San Marcos 9

1Ka Jesusi arhiasptiteru:

–Sési jimboksïnisï arhini jaka; chájtsï máru engajtsï ixu jaka, nótkijtsï uarhini jauaka, andajkorheakajtsï exeni Diósïri juramukuani enga uinhapekua jinguni janoni jauaka.#9.1 Mk 13.30; Mt 16.28.

Jesusi ménderueni jáxentasti

(Mt 17.1-13; Lc 9.28-36; 2~P 1.16-18)

2Kuímu jurhia tátsekua, Jesusi k'éri ma juátarhu niraspti, jimesï enga nóteru nema jámempka, ka pájtaaspti Pédruni, ka Santiaguni ka Juánuni. Ka enga niárapka, imaksï exexapti enga ménderueni jáxentapka. 3Imeri xukuparhakua meremerejkuntaspti ka t'uput'upuxentani, eska iéstakua, ma parhakpeni ima sánderu urapespti. 4Ka jurhengorherichaksï Eliasïni ka Moisesini exeaspti#9.4 Mal 4.5-6 (3.23-24). engaksï Jesusi jinguni uandontskurheni jápka. 5Ka Pédru arhispti Jesusini:

–Jurhentpiri, ¡Séskuchi ixu jarhaska! Tanimu uapajtsïtakuachi úaka: Ma chétiuati, máteru Moisesiriuati ka máteru Eliasïriuati.

6Pédru no jánhaskasïrempti ambesï uandapirini, jimbokaksï chérakorhetixapka. 7Ka ísku úndaspti xúmu#9.7 Janikueni jasï. Diósïri t'íntskua xúmurhu xarhatspesïrempti ménichani isï: Eks 16.10; 33.9-10; 40.34-38; 1 Ir 8.10-11. andajtsïkueraani ka ópchakurhaaspti: Ka xúmurhu uandakua ma kurhakorhespti, enga arhimpka: “I jucheti Uátsïtisti engani ji xáni xénhchka:#9.7 Griegu jimbo ístu kurhangukurhisïndi eska ma uájpaniksï arhini jaka. Jen 22.2; Pir 2.7; Is 42.1; Mt 3.17; 12.18; Mk 1.11; Lc 3.22. Kurhajcha je.”#9.7 Dt 18.15. 8Ka mátirku, engaksï ménderu exepka, nóteru nema jámsïremptia, Jesusiterkusï jáptia.

9Ka engaksï kétsemunguani jápkia, Jesusi arhiaspti eskaksï nótki nemani aiangupiringa imani ambe engaksï juátarhu exepka, eka Acheti Uájpa nótki tsíntani japiringa.#9.9 Exea 1.34 ka 2.10. 10Ka imaksï patsakuspti, k'óruksï kurhamarhperani pakaraspti, ambespki tsíntskua. 11Ka kurhamarhesptiksï Jesusini:

–¿Andiksïsï juramukua jurhentpiricha uandajki eska urheta Eliasï junguaka?

12Ka ima arhiaspti:

–Ísïsti, Eliasï urhepunguati, ka ambantskantaati. ¿Ka andisï jiájkani karakata arhijki eska Acheti Uájpa#9.12 Exe 2.10. kánekua nósesi kánhaaka ka eska no xénhchanhani kánhaaka? 13Ka jíksïni arhixaka eska Eliasï junguaskia, ka nósesiksï kántasti, ísï eska na karakata jaka eskaksï na kámapiringa.#9.12-13 Mal 4.5 (3.23); 1 Ir 19.1-2,10.

Tumbi ma enga nósesi jásï espiritu incharhetini jápka

(Mt 17.14-21; Lc 9.37-43)

14Engaksï andarheantaapka máteru jurhengorherichani, uáni k'uiripu uirhipkurhatixapti, ka arhinhaskperaxaptiksï máru kararicha jinguni. 15Ka engaksï Jesusini exepka, iámenduecha ísku pakareranhaspti, ka uiriasptiksï jájki íntskuni. 16Ka Jesusi kurhamarheaspti:

–¿Ambejtsïsï xáni arhinhaskperani jaki indecha jinguni?

