Génesis 31

Cacopo, miꞌsën taꞌananpicaso yonquirinsoꞌ

1Ina quëran Cacoposoꞌ, miꞌsënpitari pinorinsoꞌ natantërin: “Cacoposoꞌ tata pëꞌtahuanënpita matahuaton, paꞌpi maꞌhuanin,” topi natantërin. 2Naporahuaton Napanori chachintaꞌ, co huachi iráca pochin nitërinhuëꞌ niꞌnin. 3Naporoꞌ Siniorori Cacopo itapon: “Tataparin, quëmopinënpita, inapita yaꞌhuërinso parti panantaquëꞌ. Carinquën caꞌtanatënquën catahuaranquën,” itërin.

4Ina natanaton, Naquira, Nia inapita pastoquë amatërin. Inaora ohuicanënpita aꞌpairinquë amatërin. 5Huëꞌpachinara, itapon:

—Tataparima co huachi iráca pochin noya niꞌnincohuëꞌ. Yosëso nipirinhuëꞌ, caꞌtanatonco catahuarinco. Inasoꞌ tatahuëri chinotërinsoꞌ. 6Canpitasoꞌ, nani nitotërama tata marëꞌ chiníquën sacatërahuësoꞌ. 7Naporahuaton nonpintahuatonco co noꞌtëquën pahuërërincosohuëntaꞌ, nitotëramaꞌ. Napoaponahuëꞌ, Yosë catahuarinco niꞌton, co aquëtë huarëꞌ ihuarincohuëꞌ. 8Aꞌna tahuëri tatasoꞌ tënin: “Ninshipitonoꞌsa quëchinquën sacatëranso marëꞌ,” topachina, yaꞌipi sanapi ninshipitonáchin huaꞌhuanpi. Aꞌna tahuërintaꞌ: “Huiꞌtontonoꞌsa quëchinquën sacatëranso marëꞌ,” taantahuachinasoꞌ, huiꞌtontonoꞌsáchin huaꞌhuataantapi. 9Yosë nohuanton ina pochin tata pëꞌtahuanënpita huaꞌhuatopi. Canpoanquën nicacaso marëꞌ napopi.

10Aꞌna tahuëri pëꞌtahuaroꞌsa huënaitasoꞌ, huaꞌnarahuë. Chipo mashoroꞌsari, chipo sanapiꞌsa toꞌquësapi huaꞌnarahuë. Toꞌquëtonaꞌpiroꞌsasoꞌ, aꞌnaquënso huiꞌtonpiroꞌsaꞌ, aꞌnaquënso ninshipitonoꞌsaꞌ, aꞌnaquëonta iꞌcoapiroꞌsaꞌ, inapita quënanahuë. 11Naporo chachin Yosë anquëninën përarinco: “¡Cacopo!” itërinco. Itohuachincora: “Isëquë nisarahuë,” itërahuë. 12Naporoꞌ anquëni itërinco: “Noya niꞌquëꞌ, yaꞌipi chipo mashoroꞌsaꞌ, chipo sanapiꞌsa toꞌquëpisopita, huiꞌtonpiroꞌsaꞌ, ninshipitonoꞌsaꞌ, iꞌcoapiroꞌsaꞌ, inapitaráchin toꞌquërapi. Napano nonpintërinquënso nitotato, niꞌnanso chachin aꞌninquënta nicacaso marëꞌ catahuaranquën. 13Ca mini Yosëco, iráca Pitiriquë yaꞌnotëranquën. Inaquë naꞌpi tomaquë opotahuaton, chinotaancoso marëꞌ acoran. Naporahuaton inaquë chachin casáchin chinotaancoso marëꞌ shaꞌhuitëranco. ¡Manóton huëquë paꞌa! Iso noꞌpa quëran pipirahuaton, huaꞌhuatëranso noꞌpa parti panantaquëꞌ,” itërinco, tënin Cacopo.

14Ina topachina, Naquira, Nia, inapitari itapon:

—Quiyanta mini tata chiminpachin, co huachi maꞌsha tëranta macaꞌhuaiso yaꞌhuërinhuëꞌ. 15Naporahuaton ipora chachin nisharoꞌsa pochin tata niꞌnincoi huachi. ¡Paꞌanpitërarincoi niꞌton, quiya marëꞌ pahuërëtaton ina nápo sacatëran! 16Noꞌtëquën chachin Yosëri, tata maꞌshanënpita, matahuaton, canpoa quëtërinpoaꞌ. Inasoꞌ canpoanquën, huaꞌhuanpoapitanquën. Napoaton, maꞌsona Yosë shaꞌhuitërinquënsoꞌ, niquë huachi, itopi.

