Lk 12

Mexxiwak

(Mt 10,26-33; 12,32; 10,19-20)

1Sa' ajwi' li honal a'an ke'ch'utlaak k'iila mil chi poyanam, yookeb' chi xpitz'inkil rib'eb'. Ut li Jesus ki'ok chi xyeeb'al xb'een xb'een reheb' li xtzolom: “Chekolaq eerib' chiru li xch'amaleb' laj Pariseey, a' li ka'pak'al uhil. 2Maak'a' wank chi moymo li ink'a' ta taa'elq chi kutankil, chi moko wank k'aru chi muqmu li ink'a' ta taanawmanq. 3Jo'kan naq jo'nimal li xeye sa' aak'ab', taa'ab'imanq chi kutankil. Ut li xeye chi hasb'anb'il sa' kab'l, toj sa' xb'een kab'l taapuktesimanq chaq resil.

4“Ninye eere laa'ex wamiiw: Meexiwaheb' ru li neke'kamsink re li tz'ejwalej, ab'an moqon maak'a' chik te'ruuq xb'aanunkil. 5Tink'ut cheru ani tento teexiwa ru: chexiwa ru li ani nakamsink ut wank xwankil chi kutuk sa' xb'alb'a. Yaal, ninye wi' chik eere: chexiwaaq ru a'an.

6“Ma ink'a' tab'i' nak'ayimank oob'aq li kok' xul chi wiib' sentaaw? Ut maajun reheb' sachso sa' xch'ool li Yos. 7Toj ajlanb'ileb' chixjunil li rismal leejolom! Mexxiwak b'i': q'axal terto eetz'aq chiru naab'aleb' li kok' xul.

8“Laa'in ninye eere: Yalaq ani taayehoq chiruheb' li tenamit naq naxnaw wu, jo'kan ajwi' li K'ajolb'ej tixye naq naxnaw ru chiruheb' li x'ánjel li Yos. 9Ab'an li taatz'eqtaananq we chiruheb' li tenamit, taatz'eqtaanaaq ajwi' a'an chiruheb' li x'ánjel li Yos.

10“Ut yalaq ani taayehoq junaq aatin re xxik'b'al rilb'al li K'ajolb'ej, taakuymanq taasachmanq li xmaak; ab'an li taamajewanq re li Santil Musiq'ej, ink'a' taakuymanq taasachmanq xmaak.#12,10 Mt 12,32.

11“Naq texk'ame'q sa'eb' li ch'utleb'aal kab'l, chiruheb' laj raqol aatin ut li wankeb' sa' xwankil, mixik eech'ool chi xk'oxlankil chanru malaj k'aru teekol wi' eerib', jo'wi' k'aru teeye, 12xb'aan naq li Santil Musiq'ej taak'utuq cheru sa' ajwi' li honal a'an k'aru tento xyeeb'al”.

Li b'ihom maak'a' xna'leb'

13Jun li winq sa' xyanqeb' li tenamit kixye re li Jesus:

—At Tzolonel, ye re li was naq chixjek'aq b'ayaq we li junkab'lal xkanaak cho'q qe.

14Kichaq'ok li Jesus ut kixye:

—At winq, ani xxaqab'ank we cho'q aj raqol aatin malaj aj jek'onel junkab'lal sa' eeyanq?

15Ut kixye reheb':

—Chek'e reetal ut chekolaq eerib' chiru chixjunil li atawank, xb'aan naq, us ta numtajenaq li xb'ihomal junaq winq, moko taak'ehe'q ta xyu'am xb'aan li xjunkab'lal.

16Toja' naq kixye reheb' jun li jaljookil ru aatin: “Sa' xch'och' jun li winq b'ihom naab'al ru li awimq ki'elk. 17Ut a'an yo chi xk'oxlankil sa' xch'ool: «K'aru tinb'aanu? Xb'aan naq maak'a' b'ar tinch'utub' wi' ru li wawimq». 18Ut kixye: «Tinb'aanu a'in: tinjuk'eb' li rochochil ru li wawimq ut jalaneb' chik q'axal ninq chik tinyiib'; aran tinch'utub' chixjunil lintriiw ut chixjunil li k'aru wank we. 19Toja' naq tinye re li linyu'am: Naab'al linb'ihomal k'uulanb'il cho'q re k'iila chihab'. Tinhilanq b'i', tinwa'aq, tin'uk'aq ut tinninq'ehiq». 20A'ut li Yos kixye re: «At jip, sa' ajwi' li q'oqyink a'in taamaq'e'q chawu laayu'am. Ut li k'a'aq re ru xakawresi, ani taa'eechaninq re?».

