi.» 3Abram a huruk huruk a ruwuy, Buymisemuŋ a ɓaŋ ma: 4«Jumoˀay ɗu ati ka ani: Ki sa tiri dideˀ ngi sukwi ngi mizli haɗi. 5Anta a sa zilukuw Abram mata, amma Abraham, asi i sa ga ɓa ki tiri dideˀ ngi sukwi ngi mizli haɗi, 6yo i sa ga ɓa ki yi haɗi wãˀ, i sa ga ɓa ki yi sukwi ngi mizli, buy madiɗahay a sa boko tivi dideˀ ɗikeye. 7I sa ndir ti jumoˀay ɗu misi ati ka na, yo a dirba ɗike, i sa jumˀay ati dideˀ ɗikeye, hã avu dideˀ mukutur ti kutur, mukutur ti kutur hã ngi sete, ɓa i sa tiri Buymisemuŋ ɗik ati ngi dideˀ ɗikey a dirba ɗike. 8Hirwuy mulak ka misi anga wurenna na, i sa vuluw di, a ndir da ka ati dideˀ ɗikey a dirba ɗike. Hirwuy Kanaˀan gar a sa ndir da taŋ ngi set, joˀ yi sa tiri Buymisemuŋ taŋ.» 9Buymisemuŋ a ɓa Abrahama ma: «Ka, kisa ja jumoˀay ɗu a hirnga, a dirba ɗike kwana, i dideˀ ɗikey, hã avu dideˀ mukutur ti kutur nga mbuŋ nga mbuŋ. 10Jumoˀay ɗu ati kum, ɓa ki jaka a hirnga, ka ati dideˀ ɗikey a dirba ɗike na, anihĩ: ziri mizile kumoy gar na, a sa caka taŋ a mizaw. 11I ci mizaw masa biga jumoˀay, ya ɓi micica ar wala ɗu ati kum. 12Ziri mizilehey, kum miyaka taŋ le gar, hã avu dideˀ mukutur ti kutur nga mbuŋ, da a ndilaka le hin dangafaɗ na, a caka taŋ a mizaw, rak rak ati bekehey miyaka taŋ a hay ɗik, malla ka mihiɗika taŋ ti hiɗik, ko misi i dideˀ ɗikey ta gar. 13Beke miyaka cak a hay ɗik ati mihiɗika ti hiɗik gar na, a caka taŋ a mizaw, ɓa jumoˀay ɗu a bigi avu dumvu kumo ngi sete. 14Amma mbur mizile mici a mizaw ta na, a sa gwahaka ti wuzla mizli avra, asi a ngila ɓi ngi jumoˀay ɗu le.» 15A dirba nah Buymisemuŋ a ɓa Abrahama: «Ki zila ngwas ɗike Saray mata, amma zle dana, a sa zilaka Sara. 16I sa ɗuwulaŋ mi, yo ma na, i sa ga ɓa a yuw mangal mizile.» I sa ɗuwulaŋ mi, a sa tiri dideˀ ngi sukwi ngi mizli haɗi. Buy madiɗa ngi sukwi ngi mizli wal wal a sa boko ti vaŋ. 17Abraham a huruk huruk a ruwuy, dar a singir, a ɓi ti kwacay naŋ: «Na, mbur ngi vi skata, a yi mbri maka gawlay! Yo Sara, ngwas ngi vi kukur ngoltire, ɓa hã a yi maso!» 18A ɓa Buymisemuŋ so na: «Da Ismayele naŋ da, yo ki ra ki slimiɗ a ng'asi na, tewle si, y'anta cufuɗ gwat mifineˀ hana mata.» 19Buymisemuŋ a ɓaŋ: «Anta kanah ta wãˀ! Ngwas ɗik Sara a sa yuw mangal mizile, kisa caŋ slimiɗe Izak, i sa jumˀay ati naŋ, waɗ ati dideˀ naŋhay a dirba naŋ hã ngi sete. 20Yo ka mucufuɗiy vur Ismayel na kwana, i tiɓa le. Ani i ra ɗuwulaŋ mi, i ra ga ɓa a sa yi haɗi, a sa yi buyoy kuruˀ nga cuw, yo i sa bo ti sukwi madiɗa ti vaŋ. 21Amma i sa jumoˀay ati Izak, Sara masa yuw di didirba li kahana na.» 22A dirba Buymisemuŋ mitika mingiɓi naŋ ati Abraham na, a cuh kileŋ ava. 23Akẽh na, Abram a zuɓa mangal naŋ Ismayel ati beke miyaka taŋ a hay naŋ cek, waɗ mihiɗika ti hiɗikey, mizli mizile ngi hay naŋhay gar, a ca taŋ a mizawa kalla tapas Buymisemuŋ miɓaŋ di vuna si. 24Abraham mici a mizawa, naɓa naŋ ti vi kukur ngoltir nga ngoltir, 25yo naɓa Ismayele kwana naŋ ti vi kuruˀ nga makir. 26Abraham ati mangal naŋ Ismayele, a cam mizawa pas purla. 27Mizli mizile ngi hay naŋhay gar, beke miyaka taŋ a hay malla mihiɗika ti hiɗik avu mulakay kwana, a cam mizaw gar ati naŋ.

Currently Selected:

ZLI VIRZI 17: BEGDC

Highlight

Copy