Cacopo taꞌarinsoꞌ

17-19Saꞌinpitari napotërin niꞌton, Cacoposo Canaan parti panantacaso yonquirin. Paꞌpin yaꞌhuërinso noꞌpaquë paantacaso marëꞌ tapatarin huachi. Napanosoꞌ aꞌna parti ohuicanënpita yaꞌiapon paꞌnin. Inaquë paꞌninsoꞌ Naquirari, paꞌpin mamanshinënpita ihuarin. Yaꞌipi quëmopinënpitarë chachin mosharinsoꞌ, ihuarin. Cacoposoꞌ saꞌinpita, huiꞌninpita, inapita, camiyoroꞌsaquë aꞌmitërin. Pëꞌtahuanënpita, maꞌshanënpita, yaꞌipi inapita quiquirin. Yaꞌipi inapitasoꞌ, Patan-aranquë sacataton canarinsoꞌ. 20Inapoaton Cacopori, Napano nonpintahuaton, co shaꞌhuitaponahuëꞌ huëshirin. 21Yaꞌipi maꞌshanënpitarë chachin Cacoposoꞌ, taꞌarin. Co huaꞌquiya quëranhuëꞌ, Iopiratisiiquë pëntoitahuatonaꞌ, Carata motopiroꞌsa parti, notëëtërin.

Napanori Cacopo imaquirinsoꞌ

22Cara tahuëri quëran Napanosoꞌ, Cacopo taꞌarinsoꞌ nitotërin. 23-24Ina nitotaton, quëmopinënpitarë chachin, imaquirin. Canchisë tahuëri quëran, Carata motopiroꞌsa parti canquipi. Napoaponahuëꞌ, naporo tashi Yosëri huëꞌënquë yaꞌnotaton itapon: “Natanquë Napano shaꞌhuichinquën. Niꞌquëna Cacopo noꞌhuiton maꞌsha onpototan. Tananpitëquë paꞌin,” itërin. Tahuërianpitahuaton Napanosoꞌ, 25piyapinënpitarë chachin Carata motopiroꞌsaquë Cacopo nincantopi. Ina motopiroꞌsaquë inantaꞌ, huëntonënë chachin chinotopi. Napanonta ina motopiroꞌsaquë chinotaponahuëꞌ, co niquënanyátërapihuëꞌ. 26Cacopo quënanahuaton, chiníquën nontërin:

—¡Paꞌpi co noyahuëꞌ ninan! ¡Co nonpinchitoncohuëꞌ pora! Ahuëtahuatë sanapiꞌsa manëso pochin huiꞌnahuëpita quëshiaranco. 27Nonpintatonco, co shaꞌhuitaponcorahuëꞌ taꞌaiaran. ¡Co naporëhuëꞌ! Yaꞌhuëranquë yapaantaranso shaꞌhuitëranco naporini, noya ninontatëhua capa cancanchitërihuahuëꞌ. Pita nicatëhuaꞌ: Tonton, arpa, inapita piꞌnipiquë ninonchitërihuahuëꞌ. 28Huiꞌnahuëpita, shihuëpitantaꞌ, ichitaꞌairan niꞌton, co apinoto nontaꞌhuasoꞌ quëtërancohuëꞌ. ¡Co manta yonquirëhuë pochin ninan! 29Nohuantërahuë naporini, maꞌshátërahuë yaꞌipinquëma anaꞌinchitënquëmahuëꞌ. Napoaponahuëꞌ, achin tashi chachin Yosë nontërinco. Inasoꞌ tataparionta chinotërin. Huëꞌëhuëquë yaꞌnotatonco nontërinco: “Natanquë Napano shaꞌhuichinquën. Niꞌquëna Cacopo noꞌhuiton maꞌsha onpototan. Tananpitëquë paꞌin,” itërinco. 30Tataparin yaꞌhuërinquë yaꞌnipishahuë yapantaton huëꞌsaran niꞌquëhuarëꞌ, ¡co mamanshinëhuëpitasoꞌ ihuatonco quëitonhuëꞌ pora! itërin Napanori.

