1 Timoteo 6
6
1Iámendu jántspiricha ka ánchekorhetspiricha, janhanharhia je chári ánchetpirichani ka nónema Diósïni nósesi arhiati ka níjtu juchari jurhentperakuani. 2Eka nemeri ánchetpiri Diósïni jakajkutika, sánderu janhanharhi jimbokaksï jakajkukua jimbo erachiska, ka sánderu sési marhuaku, jimbokari Diósï jákakutinisï ma marhuakuni jaka. Íni amberisï jurhetpeaka ka arhijtsïkpeni.
Arini ambejtu arhistatspe ka jurhentpe
3Eka nema ísku ambe ma jurhentpeni jaka, imani ambe enga no Acha Jesukristueri jurhentpekua, 4ima k'éramakorhesïndi ka nómbema mítesti, ka ísku ambe ma uémuskorhesïndi uandani, ka ima ambe epurhurperata ka uarhiperata ka arhinhchperata ambe k'amarhukuerasïndi. 5Ka xárhati k'uiripuechaksï no úsïndi terukutsperani, níjtu sési kurhangutsperani jimbokaksï tuminajkuksï erarhukujka engaksï Diósïni marhuakuni arhimetajka. 6Ka ísïsti, enga ma Diósïni marhuakujka ma kánekua andasïndi, k'óru no tuminasï ma andajti, ma sési irekorhekuajtsï andajti. 7Jimbokachi nóma jatsikorherini andajpenuska ka nómachi pájtakorheaka uárhikuarhu. 8T'irekuajku ka xukuparhakuajku engachi jatsikorheaka, indeni jingunkuchi sési jauaka; 9K'óru engaksï tumina káneranhchakorheni uéjka, nóna jatiniksï amdakuntati tumina ka ísï jámani iámendu ambeksï tsïjpakorhesïndi. 10Jimboka iámendu nósesi jásï ambe, tumina kánhchakuarhu uénasïnka ka máruksï támu pérasïndia jakajkukuani, ka kánekuaksï nósesi nitamakorhenhchasïndi.
Timoteueri p'imarheta
11Ka t'u Timoteo engari Diósïni marhuakujka, jarhare xárhati ambe kánchakua ka sési irekorhe Diósïni jakajkuparini ka marhuakuparini. 12Jakajkukua jimbo anhatsekorhe, ka jángorhe tsípekua andakorheni enga nómeni k'amakurhiaka, jimbokinisï Diósï uandajpati jimajkani engari k'uiripu japarini xáni sési uandakorhentapka chéti jakajkukueri ambe. 13Diósï japarinkini arhixaka, enga iámendu ambeni kueraka ka enga tsípekua íntspejka ka ístu Jesukristuni jimbo enga Ponsio Pilatuni japarini jángueri ambe uandantapka, ka arhixakakini 14eskarini kurhandiracheaka ka kaxumbeni ka ísïkini nónema úati ambe arhiparhatani, ísï jáma, jiájkani jamberi enga juchari Acha Jesukristu junguaaka. 15Niáraati ima jurhiatekua enga ima junguaaka na enga jatini juchari Diósï ísï uékaaka, imajkusï sési jimbo irecheti ka Acheni. 16Imajkusï nómeni uarhiati ka k'éri t'ímarhandekuarhu irekasti enga nónema exeni jaka, ¡Mentku ísï imeristi k'érikua ka uinhapekua!. Ka ísïsti.
17Arhia jatsikorherichani eskaksï no k'éramakorheaka ka eskaksï no jámaka jatsikorhekuani mintsinharhini, eskaksï Diósïnisï mintsikaaka engajtsïni iámendu ambe kóndejka engachi jucha uétarhenchajka. 18Eskaksï sési ambe niátani jauaka, ka eskaksï sési niátakuechani kánerakorheauaka, ka mintsita jinguniksï ambe jarhojpeni. 19Ka ekaksï ísï úska, kánerakorheatiksï ambakiti ambe, enga méntku ísï marhuauaka ka imecheri tsípekua nómeni k'amakurhiati.
Uandanutskua
20Timoteu, jángorhentsï sési úni indeni ambe engari mintsinharhinhaka ka ísku kurha, imani engaksï uémuskorhejka, engaksï no Diósïri ambe uandajka. 21Máru engaksï indeni ambe uandajka, jarharhestiksïa jákajkukuani.
Eskakini Acha Diósï kóndeaka.
Currently Selected:
1 Timoteo 6: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
