EZEKIYEL 43

Buymisemuŋ mumo ng'ar hay naŋ

1Mbur tuwa aru ti ya nga mizlingre misi kini tir vay si pas ngi mipriki. 2Keɗ na, dudok ngi Buymisemuŋ ngi Israyel ara sawa, zle tisi pas ngi mipriki. Hurum naŋ kaɓa hurum ngi yam madiɗa majuruf, dudok naŋ a wucuɗa hirwuyo deŋ. 3Gwat ya mupura ti kleŋ na, naŋ kaɓa ya mupura ti kleŋ ti di Buymisemuŋ muso ngizla walahay, yo naŋ kaɓa ya mupura ti kleŋ a mi mizaw Kebar zleˀe na. Dar i huruk huruk a ruwuy. 4Dudok ngi Bumbulvuŋ a ci ngi haya tir mizlingre mupuɗak hiri ng'asi pas ngi mipriki. 5ˀUf ngi Bumbulvuŋ a zuɓiy fangal, waɗ a ci ti ya kulaˀ nga wazlaray ngi huroˀo. Keɗ na, dudok ngi Bumbulvuŋ a naha haya le. 6I cine ara ɓoko ya ti haya, naɓa mbur tuwa naŋ da deŋ a ciki ɗu. 7A ɓikiy na: «Ka mburu, mitaˀ hana i janga ɗu nga ya buy, yo i li ɗuva sar ɗu. Ya masa cifi ndrehhe a wuzla Israyeley na anga. Israyeley anta sa hiryaka slimiɗ ɗu mipal na mata, ko taŋ malla ko buy taŋhay ti gi gwat taŋ malambaˀhay na, ko ti vagay ngi buy taŋhay malla ko ti zivi taŋhay kwana, anta sa hiryaka mata. 8A ɗuvaka miviŋ taŋ a ciki miviŋ ɗu, yo dum ngi ciki miviŋ taŋhay a ciki dum ngi miviŋ ɗu, waɗ mohol ar wala ɗu ati taŋ. A hiryaka slimiɗ ɗu mipal na le ti gwat malambaˀ taŋ mukuyta wãˀ, taŋ migaka na. Vurˀe, i ngizla taŋ le kap ti himaˀ ɗu. 9Wurenna, a sa pulaka gi sulome taŋ avu ya, waɗ vagay ngi buy taŋhaya, i sa cifi a wuzla taŋ ngi wãˀ so.

10Ka so na, mburu, biga ɓi ngi mindiraka hay ɗu hana da Israyeleye. Anja ɓa malambaˀ taŋ na a pa taŋ mesem, yo hay miwaka hana, anja ɓa a dubunaka jileŋ naŋ. 11Gwat taŋ migaka gar na, da a pa taŋ mesem le so na, biga taŋ pulaˀavra ngi deŋ ngi hay vuna: wursluk naŋhay, miviŋ ngi ci ati ngi bi naŋhay, taˀ ngi hay vuna gar, ɓimujuwa ati mezegwel ngi gi ngi raˀahay gar. Ɓimujuwa ati mezegwel ngi gi miwal wal ngi raˀahay gar na, toho taŋ toh toh mur taŋ vuna, ɓa a jaka a hirnga, yo ɓa a gam di slra. 12Ɓimujuwa vur hay ngi Bumbulvuŋ ani: hirnga muwã, li mugun gun ngi cikeˀe gar na, naŋ pal wãˀ. Hana i ɓimujuwa vur hay ngi Bumbulvuŋ.»

