ǂKhoamîdi 4
4
Gā-aisib di ǃgâib
1Ti ôado, sadu î-i di ǁgauǃnâsa ǃgâ, î ǁnâuǃāba du nî hōse ǃgaoǃgâ. 2Tita ge ǃgâi ǁkhāǁkhāsa ra mā du, xuige tā ti ǁkhāǁkhāsa ǁnāxū. 3ǀGôase ta ge ti îb ǀkha ge hâ i tsî ti îs di ǀguise ǃnae hâ ǀnamǀnamsa ǀgôata ase, 4ob ge ti îba ǁgauǃnâ te tsî ge mî: “Sa ǂgaob hoab ǀkha ti mîde ǃkhōǀgaipe; ti mîmāde ǃkhōǀgara, ots ge nî ûi. 5Gā-aisiba ôa, ǁnâuǃāba ôa! Tā ti mîde ǀuru tsî ǁîde xu ǁnāǁgôa. 6Tā gā-aisiba ǂhara, ǁîb nî sâu tsi xuige; ǁîba ǀnam, ǁîb nî ǃûi tsi xuige. 7Gā-aisib ge a ǂguro, ǁnā-amaga ǁîba hōbasen. Tare-i ǀgui-ets ga ôa xawe, ǁnâuǃāba hōbasen. 8Gā-aisiba ǀgapiǃgôa, ob ge ǁîba nî ǀgapiǀgapi tsi; ǁîbats ga ǁnamǂgā#4:8 ǁÎbats ga ǁnamǂgā: Tamas ka io ǁîbats ga ǀgapiǃgôa., ob ge ǁîba ǃgôasiba nî mā tsi. 9ǁÎb ge sa danasa krons ǀkha nî ǀgapa; ǁîb ge îsase anisa ǀgapas ǀkha nî ǀgapa-ai tsi.”
10Ti ôatse ǃgâ, îts tita ra mîna ūǃoa, ǂgui ûikurigats nî ūhâse. 11Tita ge gā-aisib di daob ǃnâ ge ǁgauǃnâ tsi tsî ǂhanu daob ai ge ǂgaeǂgui tsi. 12ǃGûts ka, xawe i ge sa daob ǃnâ satsa nî ǁkhae xū-e hâ tide tsî ǃkhoets ka, xawets ge ǃnôa tide. 13Sa ǁgauǃnâsa ǃkhōǀgaipe, î tā ǁnāxū; ǁîsa ǃûiǃgâ, ǁîs a sa ûi xuige. 14Tā eloxoresan di daoba sao, î tā ǂkhabadī-aon di ǃganni ǃnâ ǃgû. 15ǁÎba xu ǂgō, tā ǁîb ǃnâ ǃgû; ǁîba xu dabasen, î sa daob ǀguiba sao. 16ǂKhabadī taman ga i, on ge ǁîna ǁom ǁoa; khoe-en tsûtsû tamas kōsen ge ǂoms xa hāhe tama hâ. 17ǂKhabab ge a ǁîn di pere tsî ǂkhabadīb ge a ǁîn di ǂauxûi.
18Xawe ǂhanu-ain di daob ge ǁgoas ǃnâb khami ī, ǀoasases nî soresa ǁhais aiǃâ, ǃaruǀî ǀgui ra ǃnâǃāba. 19ǂKhabadī-aon daob ge ǃgam ǃkhaenas khami ī, tsîn ge ǁîna tare-i ain ra ǃnôa ǃkhais tsîna ǀū.
20Ti ôatse, ti mîde ǃgaoǃgâ; ti mîde ǂōrisase ǃgâ. 21Tā di ǁîde sa ǁnâuǃāba xu ǂoa; sa ǂgaob ǃnâ ǁîde sâu. 22ǁÎdi ge ǁîde ra ǃkhōǃoa khoe-i ǃaroma a ûi tsî ǁîde ra ūǃoa khoe-i hoaraga soros di ǂgauǂgau. 23Sa ǂgaob ǃnâ ra ī xūna ǂōrisase ǃûi, ǁîba xu gu ûib di ǁgamǃāga ra dâu xuige. 24ǀGamnamxasisa xu ū-oasen, î sa amǁgaukha gāxaǃnâ ǃhoana xu ǃûi. 25A ra sa mûra ǃgāsase aisǀkhāb ǃoa ǃammâisen, î sa mûra ǂhanuse aisǀkhāb ǃoa kō kai. 26Sa ǃgûdaoba ǂhauǂhau, îs sa dāǃharos hoasa ǁaposa.#Heb. 12:13 27Tā amǀkhāb tamas ka io ǁareǀkhāb ǁga kāǁgôa; sa ǂaisa ǂkhababa xu ū-oa.
Currently Selected:
ǂKhoamîdi 4: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
