San Marcos 12

Uandantskua tarhericheri engaksï nósesi jásï mintsita jatapka

(Mt 21.33-46; Lc 20.9-19)

1Jesusi uénaspti terukutantskuechani jimbo arhijtsïkuani, ka arhiaspti: “Acheti ma úba ikaraspti,#12.1-2 Is 5.1-7; Mt 21.33. ka uatsotaspti; ka kuákua ma úspti jima enga úba tsitaranhapiringa, ka iótati ma kuaritarakua úspti enga úempka iápuru isï erajpatarani, tátsekua tarherichani máru kuánetaaspti echerini enga úba ikarakata jápka, ka uéakuspti. 2Ka enga na niárapka jurhiata, imeri jántspirini ma axaspti tarherichani andakua kurhakuantaani. 3Ka imaksï jupikaspti, ka atasptiksï, ka ískuksï axantaspti. 4Ka acheti úba ikarati máteru jántspirini axaspti, ka indeniksï arhajtsïkuspti, ka nósesi arhisptiksï. 5Máteru axaspti, ka indeniksï ataspti uándikuni. Tátsekua Uánekuateru axaaspti; máruksï ísku ataaspti, ka máruksï ataaspti uándikuani.”

6“Máterkuni nótki axaxapti: Uájpani, enga ima xáni xénhchempka. Ka k'amarani jámani imani axaspti, ísï eratseparini: ‘Jucheti uátsïni k'óruksï janhanharhiati.’ 7Ka tarherichaksï arhijperaspti: ‘Iámendu ambe i jurajkumenhaati; ju je uándikuni ka iámu ambechi jucha míngorheaka.’ 8Ka ísï jámani, jupikasptiksï, ka uándikusptiksï, ka k'uanitamantasptiksï.”#12.8 Nósesi jásï jimbo petantani.

9“¿Cha néna arhijki eska jámaaka ima acheti enga úba ikaratika? Niántatini tarherichani atauati uándikuani, ka echerini enga úba ikarakata jaka máteruechani íntsauati.”

10“¿Andi nójtsï méni arhitaski karakatani? Jima enga arhijka:

‘Ima tsakapu engaksï k'umanchekua úricha no jaiapanhentaka,

iásï tsumbindikua kasïperakuarhu jatsikunhastia.

11Ka íni ambe Diósï ísï ústi,

ka ísku pakareratixakachi.’ ”#12.10-11 Pir 118.22-23; Uk 4.11; Ro 9.31-33; 1 P 2.6-8.

12Jimajkaniksï Jesusini jupikani uékaspti, jimbokaksï p'íkukorhetaspka eska imechanisï arhiani jápka. Ka nóksï tekaaspti jimbokaksï chérhpespka, ískuksï jarharentasptiksï ka níntaniksï.

Tumina Roma axakueri kurhamarhperakua

(Mt 22.15-22; Lc 20.20-26)

13Tátsekuaksï Jesusini máru fariseuechani axakuaspti ka erodesiri eratsekua chúngumatichani, uandakua p'itachakuniksï uékani engaksï jimbo úpiringa k'amanharhirantani. 14Ka niáratinksï arhispti:

–Jurhentpiri, míteskachi eskari imani ambe uandasïnga enga ísïka, náuejkiri ménderueni uandamenhantani, jimbokari t'u nónemani sési pakarakuxamka. T'úri sési jimbo jurhentpesïnga Diósïri xanhari. Ka arhijtsïni sáni: ¿Sési jarhaski eskani jucha maiampeaka engajtsïni Roma anapu juramuticha kurhachejka? ¿Íntspeachi ochi ua no íntspeni?#12.14 Mt 22.17.

15Jesusi p'ikuarhetsespti imecheri uandakuechani eskaksï ískusï ísï arhini jápka, eskaksï ts'éjkunisï uékempka, ka arhiaspti:

–¿Andijtsïnisï ts'éjkuni uéjki? Exerajtsïni je ma taiakata.

