1 Timoteo 5
5
Néna máteruechani káani
1Ásï xukaa tata k'eratichani, jinirisï arhistakuauaka, ísï eskari na arhistakupiringa chéti táteni. Ka tumbichani ísï kaa eskari na kámapiringa chéti erachechani. 2Ka Nana k'eratichani chéti nándeni káua ka uáchechantu májkueni eskari na kámapiringa chéti pirenchitichani.
3Jarhuata tsîndichani, imani engaksï nóteru nemani kángorhejkia. 4K'óru enga tsîndi ma uájpechani o nimakuechani kángorheajka, imaksïsï urheta uénaati tsîndini jarhuataati urheta imecho uéne sési úni ambe, ka xénhchani tátjembani ka amambani. Ísï eskaksï ima na xénhchaaka t'arhexeraani jámani, Diósï ísïsï jaiapanhentajti. 5K'óru tsîndi ma enga nónemanderu jatsikorhekia, Diósïnderkusï mintsiktia, kómarhiparini mándani pauani, chúrekua ka jurhiakua. 6Ka ima tsîndi enga ísku jándinhchajka, isïsti eska uarhirini irekani jarhani. 7Ísï jimbo, juramukua eskaksï íni ambejtu ísï úaka, ka nómbe máksï arhikua jukaati. 8Eka néma no xéauaka imecho anapuechani, jakajkukuani no jiókorhesïndi ka sánderu nósesi jasïsti eska no jakajkuti ma.
9Ima tsîndichajkuksïsï karakorheati engaksï jukari tanimu ekuatse uexurhini jatirikia ka ma xanharkuksï uambuchatini. 10Ka engaksï sési jásï k'uiripueni mítekateuaka ka engaksï uájpechantu sési t'arhexeraaka, ka engaksï chéni jémbo tsípekua jinguni eropepka, ka engaksï jarhuatapka jakajkutichani ka ístu imechani engaksï kómu nitamakorheni jápka, eskaksï méntku ísï sési ambe niátatiuaka.
11K'óru ásï jáma tsîndi sapirhatichani karaani, jimbokaksï ima no úaka p'íngukorheni ka ménderuksï uambuchantskuekaati ka ísï jámanksï jarharhesïndi Jesukristuni. 12Imaksï ísï úrini no úxati ambe engaksï aiakorhetini jápka. 13Ka támuksï ísku jini ka jini jámasïndi inchatspeparini ka ísku ambeksï arhiparhatasïndi nemani ka iápuru ísïksï uékani inchaakurhani ka iámuksï xépiti úkorhesïndi. 14Jimbosïni uéjka eskaksï tsîndi sapirhaticha uambuchantaaka, ka eskaksï sapichani káuaka ka irekorhentani ka ísï nónema ambe arhiparhatauati. 15Máruksï no kurhandirasti ka tsînchestiksïa ka nóambakitinksï chúxapasti.
16Eka uarhiti jakajkutio tsîndi ma jaka, jiájkani jarhuata ambe kéndani, ka ísï jamani tiósïo úati máteruechani jarhuataani engaksï jandioterkuekia.
17Tatechani engaksï sési juramuni jaka tiósïo, kánekua sési arhia je, ka sánderu imechani engaksï jángorhentajka sési jurhentpeni ka arhijtsïkpeni. 18Jimboka karakata arhisïnga: “Ásï jatsimuku sutumukua tekechuni enga triju t'auani jauaka” ka máteru arhisïndi: “Ánchekorheri ma andakorhesïndi maiamukua”.
19Ásï jáma jakajkuni eka nema tata k'éri urhejtsïkurini ambe arhiparhataaka, jiánirisï jakajkuaka engaksï tsimani o tanimu májkueni uandakuntaaka.
20Imechani engaksï útasï kamanharhintani jaka, kuiripu japarini xukaa, ka ísïksï máteruecha chéati.
21Diósï ka Jesukristuni ka ánjelicha japarinkini kómarhixaka, eskari sési marhuatauaka íni juramukuechani. 22Ásï jáma ísku nemani újchakurani, sési eratsentsï urheta, jimbokari t'ú jamberi jukanchaaka máteru nemeri k'amanharhiskuechani, p'ínpinhasï ja méntku ísï.
23Ka ekari méni sóntku jatini p'amearhani jaka, ásï itsïterku aía, úberi ísïrhukuajtu a sáni.
24Máruksï ambantku xarhatakorhesïndi k'amanharhintskuechani, nájtukaksï nótku arhinharhikunhani jauaka, ka máruksï tátsekua xémenhantasïndi. 25Sési úkuechaksï ambantku xarharasïndi; ka nósesi ambe no úati méntkisï jískakata jarhani.
Currently Selected:
1 Timoteo 5: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
