Maleaxi 2
2
1“Tsî nēsi nēs ge mîmās sago pristergo ta ra māsa. 2ǃGâ ǂgao tama go ga i tsî ti ǀonsa ǃgôasiba mās ai ǂâisa ǂnûi tama i, tib ge ǃKhūb Hoaǀgaixaba ra mî, o ta ge ǀâxareba sago ǂama nî sî. Tita ge sago ǀkhaega nî ǀâxarexū, ā tita ge ǁîga ǀnai ǀâxarexū hâ, sago ge ǁîs ai ǂâisa ǂnûi tama i amaga. 3Tita ge sago ôananôaguba ǁkhōse nî ǁkhara. Tsî ta ge ǂhauba sago aidi ai nî ǂkhau, ǂhaub sago kaitsēdi ǁguibadi diba tsî go ge ǁîb ǀkha nî tanibēhe. 4O go ge nî ǂan tita go nē mîmāsa sago sîbasa, ti ǃgaeǀhaos Levib ǀkha ta ge dīs nî hâhâse,”
tib ge ǃKhūb Hoaǀgaixaba ra mî.#Num. 3:11-13
5“Ti ǃgaeǀhaos ǁîb ǀkha ta ge dīs ge ûib tsî ǂkhîb tsîkha di ge i, tsî ta ge ǁîkha ge mā bi. Tsîb ge ǁîba tita ǃaoǃgâb ǀkha ǃoaba tsî ti ǀonsa ǃgôasiba ge ūba hâ i.#Num. 25:12 6Ama ǁkhāǁkhās ge ǁîb ams ǃnâ ge hâ i tsî ǂkhawa-i xare-i ge ǁîb amǁgaukha ai ge hōhe tama hâ i. ǁÎb ge tita ǀkha ǂkhîb tsî ǂhauǃnâsib ǃnâ ge hâ i tsî ǂguina ǂhanuoǃnâsiba xu ge ūdabasen kai. 7Pristeri amǁgaukha ge amaba nî ǃûiǃgâ, tsîn ge khoena ams âba xu ǁkhāǁkhāsa nî ôa, ǁîb a ǃKhūb Hoaǀgaixab di sîsabe xui-ao.
8“Xawe go ge sago ǂhanu daoba ge ǁnāxū; ǂguina go ge sago ǁkhāǁkhās ǀkha ge ǁnā kai. Ti ǃgaeǀhaos Levib ǀkha ta ge dīsa go ge ge ǁgaoǁgao,”
tib ge ǃKhūb Hoaǀgaixaba ra mî.
9“ǁNā-amaga ta ge tita sago ǁaes mûǁae go ǃharaxūsa tsî ǃgôaǁnâsa xū kai, ti daoga go ge sao tama i tsî go ge ǀgoraǃgâs âgo ǂhanu tamase ge dī xui-ao.”
Khoen di îǂhôaoǃnâsib
10Hoada ǀgui ǁgûb ǀguiba ūhâ tama hâ? Hoada ǀgui Elob ǀguib xa kuruhe tama? Tarexa-i nē-e nau-i ǃoagu ǁnātikōse îǂhôaoǃnâ tsî Elob ge sada aboxagu ǀkha dī ǃgaeǀhaosa ra ǀuriǀuri? 11Judab ge ge îǂhôaoǃnâ i, ui-uisa xū-i ge Israeli ǃnâ tsî Jerusalems ǃnâ ge dīhe. Judab aogu ge ǃKhūb a ǀnam ǃanusiba ge ǃanuoǃnâ kai, tsî gu ge ǃhao elogu di ôadi ǀkha ge ǃgame. 12Ab ǃKhūba ǁnāsa ra dī aob hoaba Jakob di omde xu ūbē, nēsib ga ǁîba ǃKhūb Hoaǀgaixaba ǁguibade hā-ūba xawes tsîna.
13ǀNî xū-i ge ǁkhāti hâ sadu ra dī-e. Sadu ge ǃKhūb di altarsa ǁgamrogu tsî āb tsî ǃgaes ǀkha ra ǀoaǀoa, ǁîb sadu di ǁguibade ǃaruǀî ūǃoa ǂgao tama ǃkhais ǃaroma. 14O du ge sado ra dî: “Tare xū-i ǃaromasa?” Nēs ǃaromas ge: ǃKhūb ge ge ǀhûǀguitimî-ao-i sats tsî sa ǂkhamsis di taras tsîro ǁaegu. Sats ge ǁîs ǀkha ǂgomǂgomsase hâ tama ge i, ǁîs a sa horesa tsî ǃgaeǀhaos di tara xawe. 15Eloba saro ǀgui soros tsî gagase kuru tama hâ? Tare-i ǃaromasa ǁnāsa? Eloǃaoǃgâxa surib nî hâgas komo. ǁNā-amaga ǃûisen, îb mâb hoaba tā ǂkhamsis âb di taras ǀkha ǂgomǂgomsa tamase ûi. 16“Tita ge ǃgameǀgorasa ǁkhan hâ” tib ra ǃKhūb Israeli di Eloba mî. “Tsî ta ge ǁkhāti ǁnā ǁgaisi ǂkhabadīb taras ǃoagu ra dīheb tsîna ǁkhan hâ” tib ge ǃKhūb Hoaǀgaixaba ra mî. “ǃÛisen î tā sa taras ǃoagu ǂgomǂgomsaoǃnâ.”
ǀGoraǃgâtsēs ge a ǀgū
17Sadu ge ǃKhūba mîdi âdu ǀkha ge tsau kai, xawe du ge “Mâ xū-i ǀkha da ge ǁîba tsau kai” ti ra mî. ǁNāsa du ge ge dī, nēti du ge mîo: “ǂKhabadī ra-i hoa-i ge ǃKhūb mûǁae a ǃgâi, ǁîb ge ǁnāti īn xa a ǃgâibahe.” Tamas ka io “Mâpab Elob ǂhanu-aisib diba hâ?” ti du ge dîs ǀkha.
Currently Selected:
Maleaxi 2: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
