Génesis 29

Cacopori Napano yacaparinsoꞌ

1Cacopo paꞌsápaton, piꞌi pipirinso parti yaꞌhuëpisopita yaꞌhuërinquë canconin. 2Ninano yaꞌcariꞌ, aꞌna poso quënanconin. Ina pirayan cara huënton ohuicaroꞌsa iꞌsha oꞌshitacaiso marëꞌ achinotapi. Ina pososoꞌ, pancatë naꞌpiquë aꞌtantopi. 3Yaꞌipi ohuica huëntonoꞌsa niyontonpachinara, aꞌpaipisopitari naní quëran yamotahuatonaꞌ, chiꞌhuincapi. Ohuicanëna oꞌshitacaiso marëꞌ inapopi. Nani oꞌopachinara, naquëranchin inaquë chachin aꞌtantaantapi.

4Cacopori aꞌpaipisopita natanin:

—¿Intoparanta canpitaso iyaroꞌsaꞌ? itërin.

—Aran quëran quiyasoꞌ taꞌa, itopi.

5—¿Nohuitërama canpita Nacoro huiꞌnin, Napano itopisoꞌ to? taantarin Cacopo.

—Nohuitërai mini, itaantapi.

6—¿Noya yaꞌhuëarin? itaantarin.

—Noya mini yaꞌhuarin, itopi. Napotahuatonaꞌ:

—¡Maꞌtana huiꞌnin Naquira itopisoꞌ huëꞌsarin! Ohuicanënpitarë chachin huëꞌsarin, itaantapi. 7Naporoꞌ Cacopo tapon:

—Yono piꞌi yaꞌhuëarin niꞌton, pahuanarin ohuicaroꞌsa huëꞌërinquë oncorapicasoꞌ. ¿Onpoatonta co oꞌshitatoma pasto capacaiso marëꞌ quëpaantaramahuëꞌ? itërin.

8—Co nanitëraihuëꞌ inapocaꞌhuaisoꞌ. Yaꞌipi ohuica huëntonoꞌsa aꞌpaipisopitarë chachin niyontonacaisoꞌ ninarai. Naporo huarëꞌ nanitërai naꞌpi chiꞌhuincatahuatoi, ohuicaroꞌsa oꞌshitaꞌhuaisoꞌ, itopi.

9-10Inapita nontasoꞌ, Naquirasoꞌ paꞌpin ohuicanënpitarë chachin canquirin. Inari paꞌpin ohuicanënpita aꞌpaitërin. Ina niꞌsahuaton, Cacoposoꞌ aꞌnaroáchin posoquë paꞌnin. Paꞌsahuaton, naꞌpitë masho chiꞌhuincatërin. Chiꞌhuincatahuaton, apin ohuicanënpita oꞌshitërin. 11Ina quëran Naquira apinorahuaton: “Iꞌhuata oshi,” itërin. Napotahuaton, naꞌnërarin. 12Cacopori shaꞌhuitërin: “Caso quëmaquën tata, apihuëmiáchin. Quëmaquën aꞌshacha Nipica itëramaso huaꞌhuinco niꞌto, naporahuë,” tënin. Ina natanaton, Naquiraso taꞌarëꞌnachin paꞌpin shaꞌhuitapon paꞌnin.

13Cantonahuaton shaꞌhuitërin: “Aꞌshacha Nipica huaꞌhuin, Cacopo itopisoꞌ canquirin,” itërin. Ina natanahuaton, Napanoso taꞌarëꞌnachin nicapon paꞌnin. Quënanconahuaton apinorin. Apinorahuaton: “Iꞌhuata api,” itërin. Nontahuaton pëinënquë quëparin. Inaquë Cacopori yaꞌipi naporinso apin shaꞌhuitërin. 14Napanori natanahuaton itapon: “Quëmasoꞌ tëhuënchachin quëmopinëhuënquën ninan,” itërin.

Sanapi marëꞌ Cacopo sacatërinsoꞌ

Cacoposoꞌ Napano pëinënquë aꞌna yoquiraꞌ nani yacapatërin. 15Ina piquëran Napanori itapon:

—Quëmopinëhuënquën nipiranhuëꞌ, co topinan asacataꞌhuanquënso yaꞌhuërinhuëꞌ. Shaꞌhuitoco onposo canacamaso nohuantëransoꞌ. 16Napanosoꞌ cato huiꞌninpita nanoꞌsa yaꞌhuëtërin: Paninansoꞌ Nia itopi. Ina piquëran niantarinsosoꞌ, Naquira itopi. 17Niasoꞌ, noyápiachin yaꞌpirahuanin. Naquiraso nipirinhuëꞌ, noyápiroyanchin, co máquën tëranta tëhuërinhuëꞌ. 18Cacoposoꞌ Naquira costaton, apin itapon:

—Huiꞌnan huaꞌhua nininsoꞌ, Naquira itëramaso nohuantërahuë. Ina marëꞌ canchisë piꞌipi quëma marëꞌ sacatarahuë, itërin. 19Napotohuachina, Napanori itapon:

—Naporan niꞌquëhuarëꞌ, quëmari maquë nipachin. Nishaso quëtacasoꞌ, co noyahuëꞌ. Yacapatonco sacatëquë nipachin, itërin. 20Inapoaton Cacoposoꞌ Naquira marëꞌ canchisë piꞌipi sacatërin. Huaꞌqui sacatopirinhuëꞌ, Naquira paꞌpi nosoraoton, cara tahuëriíchin sacatërinso pochin cancantërin.

