Mt 21

Rokik li Jesus Jerusalén

(Mk 11,1-11; Lk 19,28-38; Jn 12,12-16)

1Naq ke'wulak Betfagé chiru li tzuul Olivos, nach' rik'in Jerusalén, toja' naq li Jesus kixtaqla wiib'eb' li xtzolom 2ut kixye reheb':

—Ayuqex sa' li k'aleb'aal wank cheru. Aran teetaw chi junpaat jun li b'uur b'ak'b'o, wank ral; hitomaq ut k'amomaqeb' chaq we. 3Ut wi k'aru tixye chaq eere anihaq, cheyehaq: «Li Qaawa' taa'ajoq reheb', ab'anan hoon ajwi' tolxkanab'eb'».

4A'in kik'ulmank re naq kitz'aqlok ru li xyehom li propeet:

5“Yehomaq re li xrab'in Sión:

«We' chaq aawik'in laaRey,

tuulan ut k'ojk'o chaq chirix jun li b'uur

ut chirix ral jun li xul aj iiqonel»”.#21,5 Is 62,11; Zak 9,9.

6Koheb' li xtzolom ut ke'xb'aanu li ke'taqlaak wi' xb'aan li Jesus: 7ke'xk'am chaq li b'uur rochb'een li ral, ke'xk'e li raq'eb' sa' xb'eeneb', ut aran kik'ojlaak li Jesus. 8Li xnimal xk'ihaleb' li tenamit ke'xhelatq li raq'eb' sa' li b'e; wankeb' ke'q'ujuk chaq ruq' che' ut ke'xhelatq sa' li b'e. 9Ut eb' li tenamit li yookeb' chi xik chi uub'ej ut li wankeb' chi ixb'ej japjookeb' re chi xyeeb'al:

—Chinimaaq xloq'al li Ralal laj David! Usilaatinanb'il li xchalk sa' xk'ab'a' li Qaawa'! Chinimaaq xloq'al li Qaawa' taqe'q!#21,9 Sal 118,25-26.

10Naq kox'okaq li Jesus sa' li tenamit, chixjunileb' laj Jerusalén k'ajo' naq ke'ok xk'a'uxl, yookeb' chi xyeeb'al:

—Ani a'in?

11Ut eb' li poyanam neke'xye:

—A'an a'in li propeet Jesus aj Nazaret re Galilea.

Li Jesus kirisiheb' laj k'ay sa' rochoch li Yos

(Mk 11,15-19; Lk 19,45-46; Jn 2,14-16)

12Ki'ok li Jesus sa' rochoch li Yos ut kirisiheb' chixjunileb' li yookeb' chi k'ayink ut chi loq'ok chisa'. Kixpak'lusihatq li xmeexeb' laj jalol ru tumin ut li xna'ajeb' laj k'ay mukuy. 13Ut kixye reheb':

—Tz'iib'anb'il sa' li Santil Hu naq li wochoch rochochil li tijok tixk'ab'a'in; ut laa'ex yookex chi xk'eeb'al cho'q xna'ajeb' laj elq'.#21,13 Is 56,7; Jr 7,11.

14Wankeb' mutz' ut yeq ke'jilok chi xk'atq, sa' rochoch li Yos, ut ke'k'irtasiik xb'aan. 15Eb' li xb'eenil aj tij jo'wi' eb' laj tz'iib' naq ke'ril eb' li sachb'ach'oolej kixb'aanu ut ke'rab'i li kok'al japjookeb' re chi xyeeb'al sa' rochoch li Yos: “Chinimaaq xloq'al li Ralal laj David!”, ke'po'k xch'ool 16ut ke'xye re li Jesus:

—Ma nakawab'i li yookeb' chi xyeeb'al eb' a'in?

—Hehe' -chan li Jesus reheb'-. Ma ink'a' eerilom sa' li Santil Hu:

«Chi xtz'uumal reheb' li kok'al

ut eb' li toj neke'tu'uk

xakawresi laaloq'al»#21,16 Sal 8,3.?

