San Marcos 11
11
Jesusi irecheni inchaakuntasti Jerusaleni
(Mt 21.1-11; Lc 19.28-40; Jn 12.12-19)
1Engaksï Jerusaleni andaparhakuerani jápkia, Betfage ka Betaniaksï niáraxapti, Olibusïrhu juátarhu isï, jima uératini Jesusi axaaspti tsimani jurhengorheri jémbechani, 2íni uandakua jinguni:
–Ni je amani iretarhu engajtsï eraani jaka, ka ekajtsï na niárajka, ch'anchakini májtsï jima xéaka enga nótki nema jatajka, jima jótakata jauati. Kuerata je ka juáchejtsïni. 3Engaksïni nema kurhamarheska. ¿Andijtsïsï kueratani jaki? Arhiakajtsï eska Acha úraaka, ka eska sóntku juánguaka.
4Imaksï niraspti, ka ch'anchakinksï xéntaspti, enga xanharu k'umanchekuarhu jamukutini jótakata jápka, ka kueratasptiksï.
5Ka máru engaksï jima jápka kurhamarheasptiksï:
–¿Ambejtsï úsïnki? ¿Andijtsïsï ch'anchakini kueratani jaki? 6Ka imaksï ísï arhiaspti eska Jesusi na arhistakuapka; ka jurajkukuasptiksïia. 7Imecheri sununda ambeksï tatsuparhakuaspti, ka Jesusiniksï pákuspti, ka ima jataspti. 8Xanhari jimboksï uánekua sunundechani ambe, ka pímu tatsuntskarakusïrempti engaksï juátarhu isï p'ikupka. 9Ka iámendu engaksï xáni urhekupempka ka chúxapanksï, uinhamuksï mintsitapasïrempti:
–¡K'uájpetsïni! ¡T'u újchakurakata, engari Acheri juramukua jimbo jurhani jaka!#11.9 Pir 118.25-26. 10¡Újchakurakatesti juramukua enga janoni jaka, juchari Táte Dabiri juramukua! ¡K'uájpejtsïni auandarhu uératini!
11Jesusi Jerusaleni inchaakuspti, ka tiósïo niraspti. Ka iámendu ambe exespti, ka tátsekua imeri témbeni tsimani jurhengorherichani jinguni Betania niraspti, jimboka chúrexapkia.
Jesusi xukasti jígusïni enga no úempka jukani
(Mt 21.18-19)
12Ka pauandekua, engaksï uéakuntani jápka Betania, Jesusi úndaspti k'arhimani. 13Ka iauani jatini exespti jígusïri anhatapuni ma enga xuxunhaxkurhipka, ka andarheraspti erarhutani nándika jukapka jígusï, ka chkúrhichantku erarhutaaspti, jimboka nótki jígusï jukakuespka. 14Ka xukajchaspti jígusïni, arhispti:
–¡Ásteru méni anhe chéti amanhejchakua!
Ka imeri jurhengorherichaksï kurhaspti.
Jesusi tiósïo ambantskantasti
(Mt 21.12-17; Lc 19.45-48; Jn 2.13-22)
15Tátsekuaksï Jerusaleni niáraspti, ka Jesusi tiósïo inchaspti ka petantaaspti imechani engaksï jima atarantani ka piáni jápka. Ka imechani engaksï tumina mójtakutspeni jápka, kéjpatarakua xerekuantaaspti, ka imechantu májkueni káaspti engaksï jipunhichani atarantaani jápka; 16Ka nónemani jiáretasïrempti eska tiósïo ísï parhikutapiringa atarantskua. 17Ka jurhentpeni uénaspti uandaparini:
–Karakatarhu arhisïndi: Jucheti k'umanchekua iámendu iretecheri kómarhijpetarakuesti.#11.17 Is 56.7. Ka chájtsï kuárhukujpiticheri irekua úntaskia.#11.17 Jer 7.11.
18Engaksï tátecheri juramuticha ka juramukua jurhentpiricha íni ambe kurhapka, uénasptiksï jirinhakuntani nénaksï atapirini uándikuni Jesusini, jimbokaksï chérhesïrempka enga imeri jurhentperakua jimbo iámenduecha ísku pakaranhempka. 19Enga na chúreni jápkia, Jesusi uéakuntaspti iretarhu imeri jurhengorhericha jinguni.
Jakajkukueri jurhentperakua
(Mt 21.20-22)
20Pauandekuaksï ménderu jígusïrhu isï nitamaspti, ka exesptiksï eska iámu k'arhispkia. 21Ka Pédru, miántaspti Jesusi néna enga uandapka, ka arhispti:
–Jurhentpiri exe, k'arhistia jígusï engari nósesi arhipka.
22Ka Jesusi arhispti:
–Mintsika je Diósïni. 23Jíksïni jurhimbitkusï arhini jaka eska, eka nema indeni juátani arhiaka: ¡Kéndikorhe ka japundarhu uekame! Arhini. Ka eka jakajkuparini ka nósani tsimanitsimanheaparini ísï eratseaka, ísï úkorheati.#11.23 Mt 17.20; Lc 17.6; 1 Ko 13.2. 24Jimboksïnisï arhini jaka eska iámendu ambe engajtsï kómarhijpekorheni jauaka, mintsika je eskajtsï intsïnhaskia, ka intsïnhaakajtsï.#11.24 Jn 14.13-14; 15.7. 25Ka ásï nemani jatanhekutini uandamukukorhe je, ekajtsï nemani jatanhekutini jaka, púakuntsï je, ka chári Táte enga auandarhu jaka, imajtuksïni májkueni púachentaati chári k'amanharhintskuechani. 26[Jimboka ekajtsï cha no púatspentaska, chánksïntuksïni Táte enga auandarhu jaka no puáchentaati chári k'amanharhintskuechani.]#11.26 I versikulu nóksï iápuru karakatecharhu griegurhu xarhantasïndi. Mt 6.14-15.
Jesusiri juramukua
(Mt 21.23-27; Lc 20.1-8)
27Tátsekuaksï ménderu Jerusaleni niántaspti. Ka enga Jesusi tiósïo isï jámani jápka, tátecheri juramuticha, ka juramukua jurhentpiricha ka k'érati tatechaksï andarheraspti 28ka kurhamarhenksï:
–¿Náki juramukua jimbori ísï ambe úxaki? ¿Nékini íntskuski juramukua indeni ambe úni?
29Ka Jesusi arhiaspti:
–Jíjtuksïni kurhamarheaka ambe ma: Arhijtsïni je, ka jíjtuksïni arhiaka náki juramukua jimbo íni ambe úxaki. 30¿Ne axaspki Juánu itsï atajtsïkpirini? ¿Diósï, o parhakpeni anapuecha?
31Ka imaksï arhinhaskperaspti: “Engachi arhiska eska Diósï axaspka, arhiatijtsïni, ka: ¿Andijtsïsï no jakajkukupkia? 32¿Ka nénachisï arhia eskaksï parhakpeni anapuecha axaspka?” Ísïksï arhispti jimbokaksï k'uiripuni chérhesïrempka, ka jimboka mítekata jarhaspka eska Juánu Diósïri uandarispka. 33Ka ísï jimboksïsï arhipti:
–Nóchi míteska.
Ka Jesusi arhiaspti:
–Jíjtuchkaksïni no arhiakia náki juramukua jimbo íni ambe úxaki.
Currently Selected:
San Marcos 11: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