21“Jo'ka'in tixk'ul li ani naxk'uula xb'ihomal cho'q re xjunes rib' ut ink'a' nab'ihomo'k cho'q re li Yos”.

Mixik eech'ool chi k'oxlak

(Mt 6,25-34)

22Kixye li Jesus reheb' li xtzolom: “Jo'kan naq ninye eere: Mixik eech'ool chi k'oxlak chirix leeyu'am k'aru teetzeka, chi moko chirix leetz'ejwal k'aru teetiqib' wi' eerib', 23xb'aan naq jwal loq' li qayu'am chiru li qatzekemq, ut li tz'ejwalej chiru li aq'ej. 24K'ehomaq reetal eb' li tz'oq: ink'a' neke'awk chi moko neke'q'olok; maak'a' xk'uuleb'aaleb' chi moko rochochil ru li rawimq, ut li Yos nach'oolanink reheb'. Ut laa'ex k'ajo' chik leeloq'al chiruheb' li xik'anel xul!

25“Ani eere laa'ex, us ta naxik xch'ool chi xk'oxlankil, taaruhanq chi xtiqb'al wiib'aq k'utub' li xteram? 26Wi ut chi moko li k'aru jwal kach'in texruuq chi xb'aanunkil, k'a'ut naq naxik eech'ool chi k'oxlak chirix li k'a'aq chik ru?

27“Chek'e reetal eb' li uutz'u'uj: ink'a' neke'xtawasi rib' chi moko neke'q'inok. A'ut laa'in ninye eere naq chi moko laj Salomón sa' chixjunil li xnimal xloq'al kixtiqib' rib' kama' junaq reheb' a'an. 28Wi li Yos jo'ka'in naq naxtiqib' li pim li wank anaqwan chiru tzuultaq'a ut wulaj taakutmanq sa' xam, ma ink'a' tab'i' q'axal numtajenaq chik tixb'aanu eere laa'ex li kach'in ajwi' leepaab'aal?

29“Jo'kan utan mixik eech'ool chi xsik'b'al k'aru teetzeka malaj k'aru teeruk', chi moko yooq leek'a'uxl chirix k'a'aq re ru. 30Chixjunil a'in neke'xk'oxla eb' li maak'a'eb' xpaab'aal sa' li ruuchich'och' a'in. Ab'an ak naxnaw leeYuwa' naq nekeraj ru a'in. 31Sik'omaq xb'enwa li xnimajwal awab'ejihom li Yos, ut chixjunil a'in taak'eemanq chaq eere cho'q xtz'aqob'.

32“Mexxiwak li jun ch'ina ch'uutex linkarneer, xb'aan naq xwulak chiru leeYuwa' xk'eeb'al eere li xnimajwal awab'ejihom.

Li tz'aqal b'ihomal

(Mt 6,20-21)

33“Chek'ayi li k'aru wank eere ut chek'ehaq reheb' li wankeb' sa' rajb'al ru. Cheb'aanu eeb'ools li ink'a' te'q'eeloq, jun leeb'ihomal li ink'a' taalajq taa'oso'q sa' choxa, b'arwi' ink'a' nawulak laj elq', chi moko nasachok li xmaxel. 34Xb'aan naq b'ar wanq leeb'ihomal, aran ajwi' taawanq leech'ool.

Yo'oon wanqex

(Mt 24,43-51)

35“Junelik b'ak'b'ooq leesa' ut lochlooq leexam. 36Jo'kaqex eb' li winq yookeb' chi royb'eninkil naq laj eechal reheb' taasutq'iiq chaq sa' li sumlaak, re naq, ka'ajwi' taak'ulunq ut taab'oqoq, tikto te'xte li kab'l chiru. 37Us xaq reheb' laj k'anjel tole'tawe'q chi yo'lek xb'aan laj eechal reheb' sa' xk'ulunik. Relik chi yaal ninye eere naq tixb'ak' li xsa', tixhiltasiheb' sa' meex ut taanume'q sa' xyanqeb' chi xk'eeb'aleb' chi tzekank. 38Wi taak'ulunq tuqtu q'oqyink malaj saqewk re ut tixtaweb' chi yo'lek, us xaq reheb' laj k'anjel a'an!

39“Chenawaq a'in: wi laj eechal kab'l tixnaw ta jo'q'e honal taak'ulunq laj elq', ink'a' raj tixkanab' chi weqe'k li rochoch. 40Jo'kan ajwi' laa'ex yo'oon wanqex, xb'aan naq maak'a'aq sa' eech'ool naq tol'elq li K'ajolb'ej”.