21Nani canchisë piꞌi sacatohuachina, Cacopori Napano itapon:

—Acoantoco huachi huiꞌnan. Shaꞌhuitëranquënsoꞌ nani nanirahuë huachi, itërin. 22Napotohuachina Napanosoꞌ yaꞌipi yaꞌhuërin pirayan yaꞌhuëpisopita, amatërin. Cacopo saꞌarinquë pita nicacaso marëꞌ amatërin. 23Napoaponahuëꞌ nani tashihuachina, Napanoso Naquira yaꞌhuërënamën Niasaꞌ, Cacopo acoantërin. Inaso co nohuitatonhuëꞌ, ichihuëꞌërin. 24Naporahuaton Napanori, aꞌnara piyapinën sanapi nininso Nia nicanarin. Camaicaso marëꞌ nicanarin. Inaso sanapi Siripa itopi.

25Tahuëririnquë tashíramiachin Cacoposoꞌ, Nia ichihuëꞌërinso niꞌnin. Niꞌsahuaton, paꞌpi paꞌyantërin. Napoaton Napano chiníquën nontërin:

—¡Co napochitoncohuë pora! ¡Coꞌta Naquira marëꞌ nani sacatërahuë! ¡Nani nonpintëranco niꞌsora! itërin.

26—Isëquëso api, co huaꞌhua nininsoꞌton, asoꞌyaraihuëꞌ. 27Nia mananso marëꞌ aꞌna simana pita nicacaso yaꞌhuërinsoꞌ, naniquëꞌ. Ina nanihuatan, Naquira yaꞌhuërëꞌ acoantaranquën. Canchisë piꞌi chachin ca marëꞌ sacatacasoꞌ nohuantohuatan, inapotaranquën, itërin Napanori. 28Napotohuachina, Cacopo nohuantërin. Nia maninso marëꞌ simana pita imapiso nanihuachinara, Napanori, Naquira yaꞌhuërëꞌ acoantërin. 29Napanori, aꞌnara piyapinën sanapi nininsoꞌ camaicaso marëꞌ Naquiranta nicanarin. Ina sanapisoꞌ Pira itopi. 30Nani acoantohuachina, Cacoposoꞌ, Naquira ichihuëꞌërin huachi. Inapoaton ina naꞌcon naꞌcon nosororin. Niaso nipirinhuëꞌ, co onpopinchin nosororinhuëꞌ. Canchisë piꞌipi chachin Napano marëꞌ sacataantacasoꞌ niponahuëꞌ, nosororin.

Cacopo huiꞌninpita nininsoꞌ

31Cacoposoꞌ, Nia co onpopinchin nosororinhuëꞌ. Ina nitotaton, Siniorori catahuarin huaꞌhuanacaso marëꞌ. Naquiraso nipirinhuëꞌ, ina nohuanton chachin, co nito huaꞌhuaninhuëꞌ. 32Niasoꞌ, cayorahuaton quëmapiaꞌhuaya huairin. Inasoꞌ, Nopino itërin. “Sinioro sëtërahuësoꞌ nicaton, catahuarinco. Huaꞌhuanahuë niꞌton, iporasoꞌ soꞌyahuë nosoroaponco huachi,” taꞌton, ina pochin huaꞌhuin nohuitërin. 33Naquëranchin, cayoantarahuaton, quëmapiaꞌhuaya huaiantarin. Inasoꞌ, Simion itërin. “Nocaninacosoꞌ Sinioro natanin. Natanaton catahuarinco. Napoaton aꞌna huaꞌhuasha quëtaantarinco,” taꞌton, ina pochin huaꞌhuin nohuitërin. 34Naquëranchin cayoantarahuaton, quëmapi chachin huaꞌhuantarin. Inasoꞌ, Nihui itërin. “Nani cara huaꞌhuanahuë niꞌton, iporasoꞌ soꞌyahuë naꞌcon naꞌcon chinpitaponco huachi,” taꞌton, ina pochin huaꞌhuin nohuitërin. 35Niasoꞌ, naquëranchin cayoantarahuaton quëmapiaꞌhua chachin huaiantarin. Inaso Cota itërin. “Iporasoꞌ huachi, Sinioro paꞌyatato chinotarahuë,” taꞌton ina pochin huaꞌhuin nohuitërin. Nani catapini huaꞌhuanahuaton, copi tënin huachi.

Currently Selected:

Génesis 29: cbt

Highlight

Copy