Habacuc 3
3
Apaco Sinioro chinotërinsoꞌ
1Sinioro anitotërincoso yonquiato, ina chinotaꞌhuaso marëꞌ iso pochin nontërahuë:
2Nonansopita natanahuë, acoransopitanta niꞌnahuë.
Inapita yonquiato: ¡Ma noyacha Sinioroso paya! tënahuë.
Iráca shimashonëhuëipita catahuaranso pochachin
ipora tahuëriꞌsanta catahuacoi.
Inapotatoncoi catahuacoi quiyanta nohuichinquën.
Co noyahuëꞌ ninaiso marëꞌ noꞌhuiponcoirahuëꞌ,
nosorochináchin cancantëransoꞌ, aꞌnotocoi.
3Timan parti quëran Yosë huëꞌsarin.
Inasoꞌ, noyasáchin nicaton
Paran motopi quëran huëꞌsarin.
Huënaratërinsoꞌ, yaꞌipi piꞌiroꞌtë aꞌpintërin.
Yaꞌipi isoroꞌpaquëntaꞌ, inasáchin chinotapi.
4Huënaráchin aꞌmosahuatë paꞌnëso pochin níriarin.
Oꞌcori huënsha huënshatarinso pochin imirin quëran pipíriarin.
Inapoaton chiníquën nanantaponahuëꞌ,
co inaporinsohuë pochin yaꞌnorin.
5Coꞌhuara canquiyátërasohuëꞌ, nisha nisha tiquito canio matapon.
Canquirin piquërantaꞌ, notohuaroꞌ taquiaponaꞌ.
6Huëꞌsarin quëran chiniꞌ topachina, isoroꞌpaꞌ nacontërin.
Isoroꞌpaꞌ nocohuachina, piyapiroꞌsa ropatopi.
Iráca motopiroꞌsa yaꞌhuërinsoꞌ, nohuatapi.
Soquirinso pochin nicatonaꞌ, taꞌhuantapi.
Yosë pënënatonpoa ira aꞌnotërëso pochin
nitërinpoasoso nipirinhuëꞌ, yaꞌhuëmiatarin.
7Cosan parti yaꞌhuëpisopita niꞌnahuë.
Paꞌpi chiníquën parisitatona co napion cancantapi
Matian parti yaꞌhuëpisopitanta paꞌyanatona ropatapi.
8¡Iroꞌsa noꞌhuiton Sinioro,
chiníquën nanantëranso aꞌnoran!
¡Marëroꞌsanta noꞌhuiton,
chiníquën nanantëranso aꞌnoran!
¡Napoaton cahuarioquë yaꞌmitërëso pochin huëꞌnan!
¡Minsëchantërinso huaꞌan toronanënquë
canquirinso pochin ninan!
9Huëꞌpatana, pëꞌchinanquë yainantarëso pochin níriaran.
Shinërënënpitantaꞌ, noyá tapapinan quësaran.
Quëma nohuanton iroꞌsantaꞌ, noꞌpaꞌ cashapi.
Shaꞌtai marëꞌ taparopiso pochin noꞌpaꞌ nitopi.
10Motopiroꞌsanta nicatënën, piyapi pochin ropatopi.
Oꞌnantaꞌ, paꞌpi chiníquën anotërin.
Marënta panca coꞌsacaitaton, paꞌpi huëhuëpiro tënëntërin.
11Piꞌi, yoqui, inapitanta co huachi pipiapihuëꞌ.
Shinërënënpita, nansanën, inapita huënaratapi niꞌton, napoaponaꞌ.
12Noꞌhuitaton, yaꞌipi isoroꞌpaꞌ paꞌtaran.
Nisha nisha piyapiꞌsa toꞌpi toꞌpitatë pochin nitaran.
13Natananquënso marëꞌ ina pochin anitotëranco.
Piyapinënpita catahuacaso marëꞌ huëꞌsaran.
Copirnonënantaꞌ, quëmari chachin huayonan.
Inanta catahuacaso marëꞌ huëꞌsaran.
Inimiconënapita minsëcaso marëꞌ huëcatë pochin ninan.
Pëi aꞌcanpiso oꞌquiatë pochin
co noyahuëꞌ nipisopita huaꞌanëna tëparan.
Pëi oquiatë simintonën aꞌnorëso pochin
piyapinënpitanta imaquipisoꞌ, yaꞌipi ataꞌhuantaran.
14Cahuarioquë paꞌpisopita sontaroꞌsasoꞌ,
panca ihuan pochin
saꞌahuaroꞌsa ahuëcaiso marëꞌ yaꞌcontopi:
“Quiyacha tëhuënchinsoꞌ,” tëcatonaꞌ, poꞌoana quëran
yaataꞌhuantopirinahuëꞌ,
naporo quëmari huaꞌanën tëparan.
Inaora shinërënënquë chachin inapotëran.
15Chitoroso cahuarionën pochin niꞌton,
inaquë marë aipi paꞌnan.
Inaquësoꞌ, iꞌsha paꞌpi anpotërin.
16Inapita natanato paꞌyanëhuëquë shaꞌpianantërahuë.
Paꞌhuëhuëntaꞌ, yamo yamóshin ninatanahuë.
Yaꞌipi nonëhuëntaꞌ, co chinirinhuëꞌ ninatanahuë.
Inapopirahuë mini: “Ipora ahuërarinacosopita sontaroꞌsasoꞌ,
Siniorori iꞌhuërëtaton aꞌpayanarin.
Tahuërinën nanihuachin, napotarin,” taꞌto sano cancantërahuë.
17-18Inapotohuachina cantaꞌ, capa cancantarahuë.
“Sinioro nichaꞌërinco huachi,” taꞌto napoarahuë.
Iquiraroꞌsa co yancotopirinahuëntaꞌ, Sinioro chinotarahuë.
Shaꞌtërëhuasopita co nitopirinahuëntaꞌ, napoarahuë.
Ohuica huëntonoꞌsa capa nipirinahuëꞌ,
ohuacaroꞌsanta pëinënaquë capa nipirinahuëꞌ,
naporonta ina chinotarahuë.
19Sinioro achinicancaninco niꞌton, noya cancantarahuë.
Motopi yo co osharinhuëꞌ taꞌapon.
Huëhuëpiro motopiroꞌsa paꞌtohuachina co macari masarinhuëꞌ.
Inapochachin canta Sinioro achinicancaninco niꞌton,
maꞌsha onpoaporahuënta chiníquën cancantarahuëꞌ.
Currently Selected:
Habacuc 3: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