17Ka nema enga jima jápka arhispti:

–Jurhentpiri, jucheti uátsïnikini juácheska enga no újka uandani, jimboka nósesi jásï espíritu incharhetixaka. 18Enga p'íntka, perentskantasïndi; ka k'uruata uéchasïndi, ka sînichani kirisïmeantasïndi, ka chánchanhaxentasïndi.#9.18 Mt 17.15. Ka kómu arhiaska chéti jurhengorherichani eskaksï petarhetantapiringa imani nósesi jásï espírituni, ka nóksï ústi.

19Ka Jesusi arhiaspti:

–¡No jakajkuticha! ¿Na jatini jamberi chánksïni jinguni jaua? ¿Na xánteruksïni tekantaa? Juáchejtsïni tumbini.

20Ka engaksï na pérakupka, nósesi jásï espiritu Jesusini exerini uinhamu jupintaspti tumbini, ka ima tumbi kuarhatsespti ka peretsentani k'uruata uéchaparini. 21Ka Jesusi, tumbiri tátjembani kurhamarhespti:

–¿Na jatini uénaski inde ísï jámani?

Ka tátjemba arhispti:

–Sapirintkia. 22Ka sóntku méni uekastia uándikuni, méni chpírirhu k'uanijpasïndi ka méni itsïrhu k'uanimasïndi. Ekari ambe újka néna jámani, p'amojkujtsïni sáni ka jarhuatajtsïni.

23Ka Jesusi arhispti:

–Ásïrini arhi: Ekari ambe újka, arhini ¡Ne emanga jakajkujka, iámendu ambe úsïndi úkorheni eska na uékani jarhajka!#9.23 Mt 21.21; Mk 11.23-24; Lc 17.6.

24Ka tumbiri tátjemba uinhachaparini arhispti:

–Ji jakajkusïnga ¡Ka jarhuatarini jakajkuni sánderu!

25Enga Jesusi exepka eska uánenhantaxapkia, nósesi jásï espirituni xukaspti, arhiparini:

–Nósesi jásï espiritu nunuxi ka kándi, juramuchexakakini eskari uérhentaaka tumbini ka ásteru méni jáma incharhentani.

26Ka nósesi jásï espiritu ménderu tumbini p'íntaspti, ka uinhachaparini nósesi kántaspti nóna uérhentani, ka tumbi mirikurhitini pakaraspti, ka uandanhasïrempti eska uarhispkia. 27Ka Jesusi jupijkuspti tumbini, ka jauatani; ka ima anhaxurhintaspti.

28Ísï tátsekua, enga Jesusi k'umanchekuarhu#9.28 Mk 7.17 niántapka, ka engaksï na jandiojku jápka, imeri jurhengorherichaksï kurhamarhespti:

–¿Andisïni jucha no u xásï espirituni petarhetantani?

29Ka Jesusi arhiaspti:

–Imeni járhati nóambarhatichani, kómarhikua jimbojkusï újti kénditanhani.

Jesusi ménderu uarhikua aiangpekorhesti

(Mt 17.22-23; Lc 9.43-45)

30Ka jima uératiniksï Galilea isï niraspti. Ka Jesusi no uéksïrempti eska mítekorhepiringa, 31jimboka imeri jurhengorherichani jurhendapaaxapka. Ka arhiasïrempti:

–Acheti Uájpa#9.31 Exe 2.10. jupinhaati ka atanhaati uándikunhani ka tanimu jurhia jimbo tsíntaati.

32Imaksï no kurhangusïrempti enga ima arhiani jápka, ka chésïremptiksï kurhamarheni.

¿Ne sánderu k'éri ambeski?

(Mt 18.1-5; Lc 9.46-48)

33Engaksï niárapka Kafarnaumi ka k'umanchekuarhuksï jarhania, Jesusi kurhamarheaspti:

–¿Ambejtsïsï xáni arhijperapunguani jápi?

