ǂKhoamîdi 2
2
Gā-aisib mādawa-ams
1Ti ôatse, ti mîdets ga ǃkhōǃoa tsî ti mîmāde ǁuib ase ūbasen; 2gā-aisib ǃaroma sa ǂgaera ǀkha ǃgaoǃgâxase ǃgâ tsî ǁnâuǃāxa ǂgaoba ūhâ; 3ā, ǂansats ga ǂgai-ôa tsî ǁnâuǃāb ǃaroma sa domma ǃhâkhâi; 4ǁîbats ga ǀhaiǀuriba ra ôa khami ôa tsî sâusa ǁuib khamio, 5ots ge ǃKhūba ǃaoǃgâsa ǁnâuǃā tsî Elob di ǂansa nî hōbasen. 6ǃKhūb ge gā-aisiba ra māba; ǁîb amsa xūs ge ǂans tsî ǁnâuǃāb tsîra ra ǂoaxasa. 7ǁÎb ge ǂhauǃnâ khoena hui tsî ra ǃgâiǃgâxa kai tsî ǂhauǃnâse ra ûi khoen di ǁkhauba-ao. 8ǂHanu-ain di daobab ge ǃûi tsî ǁîb ǃnâ a ǂgomǂgomsana ra ǁkhauba.
9Tita ra mînats ga ǃgâ, ots ge ǂhanu-aisib, ǂhanub tsî ǀguitikōsib tsîgu tare-e ra ǂâibasensa nî ǁnâuǃā tsî ǂhanu daoba nî sao. 10Gā-aisib ge sa ǂgaoba nî gaoǂam tsîs ge ǂans hîats ūhâsa sa ǀoms ǃgâiaǂgaob ase nî i. 11Sa ǂâiǀgaub ge nî kōǃgâ tsi tsî sa ǁnâuǃāb ge nî ǃûi tsi. 12Nēs ge ǂkhaba daob tsî ǂkhaba ǃhoa-aon mîxūna xu nî sâu tsi. 13ǁNān hîa ge ǂhanu daoga xu a ǁnāǁgôana, ǃkhaenab daogu ai ǃgûs ǃaroma; 14ǁîn ge ǂkhabadīs ǃaroma ra ǃgâiaǂgao tsî tsūdī-aon di tsūdīgu xa ra dâ; 15ǁîn di daogu ge gamaǃgâxa tsî a ǀhôagao.
16Gā-aisib ge ǁgoeǃnâ tarasa xu nî sâu tsi, ǂgaeǂhapuxa ǀai-aos di ǂkhanu mîde xu; 17ǁnās hîa ǁîs aoba ǁnāxū tsî Elob ǃgaeǀhaosa ge ǀurusa. 18ǁÎs oms ǁga garu daob ge a ǁōǁōsa tsî ǁîs daogu ge ǁŌhân Hâǃkhaib tawa ra sī-ū tsi. 19ǁÎsa ra sari gu hoagu ge tātsēs tsîna oaǀkhī tama tsî ǁkhāti ûib di daoba hō-oa tama hâ. 20ǁNā-amaga satsa ǃgâi khoen di daoba sao, î ǂhanu-ain di daogu ǃnâ hâǀgara. 21ǂHanu-ain ge ǃhūba nî ǁanǃnâ tsîn ge ǀhapiona ǁnāpa nî ǁanhâhâ, 22xawen ge ǂkhabadī-aona ǃhūba xu nî ǃhomǂuihe tsî gāxaǃnâ-aon ge nî hîkākāhe.
Currently Selected:
ǂKhoamîdi 2: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
