Mt 26
26
XII. XRAHILAL, XKAMIK UT XWAKLIJIK CHI YO'YO LI JESUS (26,1—28,20)
Ke'xk'uub' xchapb'al li Jesus
(Mk 14,1-2; Lk 22,1-2; Jn 11,45-53)
1Naq kiraqe'k li Jesus chi xyeeb'al chixjunileb' li aatin a'in, kixye reheb' li xtzolom:
2—Nekenaw naq kab'ej li Paswa, ut li K'ajolb'ej taaq'axtesiiq re taak'ehe'q chiru krus.
3Toja' naq eb' li xb'eenil aj tij ut eb' li xcheekel winqilaleb' li tenamit ke'xch'utub' rib' sa' rochoch li xyuwa'il aj tij, aj Kaifás xk'ab'a', 4ut ke'xk'uub' xchapb'al li Jesus chi b'alaq'inb'il re xkamsinkil. 5Ab'anan neke'xyehatq:
—Miqab'aanu a'an sa' li ninq'e, re naq ink'a' taawanq mululij ib' sa' li tenamit.
Li Jesus kiyule'k Betania rik'in sununkil b'an
(Mk 14,3-9; Jn 12,1-8)
6Wan chaq Betania li Jesus, sa' rochoch laj Simón li saqlep rix, 7yo chi hilank sa' meex. Toja' naq jun li ixq li wan chaq jun saqi meet chi sununkil b'an rik'in, jwal terto xtz'aq, kijilok chi xk'atq li Jesus ut kixhoy li b'an sa' xjolom. 8Naq eb' li xtzolom ke'ril a'an, xik' ke'reek'a ut ke'xye:
—K'a' aj e naq xsachmank a'in? 9Xru raj xk'ayimank chi q'axal terto xtz'aq ut xk'eemank raj reheb' li neb'a'.
10Ab'an li Jesus kixk'e reetal a'an ut kixye reheb':
—K'a'ut naq nekech'i'ch'i'i li ixq a'in? Chaab'il k'anjel xb'aanu we. 11Xb'aan naq eb' li neb'a' junelik wanqeb' eerik'in, a'ut laa'in moko junelik ta wanqin eerik'in. 12Naq xhoy li sununkil b'an a'in sa' inb'een, re xkawresinkil linmuqb'al naq xb'aanu. 13Relik chi yaal ninye eere: yalaq ta b'ar sa' ruuchich'och' taapuktesimanq wi' li Chaab'il Esilal a'in, taayeemanq ajwi' resil li xb'aanu li ixq a'in re xpatz'b'alaq.
Laj Judas kixyeechi'i rib' chi xq'axtesinkil li Jesus
(Mk 14,10-11; Lk 22,3-6)
14Toja' naq jun reheb' li Kab'laju, a' laj Judas Iskariote xk'ab'a', koho rik'ineb' li xb'eenil aj tij: 15“K'aru teeraj xk'eeb'al we ut laa'in tinq'axtesi li Jesus eere?”, chan reheb'.
Eb' a'an ke'xsume xk'eeb'al lajeeb' xka'k'aal chi tumin plaat re.
16Ut chalen sa' li honal a'an, laj Judas yo chi xsik'b'al jo'q'e tixk'e rib' xq'axtesinkil sa' ruq'eb'.
Li xloq'laj Wa li Qaawa'
(Mk 14,12-31; Lk 22,7-23, 31-34; Jn 13,21-30, 36-38; 1 Ko 11,23-26)
17Sa' li xb'een kutan nawa'e'k wi' li wa ink'a' yuub'il, eb' li xtzolom ke'jilok chi xk'atq li Jesus ut ke'xye re:
—B'ar taawaj tookawunq re naq taatzeka li Paswa?
18Ut a'an kixye:
—Ayuqex sa' li tenamit, sa' rochoch li winq a'an, ut teeye re: «Linhonal nach' chik wank; sa' laawochoch tinninq'ehi li Paswa wochb'eeneb' lintzolom, chan laj Tzolonel», cha'qex re.
19Eb' li xtzolom ke'xb'aanu li ke'taqlaak wi' xb'aan li Jesus, ut ke'xk'uub' li Paswa.
