Mateub 7

Nauna ǀgoraǃgâs

(Lukab 6:37-38, 41-42)

1“Tā ǀgoraǃgâ, îb Eloba tā ǀgoraǃgâ tsi. 2#Mrk. 4:24Khoe-ets ra ǀgoraǃgâ-ū ǀgoraǃgâs ǁkhās ǀkhats ge nî ǀgoraǃgâhe tsîb ge sats ra nauna ǁguiba ǂhanuba sats tsîna nî ǁguibahe. 3Tare-i ǃaromats sa ǃgâsab mûs ǃnâ ǁgoe ǃnaob di tsaraba ra mûǃâ, sa mûs ǃnâ hâ ǃnaoba hōǃâ tama hâ? 4Mâtits sa ǃgâsab ǃoa nî mî: ‘A ta hui tsi tsî ǀapoba sa mûsa xu ūǂui’ ǃnao-i sa mûs ǃnâ ǁgoe hîa. 5Sa ǀgamaixatsa, aibe sa mûs ǃnâ ǁgoe ǃnaoba ūǂui, ots ge ǃgâise mû tsî sa ǃgâsab mûs ǃnâ ǁgoe ǃnaotsararo-e a ūǂui ǁkhā.

6“Tā ǃanu xū-e khoe-i, ari-i khami ra tanisen-e mā, ǁîn ge dabasen tsî nî ǁnāǂam du. Tā sadu perelde hāgūna aoba, ǁîn ge perelde ǃhūb ǃnâ nî dāǂgā xuige.

ǂGans, ôas tsî ǃgubu-ams

(Lukab 11:9-13)

7“ǂGan, o du ge nî māhe; ôa, o du ge nî hō; ǃgubu-am, o du ge nî ǁkhowa-ambahe. 8ǂGan ra-i hoa-i ge nî māhe, ôa ra-i hoa-i ge nî hō tsî ǃgubu-am ra-i hoa-i ge nî ǁkhowa-ambahe. 9Mâ ǁgû-e ǁî-i di ôa-i ga pere-e ǂgano, ǀui-e nî mā? 10Tamas ka io ǁau-e i ga ǂgano, ǀao-e nî mā? 11Sadu hîa a ǂkhaba du ga a ǂan ǃgâi xūna sadu ôana māsa, o mâtikōseb ǁnās ǃgâ-ai sadu Îb ǀhommi ǃnâ hâba, ǂgan bi rana ǃgâina nî mā? 12#Luk. 6:31Sats ra dī-ūhe ǂgao khami, nau khoe-i tsîna dī-ū re. Nēs ǃnân Moseb ǂhanub* tsî kēbo-aogu di ǁkhāǁkhās tsîna hâ xuige.

ǂŌ dao-ams

(Lukab 13:24)

13“ǃKhūb Gaosib ge ǂō dao-ams ǃnâ-u ǀgui a ǂgâbahe ǁkhā. Haras ge dao-ams tsî ǂhabab ge daob, kāǁōsib ǃoa garuba tsî ǂguin ge ǁîb ai ra ǃgû. 14Tsî ǂōs ge dao-ams tsî ǀuib ge daob ûib ǃoa garuba, xawen ge ǀoro ǃgôab khoen ǀguina ǁnāpa nî ǂgâ.

Hais tsî ǁîs ǂûn

(Lukab 6:43-44)

15“ǃÛisen ǂkhaba kēbo-aogu sadu ǃoa gūsarab ǃnâ ra hāga, xawe ǂganagab ǃnâ ǂhira-i khami īga. 16#Sir. 27:6ǁÎgu ǂûn ai du ge nî ǂan gu. Amase i kom ǁkhūhaisa xu draibena a ǃorahe ǁoao tsî ǀnomaǂûna ǁkhūxa haisa xu? 17Mâ ǃgâi hai-i hoa-i ge ǃgâi ǂûna ra ūǀkhī, xawe ǁgai hai-i hoa-i ge ǁgaora ǂûna ra ūǀkhī. 18ǃGâi hai-i ǁgaora ǂûna a ūǀkhī ǁoas ǁkhās khami i ge ǁgai hai-e ǃgâi ǂûna a ūǀkhī ǁoa. 19#Mat. 3:10; Luk. 3:9Mâ hai-i hoa-i, ǃgâi ǂûna tani tama-i ge ǁhāǂuihe tsî nî ǂhubiǂuihe. 20#Mat. 12:33ǁNā-amaga gu ge ǂûn âgu ai nî ǂanhe.

Tātsē ta ge ǂan tsi tama hâ i

(Lukab 13:25-27)

21“Mâ-i hoa-i ‘ǃKhūtse, ǃKhūtse’ ti ra mî-i ge Gaosib ǀHommi dib ǃnâ ǂgâ tide, xawe ti Îb ǀhommi ǃnâ hâb di ǂâisa ra dī-i ge nî ǂgâ. 22ǀGoraǃgâtsēs ain ge ǂguina ‘ǃKhūtse, ǃKhūtse sa ǀonsa xu tamasa kha kēbo da gesa, ǁgâuaga* ǃhaeǂui tsî buruxa dīna dīsa?’ ti nî mî. 23#Psa. 6:8O ta ge ǁîn ǃoa nî mî: ‘ǀŪ du ta a, xuige bēxū te, sa ǁgauoǃnâ sîsenaodo!’

ǀGam omkuru-aokha

(Lukab 6:47-49)

24“Mâ-i hoa-i ti mîde ǁnâu tsî ga ǁnâuǀnam-i ge ǁnâuǃāxa ǃgame-aob khami ī, ommi âba ǃhaob ai ge ǂnubikhâiba. 25Tsî kai ǀgaisa ǀapib tsî ǁgamǃāgu ge ǁgôaxa tsî ǀgaisa ǁgaoǂoas ge nē ommi tsî ǂnamipe a ǃgom, xaweb ge ǂkhôahe tama ge i, ǃhaob aib ge ǂnubihe hâ i amaga.

26“Xawe mâ-i hoa-i, ti mîde ǁnâu tsî ǁnâuǀnam tama-i ge ǃereamoǃnâ ǃgame-aob, ǁîb omma ge ǀgopab ai ǂnubikhâib khami ī. 27Tsî kai ǀgaisa ǀapib ga hā tsî ǃāgu ga dâuǃkhū tsî ǂoaga ǀgaisase ommi ai tsî ǂnamipe a ǃgom, ob ge ǀunis ai ǀgaisase mâhâhâ tide tsî nî ǃkhom.”

Jesub di ǁkhāsib

28 # Mrk. 1:22; Luk. 4:32 Tsî Jesub ge nēna mîtoa, os ge ǂnubisa ǁîb di ǁkhāǁkhāǀgaub xa ge burugâ. 29ǁÎb ge ǁîna ǁkhāsib ǀkha gere ǁkhāǁkhā, Moseb ǂhanub di ǁkhāǁkhā-aogu* khamis ose.

Currently Selected:

Mateub 7: KKG20

Highlight

Copy