Jr 25
25
Lajeeb' xkaak'aal chihab' te'wanq chi munil aran Babilonia
1Ak kaahib' chihab' rokik chi awab'ejink laj Johakín,#25,1 2 R 24,1; 2 Kr 36,5-7; Dn 1,1-2. ralal laj Josías, sa' xb'eeneb' laj Judá, ki'aatinak li Qaawa' rik'in laj Jeremías chirix li te'xk'ul eb' laj Judá. A'an kik'ulmank sa' li xb'een chihab' chi awab'ejink laj Nabukodonosor aran Babilonia. 2Laj Jeremías, li propeet, kixnumsi li esil a'an reheb' chixjunil laj Judá jo'wi' reheb' laj Jerusalén. Kixye chi jo'ka'in:
3“Chalen chaq naq ak oxlaju chihab'aq rokik chi awab'ejink laj Josías, ralal laj Amón, sa' xb'een Judá toj anaqwan, li Qaawa' yo chi aatinak wik'in, ut laa'in yookin chi xyeeb'al eere chi tz'aqal re ru. Ak oxib' xka'k'aal chihab' xtikib'ankil a'an, ab'an laa'ex ink'a' nikineepaab'. 4Li Qaawa' ajwi' k'iila wa kixtaqla chaq eb' li xpropeet eerik'in, ab'an laa'ex ink'a' kex'abink chiruheb' chi moko kepaab'eb': 5«Kanab'omaq xb'aanunkil li maa'usilal ut li ink'a' us -chankeb'-. Chi jo'kan sa texwanq sa' li na'ajej xk'ehom eere chi junajwa li Qaawa' ut cho'q reheb' leexe'toonil yuwa'. 6Mixik eech'ool chirixeb' li jalanil yos, meeloq'oni chik chi moko chexk'anjelaq chiruheb'; meechiq' xjosq'il li Qaawa' rik'in li xyiib'ahom leeruq', chi jo'kan maajun rahilal tixb'aanu eere», chankeb'. 7A'ut laa'ex ink'a' nikineepaab' -chan li Qaawa'-; kechiq' b'an injosq'il naq nekeloq'oni li xyiib'ahom leeruq', ut rik'in a'an nekeb'oq chaq li rahilal sa' eeb'een.
8“Jo'kan naq li Nimajwal Yos xye chi jo'ka'in: «Laa'ex ink'a' keraj rab'inkil linq'usum; 9jo'kan naq tinb'oqeb' chaq chixjunileb' li tenamit li wankeb' chaq sa' xjayal releb'l iq' jo' ajwi' laj Nabukodonosor, li awab'ej re Babilonia, laj k'anjel chiwu, re naq te'chalq chi xsachb'al li na'ajej a'in ut chixjunileb' li poyanam wankeb' chisa' jo'wi' li wankeb' chi xsutam. Kok'putz' tinkanab'eb' chi junajwa; te'se'eeq xb'aaneb' chixjunil, xiwajelaq ut xutaanalaq rilb'al. 10Ink'a' chik taa'ab'imanq li ninq'ehik sa' xyanqeb', chi moko li sahil ch'oolejil ut li b'ichank re li sumlaak;#25,10 Jr 7,34; 16,9; Ap 18,22-23. ink'a' chik taa'ab'iiq xyaab' li ke'leb' ut maak'a'aq chik li xsaqenkil li xam. 11Chixjunil li na'ajej a'in taasachmanq ut putz'inb'il taakanaaq. Ut chiru lajeeb' xkaak'aal chihab'#25,11 2 Kr 36,21; Jr 29,10; Dn 9,2; Zak 1,12. chixjunileb' te'k'anjelaq chiru li awab'ej re Babilonia. 12Ut naq akaq xnume'k li lajeeb' xkaak'aal chihab' a'an, laa'in tinraqoq aatin sa' xb'een li awab'ej re Babilonia jo'wi' sa' xb'een li xtenamit xb'aan li xmaakeb'. Jo'kan ajwi' tinb'aanu reheb' laj Kaldeha, ut po'lem teb'inkanab' chi junwaakaj -chan li Qaawa'-. 13Tintaqla chaq sa' xb'een Babilonia chixjunil linyehom chaq chirix, jo'ch'inal jo'nimal li tz'iib'anb'il sa' li hu a'in ut yeeb'il chaq xb'aan laj Jeremías sa' ink'ab'a' chirixeb' chixjunil li tenamit. 14Xb'aan naq eb' laj Babilonia te'wanq rub'el xwankileb' li xninqal ru tenamit ut eb' li awab'ej jwal kaweb' rib'. Ut laa'in tink'eheb' chi xtojb'al rix li xmaakeb' jo' chanru li xyehom ut xb'aanuhomeb'»”.
Eb' li tenamit te'xtoj rix li xmaakeb'
15Li Qaawa', li xYos laj Israel, kixye we: “K'ul li sek' a'in, nujenaq chi b'iin, reetalil linjosq'il,#25,15 Is 51,17; Ap 14,10; 16,19. ut k'e chi ruk'eb' chixjunileb' li tenamit b'arwi' tatintaqla. 16Naq te'ruk' li b'iin, te'xxa'wa rib' ut taakaano'q ruheb' xb'aan li raaxiik' tintaqla chaq sa' xb'eeneb'”.