41Kixye laj Pedro:

—Qaawa', ma ka'ajwi' cho'q qe nakaye li jaljookil ru aatin a'in malaj reheb' ajwi' chixjunileb'?

42Kichaq'ok li Qaawa' ut kixye: “Ani li moosej tiik xch'ool ut wank xna'leb' li taak'ehe'q xwankil xb'aan laj eechal re sa' xb'eeneb' li rech moosil re xk'eeb'al xwaheb' sa' xq'ehil? 43Us xaq re li moosej a'an li toltawe'q chi xb'aanunkil a'in naq tol'elq laj eechal re. 44Relik chi yaal ninye eere naq tixxaqab' chi xjolominkil chixjunil li xjunkab'lal. 45Ab'anan, wi li moosej a'an tixye sa' xch'ool: «Laj eechal we xb'ay chaq», ut taa'ok chi xsak'b'aleb' li rech moosil winq ut ixq, taa'ok chi wa'ak, chi uk'ak ut chi kalaak, 46taak'ulunq laj eechal re li moosej a'an sa' li kutan ink'a' wi' naxyo'oni ut sa' li honal maak'a' wi' sa' xch'ool, taarisi ut tixk'e xna'aj sa' xyanqeb' laj q'etol aatin.

47“Li moosej a'an li ak naxnaw k'aru naraj laj eechal re ut maak'a' xkawresi chi moko xb'aanu jo' naraj laj eechal re, naab'al xlob' tixk'ul. 48Ut li ink'a' naxnaw ut xb'aanu li xk'ulub' wi sak'e'k, yal kach'in ajwi' xlob' tixk'ul. Ani xk'eemank wi' naab'al, naab'al ajwi' taatitz'manq re; a'ut ani xk'uluk naab'al, q'axal naab'al chik taapatz'manq re.

Jachok ib' sa' xk'ab'a' li Jesus

(Mt 10,34-36)

49“Xam xinchalk chi xk'eeb'al sa' xb'een li ruuchich'och' ut k'ajo' ninrahi naq ak lochlooq taxaq! 50Wank jun kub'iha' li tento tink'ul ut makach'in naq nayot'e'k inch'ool toj reetal toxtz'aqloq ru!#12,50 Li kub'iha' li tento tixk'ul li Jesus a'an li xnimal rahilal chalk re sa' xb'een (cf. Mk 10,39).

51“Ma nekek'oxla naq wankin arin chi xk'eeb'al li tuqtuukil usilal sa' ruuchich'och'? Ninye eere naq ink'a'; xinchalk b'an chi xk'eeb'al li jachok ib'. 52Xb'aan naq chalen anaqwan oob' wanqeb' sa' jun chi kab'l ut jachjooqeb' chirib'ileb' rib': oxib' wanqeb' sa' raaxiik' rik'ineb' li wiib' ut li wiib' rik'ineb' li oxib'; 53jachjooqeb' li yuwa'b'ej rik'in li alalb'ej ut li alalb'ej rik'in li yuwa'b'ej; li na'b'ej rik'in li ko'b'ej ut li ko'b'ej rik'in li na'b'ej; li xna' li b'eelomej rik'in li alib'ej ut li alib'ej rik'in li alib'om re”.

Li reetalil eb' li kutan

(Mt 16,1-3; 5,25-26; Mk 8,11-13)

54Naxyehatq ajwi' reheb' li tenamit: “Naq nekeril junaq choql li na'elk chaq sa' rokeb'l saq'e, sa' junpaat nekeye: «Chalk re li hab'»; ut jo'kan nak'ulmank. 55Ut naq na'apunk chaq li iq' sa' xsak'leb' iq', nekeye: «Tiqaq ru li kutan»; ut jo'kan nak'ulmank. 56Ex aj ka'pak'al u! Wi laa'ex nekenaw xk'eeb'al reetal ru li choxach'och', k'a' put naq ink'a' nekek'e reetal eb' li kutan a'in?

57“K'a'ut naq ink'a' neketz'il rix eejunes k'aru us xb'aanunkil? 58Naq yooqat chi xik rik'in laj raqol aatin aawochb'een li xik' na'ilok aawe, k'e aach'ool chi xk'amb'al aawib' sa' usilal rik'in, sa' b'e. Mare anchal tatxkelo chiru laj raqol aatin, ut laj raqol aatin tatxq'axtesi sa' ruq' li xtaql li chaq'rab', ut li xtaql li chaq'rab' tatxk'e sa' tz'alam. 59Ninye aawe naq ink'a' tat-elq chaq aran toj reetal taatoj rix chixjunil laak'as”.

Currently Selected:

Lk 12: QQC

Highlight

Copy