DANIYEL 6
6
1Dariyus mbur Medi a ci buyo, naɓa naŋ ti vi kukur merkeɗ ngaˀ cuw.
Mesene ngi Daniyeley migam wer ngi ji naŋ
2Dariyus a wuluk ɓa a ci madiɗa ngi mizli micawwahay skat ti kukur cuw, ɓa a tislaka li zuma buyo tisl wãˀ. 3A cifi madiɗa ngi slrahay makir ma, Daniyele naŋ a wuzla taŋ. A ca taŋ ɓa mizli micawwahay a slufaka taŋ ɓi ngi gwat macuh ar zumabuy taŋhaya, ɓa ko gwat a zuma hirnga da buyoyo ta. 4Na ma na, Daniyel tuwa, a funa madiɗa migi slrahay micuw numuŋhoy ati mizli micawwahaya le, asi naŋ ti lesl haɗa, dar buy a wuluk ɓa a cufaŋ, i madiɗaŋ ar zuma buyo. 5Dar madiɗa ngi migi slrahay ati mizli micawwahay tuwa, a wulkam da a lumam zluɓ neˀ avu Daniyele ar ɓi ngi zuma buyo kwana. Amma ko a lumam zluɓ ava ta, a lumam malambaˀ ava ta, asi naŋ teŋteŋ, yo gi gwat ti sefel anta ava ta, gwat malambaˀa a lumam avaˀa ko pal ta. 6Joˀ mizli tayna tuwa a ɓam: «Ar Daniyele, ndr'anta sa lumam zluɓ ko pal ta, sey i sa lumam naŋ muzluɓ le avu ɓimujuwa ngi Buymisemuŋ naŋ sukwani.» 7Joˀ mizli madiɗa ngi slra ati mizli micawwa tayna, a kilam kutum, ara lumaka buyo a ɓakaŋ: «Aw buy Dariyus! Anja ki ndir ngi sete! 8Mizli madiɗa ngi slrahay gar ar zuma buyo, mizli micawwahay, miji kaway, mukuti vuhoy, waɗ miwi lihey gar a gam kus madiɗa, ɓa buy a cici ɓi ar zuma buyo, yo ɓa a ɗuv ɓi ngi tika gwatay, mitikahay, kaɓa ani: ar hin kukur makir na, ko wa gar midir dibiɗ le da kuli, malla da mbur, mbak ka buyo le na, a sa hizigakaŋ ng'ar butum ngi moboroy. 9Aw buy ɗu, wurenna so na, juw ɓi ngi tika gwat waɗ haŋ ɗik taˀ ara, anja a mbiɗi takaɓa ɓimujuwa ngi Medihey ati ngi Persehey ma mbiɗi ta na ya.» 10Ar nah na, buy Dariyus a tuh ɓi micica ngi tika gwatay, a ɗuva haŋ ara.
Mihizigaka Daniyele ng'ar butum misi moboroy
11Ti Daniyel misina, buy a ɗuv haŋ le ar ɓi micica ngi tika gwatay na, a ci ngi hay naŋ. Haya, naŋ jirngasl a hirnga cala, ngi muŋ naŋ, fenetirey ava baŋ baŋ kini nga Zeruzalem. Vur hin gar na, a ga kanah is makir, ka naŋ maga zleˀe, a huruk huruk ti miliwis, a dir dibiɗ, a hunuma Buymisemuŋ naŋ. 12Dar mizli tayna tuwa, a wusam vu, ara lumaka Daniyele, ara dir dibiɗ, ara tumbulo Buymisemuŋ naŋ. 13A mam, ara lumaka buy madiɗa vur ɓi ngi naŋ muɗuv ɓi ngi tika gwat tuwa, a ɓakaŋ: «Ki ɗuv haŋ le ar ɓi micica ngi tika gwat, ki ɓi: ‹Ar hin kukur makire, da mbur midir dibiɗ le da kuli mekelem, malla da mbur mekelem mbak ka buyo le na, a sa hizigaka ng'ar butum ngi moboroy› kini takwa buy?» Buy a mbiɗa taŋ di: «Naŋ kanah gisiŋ, ko anta mbiɗi takaɓa ɓimujuwa ngi Medihey ati Persehey na.» 14Dar a ɓaka buyo: «Kumani ɗu, na Daniyel ngi wuzla mizli mijoko taŋ ti Zuda tuwa, anta cin mi da ka buyo ta, da ɓi mitikaka muɗuva haŋ ara na ta ma, asi ara dir dibiɗ da Buymisemuŋ naŋ, vur hin gar is makir makir.» 