Habacuc 2
2
1Ninano aꞌpainaꞌpisoꞌ, inápa toriquë nanpëaton noya yonquitárin.
Inapochachin cantaꞌ:
‘¿Maꞌtama Sinioro ichinco paꞌ?’ taꞌto, nináponquën,” itaantarahuë.
Sinioro anitotaantarincosoꞌ
2Ina quëran Sinioro anitotaantarinco:
“Naꞌpi patëtahuaton nontë pochin acoquëꞌ.
Inaquë maꞌsona anitotaranquënsoꞌ, aꞌninquëchin ninshitëquëꞌ.
Noya nontatona nitotacaiso marëꞌ inapoquëꞌ.
3Shaꞌhuitaranquënsopitasoꞌ, co apiramiachin naniarinhuëꞌ.
Napoaponahuë onpopionta nanipon.
Huaꞌquiarin pochin nipirinhuëntaꞌ, ninaquëꞌ.
Tahuërinën nanihuachin, nanipon.
4Iso nanan inaquë ninshitëquëꞌ:
‘Papironiaroꞌsasoꞌ paꞌpi nocantopi.
Canpitaso nipirinhuëꞌ sano piyapinquëma niꞌtomaꞌ:
“Caora co nanitërahuëꞌ.
Sinioroíchin catahuarinco chaꞌëcaꞌhuasoꞌ,”
tënamaso marëꞌ nichaꞌësaranquëma nanpiaramaꞌ,’ tëquë ninshitaton.
5Huino camayoroꞌsasoꞌ, poꞌoana quëran
maꞌsha nionpotatona niaparisitápi.
‘Quiyasoꞌ noya noyacoi,’ tëcatonaꞌ, co sano cancantopihuëꞌ.
Chiníquën nanantacaisoráchin cancantatonaꞌ,
onponta nacionoꞌsa minsëcaiso marëꞌ yapaꞌpi.
Poꞌorosoꞌ, onponta chimipiroꞌsa miꞌtatë pochin nitërin.
Inapochachin inapitantaꞌ,
onponta piyapiꞌsa minsëcaisoꞌ nohuantoonpi,” itërinco.
Co noyahuëꞌ nipisopita maꞌsha onpocaiso yaꞌhuërinsoꞌ
6Ina quëran Siniorosoꞌ papironiaroꞌsa yonquiaton naporin:
“Piyapiꞌsa minsërápiramahuëꞌ, ca nohuanton inapitaso
nocanatënënquëmaꞌ, iso pochin cantarapiaponënquëmaꞌ:
‘Canpitaso papironiaroꞌsanquëmaꞌ,
aꞌnapita maꞌshanëna matatomaꞌ, maꞌhuanamaꞌ.
Coriqui aꞌnanpachinëmantaꞌ,
naꞌcon naꞌcon maꞌpataantatoma maꞌhuanpiramahuëꞌ,
¡co ina pochin nisápamaso yaꞌhuërinhuëꞌ!
Naporamaso marëꞌ carinquëma anaꞌintaranquëma niꞌton,
¡maꞌhuantacha nisarama paya!’
7Coriqui matëramasopita, co yonquiasënquëmahuëꞌ
iꞌhuërëtiinquëmaso marëꞌ huaniponaꞌ.
Apaꞌyanatënquëma aropátaponënquëmaꞌ.
Co nohuantopiramahuëꞌ, maꞌsha yaꞌhuëtërinquëmaso
mataponënquëmaꞌ.
8Naꞌa nacionoꞌsaquë yaꞌhuëpisopita minsërahuatomaꞌ,
maꞌshanëna matëramaꞌ.
Iporaso napoaponahuëꞌ, inapita yaꞌhuërë
canpitanta mataponënquëmaꞌ.
Nisha nisha parti isoroꞌpaquë piyapiꞌsa tiquiramaꞌ.
Co tënorotochináchinhuëꞌ cancantatoma
ninanoroꞌsa ataꞌhuantëramaꞌ.
Inaporamaso marëꞌ canpitanta napotarinënquëmaꞌ.
9Canpitaso aꞌnapita minsërahuatomaꞌ, maꞌshanëna matëramaꞌ.
Inaquë quëmopinëmapita amaꞌhuanamaꞌ.
Yaꞌhuëcamaso marëꞌ noyápiachin pëiroꞌsa ninamaꞌ.
Ama maꞌsha onpotiinëmaso marëhuëꞌ noyá niacorapiramaꞌ.
