BI NGI ISRAYELEY 33

Buymisemuŋ mupula jiviɗ da Moyis ɓa a zuɓa jiviɗi

1Bumbulvuŋ a ɓa Moyise na: «Pula hirwuy hana, ka ati mizli, ka mubo taŋ ti ngi ruwuy Ezipte tuwaŋ. Aru nga hirwuy ya miɓa ti hudum aseˀe da Abraham, Izak waɗ Zakop tuwa, i ɓa taŋ: I vula le da dideˀ kumoy. 2I sa slina modro ɗu ɓa a kusukum, i sa ɓula Kanaˀanay, Amorihey, Hitihey, perizihey, Hivihey waɗ Zebusihey a mbuŋ kumo. 3Aru nga hirwuy misi ɗuwa ati mam ara ɓulom anga. Amma y'anta ru ti kum ti haŋ ɗu ta, asi kum i mizli micina mi tahay, naɓa i sa nguzlukum pay a jiviɗe.» 4Mizli micinaka mi ngi gi zluwun hana cin cin na, a zlaka a likam, ko mbur miki zana ngi wuya anta mata. 5Bumbulvuŋ a ɓa Moyise: «Ɓa Israyeleye: Kum i mizli micina mi tahay. Da i ɓi le i ru ti kum neˀ na, i mur tak ta na, i nguzlukum pay a jiviɗe. Wurenna, cukoko zana ngi wuya kumoyo, ɓa i sa si na gwat ya masa gukum di.» 6Israyeley a pulaka ki zana ngi wuya taŋhaya, zle a muwã Horep.

Buymisemuŋ miɓam ati Moyis ar guɗuk ngi zlir ti naŋ

7Da Israyeley ara paka walahaya na, Moyis a zuɓa guɗuko, ara nga kaˀ a duba gala, zar avu walahaya. A zilaka ‹guɗuk ngi zlir ti Buymisemuŋ.› Mizli muwuɗam le ɓa a zliram ti Bumbulvuŋ gar na, a bam tir walahaya, a ram ng'ar guɗuk nah. 8Da Moyis a bi le, ara ru na, mizli gar a slikiɗam deŋ deŋ a mi guɗuk taŋhaya, hiri tataˀ ava, sey da naŋ mici le ng'ar guɗuko far. 9Da Moyis a ci le so na, musure ngi gazlavay a po sar sikikiki avu miviŋ ngi guɗuko, joˀ Bumbulvuŋ a ɓam ati Moyise. 10Israyeley mupuraka musure ngi gazlavay na le si na, a hurkom huruk huruk, mbur gar a mi guɗuk nga naŋ nga naŋ. 11Bumbulvuŋ a ɓam ati Moyise hiri taˀ taˀ, kaɓa mbur maɓam ati cil naŋ. A dirba nah, Moyis a mi ng'ar walahay a muŋ, amma gawla naŋ Zozuwe, mangal ngi Nun, a ndir a hur guɗuko.

Buymisemuŋ mikiɗam slir ati Moyis

12Moyis a ɓa Bumbulvuŋ na: «Cin ɗi Bumbulvuŋ, ka ti haŋ ɗike ki ɓiy na: Aru ti mizli tayna, amma ki ɓiy ɓi ngi mbur ka mawuɗo sliniy di, ɓa a jiniy na ta. Na zle, ki ɓiy na: Ki muɗiy le ceɗ pal, yo ki ra giy mezleŋ. 13Na wurenna, da ki ra giy mezle gisiŋ na, bigiy jiviɗ ɗike ɓa i sinuw. Naŋ kine, i sa sinuw gisiŋ gisiŋ, yo i sa lum gi mezle ɗike kuy kuy wãˀ. Yo ma na, si na sin le, sukwi ngi mizli tayna, i mizli ɗikey!» 14Bumbulvuŋ a mbiɗaŋ di na: «I sa ru ti kum ti haŋ ɗu, ki likam ta, i sa ra vulukum musukavu.» 15Moyis a mbiɗaŋ di: «Da ki so ti haŋ ɗik asi ndra ta na, anja ki ɓa ndra ɓa i slikiɗam baɗ aka ta. 16Naŋ kine, da ki ru ti ndra ti haŋ ɗike ta na, ya ati mizli ɗikeye i sa sinaka avu miki ra ga ndra mezle ka? Maga ɓa ndra wal avu sukwi mekelemey misi asi ruwuy gar na, i ka maru asi ndra na ta kwa!» 17Bumbulvuŋ a mbiɗa da Moyise: «Ɓi ka miɓa ani na, i sa gaŋ. I sa guw mezleŋ, asi i guw mezle le, yo i wini di i ka gisiŋ.» 18Moyis a cufuɗaŋ: «Bigiy dudok ɗike ɓa i pura!» 19Bumbulvuŋ a ɓaŋ: «I sa cuh a mbuŋ ɗike, i sa buguw gi mezle ɗu wãˀ bal ti zila slimiɗ nga ya ‹Bumbulvuŋ›. I sa ga mezle da mbur ya mawuɗ gaŋ mezleŋ, yo i sa pura ircece da mbur ya mawuɗ puraŋ ircece.» 20A ɓaŋ ma: «Ki pura mihiri ɗu gu ta, asi mbur mapura mihiri ɗu, ɓa a ndir ti siifa na, ko loŋ anta.» 21Bumbulvuŋ a ɓaŋ ma: «Li ani gweˀ avu ya aka. Ki sa cici ar mandazlay muwã. 22Yo ti ya masa cuh ti dudok ɗu na, i sa kuw ɓaˀ ng'ar poporo ngi mandazlay muwã tuwa, waɗ haŋ ɗu tiɗeˀ ar ka, hã i cuh ɗagay far. 23A dirba nah, i sa zuɓa haŋ ɗu avra, kisa puriy ti dirba, asi anta puraka mihiri ɗu gu ta.»

Currently Selected:

BI NGI ISRAYELEY 33: BEGDC

Highlight

Copy