DANIEL (dc) 14
14
LAJ BEL
Laj Daniel ut li yos Bel
1Naq laj Astiajes li awab'ej kiq'ajk kisutq'iik rik'ineb' li xna' xyuwa', a' chik laj Siro, kikanaak sa' li xna'aj cho'q awab'ej re Persia.#14,1 Dn 6,28. 2Laj Daniel a'an tz'aqal nasum'aatinak wi' li awab'ej ut q'axal raaro xb'aan chiru chixjunileb' li ramiiw.
3Eb' laj Babilonia wank jun xyoseb' aj Bel xk'ab'a',#14,3 Is 46,1; Jr 50,2; 51,44; Bar 6,40. ut rajlal kutan neke'mayejak chiru: junelik neke'xyeechi'i chiru ox ox iiq chi chaab'il k'aj, ka'k'aal chi karneer ut lajeeb' xwuqk'aal meet chi b'iin. 4Li awab'ej naxnima ajwi' ru laj Bel ut rajlal kutan nawulak chi xloq'oninkil ru. A'ut laj Daniel naxloq'oni ru li xYos.
5Sa' jun kutan li awab'ej kixpatz' re: “K'a'ut naq ink'a' nakaloq'oni ru laj Bel?”, chan re. Kichaq'ok laj Daniel ut kixye re: “Laa'in ink'a' ninloq'oni ru li jalam u yal yiib'anb'il xb'aan li winq, ka'ajwi' li yo'yookil Yos, laj Winqob'resihom re choxach'och' ut xQaawa'eb' chixjunileb' li wankeb' xyu'am ninloq'oni ru”, chan laj Daniel. 6“Jo'kan naq nakak'oxla naq laj Bel moko a'an ta jun yo'yookil yos? Ma ink'a' nakawil jo'k'ihal naxwa' ut naruk' rajlal kutan?”, chan li awab'ej. 7Toja' naq laj Daniel ki'ok chi se'ek ut kixye re: “Maab'alaq'i aawib', at awab'ej. Li jalam u a'an, yal seb' chisa' ut q'anch'iich' li rix, ut maajun wa xwa'ak chi moko x'uk'ak”.
8K'ajo' naq kichalk xjosq'il li awab'ej ut kixtaqla xb'oqb'aleb' laj tij ut kixye reheb': “Wi ink'a' nekeye we ani natzekank re li k'iila mayej, texkamq. Ab'an wi nekek'ut chiwu naq laj Bel natzekank re, taakamq laj Daniel xb'aan naq xmajewa li yos Bel”. 9Laj Daniel kixye re li awab'ej: “Chi'uxmanq jo' xaye”.
Lajeeb' xkaak'aaleb' laj tij aj k'anjeleb' chiru laj Bel, chi ink'a' k'eeb'ileb' sa' ajl eb' li ixq jo'wi' eb' li ralal xk'ajoleb'. 10Toja' naq li awab'ej koho sa' rochoch laj Bel rochb'een laj Daniel, 11ut aran eb' laj tij ke'xye re li awab'ej: “Laa'o too'elq sa' li ochoch, at awab'ej. Laa'at taak'e li tzekemq ut li yuub'il b'iin chiru laj Bel, taatz'ap li okeb'aal ut kaaxti rik'in laamatq'ab'. Wi toj wanq ajwi' wulaj, naq tolat-elq eq'la, tookamq laa'o; wi ut ink'a' jo'kan, taakamq laj Daniel li xyoob'ank aatin chiqix”, chankeb' laj tij. 12Eb' a'an k'ojk'ookeb' xch'ool xb'aan naq ak xhopomeb' jun numleb'aal rub'el xmeexul li mayej, b'arwi' neke'ok chi xtzekankil li mayej.
13Ka'ajwi' ke'elk laj tij, li awab'ej kixtaqla xk'eeb'al li mayej chiru laj Bel. 14Ut laj Daniel kixtaqlaheb' li xmoos chi xpajinkil li cha sa' chixjunil li ochoch; maajun ki'ilok re, ka'ajwi' li awab'ej. Chirix chik a'an ke'elk, ke'xtz'ap li okeb'aal ut li awab'ej kixkaaxti rik'in li xmatq'ab'; toja' naq koheb'. 15Eb' laj tij ke'wulak chiru li q'oqyink rochb'eeneb' li rixaqil ut eb' li ralal xk'ajoleb', jo' k'aynaqeb' xb'aanunkil; ke'xtzeka ut ke'ruk' chixjunil li mayej.
16Toj eq'la ajwi' chi us li awab'ej ut laj Daniel koheb' sa' rochoch laj Bel. 17Toja' naq li awab'ej kixpatz' re laj Daniel: “Daniel, ma tz'aqal re ru li kaaxt?”, chan re. “Jo'kan, at awab'ej”, chan laj Daniel. 18Ka'ajwi' kiteemank li okeb'aal, li awab'ej ki'ilok wan wi' li meex ut kixye chi kaw xyaab' xkux: “K'ajo' xnimal aawankil, at Bel! Maak'a' b'alaq'ik aawik'in”. 19Ab'an laj Daniel ki'ok chi se'ek, kixchap li awab'ej re naq ink'a' taa'ok sa' li ochoch ut kixye re: “Ilon chiru li ch'och' ut k'e reetal aniheb' aj nums a'an”. 20Kichaq'ok li awab'ej ut kixye: “Yookin chi rilb'al xnumseb' li winq, eb' li ixq ut li kok'al”.
