Mt 20
20
Eb' laj k'anjel sa' li awimq
1“Xb'aan naq li xnimajwal wankilal li choxa chanchan jun li winq aj eechal junkab'al li ki'elk toj eq'la chi xsik'b'aleb' aj k'anjel re li rawimq. 2Ut naq eb' laj k'anjel ke'xk'ulub'an xch'ool k'anjelak chi lajeeb' xka'k'aal tumin li kutan, kixtaqlaheb' sa' li rawimq. 3Naq ki'elk sa' b'eleeb' honal, wank chik kixtaweb' sa' k'ayiil chi xb'ayb'aleb' rib': 4«Ayuqex ajwi' laa'ex sa' li wawimq, ut texintoj chi tz'aqal», chan reheb'. 5Ut eb' a'an koheb'. Ki'elk wi' chik wa'leb' ut sa' oxib' honal, ut jo'kan ajwi' kixb'aanu. 6Haye'k re oob' honal naq ki'elk jun sut chik, ut wan chik kixtaweb' xaqxookeb' aran: «K'a'ut naq wankex arin chixjunil li kutan chi xb'ayb'al eerib'?», chan reheb'. 7Ke'xsume ut ke'xye: Xb'aan naq maa'ani xyehok k'anjelak qe. Kixye ut reheb': «Ayuqex ajwi' laa'ex sa' li wawimq».
8“Naq ki'ewuuk, laj eechal awimq kixye re li xmertoom: «B'oqeb' chaq laj k'anjel ut tojeb' li xkutan: xb'enwa taatojeb' li toje' xe'ok, toja' naq taatojeb' li xe'ok xb'enwa». 9Ke'chalk eb' li xe'ok sa' oob' honal ut ke'xk'ul lajeeb' xka'k'aal chi tumin chi xjunjunqaleb'. 10Ke'chalk ajwi' eb' li xe'ok xb'enwa: sa' xch'ooleb' a'an naq terto chik te'xk'ul; ab'an lajeeb' xka'k'aal ajwi' ke'xk'ul chi xjunjunqaleb'. 11Ut naq ke'xk'ul, ke'ok chi xwech'inkil rix laj eechal ch'och': 12«Eb' a'in li xe'ok moqon jun k'amok ajwi' xe'k'anjelak, ut xajuntaq'eetaheb' qik'in laa'o li xqarahila li kutan ut xqakuy xtiqwal li saq'e», chankeb'. 13Kichaq'ok laj eechal ch'och' ut kixye re jun reheb' a'an: «At wamiiw, ink'a' yookin chasachb'al. Ma ink'a' tab'i' xk'ulub'an aach'ool chiwu k'anjelak chi lajeeb' xka'k'aal chi tumin? 14K'am b'i' laawe ut ayu. Twaj xk'eeb'al re li winq a'in li xk'ulunk moqon jo'nimal xink'e aawe. 15Ma ink'a' naru tinb'aanu laa'in li nawaj rik'in li k'aru we? Malaj xik' nakawil naq chaab'ilin?».
16“Chi jo'kan eb' li wankeb' chi ixb'ej, te'kanaaq chik chi uub'ej, ut eb' li wankeb' chi uub'ej, te'kanaaq chi ixb'ej”.
Rox resil li xkamik li Jesus
(Mk 10,32-34; Lk 18,31-33)
17Naq yo chi taqe'k li Jesus aran Jerusalén, kixb'oqeb' li xkab'laju chi tzolom xjuneseb' ut sa' li b'e kixye reheb':
18—K'ehomaq reetal, yooko chi taqe'k Jerusalén, ut li K'ajolb'ej taaq'axtesiiq sa' ruq'eb' li xb'eenileb' aj tij ut eb' laj tz'iib'. Te'xteneb' kamk sa' xb'een 19ut te'xq'axtesi sa' ruq'eb' li maawa'eb' aj Judiiy re naq te'reetz'u, te'xrap chi tz'uum ut te'xk'e chiru krus; ab'an sa' rox li kutan taawakliiq chi yo'yo.
Li k'aru kixtz'aama li xna' li ralaleb' laj Sebedeo
(Mk 10,35-40)
20Toja' naq kijilok li xna' li ralaleb' laj Sebedeo chi xk'atq li Jesus, rochb'eeneb' li xyum, ut kixwiq'ib' rib' re xtz'aamankil jun usilal chiru. 21Ut li Jesus kixye re:
—K'aru taawaj?
Kichaq'ok li ixq ut kixye:
—Ye laawaatin naq xkab'ichaleb' linyum a'in te'k'ojlaaq sa' laanimajwal wankilal, jun sa' laanim uq' ut jun sa' laatz'e.
22Ab'an li Jesus kixye:
—Ink'a' nekenaw k'aru yookex chi xtz'aamankil. Ma truuq teeruk' xsa' li sek' tinwuk' laa'in?
23—Tooruuq, chankeb'.
Ut li Jesus kixye reheb':
—Yaal naq teeruk' xsa' linsek',#20,23 Naraj naxye naq laj Santiago ut laj Jwan te'tz'aqonq sa' xrahilal li Jesus. ab'an li k'ojlaak sa' linnim uq' malaj sa' lintz'e moko laa'in ta yaal we xk'eeb'al, a'an b'an reheb' li ak k'uub'k'u wi' chaq xb'aan linYuwa'.
Eb' laj jolominel tento naq te'xkub'si rib'
(Mk 10,41-45)
24Naq ke'rab'i a'in li lajeeb' chik, ke'po'k sa' xb'eeneb' li wiib' riitz'ineb' rib'. 25Toja' naq li Jesus kixb'oqeb' ut kixye:
—Nekenaw naq eb' laj jolominel reheb' li tenamit neke'numtaak sa' xb'eeneb' ut li xninqaleb' ru winq neke'xrahob'tesiheb' rik'in li xwankileb'. 26Ab'anan moko jo'kanaq ta sa' eeyanq laa'ex: ani naraj naq nimaq xwankil sa' eeyanq, a'anaq laj k'anjel cheru, 27ut li naraj wank cho'q xb'eenil sa' eeyanq, a'anaq leemoos. 28Kama' naq li K'ajolb'ej moko xchalk ta chi k'anjelaak ru, re b'an k'anjelak ut re xk'eeb'al li xyu'am re xkolb'aleb' rix chixjunileb'.
Li wiib' chi mutz' aj Jerikó
(Mk 10,46-52; Lk 18,35-43)
29Naq yookeb' chaq chi elk Jerikó, kitaaqeek li Jesus xb'aan naab'al chi tenamit. 30Toja' naq wiib'eb' li mutz' chunchuukeb' chire li b'e, naq ke'rab'i naq li Jesus yo chi numeek, ke'xjap re chi xyeeb'al:
—At Qaawa', ralalat laj David, chawuxtaana qu!
31Ke'q'use'k xb'aaneb' li tenamit re naq te'xkanab' choqink; a'ut eb' a'an kaw chik ke'xjap re:
—At Qaawa', ralalat laj David, chawuxtaana qu! chankeb'.
32Toja' naq li Jesus kixaqliik, kixb'oqeb' ut kixye:
—K'aru teeraj tinb'aanu eere?
33Ke'chaq'ok eb' a'an:
—Qaawa', chitehonq taxaq xsa' li qu! chankeb'.
34Li Jesus kixtoq'ob'a ruheb', kixch'e' xsa' ruheb', ut sa' junpaat ke'ilok; ut ke'xtaaqe.
Currently Selected:
Mt 20: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
