DANIEL (dc) 13
13
LIX SUSANA
Lix Susana ut eb' li cheekel winq
1Aran Babilonia kiwank jun li winq aj Johakín xk'ab'a'. 2Kisumlaak rik'in lix Susana, xrab'in laj Jilkías; a'an jun li ixq jwal ch'ina'us ut aj paab'anel. 3Jwal tiikeb' xch'ool li xna' xyuwa' ut ke'xtij lix Susana jo' naxye li xchaq'rab' laj Moisés. 4Laj Johakín a'an jun li winq q'axal b'ihom, ut chi xk'atq li rochoch wank jun xna'ajeb' li uutz'u'uj. Chixjunileb' laj Judiiy neke'xch'utub' rib' rik'in, xb'aan naq a'an xnimal ru winq sa' xyanqeb' chixjunil li poyanam.
5Sa' li chihab' a'an ke'xaqab'aak cho'q aj raqol aatin wiib' cheekel winq, sik'b'ileb' ru sa' xyanqeb' li tenamit; ab'an chirixeb' a'an naxye li Qaawa' chi jo'ka'in: “Eb' li cheekel winq jo'wi' eb' laj raqol aatin li neke'xk'e rib' cho'q aj k'amoleb' xb'e li tenamit, xe'xk'am chaq li maa'usilal sa' li tenamit Babilonia”. 6Eb' li cheekel winq a'an kok'aq xsa' neke'wulak sa' rochoch laj Johakín, ut chixjunileb' li wankeb' xch'a'ajkilal neke'xch'utub' rib' rik'ineb'.
7Sa' wa'leb', naq neke'xik chixjunil li poyanam, lix Susana na'ok chi b'eek wankeb' wi' li ruutz'u'uj li xb'eelom. 8Eb' li wiib' chi cheekel winq rajlal neke'ril chi xik rajsinkil ru sa' xyanqeb' li uutz'u'uj; jo'kan naq ke'xtikib' xrahinkil ru: 9kipo'k xna'leb'eb' ut kisachk sa' xch'ooleb' li Qaawa' ut li xb'ehil li tiikilal. 10Chi xkab'ichaleb' q'axal neke'xrahi wank rik'in lix Susana, ab'an ink'a' neke'xye chirib'ileb' rib' li yookeb' ratawankil, 11xb'aan naq neke'xutaanak chi xyeeb'al naq te'raj wank rik'in li ixq a'an. 12Ut rajlal kutan neke'xsik' chanru te'ruhanq chi rilb'al ru.
13Sa' jun kutan ke'xye chirib'ileb' rib': “Yo'o sa' ochoch xb'aan naq xwulak xhonalil li wa'ak”, chankeb'. Naq ke'elk, ak xb'e xb'e kixchap li junjunq, 14ab'anan ke'sutq'iik wi' chik sa' li na'ajej. Ut naq ke'xpatz' rib' chirib'ileb' rib' k'a'ut naq xe'xk'ul chi kama'an, ink'a' chik ke'xmuq li rajomeb' ut sa' wiib'al ke'xk'uub' xsik'b'al junaq honal te'xtaw wi' lix Susana xjunes.
15Sa' jun kutan, naq ak yookeb' chi xsik'b'al li honal a'an, lix Susana koho sa' xna'ajeb' li uutz'u'uj rochb'een wiib'eb' li xmoos ixq, jo' k'aynaq xb'aanunkil; ut xb'aan xtiqwal ru li kutan kiraj atink sa' li na'ajej a'an. 16Maajun chik wank aran, ka'ajeb' wi' li wiib' chi cheekel winq muqmuukeb' chi ch'uukink. 17Toja' naq lix Susana kixye reheb' li wiib' chi ixq: “K'amomaq chaq inxab'on ut insununkil b'an, ut tz'apomaq li okeb'aal re naq tinruhanq chi atink”. 18Eb' a'an ke'xpaab' li kiyehe'k reheb': ke'xtz'ap li rokeb'aal li na'ajej ut junpak'al chik ke'elk re xk'amb'al chaq li kixpatz' lix Susana, chi ink'a' ke'rileb' li cheekel winq muqmuukeb' aran chi ch'uukink.
