ǂKhoamîdi 1
1
ǂKhoamîdi di ǁkhāsib
1Israeli gao-aob, Davidi ôab Salomob di ǂkhoamîdi.#1Gao. 4:32
2ǂKhoamîdi ge gā-aisiba ǁkhāǁkhā tsî ra ǁgauǃnâ tsi, mâ ǁaeb aits ǁnâuǃāxase nî ǃhoa ǃkhaisa ǂans ǃaroma. 3ǁÎdi ge ǃgâi gā-ai ǁgauǃnâsa mā tsi, tsî ǂhanu-ai, ǂhanu tsî ǀguitikō ûiǀgauba ra īǁkhā kai. 4ǁÎdi ge ǃgâi ǂansa ūhâ tama khoe-e ǁnâuǃāxa kai tsî ǂkham khoena ǂans tsî gā-ai ǀapede ra mā. 5An gā-ain tsîna ǂkhoamîde ǁnâu tsî ǁnâuǃāba ǀaroǃnâ tsî ǂansa ǀnai ūhâna, ǂans ân ǃnâ ǂgaeǂgui; 6în ǂkhoamîdi tsî ǂkhōdi, tsî gā-ain di mîdi tsî ǁîn di ǀūrodi tsîna ǁnâuǃā.
ǂKham khoena ǀapemās
7 ǃKhūba ǃaoǃgâs ge ǂans di tsoatsoasa. Gâren ǀguin ge gā-aisib tsî ǁgauǃnâs tsîra ra ǃharaxū.#Job 28:28; Psa. 111:10; ǂKhm. 9:10
8Ti ôatse, sa îb di ǁgauǃnâsa ǃgâ, î tā sa îs di ǁkhāǁkhāsa ǃharaxū. 9ǁÎra di ǁkhāǁkhās ge sa danasa krons ǀkha anis tsî sa ǃaoba karab ǀkha îsa-îsas khami nî ība tsi.
10Ti ôatse, ǁore-aon ga ǂgaeǂhapu tsi, o tā māsen. 11ǁÎn ga mî: “Hā, î da khoe-e ǃâuǁgoe tsî ǃgam; a da xū-e i ga dī da tama i, xawe ǁgoe-am tsî ǁnāǂam; 12a da ǀhobas khami ǁîna ûitsamase haraǂgā, ǁnān hîa āb ǃnâ ra ǁgôan khami. 13ǃGomǀgausa ǁuib hoaba da ge nî ǁkhâuǁnâ tsî ǃnarixūn ǀkha sada omde nî ǀoaǀoa. 14Sida ǀkha ǁhao re, î da ǁkhâuǁnâ da ran hoana ǀgoragu.”
15Ti ôatse, tā ǁnāti ī khoena sao. ǁÎna xu ūdabasen, 16ǁîn ǂaidi ge ǂkhabab ǃaroma ra ǃnoe tsî ǀaoba ǂnâxūs ǃaroma a ǃhae xui-ao. 17Aniron ra mûsets ga ǁnoasa ǁgui, ots ge ǁîna ǃkhō ǁkhā tide; 18xawen ge nē khoena ǁîn ǂhunuma ǀaoba ǂnâxūs ǀkha a ǀhabe, tsî ǁkhowa-amsa mûdi ǀkha ǁîn di ǁōb ǃnâ ra ǃgûǂgâ. 19ǁNāti i ge hoaǁae ra ǃnari khoe-i hoa-i ǀkha ra ī; ǁkhâuǁnâs ge ǁî-i ûiba ra ū.
Gā-aisib ra ǂgai
20Gā-aisib ge ǃganni ǃnâ mâ tsî ra ǂgaiǂui, ǀhûǃkhaigu ǃnâb ge dommi âba ra ǀō kai;#ǂKhm. 8:1-3 21kaise ra ǂkhupihe ǃkhaigu tawas tsînab ra ǂgaiǂui, ǃās di ǂgâ-amdi tawab ra mâ tsî ǃhao:
22“Sa gâredo, mâ ǁaeb kōse du gâresib ǃnâ ǀgui ra hâhâ ǂgao? Mâ ǁaeb kōsen ǃhō-aona nauna ǃhōs di ǃgâiaǂgaob ǃnâ ǀgui ra hâǃari ǂgao tsîn gârena ǂansa ra ǁkhanhâhâ? 23Ti ǃkhâikhomsa du ga ǃgâ, o ta ge ti gā-aisiba ǃnāǂamsase mā du tsî ti mîde nî ǁkhāǁkhā du. 24Tita ge ǂgai du, o du ge ǃgâ ǂgao tama ge i; ti ǃomma ta ge ǀhōǂui, xawe i ge khoe-i xare-e ǁae tama ge i. 25Ti ǀapemāsa du ge ǁae-ū tama ge i tsî ǃkhâi kaisen ǂgao tama ge i. 26Tita tsîn ge ǂōǂōsib ǃnâ du ga ǂgâ, o nî âiǂui du; ǃaob ga hāǂam du, o ta ge nî ǃhō du. 27ǃAob ga ǁnāǂam du tsîb ga ǂōǂōsiba ǁgaoǂoas khami hāǂam du, ǂâiǂhansens tsî kai tsûb tsîn ga hāǂam du, 28o du ge tita nî ǂgai-ôa, xawe ta ge ǃeream du tide; sadu ge ǂanǂansase nî ôa te, xawe du ge hō te tide. 29Sadu ge ǂansa ǁkhan tsî ǃKhūba ǃaoǃgâ ǂgao tama i amaga. 30Ti ǀapemāsan ge ge ǂhara tsîn ge ti ǃkhâikhomsa ge ǃharaxū. 31ǁNā-amagan ge ǁîna ǁîn ǁoreb di ǂûba nî ǂû tsî ǁîn ǂûn di ǀapedi xa nî ǂhaohe. 32ǁNâuǃāoǃnâ khoen ge ǁîn di kāǁhapus xa ra ǃgamhe tsî gâren ge ǁîǁâsens ân xa ra hîkākāhe. 33Xawe tita ga ǃgân ge ǃnorasase nî ûi tsî ǂōǂōsi-i xare-e ǃao tide.”
Currently Selected:
ǂKhoamîdi 1: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
