Jr 26
26
Ke'raj raj xkamsinkil laj Jeremías
1Naq laj Johakín,#26,1 2 R 23,36-24,6; 2 Kr 36,5-7. ralal laj Josías, ki'ok chi awab'ejink sa' xb'eeneb' laj Judá, li Qaawa' kiraatina laj Jeremías 2ut kixye re chi jo'ka'in: “Xaqab' aawib' chiru xneb'aalil li wochoch ut aatinan rik'ineb' chixjunil li poyanam sa' xteepal Judá li neke'chalk chi loq'onink sa' rochoch li Qaawa'. Ye reheb' chixjunil li xinye aawe chi maajun li aatin taamuq. 3Mare anchal tate'xpaab' ut te'xkanab' xb'aanunkil li maa'usilal. Chi jo'kan ink'a' chik tintaqla chaq li rahilal sa' xb'eeneb', jo' xink'oxla xb'aanunkil xb'aan naq ink'a' us li xyehom ut xb'aanuhomeb'. 4Ye reheb': «Wi ink'a' tineepaab' ut ink'a' teeb'aanu li naxye linchaq'rab' ink'ehom eere, 5chi moko teerab'i leeq'usb'al xb'aaneb' li propeet aj k'anjeleb' chiwu, li rajlal xintaqlaheb' eerik'in ab'an xetz'eqtaanaheb', 6laa'in tinkanab' li ochoch a'in jo' kinkanab' Siló,#26,6 Jos 18,1; 1 S 4; Sal 78,60; Jr 7,12-14. ut tink'e Jerusalén chi tz'eqtaanaak xb'aaneb' chixjunil li tenamit sa' ruuchich'och'»”.
7Eb' laj tij, eb' li propeet ut chixjunil li tenamit ke'rab'i li aatin kixye laj Jeremías sa' li rochoch li Yos. 8Ab'anan naq kiraqe'k laj Jeremías chi xyeeb'al chixjunil li xchaq'rab'iik wi' xb'aan li Qaawa', kichape'k xb'aaneb' laj tij, eb' li propeet ut xb'aaneb' chixjunil li tenamit, ut kiyehe'k re: “Relik chi yaal naq tatkamq. 9K'a'ut naq xaye sa' xk'ab'a' li Qaawa' naq li ochoch a'in taakanaaq jo' Siló, ut Jerusalén taajuk'manq chi maajun chik poyanam taakanaaq chisa'?”. Ut chixjunileb' li poyanam ke'xtuub' rib' sa' rochoch li Yos chi xsutb'al laj Jeremías.
10Naq eb' li xjolomileb' laj Judá ke'rab'i a'in, ke'elk sa' rochochil li awab'ej, koheb' sa' rochoch li Yos ut aran, sa' li Ak' Okeb'aal, ke'xk'ojob' rib'eb'. 11Toja' naq eb' laj tij ut eb' li propeet ke'aatinak rik'ineb' laj jolominel jo' ajwi' rik'ineb' chixjunil li poyanam ut ke'xye: “Li winq a'in xk'ulub' naq taateneb'aaq kamk sa' xb'een, xb'aan naq xye naq li tenamit a'in taajuk'manq, jo' xerab'i laa'ex rik'in leexik”.
12Kichaq'ok laj Jeremías ut kixye reheb' li xjolomileb' li tenamit ut reheb' chixjunil li poyanam: “Li Qaawa' xtaqlank chaq we chi xyeeb'al li aatin xerab'i chirix li xloq'laj ochoch ut chirix li tenamit a'in. 13Chaab'ilob'resiiq leeyu'am ut leeyehom eeb'aanuhom, paab'omaq li Qaawa' leeYos, ut A'an ink'a' tixtaqla chaq li rahilal sa' eeb'een jo' xineerab'i chi xyeeb'al. 14Laa'in wankin sa' leeruq' anaqwan: b'aanuhomaq we li k'aru jwal us cheru, a' li k'aru teeraj xb'aanunkil we. 15Ab'anan chenawaq chi us naq maak'a' inmaak: wi tineekamsi laa'in, q'axal wanq wi' chik leemaak jo' ajwi' wanq xmaakeb' laj Jerusalén. Relik chi yaal naq a' li Qaawa' xtaqlank chaq we chi xyeeb'al chi ch'olch'o ru eb' li aatin xerab'i”.
16Toja' naq eb' li xjolomil li tenamit ut chixjunileb' li poyanam ke'xye reheb' laj tij ut eb' li propeet: “Li winq a'in moko xk'ulub' ta kamsiik, xb'aan naq xooraatina sa' xk'ab'a' li Qaawa' li qaYos”, chankeb'.
17Wankeb' cheekel winq ke'xaqliik ut ke'xye reheb' chixjunil li poyanam ch'utch'uukeb' aran: 18“Chiru xyu'amil laj Esekías, awab'ej re Judá, laj Mikeas aj Moréset ki'aatinak sa' xk'ab'a' li Qaawa' naq kixye reheb' chixjunil li tenamit:
«Jo'ka'in xye li Nimajwal Yos:
Sión kama'aq chik li k'aleb'aal re awk,
ut Jerusalén taakanaaq cho'q po'lem,
ut taak'iche'o'q li xna'aj li rochoch li Yos».#26,18 Mi 3,12.
19“Ma kikamsiik tab'i' laj Mikeas xb'aan laj Esekías, awab'ej re Judá, ut xb'aaneb' chixjunileb' laj Judá? Ink'a'. Li awab'ej kixxiwa ru li Qaawa' ut kixtz'aama xkuyb'aleb' li xmaak. Ut li Qaawa' ink'a' chik kixtaqla chaq li rahilal sa' xb'eeneb' jo' kixk'uub' xb'enwa. A'ut laa'o, wi tqakamsi laj Jeremías, tqateneb' jun nimla maak sa' qab'een”, chankeb'.
20Jo'ka'an ajwi', sa' xk'ab'a' li Qaawa', ki'aatinak li propeet Urías, ralal laj Semaías, aj Kiryat-Yeharín, naq kixye resil li rahilal li tixk'ul Jerusalén jo' ajwi' chixjunil li xsutam, jo' tz'aqal yeeb'il xb'aan laj Jeremías. 21Laj Johakín, li awab'ej, eb' li xninqal ru winq ut eb' li xjolomileb' li tenamit ke'rab'i li kiyeemank. Ut li awab'ej kixsik' chanru naq tixkamsi laj Urías. Ab'anan naq li propeet kixnaw a'in, kixiwak ut koho eelel sa' li tenamit Ejiipt.
22Moqon laj Johakín, li awab'ej, kixtaqla laj Elnatán, ralal laj Akbor, sa' li tenamit Ejiipt rochb'een wiib' oxib' li winq. 23Eb' a'an ke'risi chaq laj Urías aran Ejiipt ut ke'xk'am chaq chiru laj Johakín, li awab'ej, ut a'in kixk'e chi kamsiik ut chi kute'k sa' xyanqeb' li k'iila kamenaq.
24B'anyox re laj Ajikán, ralal laj Safán, naq kixkol laj Jeremías chiru li kamk, ut ink'a' kiq'axtesiik sa' ruq'eb' li k'iila poyanam.
Currently Selected:
Jr 26: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