16Íntskusptiksï ma, ka Jesusi kurhamarheaspti:

–¿Nésï ixu jukanhari ka nériski i karakata enga ixu jukanharhika?

Ka arhisptiksï:

–Sésariri.

17Ka Jesusi arhiaspti:

–Sésarini íntsku je, ambe enga Sésaririka; ka Diósïni íntsku je, ambe enga Diósïrika.

Imaksï ísku pakareraspti engaksï ísï arhinhapka.#12.17 Ro 13.7.

Tsíntskueri kurhamarhperakua

(Mt 22.23-33; Lc 20.27-40)

18Tátsekuaksï Jesusini saduseuecha máru andarheraspti,#12.18 Saduseuecha: Kúngurhikua jakajkukueri judiouecheri engaksï no jakajkujka ánjelichani ka ni tsíntskuani: Mt 22.23; Uk 4.1-2; 23.8. engaksï ima engaksï uandajka eskaksï uarhiricha no tsíntasïnga ka arhisptiksï:

19–Jurhentpiri, Moisesijtsïni karakata jimbo jurhengaua jurajkuchcesti, enga arhijka eska enga acheti ma uarhiaka ka témbani nóma uájpani jurajkukuni, eska erachi jémba jatsiaka uarhiti tsîndini tembuntani, ka erachi jémbani sïrukua jurajkukuni.#12.19 Dt 25.5-10. 20Ka jarhasptiksï ma xanhari, iúmu tsimani erachicha, ka ima enga urhetipka tembuchaspti, ka uarhispti ka nóma uájpani jurajkuni. 21Ka uarhiriri erachi enga chúxapempka tembuntaspti uarhiti tsîndini ka imajtu uarhispti ka no ma uájpani jurajkukuni. Ka méntkueni jámaspti tanimu úni jámani, 22ka méntkueniksï k'amandespti iúmu tsimani erachicha; ka nónema sapini jurajkuspti. Ísï tátsekua uarhitijtu uarhispti. 23Ka néna jámaia tsíntskuarhu, ¿Andi ima uarhiti néri tembentaia engaksï iúmu tsimani erachicha tembupka?

24Ka Jesusi arhiaspti:

–Támisïjtsï uandantaxaka, nójtsï sési arhitaska ka Diósïri juramukuantujtsï nósesi míteska. 25Engaksï uarhiricha tsíntaaka, nóteru tembuchanhaatia, jimboka Diósïri ánjelini járhanhantaaka, engaksï auandarhu jaka. 26Ka inde uarhiricheri tsíntskueri ambe, ¿Andi nójtsï méni arhintaski Moisesiri karakatarhu? Enga tsïtunirhu#12.26 Eks 3.2-6. Diósï arhipka: Ji Abraaniri, ka Isaakiri, ka Jakobueri Diósïska. 27Ima tsípiticheri Diósïsti, no uarhiricheri. Chájtsï kánekua támu ísï jámaxaka.

Juramukua enga sánderu jukaparhaka

(Mt 22.34-40)

28Ka juramukua jurhentpiri ma jima andarheraspti enga kurhajchaapka ka kurhanguntani eska Jesusi sési arhiaspka, ka Jesusini kurhamarhespti:

–Iámendu juramukuecha jinguni ¿Náki sánderu k'ériski?

29Ka Jesusi arhispti:

–Aristi sánderu k'éri: Kurha Israeli: Juchari Acha Diósï, májku Achesti; 30chéti Acha Diósïni mintsita jinguni xénhcha, jángua jinguni, eratsekua jinguni ka iámendu chéti uinhapekua jinguni xénhcha.#12.29-30 Dt 6.4-5. 31Ka máteru jarhasti enga arhijka: Máteruni ísï xénhcha eskari t'u na xénhchakorhejka.#12.31 Lb 19.18. Ka nóteru ma juramukua jarhasti enga sánderu k'érika.

