Lk 13

Tento xyot'b'al qach'ool xjalb'al qak'a'uxl

1Sa' ajwi' li honal a'an wan ke'wulak rik'in li Jesus chi xyeeb'al k'aru ke'xk'ul eb' laj Galilea, naq laj Pilaat kixkamsiheb' naq yookeb' chi mayejak chiru li Yos.

2Kichaq'ok li Jesus ut kixye reheb': “Ma nekek'oxla naq eb' aj Galilea a'an q'axal chik aj maakeb' chiru chixjunileb' li rech tenamitul, xb'aan naq ke'xk'ul li rahilal a'an? 3Ninye eere naq ink'a'; wi ink'a' teeyot' eech'ool teejal eek'a'uxl, juntaq'eet naq tex'oso'q chejunilex. 4Malaj eb' li waqxaqlaju li ke'kamk naq kit'ane'k sa' xb'eeneb' li najt xteramil kab'l aran Siloé, ma nekek'oxla naq numtajenaq chik li xmaakeb' chiru chixjunileb' li wankeb' Jerusalén? 5Ninye eere naq ink'a'; ut wi ink'a' teeyot' eech'ool teejal eek'a'uxl, juntaq'eet naq tex'oso'q chejunilex”.

Li jaljookil ru aatin chirix li xche'el li iig li ink'a' na'uuchink

6Ut kixye li jaljookil ru aatin a'in: “Jun li winq wank jun toon x'iig awb'il sa' li xch'och'. Kichalk chi xsik'b'al li ru, ab'anan maak'a' kixtaw. 7Toja' naq kixye re laj ilol awimq: «Il, chalen oxib' chihab' wokik raj chi xsik'b'al li ru li iig a'in, ut maak'a' nintaw. Yok'. K'a' aj e naq yo chi xlaatz'ankil li ch'och'?». 8Ut a'an kichaq'ok ut kixye: «Wa', kanab' wan chik chiru li chihab' a'in, toj tinb'eki li ch'och' sa' xsutam ut tink'e xq'emal. 9Mare taa'uuchinq sa' li chihab' chalk re; wi ut ink'a', chayok'aq»”.

Kixk'irtasi jun li ixq sa' sábado

10Sa' jun li sábado, li Jesus yo chaq chi xtzolb'aleb' li tenamit sa' jun li ch'utleb'aal kab'l, 11ut wank aran jun li ixq, ak waqxaqlaju chihab' rokik xyajel xb'aan jun li musiq'ej: k'utzk'u, tik ink'a' naru chi xtutz'ub'ankil rib'. 12Naq kiril a'an li Jesus, kixb'oq rik'in ut kixye re:

—At ixq, k'irajenaq chik laayajel.

13Kixk'e li ruq' sa' xb'een, ut sa' junpaat kixtiikob'resi rib' li ixq ut ki'ok chi xnimankil ru li Yos. 14A'ut li xb'eenil li ch'utleb'aal kab'l kipo'k naq li Jesus xk'irtasink sa' sábado; ut ki'ok chi xyeeb'al reheb' li tenamit:

—Wank waqib' kutan li naru wi' k'anjelak. Chexchalq b'i' sa'eb' li kutan a'an chi k'irtasiik ut ink'a' sa' li kutan sábado.

15Kichaq'ok li Qaawa' ut kixye:

—Ex aj ka'pak'al u! Ma ink'a' tab'i' chejunilex nekehit leeb'ooyx malaj leeb'uur sa' li xwa'leb'aaleb' sa' sábado, re xk'amb'aleb' chi uk'ak? 16Ut a'in, xrab'in ajwi' laj Abraham, b'ak'b'o xb'aan laj tza waqxaqlaju chihab' anaqwan, ma ink'a' tab'i' tento raj xhitb'al sa' li b'ak'b'o wi' sa' li kutan sábado?

17Naq yo chi xyeeb'al a'in, ke'chalk xxutaan eb' li xik' neke'ilok re; ab'anan chixjunileb' li tenamit ke'saho'k sa' xch'ool rik'in li sachb'ach'oolej nalajxb'aanu.

Li jaljookil ru aatin chirix li jun t'orol chi mostaas

(Mt 13,31-32; Mk 4,30-32)

18Toja' naq kixye: “K'aru juntaq'eet wi' li xnimajwal awab'ejihom li Yos malaj k'aru tinjuntaq'eeta wi'? 19Chanchan jun t'orol li mostaas. Jun li winq kixokok re ut kiraw sa' xyanq li rawimq. Kik'iik, kiche'ok, ut eb' li xul li neke'rupupik chiru choxa ke'sukub'k sa'eb' li ruq'”.