34Ka imaksï ísku pakareraspti, jimbokaksï arhirperapantaxapka ne sánderu k'érispki 35Jesusi uaxakaspti, ka iámendu jurhengorherichani uandajpaaspti (témbeni tsimani) ka arhiaspti:

–Ima enga sánderu k'éri ambenhchajka, jatsiati sánderu sapichuentani ka iámenduechani marhuakuani.#9.35 Mt 20.26-27; 23.11.

36Ka sapini ma ióarhispti ka terujkani péraspti, ka kamanharhitini arhiaspti:

37–Ekajtsï jucheti jakangurhikuani jimbo jiókaska ma sapini, jíndentsïnisï jiókani jaka, ka ekajtsïni jíndeni jiókaska, Tátentsï jiókaxaka, jimbokarini imasï axaka.#9.37 Mt 10.40; Lc 10.16; Jn 13.20.

Ima engajtsïni no ójkutajka, juchantsïni jingunistiksï

(Mt 10.42; Lc 9.49-50)

38Juánu arhispti:

–Jurhentpiri, achetini máchi exeska, enga chéti jakangurhikua jimbo nóambakitichani petarhpeantaani jápka, ka nóteruchi jiáretaskia jimboka no juchantsïni jinguni jámsïnga.

39Ka Jesusi arhiaspti:

–Ásï jáma je no jiáretani, jimboka nónema úaka Diósïri uinhapekuani jucheti jakangurhikua jimbo úrani, ka tátsekuarini nósesi uandatseni jarhania. 40Ima engajtsïni no ójkutajka juchantsïni jingunistiksï.#9.40 Mt 12.30; Lc 11.23. 41Diósï, maiamuantauati imechani engaksï chánksïni itsï intsïmbeaka, jimbokajtsï Krístueriska, sési jimboksïni arhixaka eskaksï ima no tsîtaaka intsïmperatani.#9.41 Mt 10.42.

Néna no k'amanharhintani

(Mt 18.6-9; Lc 17.1-2)

42“Eka nema terungutaraska sapini ma engarini jakajkujka, sánderu sésipirindi eska k'énharhi ma tsakapu urhuratarakua jójchakunhapiringa ka japundarhu k'uanimanhani.#9.42 Mt 18.6. 43Ekakini chéti jájki nósesi jásï ambe niátani terungutaraska, kachujku;#9.43 Mt 5.29-30. sánderu sésiuati eskari tokojkutini inchaaka tsípekuarhu, ka nóri chpírirhu#9.43 Infiernurhu. k'uanijpanhani tsimani jájki jukarini, jima enga nómeni pójpejka, 44[jima engaksï ‘Karhasïcha nómeni uarhijka, ka níjtu chpíri pójpeni.’]#9.44 I uandakuecha nóksï xarhantasïndi griegu ióntki anapurhu. Exe 9.48. 45Ekakini chéti jantsiri terungutaraska, kachujta; sánderu sésiuati tokojtatini inchani tsípekuarhu, ka nóri tsimani jantsirichani jukaarini chpírirhu k'uanijpanhani, jima enga nómeni pójpejka, 46[jima engaksï karhasïcha nómeni uarhijka, ka níjtu chpíri pójpeni.]#9.46 I uandakuecha nóksï xarhantasïndi griegu ióntki anapurhu. Exe 9.48. 47Ekakini chéti éskua nósesi ambe úni terungutaraska, p'itanharhi; sánderu sésiuati engari ma éskua jinguntku inchaaka tsípekuarhu, ka nóri chpírirhu k'uanijpanhani tsimani erhakua éskua jinguni,#9.47 Mt 5.29. 48jima engaksï karhasïcha nómeni uarhijka, ka níjtu chpíri pójpeni.

49Chájtsï etukua ka chpíri jimbo pímbinhajkunhantaaka.#9.49 Lb 2.13.

50Etukua ambakiti ambesti; ka ¿Ambe jinguniterujtsï ásperaa, enga etukua tsîjpeska?#9.50 Mt 5.13; Lc 14.34-35. Patsakorhe je etukua, ka sési arhijperaparini irekani ja je.”

Currently Selected:

San Marcos 9: DKPJ

Highlight

Copy