20Naq ki'ewuuk, kik'ojlaak li Jesus sa' meex rochb'eeneb' li Kab'laju. 21Ut naq yookeb' chi wa'ak, kixye reheb':
—Relik chi yaal ninye eere naq jun eere taaq'axtesinq we.
22Eb' a'an k'ajo' naq ke'raho'k xch'ool ut ke'ok chi xyeeb'al chi xjunjunqaleb':
—Malaj laa'inin, at Qaawa'?
23Kixsumeheb' ut kixye:
—A' li xtz'a li ruq' wochb'een sa' li pulaat, a'an li taaq'axtesinq we. 24Li K'ajolb'ej taaxik jo' tz'iib'anb'il chirix, ab'an ra chaalel sa' xb'een li winq a'an li taaq'axtesinq re li K'ajolb'ej! Q'axal us raj cho'q re li winq a'an naq ink'a' xyo'laak chaq.
25Toja' naq ki'aatinak laj Judas, a' li taaq'axtesinq re:
—Malaj ut laa'inin, at Tzolonel? chan.
Kixye li Jesus re:
—Laa'at xaye aawib'.
26Ut naq yookeb' chi wa'ak, li Jesus kixchap li wa, kiyoxink sa' xb'een, kixjachi, kixk'e reheb' li xtzolom ut kixye:
—K'ulumaq, wa'omaq; a'an a'in lintz'ejwal.
27Chirix chik a'an kixchap jun li uk'leb'-sek', kiyoxink, kixk'e reheb' ut kixye:
—Uk'umaq chejunilex li xsa' li sek' a'in. 28Xb'aan naq a'an a'in linkik'el re li Sumwank, hoyb'il sa' xk'ab'a' chixjunileb' re xkuyb'al xsachb'al li xmaakeb'. 29Ninye eere naq chalen anaqwan ink'a' chik twuk' xya'al li uub' toj sa' chik li kutan a'an naq a' chik li ak' b'iin twuk' wochb'eenex sa' li xnimajwal awab'ejihom linYuwa'.
Chi junxilaj kiyehe'k resil li xmaak laj Pedro
(Mk 14,26-31; Lk 22,31-34; Jn 13,36-38)
30Naq ak ke'xb'icha eb' li loq'laj b'ich, koheb' sa' xb'een li tzuul Olivos. 31Ut li Jesus kixye reheb':
—Chejunilex taaluktaaq eech'ool sa' ink'ab'a' chiru li q'oqyink a'in, xb'aan naq tz'iib'anb'il: «Tintiq' laj ilol ketomq, ut eb' li karneer te'xcha'cha'i rib'eb'».#26,31 Zak 13,7. 32Ab'an, naq akaq xinwakliik chi yo'yo, k'amolb'ehaqin cheru toj Galilea.
33Toja' naq laj Pedro kixye re:
—Us ta chixjunileb' te'luktaaq xch'ool sa' aak'ab'a', ab'an laa'in maa-jaruj taaluktaaq inch'ool.
34Kixye li Jesus re:
—Relik chi yaal ninye aawe naq chiru ajwi' li q'oqyink a'in, toj maji'aq nayaab'ak li tzo' kaxlan, akaq xaye ox sut naq ink'a' nakanaw wu.
35Kichaq'ok laj Pedro ut kixye:
—Us ta tento tinkamq wochb'eenat, ab'an maajaruj tinmuq naq ninnaw aawu.
Jo'kan ajwi' ke'xye chixjunileb' li xtzolom.
Li Jesus kitijok Getsemaní
(Mk 14,32-42; Lk 22,39-46)
36Toja' naq koho li Jesus rochb'eeneb' li xtzolom sa' jun li na'ajej, Getsemaní xk'ab'a'. Ut kixye reheb' li xtzolom:
—K'ojlanqex arin, tijoqin wan chaq le'.
37Kixk'am chirix laj Pedro ut xkab'ichaleb' li ralal laj Sebedeo, ut kixtikib' raho'k ut yot'e'k xch'ool. 38Toja' naq kixye reheb':
—K'ajo' xrahil li waanm, ka'aj chik maa ninkamk! Kanaaqex arin ut yo'lenqex wochb'een.
