EZEKIYEL 31

Buy Ezipte naŋ kaɓa miter

1A dirba ji mizli ng'ar beke, hin mudumbuŋ, kiya mimakir naŋ, ngi vi mukuruˀ ngaŋ kaˀ naŋ na, Bumbulvuŋ a ɓiy mi naŋ ani: 2«Ka mburu, buy madiɗa ngi Ezipte, buy Ezipte ati zigiduw ngi si ruwuy naŋ, ɓa taŋ ɓi ani:

Ka, ti madiɗa ɗik na, ki wa vu ɗik ati waka?

3Ki bam vu ati miter ani a Libaŋ:

Mihaŋ naŋhaya kuy teˀe,

i widis mingiriɗ ngi naˀa susuɗuku,

a gil suyom lambaˀ,

hã hirnga naŋ a bi ɗiw ɗiw nga wuzla gazlavay.

4A gil ti yam,

naŋ migil suyom na, ti yam mijileŋ ngi ruwuy.

Yam a ɓulo a ciki slaslalak naŋhaya,

a ki zlazlar ɓaˀ ɓaˀ ng'asi widis ngi ɓuhoyo gar.

5Vurˀe, a gil hã fineˀ widis ngi ɓuhoyo gar.

A pi pircicici,

mihaŋ naŋhay a ciyam cay cay, mbele yam maɓul gol gol a ciki naŋ

zle ti taŋ mihirvaka tuwa.

6Ɗiyuwoy gar a ɗiyam hay ar mihaŋ naŋhay.

Gwat misãmi ngi ɓuhoy a jam aseˀeŋ,

yo sukwi ngi mizli gar a cifam aseˀeŋ.

7Kay, i widis migil kuy teˀe,

yo a ki haŋ kuy teˀ ma gar.

Asi slaslalak naŋhay a kam, hã avu yam migol gol ngi ruwuy.

8Ar jarne ngi Buymisemuŋ, miter migidaŋ ka naŋ anta,

widis migidaŋ mimezle misi ti mihaŋ kuy kaɓa nga naŋhay anta,

ko bazlawar kwana, miki haŋ kaɓa naŋ anta,

ɓa widis ar jarne ngi Buymisemuŋ mukuy ka naŋ na, anta.

9I tiri di kuy haɗa ti mihaŋ naŋhay mihaɗa na,

dar widis ngi Edeney, misi ar jarne

ngi Buymisemuŋ, a gam di suloŋ.»

Buy Ezipte a sa ngil kaɓa miter

10Vurˀe, Ya Bumbulvuŋ, Buymisemuŋ i ɓi na: Miter a gil le suyom haɗa. Hirnga naŋ a gil ɗiw ɗiw nga wuzla gazlavay. Naŋ migil haɗa tuwa na, a hiziga jijih. 11Dar yi ɓula avra, i pula mbak asi haŋ ngi buy ngi sukwi ngi mizli, ɓa a gakaŋ kiita weˀe avu gi moˀore naŋ na. 12Mulak misi moˀore ngi wuzla sukwi gar, a ngumakaŋ kaf kaf, mbaka. Mihaŋ naŋhay a ndilam cingah cingah ng'ar muwãhay, yo ng'ar sozohoy gar. Mihaŋ naŋhay a ngilam ngurof ngurof ng'ar hurjijiŋ ngi si ruwuyoy gar. Dar mizli ngi si ruwuyoy gar a slikiɗam a susuɗuk naŋ, a pulakaŋ sĩw. 13Ɗiyuwoy gar a soko cifam angi mihaŋ naŋ mungumahay tuwa, yo gwat misãmi ngi ɓuhoy a ɗiyam li hin taŋhay asi mihaŋ naŋhaya. 14A gi kanah ɓa widis mimbi yam le gar na, ko pal magil suyom anta mata. Yo naŋ anta gil ɗiw ɗiw nga wuzla gazlavay mata. Yo ma na, widis madiɗa misi ka miter, misi ar yam na, ko pal majijih ti gil naŋ anta mata. Asi widisey gar i muzuwula taŋ le ngi mucu, a ram ng'ar vigiɗ mijileŋ a ruwuy, a wuzla mizli titirahay, ng'avi mizli maram nga ruwuy.

15Ya Bumbulvuŋ, Buymisemuŋ i ɓi na: tapas miter mici ng'avi mizli ngi ruwuyoy na, i ga ɓa li kurzluˀ a tuwuy vagay. I gica mi ngi yam mijileŋheye asi ɓi naŋ. I cica mizaw madiɗahaya. I cica yam madiɗahay a ɓulom mata. I ga luvuŋ a Libaŋ timbiɗim aseˀeŋ. Yo widis ngi ɓuhoy gar a muˀulom sok sok asi ɓi naŋ. 16Sukwi ngi mizli gar a zluwunam ti hurum ngi naŋ madiɗ ng'avi mizli mumucahay na. Widis ngir jarne Eden a hur hirwuyo, a tislaka mevele: i widis mimezle, mukuy haɗa ngi Libaŋhay, widis ngi ciki yamay gar. 17Taŋ vuna kwana a cam bumoˀ ng'ar li cifi ngi mizli mumucahaya, ng'avi mizli mikiɗaka taŋ ti maslalam ar vurum. Majinakaŋ zleˀe i taŋ, a wuzla sukwi ngi si ruwuy gar na, minaˀaka susuɗuk naŋ i taŋ.

18Miter, ka ti dudok ɗik ati madiɗa ɗik na, ki bam vu ati widis wana a wuzla widis ngir jarne Edeney naka? A sa pam sar ti ka jom ati widis ngir jarne Edeneye nga hur hirwuyo. A sa hinukuw ati mizli manja ci mizaway, waɗ mizli misi mikiɗaka taŋ ti maslalam ar vurum. Buy madiɗa ngi Ezipte ati mizli ngi si ruwuy naŋhaya, i hana so. I ya Bumbulvuŋ, Buymisemuŋ maɓi.»

Currently Selected:

EZEKIYEL 31: BEGDC

Highlight

Copy