Hch 8

Laj Sawlo xik' naril li Iklees

1Laj Sawlo kixk'ul xch'ool naq kikamsiik laj Esteban.

Sa' li kutan a'an ke'xtikib' xrahob'tesinkil li Iklees li wank Jerusalén, ut chixjunileb' ke'xcha'cha'i rib'eb' sa' xsutam Judea ut Samaria, ka'ajeb' chik eb' li apóstol ke'kanaak. 2Wankeb' winq chaab'ileb' xch'ool ke'xmuq laj Esteban ut najt ke'yaab'ak chirix. 3A'ut laj Sawlo yo chi xjuk'inkil li Iklees: na'okje'k sa'atqeb' li kab'l, sa' josq'il naxk'ameb' li winq ut ixq, ut naxk'eheb' sa' tz'alam.

Laj Felipe aran Samaria

4Eb' li ke'xcha'cha'i rib'eb' neke'xpuktesi li chaab'il esil yalaq b'ar. 5Laj Felipe#8,5 Laj Felipe a'an jun reheb' li Wuqub' (cf. Hch 6,5). kikub'eek sa' jun li tenamit sa' xteepal Samaria, ut kixtikib' xpuktesinkil resil li Kriist chiruheb'. 6Q'es xxikeb' li poyanam chi rab'inkil chi junajeb' xch'ool jo'ch'inal jo'nimal nalajxye laj Felipe, xb'aan naq neke'rab'i chi aatinak ut neke'ril li sachb'ach'oolej naxb'aanu. 7Naab'aleb' eechaninb'ileb' xb'aaneb' li tz'ajn aj musiq'ej neke'xjap re chi kaw naq eb' laj tza neke'elk rik'ineb'; naab'aleb' ajwi' li sik ut yeq roqeb' ke'k'irtasiik. 8Ut kiwank nimla sahil ch'oolejil sa' li tenamit a'an.

Laj Simón laj tuul

9Sa' li tenamit a'an wank jun li winq, aj Simón xk'ab'a', natuulak ut naxye rib' naq nim xwankil: sachsookeb' xch'ool laj Samaria xb'aan a'an, 10ut chixjunileb', jo' kok' jo' ninq, neke'xk'e xch'ool chi rab'inkil; neke'xyehatq: “A'an a'in li xwankil li Yos, a' li xNimal Wankil naxk'ab'a'in”.

11Neke'xk'e xch'ool chi rab'inkil xb'aan naq chalen chaq kutan sachsookeb' xch'ool rik'in li tuulak naxb'aanu. 12A'ut naq ke'xpaab' laj Felipe, li yo chi puktesink xk'ab'a' li Jesus ut li xChaab'il Esil li xnimajwal awab'ejihom li Yos, ke'ok chi kub'siik xha'eb', jo' winq ut ixq. 13A' ajwi' laj Simón ki'ok chi paab'ank ut kikub'siik xha'; junelik narochb'eeni laj Felipe, sachso xch'ool chi rilb'al li xninqal ru eetalil ut li sachb'ach'oolej naxb'aanu.

14Naq eb' li apóstol li wankeb' Jerusalén ke'rab'i resil naq eb' laj Samaria ke'xk'ulub'a li Raatin li Yos, ke'xtaqla laj Pedro ut laj Jwan rik'ineb'. 15Eb' a'an ke'kub'eek aran ut ke'tijok chirixeb' re naq te'xk'ul li Santil Musiq'ej; 16xb'aan naq toj maajun chi aj b'een nakub'e chaq, ka'ajwi' kub'sinb'ileb' xha' sa' xk'ab'a' li Qaawa' Jesus. 17Toja' naq ke'xk'e li ruq'eb' sa' xb'eeneb', ut ke'xk'ul li Santil Musiq'ej.

18Kiril laj Simón naq rik'in xk'eeb'al ruq'eb' li apóstol nak'eemank li Musiq'ej; jo'kan naq kixyeechi'i xtumineb' ut kixye:

19—K'ehomaq ajwi' we li wankilal a'in re naq ani sa' aj b'een tink'e li wuq' tixk'ul li Santil Musiq'ej.

20Toja' naq laj Pedro kixye re:

—Chi'oso'q laatumin aawochb'een, xb'aan naq xak'oxla naq li xsimaatan li Yos naloq'mank rik'in tumin. 21Moko aak'ulub' ta tz'aqonk b'ayaq qik'in, xb'aan naq moko tiik ta laach'ool chiru li Yos. 22Yot' aach'ool ut jal laak'a'uxl, ut kanab' laamaa'usilal; tz'aaman chiru li Qaawa': mare anchal tixkuy li ink'a' us xak'oxla sa' laach'ool. 23Yookin chi rilb'al naq q'axal ra wankat ut b'ak'b'ookat sa' laamaa'usilal.