39Kijilok chik kach'in ut kit'ane'k chi hupu, yo chi tijok: “At inYuwa', wi truuq, chinume'q li sek' a'in sa' inb'een;#26,39 Li Jesus kiraho'k ut kiyot'e'k xch'ool xb'aan naq chalk re xhonalil li xrahilal ut li xkamik (cf. Jn 12,27). Ab'anan, sa' ajwi' li honal a'an, kixb'aanu li rajom li xYuwa' (Mt 6,10; Jn 4,34; 6,38; Hch 5,7-8; Ro 5,19; Fil 2,8). ab'an moko jo' ta li nawaj laa'in, jo'aq b'an li nakawaj laa'at”, chan.
40Toja' naq kisutq'iik rik'ineb' li xtzolom ut kixtaweb' chi wark; ut kixye re laj Pedro:
—Ma ink'a' xekuy jun k'amokaq yo'lek wochb'een? 41Yo'lenqex ut tijonqex re naq mext'ane'k sa' li aaleek: li musiq'ej yo'oon wank, a'ut li tz'ejwalej lub'lub' wank.
42Koho wi' chik chi tijok xka' sut ut kixye: “At inYuwa' wi ink'a' truuq naq taanume'q li sek' a'in chi ink'a' ta twuk' li xsa', chi'uxmanq laawajom”.
43Ut naq kisutq'iik chaq, kixtaweb' wi' chik chi wark xb'aan naq k'ajo'eb' li xwara sa' ruheb'. 44Kixkanab'eb' ut koxtijoq chaq rox wa rik'ineb' ajwi' li aatin ak xye chaq. 45Toja' naq kisutq'iik rik'ineb' li xtzolom ut kixye reheb':
—Warinqex ut hilanqex wan. K'ehomaq reetal, xtaw xhonalil naq li K'ajolb'ej taaq'axtesiiq sa' ruq'eb' laj maak. 46Waklinqex! Yo'qeb'! We' chaq li taaq'axtesinq we.
Kichape'k li Jesus
(Mk 14,43-52; Lk 22,47-53; Jn 18,2-11)
47Toj yo ajwi' chi aatinak li Jesus, naq kiwulak laj Judas, jun reheb' li Kab'laju. Naab'aleb' li rochb'een, wankatqeb' xch'iich' ut xche', taqlanb'ileb' chaq xb'aaneb' li xb'eenil aj tij ut eb' li xcheekel winqilaleb' li tenamit. 48Li taaq'axtesinq re kixk'e li eetalil a'in reheb': “A' li tintz'ub' ru, a'an a'an. Chapomaq”. 49Ut chi junpaat kijilok chi xk'atq li Jesus ut kixye re:
—Ma sa laach'ool, at Tzolonel?
Ut kixtz'ub' ru. 50Li Jesus kixye re:
—At wamiiw, b'aanu li xatchalk wi'.
Toja' naq ke'nach'ok rik'in li Jesus ut ke'xchap.
51Jun reheb' li rochb'een li Jesus tikto kixye' li ruq', kirisi li xch'iich', kixtiq' li xmoos li xyuwa'il aj tij ut kixch'ot li xxik. 52Toja' naq kiyehe'k re xb'aan li Jesus:
—K'e wi' chik laach'iich' sa' xna'aj, xb'aan naq chixjunileb' li te'xchap xch'iich', chi ch'iich' ajwi' te'oso'q. 53Malaj nakak'oxla naq ink'a' truuq tinpatz' xk'ab'a' linYuwa', ut a'an tixk'e raj chaq we chi junpaat numenaq kab'laju teep chi ánjel? 54Ab'an chan raj ru naq taatz'aqloq ru li tz'iib'anb'il sa' li Santil Hu li naxye naq jo'ka'in tento taak'ulmanq?
55Ut sa' li honal a'an kixye li Jesus reheb' li tenamit:
—Ma jo' nachape'k junaq aj elq' naq xexchalk chinchapb'al rik'in ch'iich' ut che'? Rajlal kutan k'ojk'ookin chaq sa' rochoch li Yos cheetzolb'al, ut ink'a' xineechap. 56Ab'an chixjunil a'in xk'ulmank re naq chitz'aqloq ru li xtz'iib'ahomeb' chaq li Propeet.
Toja' naq chixjunileb' li xtzolom ke'xkanab' ut ke'elelik.
