Génesis 30

1Naquira co nito huaꞌhuanatonhuëꞌ, cainpain noyaparin. Napoaton soꞌin itapon:

—Huaꞌhuantoco cantaꞌ. Coꞌsoꞌ huaꞌhuantohuatancohuëꞌ, chiminarahuë, itërin. 2Cacoporiso nipirinhuëꞌ, noꞌhuiton itapon:

—¡Co caso Yosëcohuëꞌ! Ina co nohuantërinhuë niꞌton, co huaꞌhuananhuëꞌ, itërin.

3Napotohuachina, soꞌin itapon:

—Niꞌquëꞌ. Piyapinëhuë Pira itërëhuasoꞌ, maquë topirahuë. Ina mapatan huaꞌhuanpachin, cari masarahuë. Huaꞌhuahuë chachin nicacaso marëꞌ masarahuë. 4Inapoaton, Naquirari piyapinën Pira itopisoꞌ, soꞌin acoantërin. Acoantohuachina, ichihuëꞌërin. 5Pirasoꞌ, cayorahuaton quëmapiaꞌhuaya huairin. 6Naporoꞌ Naquira tapon: “Isoso huaꞌhuasha, Tano itarahuë. Yosë nontërahuësoꞌ natanatonco: ‘Tëhuënchachin quëmasoꞌ noya ninan niꞌton, catahuaranquën huachi,’ itërinco. Napoaton aꞌnara huaꞌhuasha quëtërinco,” tënin. Ina yonquiaton ina pochin nohuitërin. 7Ina quëran Pira cayoantarahuaton, quëmapiaꞌhuaya chachin huaiantarin. 8Naporoꞌ Naquira taantarin. “Iso huaꞌhuashasoꞌ, Nipitari itarahuë. Naꞌcon caipayarëꞌco nichinitërai, iporaso huachi nani minsërahuë,” taꞌton ina pochin nohuitërin.

9Nianta co huachi huaꞌhuanacaso nanitërinhuëꞌ. Napoaton piyapinën Siripa itopisoꞌ Cacopo acoantërin. 10-11Siripa yaꞌhuërëꞌ cayoaton huaꞌhuanpachina, Niaso tapon: “ ‘¡Ma noyacha nisharahuë paya!’ tënahuë. Napoaton iso huaꞌhuashasoꞌ, Caro itarahuë,” tënin. 12Ina piquëran Siripasoꞌ, aꞌna yaꞌhuërëꞌ huaꞌhuaantarin. 13Naporoꞌ Niasoꞌ tapon: “¡Ma noyacha yaꞌhuërahuë paya! Iporaso yaꞌipi sanapiroꞌsaꞌ: ‘¡Ma noyacha inaso yaꞌhuërin paya!’ itaponaco taꞌto, iso huaꞌhuashantaꞌ, Asiri itarahuë,” tënin.

14Trico macacaso tahuëriꞌsaꞌ, Nopino paꞌsahuaton, mantracora huayo itopisoꞌ quënanconin. Ina masahuaton, aꞌshin quëshimarin. Ina quënapataton Naquirari itapon:

—Huaꞌhuan mantracora huayo quëshirinquënsoꞌ, quëtoco canta topirahuë, itërin. 15Napotopirinhuëꞌ, Niari itapon:

—Ayon caira. ¡Ama napopitëraquësohuëꞌ! ¡Soꞌyahuë nani osërëtëranco! Huaꞌhuahuë yaꞌhuërëꞌ mantracora huayo quëshirincosontaꞌ ¿yaosërëtaantamaranco ti? itërin.

—Ina quëtohuatanco, ipora tashi Cacopo quëmarëꞌ huëꞌëpon, itërin Naquirari. 16Tashi huarëꞌ Cacopo pasto quëran huënantahuachina, Niari nacapirahuaton:

—Huaꞌhuahuë mantracora huayo quëshirincosoꞌ, nani Naquira quëtërahuë. Quëmaroꞌco ipora tashi huëꞌëcaꞌhuaso marëꞌ inaquë pahuërëtërahuë, itërin.