19Ka'ajwi' ke'elk li moos ixq, eb' li wiib' chi cheekel winq koheb' sa' aanil wan wi' lix Susana 20ut ke'xye re: “Eb' li rokeb'aal li na'ajej a'in tz'aptz'ookeb' ut maajun na'ilok qe. Laa'o naqarahi aawu; jo'kan naq kanab'o chi wank aawik'in. 21Wi ink'a' nakasume, laa'o tatqajit ut tqaye naq aawochb'een jun li saaj winq arin, jo'kan naq xawisiheb' laamoos ixq”. 22K'ajo' naq kiraho'k xch'ool lix Susana; ki'ok chi yaab'ak ut kixye: “Maab'ar tinkole'q. Wi ninsume cheru, tinkamsiiq;#13,22 Lv 20,10; Dt 22,22. ab'anan wi ink'a' ninsume, tineejit laa'ex. 23Q'axal us cho'q we naq tineejit ut ink'a' tinmaakob'q chiru li Qaawa'”,#13,23 Gn 39,9. chan. 24Lix Susana kixjap re chi kaw; ab'anan eb' li cheekel winq ke'xjap ajwi' reheb' chi xsumenkil, 25ut jun reheb' a'an koho sa' aanil chi xteeb'al li rokeb'aaleb' li na'ajej. 26Naq eb' li wankeb' sa' li ochoch ke'rab'i li japok e sa' xna'ajeb' li uutz'u'uj, ke'xchap raanil re rilb'al li k'aru yo xk'ulb'al ut ke'nume'k sa' li okeb'aal wank chi xk'atq li xna'ajeb' li uutz'u'uj. 27Toja' naq eb' li cheekel winq ke'xseeraq'i jo' ke'raj a'an chirix li xk'ulmank, ut eb' laj k'anjel sa' li ochoch q'axal ke'xutaanak xb'aan naq maajun wa rab'ihomeb' k'a'aq re ru jo' a'an chirix lix Susana.
28Eweraq chik, naq ch'utch'uukeb' li poyanam sa' rochoch laj Johakín, li xb'eelom lix Susana, ke'wulak ajwi' eb' li wiib' chi cheekel winq, yal re xteneb'ankil li kamk sa' xb'een lix Susana. 29Ut ke'xye chiruheb' li tenamit: “B'oqomaq chaq lix Susana, xrab'in laj Jilkías, rixaqil laj Johakín”, chankeb'. Koxe'xk'am chaq lix Susana, 30ut a'an kichalk rochb'eeneb' chaq li xna' xyuwa', eb' li xkok'al ut chixjunileb' li xkomon. 31-32Eb' li reemaaru aj winq ke'xye re naq taarisi li t'ikr tz'aptz'o wi' li xnaq' ru yal re xlemankil li xch'ina'usal, xb'aan naq lix Susana jwal q'un xch'ool ut q'axal ch'ina'us na'ilok. 33Ab'an chixjunileb' li xkomon ut li wankeb' aran ke'ok chi yaab'ak. 34Toja' naq eb' li wiib' chi cheekel winq ke'xaqliik sa' xyanqeb' li poyanam ut ke'xk'e li ruq'eb' sa' xb'een xjolom lix Susana.#13,34 Lv 24,14. 35A'in yo chi yaab'ak naq kixtaqsi li rilob'aal sa' choxa, xb'aan naq q'axal k'ojk'o li xch'ool rik'in li Qaawa'.
36Eb' li cheekel winq ke'xye: “Naq yooko chi b'eek qajunes sa' xna'ajeb' li uutz'u'uj, x'ok li ixq a'in rochb'een wiib'eb' li xmoos ixq, xtz'ap li okeb'aal ut chirix a'an xrisiheb' li xmoos. 37Toja' naq x'eelunk chaq jun li saaj al sa' xyanqeb' li uutz'u'uj b'arwi' muqmu, ut xmaakob'k rik'in li ixq a'in. 38Laa'o wanko chaq junpak'aleb' li uutz'u'uj, ut naq xqil li maa'usilal, xoochalk sa' aanil wankeb' wi', 39ut q'alq'ookeb' naq xe'qataw. Ab'an li saaj winq ink'a' xoruuk xchapb'al xb'aan naq jwal kaw rib' chiqu: xte li okeb'aal ut x'elelik. 40Xqachap li ixq a'in ut xqapatz' re ani li winq a'an, 41ab'an ink'a' xraj xyeeb'al qe. Laa'o testiiw chirix chixjunil a'in”.
Eb' li tenamit ke'xpaab' a'an xb'aan naq cheekel winqeb' ut aj raqoleb' aatin. Ut ke'xteneb' kamk sa' xb'een lix Susana.
Laj Daniel kixkol lix Susana
42Toja' naq lix Susana kitijok chi kaw xyaab' xkux: “At junelik Yos, laa'at nakawil li k'a'aq re ru wank sa' muqmu#13,42 Pr 15,11; Heb 4,13. ut ak nakanaw chixjunil, us ta toj maji' na'uxmank! 43Laa'at nakanaw naq eb' li cheekel winq a'in tik'ti' xe'xye chiwix. Ut anaqwan ok we chi kamk, us ta maak'a' li maak li xine'xq'ab'a wi'”.
