DANIYEL 7

Daniyel mupur gwat ti kleŋ sar mudumbuŋ naŋ: gwat misaŋhmihey mufaɗ

1Ar vi mudumbuŋ naŋ ngi Baltazar, mazum buy a Babiloŋ na, Daniyel a ro tup ar li hin naŋ, musuwun a gaŋ, a pur gwat ti kleŋ. Dar a toho musuwun nah ti tuhu. 2Daniyel a zla a ɓi: «Ngi hiikuɗo, i pur gwat ti kleŋ. Himiɗ a so tisi diˀisey mufaɗ taŋ ng'ar mubuliy madiɗa. 3Gwat misahmi madiɗahay wal wal mufaɗ, a boko tir mubuliye. 4Mudumbuŋ naŋ kaɓa mobor, amma naŋ ti kirpasl ngi kurom. Ti ya mapura na, a mburcakaŋ kirpaslay avra. A slikiɗ ti ruwuyo, a cici deŋ ar sar kaɓa mbur, waɗ a vulakaŋ lesl ngi mbur. 5A dirba nah, i pur gwat misahmi mucuw naŋ, naŋ kaɓa luˀuf. A cifi jangaw tir vay purla, cakay makir ngik ngik avu sliŋ. Joˀ a ɓakaŋ: «Slikiɗi! Humbuɗ useˀe kuy kuy.» 6A dirba nah, i ra pur hiri ma ni, keɗ na, mekelem deŋ ma. A bam vu ati kokoyta, kirpasl ngi ɗiyuw kaˀ kaˀ mufaɗ a duba, hirnga mufaɗ. A vulakaŋ buy madiɗa miwãˀ. 7A dirba naŋ ma na, i ro pur gwat ti kleŋ ngi hiikuɗo na si, keɗ na, gwat misahmi mumufaɗ naŋ deŋ. A gi zluwun, a muɗ didaka, naŋ gidaŋ haɗa. Naŋ ti sliŋ ngi ɓirihey ngoryoŋ ngoryoŋ. A ra zum gwat, ara nguwa gwata, a gudubura is naŋ asi sar. Naŋ wal avu gwat misahmi mudumbuŋhoyo, yo naŋ ti durumoy kuruˀu. 8I ra singila durum naŋhaya zleˀe, keɗ na, durum mekelem meciɗek, ara bo a wuzla taŋ. A wuzla durum mudumbuŋhoy mimakire, a muɗaka taŋ a mbuŋ naŋ. Durum meciɗek tuwa, hiri ava kaɓa hiri ngi mbur waɗ mi maɓi ɓi ngi huhumo vu.

Buymisemuŋ miga kiita da mizli

9I ra pur hiri aruŋ, keɗ na, a ɗuvam janga ngi buyoy, dar mbur midigila a cifi ara. Zana naŋ babara ndazl kaɓa yam, ngwic hirnga naŋ, kaɓa ngwic ngi tumuŋ mubuna le, li cifi naŋ ngi buyo, i irne vu, sar ngi janga nah, a wucuɗ kaɓa vu mihilɓiɓ. 10Mizaw ngi vu ara ɓulo ti mbuŋ naŋ kaɓa yam maɓul. Mizli milyoŋ mbeˀ mbeˀ, ara gakaŋ slra, milyoŋ kukur mbeˀ mbeˀ, deŋ deŋ a mbuŋ naŋ. Migi kiitahay a cifam jojoˀ, dar mizli a wunaka ɗerewoloyo. 11Yi pur hiri ava ni, asi durum meciɗek tuwa, ara gi mi haɗa, ara ɓi ɓi ngi huhumo vu. Ti ya mapur hiri tuwa, keɗ na, a kiɗaka gwat misahmi mumufaɗ naŋ tuwa le vagay, a hizigaka vagay naŋ ng'ar vu, dar a zlizlir. 12A tiɓaka zumabuy ngi gwat misahmi numuŋhoyo. Joˀ a slaka taŋ hin ngi siifa taŋ nga mbuŋ, ar hin naŋ kaslsla. 13I ra pur gwat ti kleŋ ngi duvuɗo ni, keɗ na, gwat mibam vu ati Mangal ngi Mbur, ara so, gazlavay gun hirnga naŋ. A ndilo sesẽŋ avu mbur midigila, dar a kirohoko di nga mbuŋ naŋ. 14A vulakaŋ zumabuy, dudok ati li zumabuy. Mizli ngi ruwuyoy, sukwihey ati mi miwal wal gar, ara gam gawla naŋ.

