Mk 2

Li Jesus kixk'irtasi jun li sik

(Mt 9,1-8; Lk 5,17-26)

1Kox'okaq wi' chik li Jesus sa' li tenamit Kafarnaúm; ut ink'a' ajwi' k'iila kutan rokik aran, naq ki'ab'iik resil naq wank sa' kab'l. 2Naab'aleb' ke'ch'utlaak aran; tik maak'a' chik li na'ajej chi moko chire li kab'l: ut li Jesus naxjultika li Aatin reheb'.

3Jun li sik kik'ame'k chaq rik'in xb'aaneb' kaahib' chi winq, 4ab'an ink'a' ke'ruuk roksinkil wan wi' li Jesus xb'aan li k'iila tenamit; jo'kan naq ke'xte li xb'een li kab'l, ke'xyiib' jun li okeb'aal ut aran ke'xkub'si li ch'ina ch'aat yokyo wi' li sik. 5Naq li Jesus kiril li xpaab'aaleb', kixye re li sik:

—At walal, kuyb'il sachb'il chik laamaak.

6Wankeb' aj tz'iib' chunchuukeb' aran, yookeb' chi xk'oxlankil sa' xch'ooleb': 7“K'a'ut naq na'aatinak chi jo'kan? Yo chi xmajewankil li Yos. Ani truuq chi kuyuk sachok maak? Ma ink'a' tab'i' ka'ajwi' li Yos?”. 8Sa' junpaat kixnaw li Jesus sa' xch'ool naq jo'kan yookeb' chi xk'oxlankil xjuneseb', ut kixye reheb':

—K'a'ut naq nekek'oxla a'an sa' leech'ool? 9B'ar wank li ink'a' ch'a'aj xyeeb'al re li sik: «Kuyb'il sachb'il chik laamaak», malaj: «Waklin, xok laach'ina ch'aat ut b'een»? 10Ab'anan re teenaw naq li K'ajolb'ej wank xwankil sa' ruuchich'och' re kuyuk sachok maak -kixye re li sik: 11Aawe ninye, waklin, xok laach'ina ch'aat ut ayu sa' laawochoch.

12Ak taawakliiq chi junpaat li sik, kixxok li xch'ina ch'aat ut ki'elk aran chiru chixjunil li tenamit: q'axal sachsookeb' xch'ool ke'kanaak chixjunileb' ut ke'xnima ru li Yos: “Maajun wa qilom a'in”, chankeb'.

Li Jesus kixb'oq laj Leví

(Mt 9,9; Lk 5,27-28)

13Koho wi' chik li Jesus chire li palaw, ut chixjunil li tenamit ke'wulak rik'in; ut ki'ok chi xtzolb'aleb'. 14Naq yo chi nume'k aran, kiril laj Leví, ralal laj Alfeo, k'ojk'o sa' titz'leb'aal toj, ut kixye re:

—Taaqehin.

Ut laj Leví kixaqliik ut kixtaaqe.

Li Jesus natzekank rik'ineb' laj maak

(Mt 9,10-13; Lk 5,29-32)

15Naq wan chaq li Jesus sa' meex sa' rochoch laj Leví, naab'aleb' laj titz'ol toj ut aj maakeb' ke'ok sa' meex rochb'een, rochb'eeneb' ajwi' li xtzolom, xb'aan naq naab'al xkomoneb' a'an yookeb' chi taaqenk re. 16Eb' laj tz'iib' reheb' laj pariseey ke'ril naq yo chi wa'ak rochb'eeneb' laj maak ut eb' laj titz'ol toj; jo'kan naq ke'xye reheb' li xtzolom:

—K'a'ut naq nawa'ak rik'ineb' laj titz'ol toj ut eb' laj maak?

17Li Jesus kirab'i a'an ut kixye reheb':

—Ink'a' neke'raj aj b'anonel li kaweb', a'eb' b'an li yaj neke'ajok re. Ink'a' xinchalk chi xb'oqb'aleb' li tiikeb' xch'ool, a'eb' b'an laj maak.

Xwech'b'al rix li ayuunik

(Mt 9,14-17; Lk 5,33-39)

18Naq eb' li xtzolom laj Jwan ut eb' laj pariseey yookeb' chi ayuunik, ke'chalk li tenamit rik'in li Jesus ut ke'xpatz' re:

—K'a'ut naq eb' li xtzolom laj Jwan ut li xtzolomeb' laj Pariseey neke'ayuunik, ut eb' laatzolom laa'at ink'a' neke'ayuunik?

19Li Jesus kixye reheb':

—Ma truuq tab'i' te'ayuuniq li b'oqb'ileb' rik'in sumlaak wi toj wank li b'eelomej rik'ineb'? Naq toj wank li b'eelomej rik'ineb', ink'a' naru neke'ayuunik. 20Ab'an taawulaq xkutankil naq taamaq'e'q li b'eelomej chiruheb': toja' naq te'ayuuniq, sa' li kutan a'an.

21“Maajun nab'ojok junaq ak' xiitil chiru li q'eel t'ikr. Wi ta jo'kan, li ak' xiitil tixq'uy li q'eel t'ikr ut taanimanq li xq'ichilal. 22Maajun nak'ehok li ak' b'iin sa' q'eel tz'uum-kuk. Wi ta jo'kan, li ak' b'iin tixpuk' li tz'uum-kuk ut taatz'eqe'q li b'iin jo' ajwi' li tz'uum-kuk. Li ak' b'iin, ak' tz'uum-kuk naraj”.

Eb' li xtzolom ke'xch'ot ru li triiw sa' sábado

(Mt 12,1-8; Lk 6,1-5)

23Sa' jun li sábado yo chi nume'k li Jesus sa'eb' li awimq, ut eb' li xtzolom yal sa' nume'k ke'xtikib' xch'otb'al ru li triiw. 24Eb' laj Pariseey ke'xpatz' re:

—Il, k'a'ut naq neke'xb'aanu li ink'a' naru xb'aanunkil sa' sábado?#2,24 Ex 34,21.

25Kixye li Jesus reheb':

—Ma maajun wa eerilom sa' li Santil Hu k'aru kixb'aanu laj David naq kiwank sa' rajb'al ru, naq kitz'okaak a'an jo'wi' eb' li rochb'een? 26Ki'ok sa' rochoch li Yos naq wank laj Abiatar cho'q xyuwa'il aj tij, ut kixtzeka li mayejanb'il wa li maajun naru taawa'oq re, ka'ajwi' eb' laj tij; ut kixk'e ajwi' reheb' li rochb'een.#2,26 1 S 21,2-7; Lv 24,5-9.

27Ut kixye reheb':

—Li sábado xaqab'anb'il cho'q re li winq ut ink'a' li winq cho'q re li sábado. 28Jo'kan naq li K'ajolb'ej wank xwankil ajwi' sa' xb'een li sábado.

Currently Selected:

Mk 2: QQC

Highlight

Copy