24Kichaq'ok laj Simón, ut kixye:

—Chextijoq chiwix chiru li Qaawa' re naq maajun reheb' a k'a'aq re ru a'in chichalq sa' inb'een, jo' xeye.

25Naq laj Pedro ut laj Jwan ak ke'xye li yaal ut ke'xch'olob' li Raatin li Qaawa', ke'sutq'iik Jerusalén, naab'aleb' li k'aleb'aal xteepal Samaria ke'xye wi' li Chaab'il Esilal.

Laj Felipe kixkub'si xha' jun aj Etiopía

26Moqon chik li x'ánjel li Qaawa' kiraatina laj Felipe, ut kixye re: “Xaqlin ut ayu sa' xjayal rokeb'l iq', sa' li b'e na'elk chaq Jerusalén ut naxik Gasa; a'an junesal na'ajej”. 27Kixaqliik laj Felipe ut koho. Toja' naq kiril jun aj Etiopía, xnimal ru winq, aj k'anjel chiru li xNa'eb' li tenamit Etiopía, ut aj ilol re chixjunil li xb'ihomal. A'an kiwulak Jerusalén chi loq'onink 28ut naq yo chi sutq'iik, k'ojk'o sa' li xb'eleb'aal ch'iich', yo rilb'al xsa' li xhu li propeet Isaías.

29Toja' naq li Musiq'ej kixye re laj Felipe: “Jilon ut ayu chi xk'atq li b'eleb'aal ch'iich' a'an”. 30Tikto laj Felipe ki'aanilak toj chi xk'atq, ut kirab'i chi xyaab'asinkil xsa' li xhu li propeet Isaías. Kixpatz' re:

—Ma nakataw ru li yookat chi rilb'al? chan.

31Kichaq'ok a'an, ut kixye:

—Chanru naq tintaw xyaalal wi maa'ani taach'olob'anq chiwu?

Ut kixtz'aama chiru laj Felipe naq chitaqe'q chaq ut chik'ojlaaq chi xk'atq. 32Li xraqalil li Santil Hu li yo chi rilb'al a'an a'in:

“Kik'ame'k chi kamsiik jo' junaq karneer.

Jo' junaq ch'ina karneer, mem chiru laj b'esol re li rix,

jo'kan ajwi' a'an ink'a' kixte li xtz'uumal re.

33Kikub'siik xwankil

ut ink'a' ke'raj xraqb'al aatin sa' xb'een sa' tiikilal.

Ani put taaruhanq rajlankil eb' li ralal xk'ajol?

Xb'aan naq ki'isiik li xyu'am sa' ruuchich'och'”.#8,32-33 Is 53,7-8.

34Li xnimal ru winq kixye re laj Felipe:

—Nintz'aama chawu, ye we ani chi aj ix yo chi aatinak li propeet: ma chirix ajwi' a'an, malaj chirix jalan chik?

35Toja' naq laj Felipe ki'ok chi aatinak, kixtikib' chaq rik'in li jun raqal chi Santil Hu a'an toj kixch'olob' li xChaab'il Esil li Jesus. 36Ut naq yookeb' chi xik, ke'wulak sa' jun li na'ajej b'arwi' wank li ha', ut li xnimal ru winq kixye:

—Arin wank ha'. K'aru taaramoq chiwu xkub'ik inha'?#8,36 Li raqal 37: Kixye laj Felipe: “Wi nakapaab' chi anchal aach'ool, truuq”. Kichaq'ok a'an ut kixye: “Ninpaab' naq li Jesukriist a'an Ralal li Yos”, moko tz'aqal xcha'al ta li Hechos, a'an b'an yal xtiqb'al aj chik li raqal 36.

38Toja' naq kixtaqla xxaqab'ankil li b'eleb'aal ch'iich': ke'kub'eek chi xkab'ichaleb' sa' li ha' laj Felipe ut li xnimal ru winq; ut kikub'siik xha'. 39Naq ke'elk sa' li ha', li xMusiq' li Qaawa' kixsaapu laj Felipe ut ink'a' chik ki'ile'k ru xb'aan li xnimal ru winq. Ut a'in kixchap wi' chik xb'e chi sa sa' xch'ool, 40ut laj Felipe koxkanaaq Asoto; kixb'eeni chixjunileb' li tenamit, yo xpuktesinkil li Chaab'il Esilal toj kiwulak Cesarea.

Currently Selected:

Hch 8: QQC

Highlight

Copy