Mk 3
3
Li Jesus kixk'irtasi jun li winq chaqi li ruq'
(Mt 12,9-14; Lk 6,6-11)
1Li Jesus ki'ok wi' chik sa' li ch'utleb'aal kab'l. Wank aran jun li winq chaqi jun li ruq'. 2Ut yookeb' chi xk'eeb'al reetal ma tixk'irtasi tana sa' li sábado re naq te'ruuq xjitb'al. 3Li Jesus kixye re li winq chaqi li ruq':
—Xaqlin ut k'e aawib' arin sa' yiib'ej.
4Ut kixpatz' reheb':
—K'aru us xb'aanunkil sa' sábado, ma li usilal malaj li ink'a' us, xkolb'al xyu'am junaq malaj ut xkamsinkil?
A'ut eb' a'an ch'anch'o ke'kanaak. 5Toja' naq kirileb' sa' xsutam sa' josq'il, chi ra sa' xch'ool xb'aan xkawileb' xjolom, ut kixye re li winq:
—Ye' laawuq'.
A'an kixye' li ruq' ut kik'iraak. 6Naq ke'elk aran eb' laj Pariseey, tikto ke'xch'utub' rib' rik'ineb' li neke'okenk chirix laj Herodes, chi k'uub'ank chirix li Jesus re xkamsinkil.
Naab'aleb' te'taaqenq re li Jesus
(Mt 12,15-16; Lk 6,12-16)
7Li Jesus ki'elk aran ut koho wan wi' li palaw, rochb'eeneb' li xtzolom, ut jwal naab'aleb' aj Galilea ke'taaqenk re. Naab'aleb' ajwi' aj Judea, 8aj Jerusalén, aj Idumea, eb' li wankatqeb' chaq junpak'al li nima' Jordán ut sa' xsutam Tiro ut Sidón, naq ke'rab'i li naxb'aanu li Jesus, ke'wulak rik'in. 9Jo'kan naq kixye reheb' li xtzolom naq kawresinb'ilaq junaq ch'ina jukub' re naq ink'a' taanat'e'q xb'aaneb' li k'iila tenamit: 10xb'aan naq naab'aleb' li kixk'irtasiheb', ut eb' li wankeb' xrahilal neke'xmululi rib' sa' xb'een chi xch'e'b'al.
11Ut eb' li tz'ajn aj musiq'ej, naq neke'ril ru, neke'xkutb'e rib' chi roq ut neke'xjap re: “Laa'at Ralalat li Yos”, chankeb'.
12Ab'an li Jesus naxq'useb' chi kaw re naq ink'a' te'xye chi kutankil.
Li Jesus kixsik'eb' ru li Kab'laju
(Mt 10,1-4; Lk 6,12-16)
13Kitaqe'k chiru tzuul ut kixb'oqeb' li ani kiraj xb'oqb'aleb', ut ke'wulak rik'in. 14Kixxaqab'eb' Kab'laju re naq te'wanq rik'in, jo'wi' re naq tixtaqlaheb' chi xpuktesinkil li Chaab'il Esilal, 15chi wanq xwankileb' chi isink maa'us aj musiq'ej. 16Ut kixxaqab'eb' li Kab'laju: laj Simón, aj Pedro chik kixk'e cho'q xk'ab'a'; 17laj Santiago, ralal laj Sebedeo, ut laj Jwan, riitz'in laj Santiago, li Boanerges chik kik'ehe'k cho'q xk'ab'a'eb' (chi jalb'il ru naraj naxye: ralaleb' li kaaq#3,17 Ralaleb' li kaaq neke'xk'ab'a'in xb'aan naq ink'a' q'uneb' xch'ool, jo' xk'utunk sa' li kik'ulmank aran Samaria (Lk 9,51-56).); 18laj Andrés ut laj Felipe, laj Bartolomé, laj Mateo, laj Tomás, laj Santiago, ralal laj Alfeo, laj Tadeo, laj Simón aj Kanahán 19ut laj Judas Iskariote, a' li kiq'axtesink re.
Li Jesus ut laj tza
(Mt 12,24-32; Lk 11,15-23; 12,10)
20Koho li Jesus sa' kab'l ut k'ajo' xk'ihal li tenamit ke'ch'utlaak wi' chik: jo'kan naq chi moko wa'ak naxk'e rib' chiruheb'. 21Naq eb' li rech'alal ke'rab'i resil, koheb' chi xk'amb'al, xb'aan naq neke'xye: “Ink'a' tuqtu li xna'leb'”.
22Eb' laj tz'iib' li ke'kub'e chaq Jerusalén ke'xye: “Wank laj Beelsebul rik'in”. Jo'kan ajwi': “Rik'in xwankilal li xyuwa'ileb' laj tza narisiheb' laj tza”, chankeb' re.
23Toja' naq li Jesus kixb'oqeb' chaq ut kixye reheb' sa' jaljookil ru aatin: “Chanru naq laj tza taarisi laj tza? 24Wi junaq tenamit jachjooq chirib'il rib', ink'a' truuq taakanaaq chi xaqxo li tenamit a'an. 25Wi jachjooq chirib'il rib' jun kab'alaq, ink'a' truuq taakanaaq chi xaqxo li junkab'al a'an. 26Ut wi laj tza tixch'i'ch'i'i rib' ut jachjooq chirib'il rib', ink'a' truuq taakanaaq sa' xna'aj, xwulak b'an li roso'jik a'an.
27“Maajun truuq chi ok sa' rochoch li winq kaw rib' re xmaq'b'al li k'aru wank re, wi ink'a' ta xb'enwa tixb'ak' li kaw rib'; toja' naq tixjuk'i xsa' li rochoch.
28“Relik chi yaal ninye eere naq te'kuymanq te'sachmanq chixjunil li xmaakeb' li winq ut chixjunil li xmajewaleb', us ta k'iheb'; 29ab'an li taamajewanq re li Santil Musiq'ej, maajoq'e taakuymanq taasachmanq xmaak,#3,29 Chirix li maak a'in: cf. Mt 12,32. taariiqani b'an li xmaak chi junelik”.
30Kixye a'in xb'aan naq yookeb' chi xyeeb'al: “Wank tz'ajn aj musiq'ej rik'in”.
Li xna' ut eb' li riitz'in li Jesus
(Mt 12,46-50; Lk 8,19-21)
31Ke'wulak aran li xna' ut eb' li riitz'in li Jesus;#3,31 Chirix eb' li riitz'in li Jesus: cf. Mt 12,46. ke'kanaak chirix kab'l ut ke'xtaqla xb'oqb'al. 32Ut eb' li tenamit chunchuukeb' chi xsutam, ke'xye re:
—Ab'i, laana', eb' laawiitz'in ut eb' laawanab' wankeb' chirix kab'l, yookeb' chasik'b'al.
33Kichaq'ok li Jesus ut kixye:
—Ani linna', aniheb' li wiitz'in?
34Ut naq kixsuti rilb'aleb' li chunchuukeb' chi xsutam, kixye:
—A'aneb' a'in linna' ut eb' li wiitz'in. 35Xb'aan naq chixjunil li taab'aanunq re li rajom li Yos, a'an li wiitz'in, li wanab' ut linna'.
Currently Selected:
Mk 3: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