Gidaŋ naŋ ngi buyo, i gidaŋ ngi caˀ, masa kiɗ mi ta.

Zuma buy naŋ anta sa kiɗ ta ndiɗaˀ.

Pulaˀ avra ngi gwat Daniel mupura ti kleŋ sar mudumbuŋ naŋ

15Ya Daniyele, didak a miɗiy hã sesẽŋ avu membezleŋ ngi vu ɗu, yo gwat ya mupura ti kleŋ tuwa, ɓi naŋ ara giriy a mevele haɗi. 16Yi girjoho ng'avu mbur pal a wuzla mizli midedeŋ akẽh na, i cufuɗa mbiɗeˀvra ngi gwat hana vuna. Naŋ a ɓiy di, a bigiy mbiɗeˀvra naŋ ma, a ɓiy: 17«Gwat mimadiɗa misahmihey mumufaɗ na, i buy madiɗahay mufaɗ masa boko ngi zumabuy a ruwuy. 18Amma mizli ngi Bumbulvuŋ Buymisemuŋ Mimadiɗa wãˀ, a sa lumaka zuma buyo, a sa ndir inga taŋ ngi wãˀ ngi sete.» 19A dirba naŋ, i wuɗ sey i sla wala ngi gwat misahmi mumufaɗ naŋ na. Naŋ wal avu numuŋhoyo gar, naŋ gidaŋ haɗa. Naŋ ti sliŋ ngi ɓiri ho gar, waɗ zlenek ngi ɓiri gaza. A ra zum gwata, a nguwa ngaw ngaw waɗ a gudubura is naŋ asi sar. 20I cufuɗaŋ vur durum mukuruˀ misi a hirnga gwat misahmi, waɗ vur durum meciɗek misa bawa, dar mimakir numuŋhoy a ndilam na. Durum nah na naŋ ti hirihey, yo naŋ ti mi maɓi ɓi ngi huhumo vu. A biga vu naŋ fineˀ numuŋhoyo gar. 21I ra pur hiri ni, keɗ na, durum tuwa, ara kiɗam vu ati mizli muvuku vu taŋ, a lum bugawla ar taŋ. 22Hã mbur midigila tuwa, a sawa, a ga kiita mijeŋŋe da mizli ngi Buymisemuŋ Mimadiɗa wãˀa. Hin mindilo so na, mizli ngi Buymisemuŋhoy a tiɓaka zuma buyo. 23Joˀ mbur tuwa a ɓiy: «Gwat misahmi mumufaɗ naŋ na, i zumabuy mumufaɗ naŋ masa gi asi ruwuy. A sa gi naŋ wal avu zumabuy numuŋhoyo cek. A sa zuma hirwuyo cek cek, a sa gudubura li asi sar waɗ a wuɗuka meɗ meɗe. 24Durum mukuruˀhoyo, ar zumabuy nana, buyoy kuruˀ a sa boko asi cala asi cala. Mekelem a sa bo a dirba taŋ ma. Naŋ wal avu mudumbuŋhoyo, a sa kiɗ buyoy makir. 25A sa ɓi ɓi malambaˀ ar Buymisemuŋ Mimadiɗa wãˀa, yo a sa guzuvura mizli ngi Buymisemuŋ Mimadiɗa. A sa wuɗ ɓa a mbiɗa hin ngi muguzlumoy ati ɓimujuwahaya. Mizli tayna a sa ndiram asi haŋ naŋ ngi vi makir ti reta. 26A dirba nah, a sa cifam ngi gi kiita, a sa tikakaŋ ngi zuma buyo, ɓa a susuyumokoŋ, a zizakaŋ ngi wãˀ. 27Na zumabuy, gi madiɗa muwãˀ waɗ micawwa ar zumabuy naŋ gar misi asi ruwuy kurzluˀ gara, a vulaka le da mizli ngi Buymisemuŋ Mimadiɗa wãˀa.

Zuma buy naŋ, i zumabuy mandir ngi sete,

gidaŋ ngi zuma buyoy, a sa gam gawla naŋ, yo a sa cinakaŋ mi.» 28Slufa ɓi ngi kleŋ ɗu a kiɗ mi ar hana. Ya Daniyele, wuluk ara giriy haɗa. A pusluɗiy vu ndararara, i ro di a mevele.

Currently Selected:

DANIYEL 7: BEGDC

Highlight

Copy