31Napotohuachina, Cacopori Napano itapon:

—Tëꞌhuatatënquën topinan huëꞌsarahuë: “Paantaꞌhuaso shaꞌhuitohuatosoꞌ, saꞌahuëpita osërëtamarinco,” taꞌto, naporahuë. 32Nipirinhuëꞌ, insosona tëranta mamanshinënpita matahuatënquën, quësahuachin, ¡chimiin! Maꞌsona tëranta quëmaquën nininsoꞌ quësahuato, yaꞌipi quëmopinënpoapita niꞌtonënquë aꞌnoquëꞌ. Inapotaton quëpamantaquëꞌ, itërin. Napopirinhuë Cacoposoꞌ, Naquirari paꞌpin mamanshinënpita ihuarinsoꞌ, co nitotërinhuëꞌ. 33Naporoꞌ Napanosoꞌ, mamanshinënpita yoniton patë patë́rantarin. Cacopo nëꞌmëtë pëinënquëꞌton yaꞌconin. Pipirahuaton, Cacopo cosonanënpita nininquë, yaꞌcoantarin. Nianquën nininquënta yaꞌconaponahuëꞌ, co mamanshinënpita quënaninhuëꞌ. Ina quëran pipirahuaton, Naquiranquën nininquë yaꞌhuërëꞌ yaꞌcoantarin. 34Naquirasoꞌ mamanshiroꞌsa masahuaton, poꞌorin. Camiyoquë huënsëcaiso marëꞌ nitopisoanaquë poꞌorin. Inapotahuaton, ina aipi huënsëtërin. Paꞌpinsoꞌ yaꞌipi nëꞌmëtë pëianaquë yonípirinhuëꞌ, co quënaninhuëꞌ. 35Naquirari itapon:

—Tata, co huanirahuëso marëhuëꞌ, ama noꞌhuicosohuëꞌ. Sanapicoi inachintëraiso tahuëri nanitërinco niꞌton, huënsëárahuë, itërin. Napanori mamanshinënpita yonisápirinhuëꞌ, co quënaninhuëꞌ.

36Co quënanpachinahuëꞌ, Cacopo yaꞌhuërëꞌ noꞌhuitaton Napano chiníquën nontërin.

—¿Maquëta tëhuëtëranquën niꞌnan? ¿Maꞌta onpoato oshahuanahuë niꞌton, co napion cancantaton imaquirancosoꞌ? 37Yaꞌipi maꞌshanëhuëpita oꞌquiaton yoniran. ¿Maꞌta quënaparanco quëmaquën nininsoꞌ? Maꞌsona quënanpatan, aꞌninquëchin, quëmopinënpita notënanquë acoquëꞌ. Quëmopinëhuëpitarintaꞌ, niꞌin. Inapita shaꞌhuichinpoaꞌ insosona noꞌtëquën noninsoꞌ. 38Cato shonca piꞌi quëma marëꞌ sacatërahuë. Naporoꞌ co aꞌna ohuica tërantaꞌ, co aꞌna chipo tëranta anaꞌhuarinhuëꞌ. Huëntonënpita quëran, co aꞌna carniro tërantaꞌ, capitëranquënhuëꞌ. 39Niꞌniroꞌsari pëꞌtahuanënpita tëpahuachinara, co onporo tëranta aꞌnotaꞌhuanquënso marëꞌ quëshiranquënhuëꞌ. Caoranquën masahuato, acoantarahuë. Tahuërihuë nipon, tashihuë nipon, ihuatohuachinantaꞌ, ca apahuërëtëranco. 40Tahuëri nipachina piꞌi acorinco, tashinta nipachina sëhuën acorinco. Pëꞌtahuaroꞌsa aꞌpaito, huëꞌëi natanahuë. Inapoato nohuantasoꞌ parisitërahuë. 41Cato shonca piꞌi quëma marëꞌ sacatato, yaꞌipi inapita ahuantërahuë. Cato huiꞌnanpita marëꞌ shonca catapini piꞌipi sacatërahuë. Pëꞌtahuanënpita marëntaꞌ, saota piꞌi sacatërahuë. Naporahuaton, apira apira pochin nisha nisha canaꞌhuaso shaꞌhuitëranco. 42Apraan chinotërinso catahuarinco. Tata Isacontaꞌ, inachachin chinotërin. Coꞌsoꞌ ina catahuarincohuë naporini, topinamiáchin yaꞌhuërahuëquë aꞌpaꞌitoncohuëꞌ. Yosëso nipirinhuëꞌ, parisitërahuësoꞌ nitotërin. Chiníquën sacatato maꞌsha yaꞌhuëtërincosontaꞌ, nitotërin. Napoaton achin tashi pënëninquën, itërin Cacopori.