Li Jesus chiru laj Kaifás
(Mk 14,53-65; Lk 22,54-55, 63-71; Jn 18,12-14, 19-24)
57Eb' li ke'chapok re li Jesus ke'xk'am rik'in laj Kaifás, li xyuwa'il aj tij, b'ar ch'utch'uukeb' wi' eb' laj tz'iib' ut eb' li cheekel winq. 58Laj Pedro najt rik'in naq yo chi xtaaqenkil, toj kiwulak sa' rochoch li xyuwa'il aj tij. Ut naq kox'okaq, kik'ojlaak sa' xyanqeb' li moosej re rilb'al k'aru taakanaaq wi'.
59Li xb'eenileb' aj tij ut chixjunil li xninqaleb' ru aj raqol aatin yookeb' chi xsik'b'al junaq yoob'anb'il aatin chirix li Jesus re xk'eeb'al chi kamsiik; 60ab'anan ink'a' ke'xtaw, us ta naab'aleb' ke'wulak chi xyeeb'al yoob'anb'il aatin chirix. Sa' roso'jik ke'wulak wiib'eb' 61ut ke'xye:
—Jo'ka'in kixye li winq a'in: «Laa'in tinruuq xjuk'b'al li rochoch li Yos ut chiru oxib' kutan tinwaklesi wi' chik».
62Toja' naq kixaqliik li xyuwa'il aj tij:
—Ma ink'a' tatchaq'oq b'ayaq? K'aru neke'xye eb' a'in chawix? chan re.
63Ab'an li Jesus ink'a' kichaq'ok. Ut li xyuwa'il aj tij kixye re:
—Nintz'aama chawu sa' xk'ab'a' li yo'yookil Yos: ye qe ma laa'at li Kriist, li Ralal li Yos.
64Kixye li Jesus re:
—Hehe', laa'at xatyehok re. Ut laa'in ninye eere naq chalen anaqwan teeril li K'ajolb'ej k'ojk'ooq sa' xnim uq' li Nimajwal Yos, yooq chaq chi chalk sa' xb'eeneb' li choql sa' choxa.#26,64 Sal 110,1; Dn 7,13.
65Toja' naq li xyuwa'il aj tij kixq'ich li raq' ut kixye:
—Xmajewa li Yos! K'a' chik te'ok wi' qe li testiiw? Xerab'i anaqwan, xmajewa li Yos. 66K'aru nekeye?
Ke'chaq'ok eb' a'an:
—Wank xmaak re kamsiik, chankeb'.
67Toja' naq ke'xchuub'a li xnaq' ru ut ke'xtzaj chi ruq'eb'; wankeb' chik ke'tenink re, 68yookeb' chi xyeeb'al:
—At Kriist, q'ehi ut ye qe ani xsak'ok aawe.
Laj Pedro kitik'ti'ik
(Mk 14,66-72; Lk 22,56-62; Jn 18,15-18, 25-27)
69Laj Pedro wank chirix kab'l, k'ojk'o chi neb'aal. Toja' naq jun li moos ixq kinach'ok rik'in ut kixye re:
—Laa'at ajwi' xat-ochb'eenink chaq re li Jesus, laj Galilea.
70A'ut a'an kitik'ti'ik chiruheb' chixjunil:
—Ink'a' ninnaw k'aru nakaye, chan.
71Naq ki'elk laj Pedro chire kab'l, ki'ile'k xb'aan jun chik moos ixq; ut a'an kixye reheb' li wankeb' aran:
—A'in rochb'een chaq li Jesus aj Nazaret.
72Kitik'ti'ik wi' chik laj Pedro rik'in jurament:
—Ink'a' ninnaw ru li winq a'an, chan.
73Junpaataq chik a'an eb' li wankeb' aran ke'jilok chi xk'atq laj Pedro ut ke'xye re:
—Relik chi yaal naq laa'at ajwi' jun reheb' a'an! A' ajwi' laawaatinob'aal nak'utuk re.
74Toja' naq ki'ok chi majewank ut chi xyeeb'al rik'in jurament:
—Ink'a' ninnaw ru li winq a'an.
Tikto kiyaab'ak jun li tzo' kaxlan. 75Ut laj Pedro kinaqk sa' xch'ool li kiyehe'k re xb'aan li Jesus: “Toj maji'aq nayaab'ak li tzo' kaxlan, akaq ox sut xaye naq ink'a' nakanaw wu”. Ki'elk chirix kab'l ut k'ajo' naq kiyot'e'k chi yaab'ak.
Currently Selected:
Mt 26: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