Napotohuachina, naporo tashi Niasoꞌ, Cacopo huëꞌëparin. 17Huaꞌhuanacaso marëꞌ orarinso Yosëri natanahuaton, catahuarin. Napoaton Niasoꞌ, aꞌnatërápo huaꞌhuinpita nicacasoꞌ cayoantarin. 18Nasitohuachina tapon: “Isosoꞌ huaꞌhuasha, Isacaro itarahuë. Camairahuëso sanapi soꞌyahuë acoantërahuë niꞌton, Yosë acanarinco,” taꞌton, ina pochin huaꞌhuin nohuitërin. 19Ina quëran Nia cayoantarahuaton, saota nicacasoꞌ huaꞌhuaantarin. 20Nasitohuachina taantarin: “Iso huaꞌhuashasoꞌ, Saporono itarahuë. Noya nininso chachin Yosë nicararinco. Nani saota huaꞌhuasha aꞌnotërahuë niꞌton, iporasoꞌ soꞌyahuë noya noya niꞌsarinco,” taꞌton, ina pochin nohuitërin. 21Nitiquioninquë Niasoꞌ, sanapiaꞌhuaya huaꞌhuanin. Nasitohuachina, Tina itërin.

22Naquiraso co huaꞌhuanaꞌpihuë niꞌton, naꞌcon Yosë nontërin. Napohuachina, napoiyan quëran nosoroaton aꞌpanirin. Ina nohuanton huaꞌhuanin huachi. 23Paninantërinsoꞌ huaihuachina, tapon: “Co huaꞌhuanaꞌpicohuëꞌ nicato tapanápirahuëꞌ. Yosë chachin catahuarinco niꞌton, huaꞌhuanato co huachi tapanaꞌhuaso yaꞌhuërinhuëꞌ. 24Aꞌna yaꞌhuërëꞌ Sinioro quëtaantaꞌinco topirahuë,” taꞌton, Cosi itërin.

Cacopo Napanorëꞌ, ninonpintopisoꞌ

25Cosi nasitërin piquëran Cacoposoꞌ, Napano itapon:

—Yaꞌhuërahuëquë chachin yapanantapirahuëꞌ. 26Saꞌahuëpita, huiꞌnahuëpita, inapita quëtoco. Nani inapita marëꞌ sacatërahuësoꞌ nanirin. Quëma nitotëran onpo sacatërahuësona niꞌton, quëpai huachi topirahuë, itërin. 27Napotopirinhuëꞌ, Napanorisoꞌ itapon:

—Ama napoquësohuë api. Quëma yacaparanco niꞌton, Sinioro catahuarinco. Aniꞌtato, ina nitotërahuë. Napoaton quëparitëquë tënahuë. 28Shaꞌhuitoco onposona canacamaso nohuantëransoꞌ. Nápo chachin pahuërëꞌinquën, itërin.

29Napotohuachina, Cacopori itapon:

—Quëma marëꞌ onpo sacatërahuësoꞌ, nani nitotëran. Pëꞌtahuanënpitanta noya aꞌpairahuësoꞌ, nani nitotëran. 30Coꞌhuara huëꞌshátërapohuëꞌ, caraíchin yaꞌhuëtërinquën. Iporaso nipirinhuëꞌ, paꞌpi notohuaroꞌ naꞌamiatërin. Huëꞌnahuë quëran huarëꞌ Sinioro catahuarinquën. Iporaso huachi cantaꞌ, caora marëꞌ sacataꞌhuasoꞌ nanirin huachi, itërin.

31—Caquë chachin sacataantacaso marëꞌ ¿onpota pahuërëꞌinquën? taantarin Napano.

—Ama coriqui pahuërëcosohuëꞌ. Apira shaꞌhuitaranquënsoꞌ nohuantohuatan, quëma marëꞌ sacataantarahuë. 32Ipora tahuëri pëꞌtahuanënpita huëntonënquë paꞌsarahuë. Paꞌsahuato, yaráton carniroaꞌhuaroꞌsaꞌ, niquë acoarahuë. Naporahuaton chipoaꞌhuaroꞌsanta ninshipiton nipisoꞌ, niquë acoarahuë. Iꞌcoapi nipisopitanta inapotarahuë. Inapita quëran pahuërëꞌ quënanaꞌhuaso marëꞌ napoarahuë. 33Inapohuato, aꞌna tahuëri canarahuëso niꞌquihuatan, noꞌtëquën sacatërahuëso nitotaran. Pëꞌtahuatërahuëquë, iꞌcoapiroꞌsaꞌ, ninshipitonoꞌsa inaporáchin chiporoꞌsa quënanaran. Naporahuaton, yaráton carniroꞌsaráchin quënanaran. Nisha quënanpatansoꞌ, ihuaranquën niꞌton, naporin, itërin Cacopori.