17Ut kixkanab'eb': ki'elk sa' li tenamit ut koho Betania b'arwi' kixnumsi li q'oqyink.

Kichaqik jun toon chi iig

(Mk 11,12-14, 20-24)

18Naq yo chi sutq'iik eq'la sa' li tenamit, kichalk xtz'okajik. 19Kiril jun toon chi iig wank chire b'e: kinach'ok rik'in, ab'anan junes xaq kixtaw. Toja' naq kixye re:#21,19 Li xche'el li iig a'an reetalil li tenamit Israel li maak'a' xpaab'aal.

—Mat-uuchink chik chi junajwa.

Ut chi junpaat kichaqik li xche'el li iig. 20Naq ke'ril a'an, eb' li xtzolom ke'sachk xch'ool ut ke'xye:

—K'a' naq sa' junpaat xchaqik li xche'el li iig?

21Kichaq'ok li Jesus ut kixye reheb':

—Relik chi yaal ninye eere: wi wanq leepaab'aal ut ink'a' taawiib'anq leech'ool, moko ka'aj ta wi' li xinb'aanu laa'in re li xche'el li iig teeb'aanu laa'ex, taaruuq aj b'an wi' teeye re li tzuul a'in: «Elen ut kut aawib' sa' palaw», ut taa'uxmanq raj. 22Ut chixjunil li k'aru teetz'aama sa' li tijok chi anchal eepaab'aal, teek'ul.

Kipatz'e'k re li Jesus k'aru xwankil

(Mk 11,27-33; Lk 20,1-8)

23Kiwulak li Jesus sa' rochoch li Yos. Ut naq yo chi xtzolb'aleb' li tenamit, ke'wulak li xb'eenileb' aj tij ut eb' li xcheekel winqilaleb' li tenamit, ut ke'xye re:

—K'aru aawankil naq nakab'aanu a'in? Ani xk'ehok aawe li wankilal a'in?

24Kichaq'ok li Jesus ut kixye reheb':

—Inpatz'aq ajwi' eere laa'in. Wi tineesume, laa'in ajwi' tinye eere k'aru linwankil naq ninb'aanu a'in. 25Li xkub'iha' laj Jwan b'ar xchalk? Ma sa' choxa malaj rik'ineb' li winq?

Ut eb' a'an ke'ok chi xk'oxlankil sa' xch'ooleb': “Wi tqaye naq sa' choxa, tixye qe: «K'a' put naq ink'a' xepaab'?». 26Ab'an wi tqaye naq rik'ineb' li winq, naqaxiwa ruheb' li tenamit xb'aan naq laj Jwan a'an propeet chiruheb' chixjunil”. 27Jo'kan naq ke'xsume li Jesus:

—Ink'a' naqanaw, chankeb' re.

Ut a'an ajwi' kixye reheb':

—Jo'kan ajwi' laa'in ink'a' ninye eere k'aru linwankil naq ninb'aanu a'in.

Li jaljookil ru aatin chirix li wiib' chi alalb'ej

28Kixpatz' li Jesus reheb':

—K'aru nekeye? Jun li winq kiwank wiib' li ralal. Kiwulak rik'in li xb'een ut kixye: «At walal, chatxikaq hoon chi k'anjelak sa' li wawimq». 29Ut a'an kixye: «Ink'a' nawaj». Ab'an moqon chik kiyot'e'k xch'ool ut koho. 30Kiwulak rik'in li jun chik ut jo'kan ajwi' kixye re. Ut a'an kixye: «Us, wa'; tinxik»; ut ink'a' koho. 31Ani reheb' li wiib' chi alalb'ej xb'aanu li rajom li yuwa'b'ej?

—A' li xb'een, chankeb'.

