San Marcos 8

Jesusi ménderu uáni t'irerpesti

(Mt 15.32-39)

1Ma jurhiatekua uánekua tángorhenhantaspti ka nónema kámsïrempti t'irekua. Jesusi ióarhispti imeri jurhengorherichani ka arhiaspti:

2–P'amojkpexaka, jíndeni jinguni jámbarini tanimu jurhia no t'irenhastia. 3Ka ekani nómbema atini axajpentaska, indeksï xanhari jimbo chkéati, jimbokaksï máru iauani uératini jurhaska.

4Ka imaksï arhispti:

–¿Ka ixuchi nénasï t'irerpeaia, enga nónema irekaka?

5Ka Jesusi kurhamarheaspti:

–¿Andi kurhindajtsï namoni kámaxaki?

Ka arhisptiksï:

–Iúmu tsimani echakua.

6Ka arhijpespti eska uaxakanhapiringa, ka kurhinda jupikatini, ka diósïmaiamukua arhintatini, ústatspespti ka imeri jurhengorherichani íntsaaspti, ka imaksï íntspespti. 7Ka ístuksï máru kuruchechani káaxapti, ka Jesusi újchakuraaspti, ka juramuspti eskajtuksï imantu intspepiringa. 8Ka niáchanhantaspti anhani, ka pakarakataksï iúmu tsimani tsïkiata uiniri tánantaspti. 9Ka témbeni irepeta (4,000) isï t'irenhaspti. Tátsekua Jesusi axajpentaspti, 10ka Jesusi imeri jurhengorherichani jinguni icharhutarhu jatantaspti, ka Dalmanuta#8.10 Ístu Magdala arhinhasïrempti: Mt 15.39. uanondani isïksï niraspti.

Fariseuechaksï milagru#8.10 Eska auandarhu anapu uinhapekua exeraapiringa. kurhajkorhespti

(Mt 16.1-4; Lc 12.54-56)

11Jimaksï niáraspti fariseuecha ka Jesusini jingunksï arhinharhikperani; arhisïremptiksï eska milagru ma exeraapiringa, eska xarhatapiringa eska Diósï axaspka, jimbokaksï ts'éjkuni uéksïrempka.#8.11 Mt 12.38; Lc 11.16; Jn 6.30. 12Jesusi k'éri ma k'arhanguntaspti ka uandaspti:

“¿Andijtsïsï méntku milagru kurhajkorheni jaki?#8.12 Mt 12.39; 16.4; Lc 11.29. Sési jimboksïni arhixaka eskajtsï cha nóma milagru exeranhaaka.”

13Ka kéndikukuaspti ka k'uanhatsentaspti icharhutarhu ka japundarhu parhimentaspti.

Fariseuecheri xarhiperakua

(Mt 16.5-12)

14Jurhengorherichaksï mirikurhispti icharhutarhu t'irekua jatsirani, ka ma echukua kurhindajkuksï kámaxapti. 15Jimajkani Jesusi arhiaspti:

–Xéparini jáma je fariseuecheri ka erodesicheri xarhiperakua jinguni.#8.15 Mt 14.1.

16Ka jurhengorherichaksï arhijperaspti eska ísï arhiaspka jimbokaksï t'irekua mirikurhispka jatsirani.

17Ka Jesusi mítespti ambe engaksï arhijperani jápka ka arhiaspti:

–¿Andijtsïsï kurhinda uandanheani jaki? ¿Útasïjtsï no jánhaskasïnki? ¿Andi xántsï chupejtsïski? 18¿Andi nójtsï exexaki nájkirukajtsï eskani jaka? ¿Ka andi nójtsï kurhangusïnki nájkirukajtsï kurhani jaka?#8.18 Jer 5.21; Es 12.2; Mk 4.12. ¿Andi nójtsï míasïnki 19engani iúmu echakua kurhinda jimbojkuni iumu míli t'irerpeka? ¿Nójtsï míasïnki namonijtsï tsïkiata uiniri tánantaspki pakarata?

Ka imaksï arhispti:

–Témbeni tsimani.#8.19 Mk 6.43.

20–Ka ekani iúmu tsimani kurhinda jimbojku, témbeni irepeta (4,000) t'irerpepka ¿Namontsï tsïkiata uinirantaspki pakarata?

Ka imaksï arhispti:

–Iúmu tsimani.#8.20 Mk 8.8.

21Ka arhiaspti:

–¿Andi útasïjtsï no úsïnki jánhaskani?

Jesusi pátenharhini ma ambakerantasti#8.22-26 Exejtu Mk 7.32-37.