Naporamaso marëꞌ carinquëma anaꞌintaranquëma niꞌton,
¡maꞌhuantacha nisarama paya!
10Aꞌnapita nacionoꞌsa ataꞌhuantatomaꞌ,
canpitaora chachin Yosë ataꞌhuantatënquëma
atapanainquëmasoꞌ, yonitë pochin ninamaꞌ.
11Naꞌpiroꞌsa ninanonëma pairapiramasoꞌ,
noyápiachin pëinëmaquë huicaroꞌsa acoramasoꞌ,
inapitanta co noyahuëꞌ ninamasoꞌ,
shaꞌhuirapitë pochin nitaponquëmaꞌ.
12Canpitaso ninanonëma tapamaso marëꞌ
piyapiꞌsa ihuaramaꞌ, notohuaroꞌ tëparamaꞌ, naporamaꞌ.
Naporamaso marëꞌ carinquëma anaꞌintaranquëma niꞌton,
¡maꞌhuantacha nisarama paya!
13Natanco shaꞌhuichinquëmaꞌ:
Caso Sinioroco yaꞌipi nanitaparahuë.
Ca nohuanton sacatatoma canotëramasoꞌ,
topinan quëran nisarin. Pëni yaꞌipi ahuiquitapon.
14Inapotohuatënquëmaꞌ,
Iꞌshari marë mëntatërinso pochin
yaꞌipi isoroꞌpaquë yaꞌhuëpisopita
chini chiníquën nanantërahuëso nitotapi.
15Canpitaso canatëramaso noꞌparoꞌsaquë,
piyapiroꞌsa noniatë pochin
huino naꞌcon naꞌcon oꞌshitatomaꞌ, tëpaitëramaꞌ.
Inapotahuatoma taparonëna nitëramaꞌ.
Naporamaso marëꞌ carinquëma anaꞌintaranquëma niꞌton,
¡maꞌhuantacha nisarama paya!
16Naporamaso marëꞌ
co huachi piyapiꞌsa noya nicainëmasoꞌ yaꞌhuëaponhuëꞌ.
Aꞌnapita niꞌtonënquë canpitanta taparo nisaramaꞌ.
Sinioro chachin canpitanta noniatë pochin nitohuachinquëmaꞌ,
co marcahuanhuëꞌ ninamasoꞌ, aꞌnapita aꞌnotarin:
‘Quiyasoꞌ chini chiníquën nanantërai,’ topiramahuëꞌ,
paꞌpi taparo nitarinquëmaꞌ.
17Nipano motopi tanantontarinquë nararoꞌsa tiquiramaꞌ.
Maꞌsharoꞌsanta inaquë yaꞌhuërinso tiquiramaꞌ.
Ninanoroꞌsa yaꞌhuëhuanoꞌsarë chachin, ahuëatoma ataꞌhuantëramaꞌ.
Inaporamasopita naꞌintarinquëma parisitaramaꞌ.
18Aꞌnaquën naꞌpi quëranhuë nipon, nara quëranhuë nipon
patëtahuatonaꞌ, mamanshi tënipi.
¡Tënipirinahuëꞌ, inaso co maꞌmarë tëranta paꞌtërinhuëꞌ!
Aꞌnaquëonta mamanshinën nontaton:
‘Quëmaso yosënëhuënquën,’ itërin.
¡Napotohuachina, nonpiánin inasoꞌ!
Mamanshiroꞌsasoꞌ, co nonacaso tëranta nanitopihuëꞌ.
Napoaton ina ninaꞌpiroꞌsasoꞌ,
¡co inapita natëcaiso yaꞌhuërinhuëꞌ!
19Mamanshi nara quëranhuë nipon,
naꞌpi quëranhuë nipon ninamasoꞌ nontatomaꞌ:
‘Nichaꞌëcoi quiyantaꞌ,’ itëramaꞌ.
Napotopiramahuëꞌ,
¡inapitaso co manta aꞌpaniponquëmahuëꞌ!
Oro quëran, prata quëran inaquëranpita pashitopirinahuëꞌ,
co manta pacaritaponahuëꞌ.
Naporamaso marëꞌ carinquëma anaꞌintaranquëma niꞌton,
¡maꞌhuantacha nisarama paya!
20Caso nipirinhuëꞌ, Sinioroco niꞌto, pëinëhuëquë yaꞌhuëarahuë.
Yaꞌipi isoroꞌpaquë yaꞌhuëramasopita taꞌtápamaso yaꞌhuërin,” tënin.
Currently Selected:
Habacuc 2: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
