Habacuc 1
1
Co noyahuëꞌ nipisopita yonquiato Sinioro nontërahuësoꞌ
1Caso Apacoco. Pënëntaꞌhuaso marëꞌ Sinioro huaꞌnarëso pochin anitotërincosoꞌ, iso quiricaquë ninshitaranquëmaꞌ.
2Aꞌna tahuëri Sinioro nontato:
“Sinioro. Co napion ancantato catahuancoso marëꞌ
nontápiranquënhuëꞌ, ¡co aꞌpanirancohuëꞌ!
Naꞌcon maꞌsha onpotatonacoi aparisitarinacoi.
Napoaton nichaꞌëancoiso marëꞌ chiníquën nontaranquën.
Inapo nontopiranquënhuëꞌ, ¡co nichaꞌërancoihuëꞌ!
3Piyapiꞌsa maꞌsha onpotatonacoi aparisitarinacoi.
¡Catahuacoi huachi ama napotaꞌinacoisohuëꞌ!
Naꞌcon maꞌsha onpotatonacoi, yaataꞌhuantërinacoi.
Piyapiꞌsa nanan yaꞌhuëtatona coisëroꞌsaquë niquëparápi.
4Pënëntëransoꞌ yaꞌhuëpirinhuëꞌ,
co ina nicatona piyapiꞌsa noꞌtëquën anaꞌintopihuëꞌ.
Coisëroꞌsasoꞌ, piyapiꞌsa catahuacaiso nipirinhuëꞌ, co catahuapihuëꞌ.
Noya nipisopita, co noyahuëꞌ nipisopitari aparisitárin.
Coisëroꞌsanta pahuërëhuachinara,
co huachi noꞌtëquën anaꞌintopihuëꞌ,” itërahuë.
Sinioro aꞌpanitonco anitotërincosoꞌ
5Ina quëran Siniorosoꞌ anitotërinco:
“Israiroꞌsaꞌ. Aꞌnapita nacionoꞌsaquë napopisoꞌ niꞌcoꞌ.
Ina nicatoma paꞌyancoꞌ.
Nani yonquirahuë paꞌpi huëhuëpiro nininsoꞌ, nicaꞌhuasoꞌ.
Canpitaso naporahuësoꞌ shaꞌhuitopirinënquëmaontaꞌ,
noꞌtëquën shaꞌhuipisoꞌ co natëaramahuëꞌ.
6Ca nohuanton papironiaroꞌsa
chiníquën nanantatona ahuëarinënquëmaꞌ.
Inapitasoꞌ co tënorotochináchinhuëꞌ cancantopi.
Itohua itohua pacatonaꞌ,
aꞌnapitari noꞌpaꞌ huaꞌanëntopiso osërëtëraꞌpiapi.
7Intohuaso paꞌpachinara, piyapiꞌsa paꞌpi aꞌpayanpi.
Aꞌpayanatonaꞌ, aropátopi.
Inahuara nipaꞌyatacaisoráchin cancantatonaꞌ:
‘Quiyasoꞌ noyasáchin ninai,’ toconpi.
8Cahuarionënapitasoꞌ, nioparto paꞌpiniroꞌsa quëran
chini chiníquën taꞌapi.
Inotëro asaniroꞌsa quëran tëꞌhua tëꞌhuatoro yaꞌnopi.
Huaꞌhuayátërahuë sontaroꞌsa inapitaquë yaꞌmitëatona paꞌpi.
Inimico quënanpachinara, aquëquëranchin pashitaꞌpapi.
Panca onian maꞌsha maninso pochin nisapi.
9Papona pochin yaꞌipi quënanpisoꞌ ataꞌhuantëraꞌpiapi.
Huëꞌsapiso natanpachinara, naní quëran paꞌyanapi.
Notohuaroꞌ piyapiꞌsa asacatacaiso marëꞌ masapi.
Marë yonsanquë inotë notohuaroꞌ yaꞌhuërinso pochin masapi.
10Copirnoroꞌsaꞌ, huaꞌanoꞌsaꞌ, inapita co natëpihuëꞌ.
Noyá niacorapipirinahuë tëranta tëhuaconpi.
Noꞌpaꞌ nanpënanoꞌsa acorahuatonaꞌ,
inataquëchin ahuëcaiso marëꞌ
ninanoroꞌsa yaꞌcontëraꞌpiaponaꞌ.
11Panca ihuan paꞌpachina, inquitërinso pochin tiquitaponaꞌ.
Inahuara chinipisoraꞌ, yosënëna pochin niꞌpi,” itërinco.
Sinioro nontaantarahuësoꞌ
12Napotohuachincora, carinta itaantapo:
“Sinioro quëmaso Yosënquën niꞌton, chinotëranquën.
Noyasáchin nicaton yaꞌhuëmiatëran.
Quëmari inapita quëran anaꞌintancoiso marëꞌ
papironiaroꞌsa huayonan.
Quëmasoꞌ paꞌpoyarápirancoihuëꞌ,
anaꞌintancoiso marëꞌ inapita achiniran.
13Quëmasoꞌ noyasáchin nicaton, co piꞌpian tëranta
co noyahuëꞌ nipisoꞌ noya niꞌnanhuëꞌ.
Paꞌpi co noyahuëꞌ nipisoꞌ co onporonta costaranhuëꞌ.
¡Tëpatoroꞌsasoꞌ, anaꞌintamaso yaꞌhuërin!
Co noyahuëꞌ nipisopitari
noyamiachin nisapisopita ataꞌhuantahuachinaꞌ,
¡co topinan niꞌsápamaso yaꞌhuërinhuëꞌ!
14Samiroꞌsasoꞌ co naꞌcon paꞌtërinhuëꞌ.
¡Piyapicoisoꞌ co inapita pochin nitancoiso yaꞌhuërinhuëꞌ!
Maꞌsharoꞌsanta co huaꞌanëhuanatonaraihuëꞌ, nosoro paꞌtopi.
¡Co inapita pochin quiyasoꞌ nitancoiso yaꞌhuërinhuëꞌ!
15Papironiaroꞌsasoꞌ, sami camayoroꞌsa pochin nipi.
Yoꞌnanaquë sami ohuarapiso pochin,
ritiquënta amotahuatonaꞌ, yaꞌipi mapiso pochin,
co oshatapihuëꞌ nisha nisha piyapiꞌsa minsëcaisoꞌ.
Inapohuachinara capa cancantopi.
16Napoaton inapitasoꞌ, ritinënaꞌ, yoꞌnananënaꞌ, inapita moshapi.
Inapita moshacaiso marëꞌ maꞌsharoꞌsa tëpapi.
Yonarin pochin nininsontaꞌ, aꞌpëpi.
‘Inapita catahuarincoi niꞌton, naꞌa noya cosharo yaꞌhuëtërincoi,’ topi.
17Inapopirinahuëꞌ,
ama Sinioro papironiaroꞌsa inapotiinacoiso nohuantëquësohuëꞌ.
Co piyapiꞌsa nosoro tëparápaiso yaꞌhuërinhuëꞌ.
Currently Selected:
Habacuc 1: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
