EZEKIYEL 9
9
Buymisemuŋ miga kiita da Zeruzalem
1Buymisemuŋ a hizigo widi kaˀ nga slimiɗ ɗu, a ɓi: «Gi kiita da walahay a ndilo le gweˀe. Anja mbur gar ti gwat naŋ ngi ngizla vu kaw a haŋ, kaw a haŋ.» 2Keɗ na, ziley merkeɗ ara soko tir jiviɗ maso tir miviŋ ngi muŋ, mupulaˀ hiri tir vay muŋ, mbur gar na, kaw ti gwat naŋ ngi ngizla vu avu haŋ avu haŋ. A wuzla taŋ tuwa na, mbur ada, zana ngi gugumay mislirkeɗ ɓaˀ avu vu, waɗ gwat ngi toho gwat ngi mbur mutoho gwat, kulaˀ avu kanda naŋ. A soko, waɗ taŋ dedeŋ a ciki li gi mikuli miɗiya ti ɓiri gaza. 3Dudok ngi Buymisemuŋ ngi Israyele, a slikiɗ a hirnga kerubeŋheye, a ngi hirnga kini tivi li ɗuva sar ngi miviŋ ngi hay ngi Buymisemuŋ. Dar Buymisemuŋ a zila mbur miɓaˀ ti zana ngi gugumay mislirkeɗ, waɗ gwat ngi toho gwat kulaˀ avu kanda tuwa. 4Bumbulvuŋ a ɓaŋ na: «Bula walahaya, walahay Zeruzaleme. Mizli muroko ti niˀic ati muroko ti tuwuy asi gi gwat mukuyta wãˀ magaka a diga na, ga taŋ lammba a midibiɗ taŋhaya.» 5A dirba nah, i cine, a ɓa mizli mekelemeye na: «Sipaka mbur misenna ar walahaya, kiɗaka mizli ngir walahaya vagay vagay. Anja ko ircece a gukum geˀ le ta, yo ki puram ircece da mbur ta si. 6Midigilahay, gawla ati diilihey, ziri ati ngwasay gar na, kiɗaka taŋ vagay vagay, hã ki ngizlaka taŋ wãˀ. Amma mbur misi ti lammba a midibiɗ gar na, ki wusakaŋ ta. Zlaka angi hay nga ya Buymisemuŋ.» Dar mizli tuwa, a zlaka avu micawwahay misi a mbuŋ hay ngi Buymisemuŋ. 7Buymisemuŋ a ɓa taŋ: «Hiryaka hay ngi Buymisemuŋ, nahaka wazlaraya ti vagay ngi mizli. A dirba nah, cohom!» A bam, dar a kiɗaka mizli ngir walahaya.
8Ti taŋ mira kiɗaka mizli tuwa na, yi ndir pal ɗu, i huruk huruk a ruwuy, i widi: «Aw Bumbulvuŋ, Buymisemuŋ ɗu! Israyeley mindiram na, ki wuɗ ki ngizla taŋ gar ti ka mavunaha himaˀ ɗik ar Zeruzalem na sukwa? 9A ɓiy na: «Mungra ngi Israyel ati Zudahaya, a gi le haɗa, naŋ fineˀ gidaŋ. Pumbus a pi asi ruwuyo haɗa teˀe, yo gi moˀore a fini gidaŋ le ar walahaya, asi a ɓam na: ‹Bumbulvuŋ, a muɗ haŋ le avu hirwuyo, Bumbulvuŋ anta pura ndra gu ta›. 10Naŋ kine, ko ircece anta giy geˀ le ta, na zle y'anta pur ircece da mbur ta si. Gi gwat taŋ na, yi sa pa dudok naŋ nga hirnga taŋ.» 11Ar nah na, mbur miɓaˀ ti zana ngi gugumay mislirkeɗ, waɗ gwat ngi toho gwat mukulaˀ avu kanda naŋ tuwa, a slufa ɓi ngi slra naŋ, a ɓa Buymisemuŋ: «I ga le kaɓa ka miɓiy di ɗaˀ le tuwa.»
Currently Selected:
EZEKIYEL 9: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