15Ti buy madiɗa micina ɓi nah cin na, hiri ndaɓaɓaɓa. A ɗuva wuluk naŋ taˀ ngi laha Daniyele. Hã ngi pastaˀa, ara sipi jiviɗ ngi lih naŋ. 16Mizli tuwa, a mam kutum ng'avu buyo, a ɓakaŋ: «Kumani, ɓimujuwa ngi Medihey ati Perseheye a ɓi, da buy a tik gwat le, yo a ɓi le ɗaˀ na, ko ɓi nah anta mbiɗi ta na, ki si na le takwa?» 17Akẽh na, buy a ɓa mizli ɗaˀ, a soko ti Daniyele, ɓa a hizigaka ng'ar butum ngi moboroy. Buy a ɓa Daniyele: «Anja Buymisemuŋ ɗik, ka madiraŋ dibiɗ hirdam hirdam na, a lihuw.» 18A kam ɗugur risl a mi vigiɗe. Buy a ɗuva haŋ ti dangwa naŋ ati ngi mizli hirnga naŋhay ara, ɓa ɓi ngi Daniyele, gwat ma mbiɗi anta mata. 19Joˀ buy a cuh ng'ar mugum naŋ. Ngi hiikuɗo, ko a zum gwat ta, a ngum ɓa mangasl naŋhaya a soko nga ciki naŋ ta, hinje a gaŋ ta ma.
Daniyel mubo tir butum misi moboroy, minja gwat a gaŋ
20Buy a slikiɗ ngi li, a wus vu nga mi butum ngi moboroy tuwa. 21Ti naŋ migweˀ a mi butum na, a tila mi da Daniyele ti ˀay ɓel ɓel. Joˀ a ɓaŋ: «Aw Daniyel ɗu! Gawla ngi Buymisemuŋ misi ti siifa, Buymisemuŋ ɗik, ka magaŋ slra hirdam hirdam tuwa a lihuw le ti balam moboroyo kwa?» 22Joˀ Daniyel a ɓa buyo: «Aw kumani ɗu, anja Bumbulvuŋ a juw hutuŋ subur! 23Buymisemuŋ ɗu a slino modro naŋ le, a gica mi ngi moboroyo kap kap, ani ko a gikiy gwat ta, asi Buymisemuŋ a pura le, ya jeŋŋe a mbuŋ naŋ, yo ka buyo kwana, yi guw malambaˀ ko pal ta.» 24Dar hiri a cira buyo haɗa, a ɓa mizli, a boko ti Daniyele tir vigiɗe avra. Daniyel mubo na, a lumam waˀa ko neˀ ava ta, asi a tiɓa Buymisemuŋ naŋ le a mevele. 25Buy a ɓa mizli, a soko ti mizli minjikaka Daniyel tuwa, a hizigaka taŋ ng'ar butum ngi moboroy tuwa, jom ati ziri taŋhay waɗ ngwas taŋhaya. A ndilaka virzi ngi vigiɗe t'aruŋ si na, moboroy a vaka taŋ kac kac, a humbuɗa ka taŋ kirap kirap, jom ti tesleye. 26Akẽh na, buy Dariyus a tuh letir da mizli gar, sukwihey ati mizli maɓam mi miwal walay misi asi hirwuy gar, a ɓa taŋ: «Anja ki cifam zuy zuy kuy kuy! 27I vula mingiɓi ɗu ani, ya miɓa ɗaˀa: anja a zluwunam kirkir ti Buymisemuŋ ngi Daniyele, ar zumabuy ɗu gar.
Asi Buymisemuŋ misi ti siifa i naŋ, yo a ndir ngi sete.
Zuma buy naŋ anta kiɗ ta, yo a sa ndir i buy madiɗa hã ngi samadin.
28A cuko mburo tir bonoyo, yo a lahaŋ,
a gi gwat mabigi gwat ati gwat migam ɗaˀ tahay a muŋ waɗ a ruwuyo,
ani a laha Daniyele le tivi mi ngi moboroyo.» 29Ti Dariyus ati Sirus buy Persehey muroko ar buy aruŋ na, na Daniyele a lum madiɗa nga mbuŋ nga mbuŋ.
Currently Selected:
DANIYEL 6: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