Li gi mikuli ati mikulihey

13Li gi mikuli, a waka ani ti gwat ngi wi gwat muwam di hay ngi Bumbulvuŋ zleˀe na. Gwat ngi wi gwat nah, a funa gwat ngi wi gwat muho gar na le neˀ. Jileŋ ngi vigiɗ mugun hirnga naŋ na: reta metir, sliprik naŋ: reta metir, yo mi ngi vigiɗ vay ngi vra naŋ na, gil naŋ: reta ngi reta metir. 14Virzi ngi li gi mikuli, zle a ruwuy hã avu sar naŋ mitaˀ ngi ruwuyo, jileŋ naŋ: metir pal, sliprik naŋ: reta metir. Zle avu sar naŋ meciɗek hã avu sar naŋ madiɗa: metir cuw, sliprik naŋ: reta metir. 15Dum vu ngi li gi mikuli misi liwis anga na, gil naŋ: metir cuw, yo a hirnga naŋ wãˀ ma na, durumoy mufaɗakaˀ kaˀ a mivay naŋhaya. 16Dum vu ngi li gi mikuli, jek naŋ ati sliprik naŋ gar na: metir makir makir. Giluw naŋhaya ti ka ti ka gar na, i misi purla. 17Sar naŋ, jek naŋ ati sliprik naŋ, vay ti ka ti ka gar na: metir tarnaˀ tarnaˀ. Mi naŋ miteleŋŋe gun gun zlar na: reta ngi reta metir, vigiɗ naŋ gun gun: reta metir. Li migaˀa gaˀ gaˀ ada ngi jiɗ ng'ara tir vay si pas ngi mipriki.

18Mbur tuwa a ɓiy: «Ka mburu, ya Bumbulvuŋ Buymisemuŋ i ɓi na: Gwat ya miɓa ɗaˀ le vur li gi mikuli ani, tapas taŋ mindiraka le na, a sa gam mikuli mizlam zlam ara, yo a sa pam pumbus ara. 19Levi masayay angi tizer ngi Sadok, masoko nga mbuŋ ɗu ngi giy mezegwel na, kisa vula taŋ gusoŋ ngi gi mikuli vur mungra. I ya Bumbulvuŋ, Buymisemuŋ maɓi. 20Ki sa tiɓa pumbus ngi gusoŋ, kisa ga da durum mumufaɗ ngir mivay ngi li gi mikuli, da mivay ngi sar naŋhay mumufaɗ ngir zlirɗi naŋhaya, waɗ avu mi naŋ miteleŋŋe gun gun na. Ka masa zuɓa dili ngi li gi mikuli avra, yo ka masa tiri di pal na, ti jiviɗ kahana. 21Gusoŋ migam di mezegwel vur mungra tuwa na, kisa zuɓa soŋ wãˀ, kisa wura ar li mihĩˀĩ ngi wur naŋ a duba hay ngi Bumbulvuŋ. 22Ti hin mucuw naŋ na, kisa jo bazuway manja hereweɗ ava ngi gi mikuli vur mungra, waɗ a sa gaka mezegwel ngi zuɓa mungra ngi li gi mikuli, kaɓa migaka ti gusoŋ tuwa. 23Ti ka misa kiɗa mi ngi mezegwel ngi zuɓa mungra le na, kisa jo a wuzla ginew ɗikeye, gusoŋ waɗ zlengerek, manja hereweɗ avu taŋ. 24Ki sa bigikiy taŋ a mbuŋ ɗu ya Bumbulvuŋ, masayay a sa futoko taŋ mandaŋ, a sa gikiy taŋ mikuli mizlam zlam da Bumbulvuŋ. 25Vur hin gar ya angi tarnaˀ na, kisa gi mikuli vur mungra ti bazuway, yo kisa gi ti gusoŋ waɗ ti zlengerek manja hereweɗ avu taŋ, ka masa jo taŋ a wuzla ginew ɗikey tuwa. 26Vur hin gar angi hin tarnaˀ tuwa na, a sa gam mikuli ngi vula li gi mikuli wãˀ da Bumbulvuŋ, a sa tiram di li mipal, ɓa a gam slra ara. 27Da hin mitarnaˀ tayna a kiɗam mi le na, hin midangafaɗ naŋ ati hin mekelemey gar na, masayay a sa gam mikuli kumoy ngi zlum ti zlum ati mikuli kumoy ngi jumoˀaya ar li gi mikuli. Dar yi sa tuɓukum so. I ya Bumbulvuŋ, Buymisemuŋ maɓi.»

Currently Selected:

EZEKIYEL 43: BEGDC

Highlight

Copy