Ut li Jesus kixye reheb':

—Relik chi yaal ninye eere naq eb' laj titz'ol toj ut eb' laj yumb'eet te'wulaq xb'enwa cheru laa'ex sa' li xnimajwal awab'ejihom li Yos. 32Xb'aan naq xk'ulunk eerik'in laj Jwan chi xk'utb'al xb'ehil li tiikilal ut ink'a' xepaab'; a'ut eb' laj titz'ol toj ut eb' laj yumb'eet xe'xpaab'. Ut laa'ex, chi moko naq xeril, xyot'e'k eech'ool re xpaab'ankil.

Li jaljookil ru aatin chirixeb' laj k'anjel aj kamsineleb'

(Mk 12,1-12; Lk 20,9-19)

33“Ab'ihomaq jun chik li jaljookil ru aatin. Jun li winq aj eechal junkab'al kiraw jun siir x'uub', kixsut chi koral, kixb'ek aran jun xyatz'leb'aal uub' ut kixyiib' jun li kab'l cho'q re laj k'aak'alenel; kixk'e chi to' reheb' aj k'alom ut koho chi najt. 34Naq kiwulak xq'ehil xchoqb'al li uub', kixtaqlaheb' li xmoos rik'ineb' laj k'alom re naq tixk'ul ru li rawimq. 35A'ut eb' laj k'alom ke'xchapeb' li moosej: ke'xteni li jun, li jun ke'xkamsi, ut li jun chik ke'xkuti chi pek. 36Kixtaqla wi' chik junch'oleb' li xmoos, naab'aleb' chik chiruheb' li ke'taqlaak xb'enwa; ut jo'kan ajwi' ke'xb'aanu reheb'.

37“Sa' roso'jik kixtaqla li ralal rik'ineb': «Li walal te'roxloq'i», chan sa' xch'ool. 38Ab'an eb' laj k'alom, naq ke'ril li alalb'ej, ke'xye chirib'ileb' rib': «A'an a'in li taa'eechaninq re li ch'och'. Kimqex, qakamsiiq ut qeechanihaq li xch'och'». 39Ke'xchap, ke'risi sa' li awimq ut ke'xkamsi.

40“Naq taak'ulunq laj eechal re li awimq, k'aru tixb'aanu reheb' aj k'alom a'an?”.

41Ke'xye re:

—Eb' a maa'us aj k'alom a'an tixsacheb' chi junajwa ut tixk'e chi to' li xch'och' reheb' jalan chik aj k'alom re naq te'xtoj ru li rawimq sa' xq'ehil.

42Kixye li Jesus reheb':

—Ma maajun wa eerilom sa' li Santil Hu:

«Li pek li ke'xtz'eqtaana eb' laj kab'lanel,

a'an li kikanaak cho'q xnimal ru pek sa' li kab'l.

A' li Qaawa' kib'aanunk re a'in,

ut a'an sachb'ach'oolej chiqu»#21,42 Sal 118,22-23 (cf. Hch 4,11; 1 P 2,7).?

43Jo'kan naq ninye eere naq li xnimajwal awab'ejihom li Yos taamaq'e'q cheru ut taak'ehe'q re jalan chik tenamit re naq taa'uuchinq chi us.#21,43 Li raqal 44: Li taat'ane'q sa' xb'een li pek a'in taakok'puk'iiq; ut ani sa' aj b'een taat'ane'q li pek a'in, taaputz'iiq, moko tz'aqal xcha'al ta li Evangelio, a'an b'an yal xtiqb'al aj chik li raqal 43 sa' xk'ab'a' Lk 20,18.

45Naq ke'rab'i eb' li jaljookil ru aatin li kixye li Jesus, eb' li Xb'eenil aj tij ut eb' laj Pariseey ke'xtaw ru naq chirixeb' a'an yo chi aatinak. 46Ut ke'xsik' chan raj ru xchapb'al, ab'an ke'xxiwa ruheb' li tenamit, xb'aan naq a'an propeet chiruheb'.

Currently Selected:

Mt 21: QQC

Highlight

Copy