Titub 2
2
ǂUru ǁkhāǁkhās
1Xawe satsa, Titutse, sa ǁkhāǁkhāsa ǂuru ǁkhāǁkhās ai ǃgaoǃgao. 2Kai aoga ǁkhāǁkhā, î gu ǁkhaesen, ǀgausa tsî gā-ai ûiba ūhâ. ǀGaisa ǂgoms, ǀnammi tsî ǃnūǃnâxasib tsîna gu ge nî ūhâ. 3ǁKhā ǀgaub ai kai tarade ǁkhāǁkhā, î di Eloba anuba ǀgaub ai ûi. A di tā nau khoena mîǁgaiǁgai tsî ǂauxûi-i di khobo kai. Xawe a di ǁnās ǃās ǃnâ nauna ǃgâin ǀguina ǁkhāǁkhā. 4A di kai tarade ǂkham tarade ǁgauǃnâ mâ ǀgaub ai di ǁîdi aogu tsî ǀgôana nî ǀnamsa, 5î di gā-ai tsî ǃanu ûiba ūhâ, omdi âde ǂhomisase ūhâ, ǃgâin ǀguina dī tsî ǁîdi aoga ǃgôasiba ūhâba. O di ge Elob di mîsa ǃkhāǃkhās ase ība tide.
6ǁKhā ǀgaub ai ǂkham aoga ǀgaiǀgaiǃnâ, î gu dī gu ra xūn hoan ǃnâ gā-aise ûi. 7Dīts ra xūn hoan ǃnâ nauna ǃgâi aiǁgause ība re. Sa ǁkhāǁkhāsa as amabe tsî ǂhauǃnâ. 8ǀAuhe ǁoa ǂuru ǁkhāǁkhāsa ǁkhāǁkhā, în sa khākhoen hîa tsū xū-e ra mî ǂgaon hoana taotaohe.
9An ǃgāna ǁîn ǀhonkhoena ǃgôasiba mā tsî ǂkhîǂkhîǂgao dīn ra xūn hoan ǃnâ. Tān ǀhonkhoen âna ǃhoaǃoa 10tamas ka io ǁîn xūna ǃnari. Xawen ge hoaǁae ǂhauǃnâ tsî nî ǂgomǂgomsa. ǁNāti i ga ī, o-i ge mâ khoe-i hoa-e Elob, sada ǃGâiǃōdī-aob xa hâ ǁkhāǁkhāsa ǃgôasiba nî ūhâba.
11Hoaraga khoen di ǃgâiǃōsib ǃaromas ge Elob ge ǁîb di ǀkhomma ǂhaiǂhaisa. 12Nē ǀkhommi Elob dib ge sada ra ǁkhāǁkhā eloxoresa ûib tsî ǃhūbaisi turagu tsîna xu da nî ūdabasen tsî da nē ǂkhaba ǃhūbaib ai gā-ai ǂgaob, ǂhanu-ai ûib tsî eloǃaoǃgâxasib tsîna nî ūhâ ǃkhaisa. 13Kai ǃâubasens ǀkha da ǀkhaehesa ǁkhawa hās sada Elo tsî ǃGâiǃōdī-aob, Jesub Xristub* dis hîa nî ǂhaiǂhaihesa ǃâu hâ hîa. 14#Psa. 130:8; Eks. 19:5; Deu. 4:20; 7:6; 14:2; 1Pet. 2:9Hoaraga khoen nî ǁgauoǃnâsigu hoaga xu orehe tsî ǂgaogu âna ǃanuǃanuhegab ge ǁîba ûib âba ge ǁguiba. Tsîb ge ra ǂgao ǁîb di ôa kai tsî da nî ǀaexasib ǀkha ǃgâin ǀguina dī ǃkhaisa.
15Nē xūna sa khoena ǁkhāǁkhā tsî ǂgaoǂgaoǃnâ, în dī tsî ǂhâbasa i as kōse hoa ǁkhāsib ǀkha ǂgōǀau. Tā-i ǁkhāti khoe-i xare-e ǃgôaǁnâ tsi.
Currently Selected:
Titub 2: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