21Ut chi k'ajo' xjosq'il kixtaqla xb'oqb'aleb' laj tij rochb'eeneb' li rixaqil ut eb' li ralal xk'ajoleb', ut a'aneb' ajwi' ke'k'utuk li okeb'aal b'arwi' neke'ok re xtzekankil li mayej nak'eemank chiru li meex. 22Toja' naq li awab'ej kixtaqla xkamsinkileb' laj tij, ut laj Bel kiq'axtesiik sa' ruq' laj Daniel, ut a'in kixpuk'i chi junajwa rochb'een li rochoch.
Laj Daniel kixkamsi li nimla k'anti'
23Aran Babilonia wank ajwi' jun nimla k'anti' li neke'xloq'oni eb' li wankeb' sa' li tenamit a'an. 24Sa' jun kutan li awab'ej kixye re laj Daniel: “Ma taaye naq a'in a'an ajwi' jun q'anch'iich'il yos? Il, a'in yo'yo, nawa'ak ut na'uk'ak. Moko truuq ta taaye naq maawa' yo'yookil yos. Jo'kan naq loq'oni ru”.
25Ab'an laj Daniel kixsume: “At awab'ej, laa'in ninloq'oni ru li Qaawa' linYos, a'an li yo'yookil Yos. Ut wi laa'at taak'e inlesens, tinkamsi li xul a'in chi maak'a' inch'iich' chi moko inche'”, chan laj Daniel. 26Kixye li awab'ej: “Us, maak'a' naxye”.
27Toja' naq laj Daniel kixk'am chaq li xq'ol che', xeeb' ut ismal; kixchiq chixjunil, kixt'oroxi ut kixk'e chi xlow li k'anti'. Naq li nimla xul kixnuq' a'an, kipuk'e'k li xsa'. Ut laj Daniel kixye: “Ilomaq li nekeloq'oni ru laa'ex!”.
28Naq eb' laj Babilonia ke'xnaw a'in, k'ajo' naq ke'josq'o'k ut ke'xmululi rib'eb' sa' xb'een li awab'ej, yookeb' chi xyeeb'al: “Li awab'ej xk'e rib' cho'q aj Judiiy -chankeb'-. Xjuk' laj Bel, xkamsi li nimla k'anti' ut xk'eheb' chi kamsiik chi ch'iich' eb' laj tij”. 29Sa' junpaat koheb' rik'in li awab'ej chi xyeeb'al re: “Q'axtesi qe laj Daniel. Wi ink'a' taawaj, laa'o tatqakamsi laa'at jo'wi' chixjunil laajunkab'al”. 30Naq li awab'ej kixk'e reetal li nimla rahilal chalk re sa' xb'een, ki'ok xxiw ut kimine'k ru chi xq'axtesinkil laj Daniel sa' ruq'eb'.
Laj Daniel sa' xjuleb' li kaqkoj
31Toja' naq eb' laj Babilonia ke'xchap laj Daniel ut ke'xk'ut sa' xjuleb' li kaqkoj, b'arwi' kiwank waqib' kutan. 32Sa' li jul a'an wankeb' wuqub' chi kaqkoj ut rajlal kutan nak'eemank reheb' wiib' chi kamenaq ut wiib' chi karneer. Ab'anan chiru li kutan a'an ink'a' kik'eemank xtib'eb', re raj naq sa' junpaat te'xt'upi laj Daniel.#14,31-32 Dn 6,16.
33Chiruheb' li kutan a'an wank li propeet Habakuk#14,33 Hab 1,1. aran Judá. Tojo' taaraqe'q chi k'uub'ank tzekemq ut xk'eeb'al li wa sa' chakach, xik raj re sa' li k'aleb'aal re xk'eeb'al reheb' laj q'olonel, 34naq li x'ánjel li Qaawa' kixye re laj Habakuk: “K'am li tzekemq a'an aran Babilonia cho'q re laj Daniel, li wank sa' xjuleb' li kaqkoj”. 35“At inQaawa', -chan laj Habakuk- maajun wa wilom chaq Babilonia chi moko ninnaw li jul a'an”.
36Tikto li x'ánjel li Qaawa' kixsaapu sa' iq' laj Habakuk, kixch'ilo chi rismal xjolom#14,36 Ez 8,3. ut koxkanab' Babilonia, tz'aqal wan wi' li jul. 37Laj Habakuk kixjap re chi xyeeb'al: “Daniel, Daniel, k'ul li tzekemq a'in li xtaqla chaq aawe li Qaawa'”. 38Kichaq'ok laj Daniel ut kixye: “At inYos, xinjultiko'k chaq aawe ut ink'a' xakanab'eb' xjunes li neke'rahok aawe!”. 39Tikto kiwakliik laj Daniel ut ki'ok chi wa'ak, ab'an li x'ánjel li Qaawa' kixk'am wi' chik laj Habakuk ut yal sa' jun apunk koxkanab' wi' chik sa' li xna'aj.
40Sa' xwuq li kutan li awab'ej kichalk chi yaab'ak sa' xb'een laj Daniel; kijilok chire li jul, ki'ilok chisa' ut aka' laj Daniel wank aran chi chunchu sa' xyanqeb' li kaqkoj. 41Toja' naq kixjap re chi xyeeb'al chi kaw xyaab' xkux: “Q'axal nim laawankil, at Qaawa', xYosat laj Daniel! Maak'a' chik junaq Yos jo' laa'at”.
42Tikto kixye naq chi'isiiq laj Daniel sa' xjuleb' li kaqkoj ut kixtaqla aran eb' li ke'ajok raj xkamsinkil laj Daniel. Ut eb' a'an sa' iq' ke't'upiik xb'aaneb' li kaqkoj, chiru ajwi' li awab'ej.#14,40-42 Dn 6,19.23-27.
Currently Selected:
DANIEL (dc) 14: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.