34—Noyapaꞌ. Inapoaꞌa nipachin, tënin Napano.

35Napoaponahuëꞌ, naporo tahuëri chachin inaso chiporoꞌsa huiꞌtonpi nipisopita, iꞌcoapi nipisopita, nisha acorin. Chipo sanapiꞌsanta ninshipiton, nipisoꞌ, inaquë acorin. Iꞌcoapiroꞌsaꞌ, máquënso tëranta huiritopisopita, inapitanta inaquë chachin acorin. Yaꞌipi yaráton carniroaꞌhuaroꞌsantaꞌ, inapotërin. Inapotahuaton huiꞌninpitari aꞌpaicaiso marëꞌ quëtërin. 36Ina quëran, pëꞌtahuaroꞌsa huayoninsopitarë chachin Napanosoꞌ, Cacopo yaꞌhuëarin quëran, cara tahuëri iratatë paꞌnëꞌpaꞌ, paꞌpi.

Cacoposo nipirinhuëꞌ, co manta taponahuëꞌ, aꞌnapita ohuicaroꞌsa Napanonquën aꞌpaitarin. Aꞌpaitapon pochin canacaso marëꞌ isoporin: 37Nara sëꞌparoꞌsa huara napapiráchin nanpi sëꞌpatërinsoꞌ pëꞌshitërin. Isopita nararoꞌsa sëꞌpaquën napotërin: Aramo, niꞌtoꞌ, tanpapi, inapita sëꞌpaquën manin. Masahuaton, huiꞌtonaꞌpiarin. Huiꞌtoninsopitantaꞌ, iꞌshotëraꞌpiarin. Acopo huiritërinso yaꞌnocaso marëꞌ, inapotërin. 38-39Ina quëran huararoꞌsa huiꞌtonanpinan nininsoꞌ, pëꞌtahuaroꞌsa huëntonën notënanquë acorin. Iꞌsha oꞌopiquë acorin. Inaquë pëꞌtahuaroꞌsa nitoꞌquëpi niꞌton, naporin. Huararoꞌsa notërahuatona quëmapi nipisopita toꞌquëtopi. Inapohuachinara huiꞌninpitasoꞌ: Huiꞌtontonoꞌsaꞌ, ninshipitonoꞌsaꞌ, iꞌcoapiroꞌsaꞌ, inapita huaꞌhuatapi. 40Naporoꞌ Cacoposoꞌ, inapita nisha acorarin huachi. Inapotërinsoꞌ, Napano pëꞌtahuanënpita yaratonoꞌsaꞌ, huiꞌtontonoꞌsaꞌ, inapita notënanquë acoonin. Toꞌquëcaiso marëꞌ acoonin. Inapoaton Cacoposoꞌ, Napano pëꞌtahua huëntonën quëran naꞌapisopita, inaora huëntonënquë acoaton anaꞌatarin huachi. 41Panca panca pëꞌtahuaroꞌsa nipisopita huënaitohuachinara, iꞌsha oꞌopiquë huararoꞌsa acorin. Nitoꞌquëapona pochin huararoꞌsa notëcaiso marëꞌ naporin. 42Mashiraaꞌhuaroꞌsa huënaitohuachinarasoꞌ, co huararoꞌsa acorinhuëꞌ. Napoaton piꞌpiraꞌhuaya nipisopitasoꞌ, Napano marëꞌ ninin. Yaꞌhuërëꞌ panca pancaroꞌsasoꞌ, inaoranquën ninin. 43Inapoaton inasoꞌ, paꞌpi maꞌhuanin. Paꞌpi notohuaroꞌ ohuica yaꞌhuëtahuaton, piyapinënpitanta quëmapiꞌsaꞌ, sanapiꞌsaꞌ, yaꞌhuëtërin. Notohuaroꞌ camiyoroꞌsaꞌ, moraroꞌsaꞌ, inapitanta yaꞌhuëtërin.

Currently Selected:

Génesis 30: cbt

Highlight

Copy