17Laa'in kink'ul li sek' sa' ruq' li Qaawa' ut kink'e chi ruk'eb' chixjunileb' li tenamit li kinxtaqla wi' li Qaawa'. 18Kink'e chi ruk'eb' laj Jerusalén, eb' laj Judá, jo'wi' kink'e reheb' li awab'ej ut eb' li xninqal ru winq, re xsachb'al ruheb' ut xkanab'ankileb' chi kok'putz' chi junajwa ut chi xiwajelaq rilb'al, chi tz'eqtaananb'ilaqeb' ut majewanb'ilaqeb', jo' wankeb' chalen toj anaqwan. 19Kink'e ajwi' chi ruk' laj Parahón, li awab'ej re Ejiipt, eb' laj k'anjel chiru, eb' li xninqal ru winq ut re chixjunil li tenamit. 20Kink'e ajwi' reheb' chixjunil li k'iila paay chi poyanam wankeb' aran; kink'e reheb' chixjunil li awab'ej sa' xteepal Us, ut chixjunileb' li wankeb' sa' xsutam Filistea: sa' li tenamit Askalón, Gasa, Ekrón ut Asdod; 21eb' laj Edom, eb' laj Mohab ut eb' li ralal xk'ajol laj Amón; 22chixjunileb' li awab'ej re Tiro ut Sidón; eb' li awab'ej li wankatqeb' chaq chire li palaw; 23eb' li xteepalileb' laj Dedán, eb' laj Temá, eb' laj Bus ut chixjunileb' li neke'xjo li xjolomeb'; 24chixjunileb' li awab'ej re Arabia ut eb' li neke'taqlank sa' xb'eeneb' li k'iila paay chi tenamit li wankeb' chaq sa' li chaqich'och'; 25chixjunileb' li awab'ej re Simrí, eb' li awab'ej re Elam ut chixjunileb' laj Media; 26chixjunileb' li awab'ej wankeb' chaq sa' xjayal releb'l iq', eb' li wankeb' chi nach' jo'wi' li wankeb' chaq chi najt chirib'ileb' rib', ut chixjunileb' li awab'ej li wankeb' junsut junrub'el choxa. Ut li awab'ej re Babilonia taa'uk'aq sa' xraqik.
27Chirix chik a'an kixye we li Qaawa': “Jo'ka'in xye li Nimajwal Yos, li xYos laj Israel: Chex'uk'aq, chexkalaaq ut chexa'waaq eerib'. Text'ane'q chiru ch'och' toj reetal naq ink'a' chik texruuq chi wakliik, xb'aan li raaxiik' li tintaqla chaq sa' eeb'een. 28Ut wi ink'a' te'raj xk'ulb'al li sek' chi moko te'raj ruk'b'al li wank chisa', laa'at taaye reheb': «Jo'ka'in xye li Nimajwal Yos: Tento teeruk' xb'aan naq maak'a' chik xja'lenkil: 29ok we chi xtaqlankil li rahilal sa' xb'een li tenamit sik'b'il ru inb'aan. Ma nekek'oxla naq texkole'q? Moko texkole'q ta, xb'aan naq ok we chi xtaqlankil chaq li raaxiik' sa' xb'een chixjunileb' li poyanam li wankeb' sa' ruuchich'och' -chan li Nimajwal Yos».
30“At Jeremías, ye chixjunileb' li aatin a'in sa' ink'ab'a'. Ye reheb' chi jo'ka'in:
«Li Qaawa' tixjap chaq re sa' li choxa
ut taa'aatinaq chaq chi kaw toj sa' li xsantil muheb'aal.#25,30 Jl 3,16; Am 1,2.
Tixjap chaq re chi raatinankil li xtenamit,
jo' naq neke'xjap reheb' li neke'yatz'ok ru li uub'.
31Li xyaab' xkux li Qaawa' taa'ab'imanq xb'aaneb' chixjunil li poyanam,
toj sa' xmaril li ruuchich'och',
xb'aan naq li Qaawa' ok re chi xjitb'al chixjunileb' li poyanam;
A'an taaraqoq aatin sa' xb'een chixjunileb' li tenamit
ut tixsach ruheb' chi ch'iich' li ink'a' useb' xna'leb',
chan li Qaawa'»”.
32Jo'ka'in kixye li Nimajwal Yos:
“Relik chi yaal naq li raaxiik' taanume'q sa' jalan jalanq chi tenamit,
ut k'ajo' li rahilal taawanq
chalen toj sa' xmaril chaq li ruuchich'och'”.
33Chiru li kutan a'an, eb' li te'k'ehe'q chi kamk xb'aan li Qaawa'
t'anaxinq te'kanaaq sa' chixjunil li ruuchich'och';
maajun taayaab'aq chirixeb',
maajun taamuquq reheb'
ut t'anaxinqeb' chiru ch'och' jo'kaqeb' li k'ot.#25,33 Jr 8,1-2.
34Ex xjolomileb' li tenamit, japomaq eere chi yaab'ak!
Ex aj k'aak'alenel ketomq, tolk'osiiq eerib' sa' pojtz' xb'aan xmay li rahilal,
xb'aan naq xwulak xq'ehil li raqb'a aatin sa' eeb'een
ut texkamsiiq jo'qex li karneer ninqeb' xtib'el.
35Eb' laj k'amol xb'e li tenamit ink'a' te'kole'q,
eb' laj jolominel ink'a' te'ruuq chi elelik.
36Japjookeb' re chi yaab'ak eb' laj k'aak'alenel karneer,
q'axal ra wankeb' laj iloleb' ketomq,
xb'aan naq li Qaawa' yo chi xsachb'al chixjunil li raxpim.
37Li xchaq'alil ruheb' li pim xlaje'oso'k
xb'aan xxamlel xjosq'il li Qaawa'.
38Jo' junaq kaqkoj li x'elk sa' li xna'aj,
jo'kan ajwi' naq li Qaawa' x'elk chi xsachb'al ru li xtenamit,
ut li na'ajej xkanaak chi po'lemil,
xb'aan naq xlochk xxamlel xjosq'il li Qaawa',
ut jun nimla raaxiik' xtaqlaak chaq sa' xb'eeneb'.
Currently Selected:
Jr 25: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