Cacopo, Napanorëꞌ anoyatopisoꞌ

43Cacopori napotohuachina, Napanosoꞌ tapon:

—Isopita catoroꞌsasoꞌ, huiꞌnahuëpita. Isopita huaꞌhuaroꞌsanta shihuëpita. Pëꞌtahua huëntonoꞌsantaꞌ, caquën. Yaꞌipi isëquë niꞌnansoꞌ, caquënáchin. Napoaponahuëꞌ, huiꞌnahuëpita catahuaꞌhuaso marëꞌ yaꞌipi quëchi nipachin. Shihuëpitanta quëchi.

44Napoaton huëquë paꞌa Yoscoarëꞌ niitatë anoyataꞌa. Catonpo chachin anoyatërëhuaso ayonquiinposo marëꞌ inapoaꞌa, itërin. 45Napotohuachina, Cacopontaꞌ, “Noyapaꞌ,” tëcaton, aꞌnara naꞌpi manin. Ina masahuaton, onë pochin ahuanirin. 46Naporoꞌ quëmopinënpita camairin:

—¡Naꞌpiroꞌsa yontoncoꞌ! itërin. Itohuachina, yaꞌipiya quëran naꞌpiroꞌsa yontonpi. Aꞌmitë aꞌmitëtahuatonaꞌ, panca imopi. Ina quëran, yaꞌipiya coshatopi, naꞌpiroꞌsa aꞌmitë aꞌmitëtopiso pirayan coshatopi. 47Napanosoꞌ inaora nanamënquë, ina roꞌtë nohuitaton, “Quicaro Saatota,” itërin. Cacoporiso nipirinhuëꞌ, inaora nanamënquë ina roꞌtë chachin, Carata, itërin. 48Naporoꞌ Napano tapon:

—Iso naꞌpiroꞌsa imorësoꞌ, catonpo chachin ayonquiarinpo Yoscoarëꞌ taꞌtë ipora tahuëri anoyatërësoꞌ. Napoaton, ina noꞌpasoꞌ ipora huanta Carata, itopi. 49-50Naporahuaton Mispa itopi antaꞌ: “Nipatohuatë, co huachi niquënanarihuëꞌ. Napoaponahuëꞌ, Sinioro chachin niꞌinpoꞌ. Co insonta yaꞌhuërëquë naporëso niꞌpirinpohuëꞌ, Yosë chachin niꞌinpoꞌ. Napoaton ama huiꞌnahuëpita noꞌhuiton aparisitëquësohuëꞌ. Ama aquëtë chachin sanapiꞌsa maantaquësohuëꞌ. Ina marëꞌ Yoscoarëꞌ taꞌton shaꞌhuitoco,” itërin. Ina naporinso marëꞌ ina pochin ina noꞌpaꞌ nohuitopi.

51Napanosoꞌ aquëtë chachin Cacopo shaꞌhuitaantarin:

—Niꞌquëꞌ. Naꞌpi imorahuëso yaꞌhuëarin. Onë pochin naꞌpi ahuanirahuësonta yaꞌhuarin. Yaꞌhuërëhuaso huáncana inapita acorahuë. 52Inapita ayonquiarinpo ama quëmanta maꞌsha onpotancoso marëhuëꞌ, isëquëran pëntonquësohuëꞌ. Co ca tëranta maꞌsha onpotaꞌhuanquënso marëꞌ isëquëran pëntonaꞌhuaso yaꞌhuërinhuëꞌ. 53Canpo capini nanan yaꞌhuëhuachin, Yosë chachin anitochinpoꞌ, inquënposona tëhuërësoꞌ. Ina Yosë chachin quëmaquën tata masho Apraan, chinotërin. Caquën tata masho Nacoronta chinotërin. Inquënposo tëhuëhuatëꞌ, ina chachin anaꞌinchinpoꞌ, itërin. Napotohuachina, Cacoposoꞌ: “Caquën tata chinotërinso niꞌsárinco niꞌton, co napoarahuëꞌ,” tënin. 54Inapoatona anoyatohuachinara, Cacoposo inaquë chachin Yosë chinotacaso marëꞌ maꞌsharoꞌsa tëparin. Nani Yosë chinotohuachinara, quëmopinënpita ichicoshatërin. Yaꞌipiya coshatopi. Nani coshatohuachinara, inaquë chachin huëꞌëantapi.

55Tahuëririnquë tashíramiachin Napanosoꞌ huënsëintarahuaton, huiꞌninpita, shinpita, inapita apinoraꞌpiarin: “Yosë catahuainquëma noya pacoꞌ,” itahuaton yaꞌhuërinquë paꞌmantarin huachi.

Currently Selected:

Génesis 31: cbt

Highlight

Copy