32Ka ima juramukua jurhentpiri arhispti:

–Sésiri uandaska jurhentpiri, ísïsti eskari na uandajka: Eska májkueska Diósï, ka eska nóteru ma jarhaska.#12.32 Dt 4.35; Is 45.21. 33Ka eska uétarhesïnga Diósïni mintsita jinguni xénhchani ka eratsekua jinguni ka iámendu uinhapekua jinguni xénhchani; ka eskari máteru nemani ísï xénhchaaka eskari na xénhchakorhejka, inde ambe sánderu jukaparhakuesti eska kéjtsïtakua ambe ka eska ima ambe enga Diósïni aiakuparini kurhiranhajka.#12.33 Os 6.6.

34Enga Jesusi exepka eska juramukua jurhentpiri sési eratsentaparini mókukuspka, arhispti:

–Andarheraxakari Diósïri juramukuani.

Ka nóteru nema tekaaspti sánderu ambe kurhamarheni.

¿Néri sïrukueski Krístu?

(Mt 22.41-46; Lc 20.41-44)

35Enga Jesusi tiósïo jurhentpeni jápka, arisï kurhamarhpespti:

–¿Andiksïsï juramukua jurhentpiricha uandajki eska Krístu Dabidiri sïrukueska?#12.35 Is 9.2-7 [1-6]; 11.1-10; Jer 23.5-8; 33.15-17; Es 34.23-24; 37.24. 36Ka Dabidintu Espiritu Sántu ísï uandaraspti:

Acha arhispti jucheti Tatani:

Axu t'irerkandani uaxaka,

engakini jamberi chéti ikiatspirichani

jatandutarantauaka.#12.36 Pir 110.1; Mt 22.44.

37¿Nénajtu Dabidi uájpeua? ¿Nájki Dabidijtu Táte erataparini uandajpajki andi?

Jesusi juramukua jurhentpirichani uandakuantasti

(Mt 23.1-36; Lc 11.37-54; 20.45-47)

Uánekuaksï tsípekua jinguni kurhajchaxapti Jesusini. 38Ka Jesusi jurhentpeparini uandasïrempti: “Xéparini je juramukua jurhentpirichani jinguni, jimbokaksï takusï iórhati ambe xukuparhanchasïnga, ka uéksïndiksï eskaksï kópekuarhu isï sési uandajpanhaaka. 39Tángorhekuecharhu ka jimesï enga t'irekua ambe jauaka, jángorhesïndiksï k'érikuarhu uaxakani; 40ka uarhiti tsîndichanksï iámendu ambe euakorheasïndi,#12.40 Is 10.1-2. ka nónentanksï uékantku ióni uandatsekorhesïndi. Imaksï sánderu maiampetaranhantaati.”

Uarhiti tsîndiri tumina jatsirakata

(Lc 21.1-4)

41Tátsekua Jesusi jima erangurhini uaxakaspti enga tumina jatsirakua jápka, ka jima uératini exexapti na enga xáni tumina jatsiranhempka, ka jatsikorherichaksï uánhachani jatsirsïrempti. 42Ka uarhiti tsîndi nómbe jatsikorheri ma niáraspti, ka tsimani sapirhati taiakatajku jatsiraspti, enga no káni jukaparhakuepka. 43Jesusi ióarhiaspti imeri jurhengorherichani, ka arhiaspti:

–Sési jimboksïni arhixaka eska inde uarhiti tsîndi, nándi no jatsikorhe, eska inde sánderu kánekua tumina jatsiraska eska iámendu imecha engaksï uánhachani jatsiraka; 44jimbokaksï iámenduecha pakajkukatajkusï jatsiraka, ka inde uarhiti no jatsikorheri iámu jatsirasti enga nitamakorhetarapiringa.#12.43-44 2 Ko 8.12.

Currently Selected:

San Marcos 12: DKPJ

Highlight

Copy