22Engaksï Betsaida niárapka, Jesusiniksï pátenharhini ma pákuspti, ka kómarhisptiksï eska p'ájtsïkupiringa ambakerantani. 23Jesusi pátenharhini jupijkutini iretarhu petaataspti. Ka kuechenda#8.23 Exe kétsekua Mk 7.33. atanharhikuspti eskuarhu, ka p'ájtsïkuspti ka kurhamarheni ¿Exexakiri? 24Ka ima pátenharhi uénaspti exeni, ka uandaspti:

–K'uiripuechani xéaxaka, anhatapueni járhatichenksï xanharaxati.

25Jesusi ménderu p'ánharhikuspti, ka pátenharhi, Jesusini exeni pakareraspti, ka sési eskantaspti, ka úspti iámendu ambe sési exeni. 26Ka Jesusi axantaspti chénjembo, ka arhispti:

–Ásï jáma k'uanhatsentani iretarhu, [ka ásï nemani jáma aianguni.]#8.26 Exe kétsekua Mk 1.1 ka 1.34.

Pédru uandasti eska Jesusi Krístueska.

(Mt 16.13-20; Lc 9.18-21)

27Ísï tátsekua, Jesusi ka imeri jurhengorherichaksï niraspti ireta sapirhaticharhu isï, engaksï Sesarea Filipueri#8.27 Romanuecheri k'éri ireta enga Galilea anapu japundarhu karhamani isï jaka. uanondani isï jaka. Ka xanhari jimbo kurhamarheaspti imeri jurhengorherichani:

–¿Na uandanhaxaki, eskani néska?

28Ka imaksï arhispti:

–Uandasïndiksï máru eskari Juánu itsï atajtsïkpiriska,#8.28 Mk 6.14-15; Lc 9.7-8. ka máteruechaksï uandasïndi eskari Eliasïska,#8.28 1 Ir 17–2 Ir 2; Mal 4.5-6 [3.23-24]. ka máteruksï uandasïndi eskari Diósïri uandariska.

29Ka Jesusi ménderu kurhamarheaspti:

–¿Ka cha néna uandasïnki?

Ka Pédru arhispti:

–T'úri Krístueska.#8.29 Jn 6.68-69. Mesiasi ebreo jimbo ka Krístu griegu jimbo tsimani ambeksï arhikuekasïndi “Aseti atajtsïkukata” ka “Míndakata”.

30Ka Jesusi arhiaspti eskaksï no jámapiringa imani ambe uandantani.#8.30 Exe Mk 1.34.

Jesusi imeri uarhikueri ambe uandantasti

(Mt 16.21-28; Lc 9.22-27)

31Ka Jesusi uénaspti uandantani eska Acheti Uájpa#8.31 Exe 2.10. kánekua nósesi nitamanchapiringa, ka eskaksï no xénhchapringa k'érati tátecha, níjtu táteri juramuticha, ka níjtu juramukua jurhentpiricha. Uandasïrempti eskaksï atapiringa uándikuni, ka eska tanimu jurhia jimbo tsíntapiringa. 32Íni ambe aianguaxapti. Ka Pédru támu páspti Jesusini xukani. 33Ka Jesusi k'uanhatsentaspti, ka jurhengorherichani japarini, Pédruni xukaspti, ísï arhiparini:

–¡Kéndikucherini, Nóambakiti!#8.33 Exe Mk 1.13. T'úri no kurhangusïnga Diósïri ambe, parhakpeni anapu ambejkurisï exejka.

34Tátsekua Jesusi tánpentaspti ka jurhengorheri jémbechantu uandajpantaaspti, ka arhiaspti:

–Eka nema uéjka jucheti jurhengorherini, imeri eratsekuechani ka jánguechani mirikurhiaue, krúsini ichandikorhe ka chúxapuerini. 35Jimboka ne enga tsípekuani patsakorhenhchajka, ima sánderu tsîtaati; Ka tsípekua andakorheati ne enga jíndeni jimbo ka ambakiti aiangperakuani jimbo uarhiaka,#8.34-35 Mt 10.38-39; Lc 14.27; 17.33; Jn 12.24-25; Ro 6.2-11; Gl 2.19; 6.14; Kol 3.3-5. 36¿Andi embe marhuasïni iámu parhakpenini andakorheni, ka jini tsípekuani tsîtakorheni? 37Ka ¿Andi ma náxani jimbo úsïni tsípekua piákorheni?#8.35-37 Mt 16.25-26; Lc 9.25. 38Jimboka, ekarini nema k'uratsenharhiska ísku jándichani japarini, ka k'amanharhintstichani japarini, ka eka jucheti aiangpekua jimbojtu k'uratsenharhiska, Acheti Uájpajtu#8.38 Exe 2.10. k'uratsenharhiati jiájkani enga Tátjemberi t'íntskuani jukarini junguaka, ka enga ánjeli pímbinharhatichani jinguni junguaka.#8.38 Mt 10.33; Lc 12.9.

Currently Selected:

San Marcos 8: DKPJ

Highlight

Copy