1 Timoteo 4
4
Yosë nanamën aꞌporapisoꞌ
1Tëhuënchachin Ispirito Santo ninoton, aꞌninquëchin shaꞌhuitërinpoaꞌ: “Aꞌna tahuëri aꞌnaquën piyapiꞌsaꞌ Yosë nanamën aꞌporapi. Sopai natëtonaꞌ, nonpin nanan aꞌchinpachinaꞌ, imasapi. Ayaroꞌ tahuëri yaꞌcaritohuachin, naporapi,” tënin. 2Naporoꞌ nonpinaꞌpiroꞌsaꞌ yaꞌhuaponaꞌ piyapiꞌsaꞌ nonpintacaiso marëꞌ. “Quiyantaꞌ Yosë imarai,” topirinahuëꞌ, co noꞌtëquën nonsapihuëꞌ. Nitotaponaraihuëꞌ, co cancanhuanhuë pochin nicatonaꞌ, co natëtochináchinhuëꞌ cancantapi. Huaꞌquiꞌ sopai natëtonaꞌ, co huachi nanitapihuëꞌ Yosë natëcaisoꞌ. Inapitasoꞌ nisha aꞌchinapi. 3“Ama sanapi macosohuëꞌ. Nisha nisha cosharoꞌ aꞌpoco huachi,” tosapi. Napopirinahuëꞌ, Yosë yaꞌipi cosharoꞌ ninin capacaso marëꞌ. Nanamën nitotatëhuaꞌ, Yosë natëhuatëhuaꞌ, co aꞌpoarihuahuëꞌ. “Yosparinquën, Sinioro,” itatëhuaꞌ, caparihuaꞌ. 4Yaꞌipi maꞌsha Yosëri ninin. Napoaton nóya. Co mantaꞌ aꞌpocasoꞌ yaꞌhuërinhuëꞌ. “Yosparinquën, Sinioro,” itatëhuaꞌ, yaꞌipiya noya caparihuaꞌ. 5Yosë quiricanën yonquiatëhuaꞌ, Yosë nontohuatëhuaꞌ, noya capacasoꞌ, tënin Yosë.
Quisocristo marëꞌ noya sacatacasoꞌ yaꞌhuërin
6Nani pënënanquën. Ina nanan aꞌchinpatan, noya nisaran. Quisocristo noya niꞌsarinquën. Cosharoꞌ achinirinposo pochin Yosë nanamën natëhuatan, achinicancanarinquën. Noꞌtëquën aꞌchintërainquën niꞌton, noya imasaran.
7Nonpin nananoꞌsaso nipirinhuëꞌ tananpitëquëꞌ. Inahuara yonquinëna quëran naporapi niꞌton, tananpitëquëꞌ. Inapitasoꞌ topinan quëran aꞌchinapi. Quëmaso nipirinhuëꞌ nani tahuëri yonquiquëꞌ Yosë noya imacaso marëꞌ. 8Nani tahuëriya sacatohuatëhuara, chinipirëhuahuëꞌ, noya noya Yosë imacasoꞌ yonquihuatëhuaꞌ, achinicancaninpoaꞌ. Achinicancanpachinpoaꞌ, noya noya nisarëhuaꞌ, tënahuë. Noya noya imapatëhuaꞌ, isoroꞌpaquë noya nanpiarëhuaꞌ. Aꞌna tahuërintaꞌ Yosëꞌpaꞌ nanpimiatarihuaꞌ. 9Casoꞌ noꞌtëquën pënëntërahuë, yaꞌipi piyapiꞌsaꞌ natëinaꞌ. 10Ina marëꞌ paatëhuaꞌ, Yosë nanamën shaꞌhuirárëhuaꞌ. Parisitarihuarahuëꞌ, aꞌchinárëhuaꞌ. Yosëíchin ninarëhuaꞌ. Inasoꞌ nanpiarin niꞌton, yaꞌipi piyapi nichaꞌëcasoꞌ nohuantërin. Natëhuatëhuaꞌ, anoyacancantatonpoaꞌ, nichaꞌësarinpoaꞌ.
11Nani aꞌchintëranquën niꞌton, inachachin api aꞌchinquëꞌ. Aꞌchinaton, pënëntëquëꞌ natëinaꞌ. 12Co mashonquënhuëꞌ niponahuëꞌ, noya pënëntëquëꞌ mashoroꞌsantaꞌ natëinënquën. Yaꞌipi piyapiꞌsaꞌ noya nontëquëꞌ. Nosoroaton, catahuaquëꞌ. Cancanën quëran huarëꞌ Yosë natëquëꞌ. Sano yonquiaton, noyápiachin cancantëquëꞌ. Noyasáchin niquëꞌ imapisopita nonainënquënso marëꞌ. 13Niyontonpachinaꞌ, Yosë quiricanën nontëquëꞌ. Ina nontaton, pënëntëquëꞌ. Quisocristo nanamën aꞌchintëquëꞌ. Ca canconaꞌhuarëꞌ inapoquëꞌ. 14Iráca ansianoꞌsaꞌ niyontonahuatonaꞌ, acorinënquën Yosë nanamën aꞌchinamaso marëꞌ. Sëꞌhuamotorahuatënënquën, nanan quëtërinënquën aꞌchinamaso marëꞌ. Ina quëran Yosë catahuarinquën nóya aꞌchinamasoꞌ. Ama ina naniantaton, topinan yaꞌhuëquësohuëꞌ.
15Yosë nanamën naꞌcon yonquiaton, aꞌchináquëꞌ. Yaꞌipi cancanën quëran huarëꞌ imaquëꞌ. Ina quëran pënënpatan, aꞌnapita noya niꞌsarinënquën. “Ma noya Yosëri catahuarin niꞌton, noya noya pënëntërin,” tosapi. 16Nani tahuëri yonquiquëꞌ nóya imacamaso marëꞌ. Naporahuaton, noꞌtëquën aꞌchinquëꞌ. Inapohuatan, Yosë catahuarinquën imamiataton chaꞌëcaso marëꞌ. Aꞌnapitantaꞌ natanpachinquën, chaꞌësapi.
Currently Selected:
1 Timoteo 4: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.