44Li Qaawa' kirab'i li xtij lix Susana 45ut naq yookeb' chi xk'amb'al chi kamsiik, kixtoch' xch'ool jun saaj winq, aj Daniel xk'ab'a', rik'in li xsantil musiq'. 46Ut laj Daniel ki'ok chi xyeeb'al chi kaw xyaab' xkux: “Laa'in maak'a' inmaak chirix li xkamik li ixq a'an”, chan. 47Chixjunileb' li poyanam ke'xsutq'isi rib' chi rilb'al laj Daniel ut ke'xye: “K'aru xyaalal li aatin toje' xaye?”, chankeb' re.
48Toja' naq laj Daniel kixk'e rib' sa' xyiheb' ut kixye: “Ex aj Israel, ma tik maak'a' eena'leb' naq xeteneb' kamk sa' xb'een jun rixqilal aj Israel chi toj maji' neketz'il rix chi us k'aru xk'ulmank? 49Sutq'inqex sa' li raqleb'aal aatin, xb'aan naq eb' li winq a'in yal xe'xq'ab'a' lix Susana”.
50Tikto eb' li poyanam ke'sutq'iik sa' li raqleb'aal aatin, ut eb' li cheekel winq junch'ol ke'xye re laj Daniel: “K'ojlan sa' qayanq ut ye qe k'aru nakanaw, xb'aan naq li Yos xxaqab'ank aawe cho'q aj raqol aatin”. 51Laj Daniel kixye reheb': “Jek'omaq wan chi najt li jun rik'in li jun chik ut laa'in ok we chi xpatz'inkileb'”. 52Ut jo'kan ke'xb'aanu.
Naq ak xe'jek'mank chi xkab'ichaleb', laj Daniel kixb'oq li jun ut kixpatz' re: “Xattixk sa' laamaa'usilal ut anaqwan xk'utunk chi us laamaak chalen chaq junxil, 53naq ink'a' nakatraqok chaq aatin sa' tiikilal, nakateneb' b'an kamk sa' xb'een li maak'a' xmaak ut nakakol rix li xmaakob'k, us ta li Qaawa' ak xyehom: «Maateneb' kamk sa' xb'een li maak'a' xmaak ut li tiik xch'ool».#13,53 Ex 23,7. 54Wi relik chi yaal naq xataw lix Susana chi maakob'k, ye qe k'a' chi che'il xawileb' wi' chi q'alq'o”. Kixsume: “Rub'el jun toon chi oqob'”, chan. 55Ut laj Daniel kixye re: “Laatik'ti' xq'apliik sa' aab'een, xb'aan naq jun x'ánjel li Yos ak xk'ulum li xtaqlankil chak'eeb'al sa' tojb'amaak ut wiib' jachal tatrisi”.
56Naq ak x'isiik li winq a'in, laj Daniel kixtaqla xb'oqb'al li jun chik ut kixpatz' re: “Laa'at aj Kanahán ut maawa'at aj Judá. Li xch'ina'usal li ixq xpo'ok re laana'leb' ut li ratawankil xluktesink laach'ool! 57Jo'kan nekeb'aanu laa'ex reheb' li ixq aj Israel ut eb' a'an neke'xsume wank eerik'in xb'aan xxiweb', ab'anan li ixq a'in aj Judá ink'a' xsume xb'aanunkil li maa'usilal eerik'in. 58Ut anaqwan ye we k'a' chi che'il xataweb' wi' chi q'alq'o”. Li cheekel winq kixsume: “Rub'el jun toon chi ji”, chan. 59Ut laj Daniel kixye re: “Laatik'ti' ajwi' xq'apliik sa' aab'een, xb'aan naq jun x'ánjel li Yos ak yo chi oyb'enink rik'in q'esnal ch'iich' re aajachb'al sa' aayi. Ut chi jo'kan texkamq eekab'ichal”.
60Toja' naq chixjunileb' li ch'utch'uukeb' aran ke'xjap reheb' chi b'anyoxink chiru li Yos, li naxkoleb' li neke'oyb'enink rik'in. 61Chirix chik a'an koheb' sa' xb'eeneb' li cheekel winq, xb'aan naq chiru laj Daniel xch'olaak naq yal tik'ti' li neke'xye chirix lix Susana. 62Ut ki'uxk reheb' li xe'xteneb' a'an sa' xb'een li ixq: jo' naxye li xchaq'rab' laj Moisés,#13,62 Dt 19,16-21. ke'kamsiik xkab'ichaleb'.
Sa' li kutan a'an kikole'k jun li ixq maak'a' xmaak. 63Laj Jilkías ut li rixaqil ke'xb'anyoxi chiru li Yos chirix lix Susana li xrab'in; jo'kan ajwi' kixb'aanu laj Johakín, li b'eelomej, jo' ajwi' chixjunileb' li xkomon, xb'aan naq maajun li xutaanalil na'leb' xtawe'k chirix. 64Ut chalen sa' li kutan a'an laj Daniel jwal raab'il ut k'eeb'il xloq'al xb'aaneb' li tenamit.
Currently Selected:
DANIEL (dc) 13: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.