Jaljookil ru aatin chirix li xyu li xq'emal li kaxlan wa

(Mt 13,33)

20Kixye ajwi': “K'aru tinjuntaq'eeta wi' li xnimajwal awab'ejihom li Yos? 21Chanchan kach'in xyu li kaxlan wa. Jun li ixq kichapok re ut koxk'e sa' jun aroow chi k'aj, toj reetal kisipook chixjunil”.

Ch'a'aj ok sa' li xnimajwal awab'ejihom li Yos

(Mt 7,13-14, 21-23)

22Li Jesus koxnume'q sa'atqeb' li tenamit ut k'aleb'aal ut kixtzoleb' li poyanam naq yo chi xik Jerusalén. 23Toja' naq jun kixye re:

—Qaawa', ma ink'a' k'iheb' li te'kole'q?

24Kixye li Jesus reheb': “Cheyal eeq'e chi ok sa' li okeb'aal kach'in ru, xb'aan naq ninye eere naq naab'aleb' li te'yaloq raj ok ut ink'a' te'ruuq. 25Naq taaxaqliiq chaq laj eechal kab'l ut toxtz'ap li okeb'aal, laa'ex li wanqex chirix kab'l teetikib' b'oqok sa' li okeb'aal: «Qaawa', te li kab'l chiqu», cha'qex. Ut a'an taachaq'oq chaq ut tixye eere: «Ink'a' ninnaw eeru b'ar chalenaqex». 26Toja' naq teetikib' xyeeb'al: «Xoowa'ak xoo'uk'ak qochb'eenat, ut laa'at xattzolok sa'eb' li qak'ayiil», cha'qex. 27A'ut a'an tixye eere: «Ink'a' ninnaw b'ar xexchal chaq. Elenqex chiwu chejunilex aj b'aanuhom maa'usilal!».#13,27 Sal 6,9.

28“Aran taawanq li yaab'ak ut li k'uxuxink ruuch e, naq teeril ru laj Abrahán, laj Isahak ut laj Jakob ut chixjunileb' li propeet sa' li xnimajwal awab'ejihom li Yos, ut laa'ex tex'isiiq chirix kab'l. 29Ut te'chalje'q sa' releb'l ut sa' rokeb'l saq'e, sa' releb'l ut sa' rokeb'l iq', ut tole'hilanq sa' meex sa' li xnimajwal awab'ejihom li Yos.

30“Wan wankeb' chi ixb'ej: te'kanaaq chi uub'ej; ut wan wankeb' chi uub'ej: te'kanaaq chi ixb'ej”.

Laj Herodes taaraj xkamsinkil li Jesus

31Sa' ajwi' li honal a'an wankeb' aj Pariseey ke'jilok chi xk'atq li Jesus ut ke'xye re:

—Elen arin ut ayu, xb'aan naq laj Herodes taaraj aakamsinkil.

32Ut a'an kixye reheb':

—Ayuqex chi xyeeb'al re li xk'aji winq a'an:#13,32 Tz'iib'anb'il arin sa' griego: Ayuqex chi xyeeb'al re li yak a'an. Cho'q reheb' laj Israel li aatin yak ink'a' naraj naxye: jun li winq li wank xk'a'uxl, naraj b'an naxye: jun li xk'aji winq, jun li winq li maak'a' na'ok wi'. «Laa'in nin'isink maa'usej musiq'ej ut nink'irtasink chiru li kutan a'in ut wulaj; ut sa' rox li kutan tz'aqlojenaqaq ru link'anjel». 33Ab'anan tento naq chiru li kutan a'in jo' ajwi' wulaj ut kab'ej yooqin chi xik, xb'aan naq ink'a' naru taakamq junaq propeet chi ink'a' ta Jerusalén.

Li Jesus ki'aatinak chirix Jerusalén

(Mt 23,37-39)

34“At Jerusalén, Jerusalén, li nakakamsiheb' li propeet ut nakakuteb' chi pek li taqlanb'ileb' chaq aawik'in! K'ajo' naq xwaj raj xch'utub'ankileb' laawalal aak'ajol, kama' junaq kaxlan naxkupuheb' li ral rub'el li xxik', ut ink'a' xeraj! 35Anaqwan taakanab'aaq leerochoch. Ninye eere naq ink'a' chik teeril wu toj taawulaq xq'ehil naq teeye: «Usilaatinanb'il li xchalk sa' xk'ab'a' li Qaawa'!»”.#13,35 Sal 118,26.

Currently Selected:

Lk 13: QQC

Highlight

Copy