1 Timoteo 3
3
Ansianoꞌsaꞌ acocasoꞌ yaꞌhuërinsoꞌ
1Noꞌtëquën shaꞌhuitaranquën. Ansiano yayaꞌconpachinaꞌ, noya yonquiapi. Ansianoꞌsaꞌ tëhuënchachin catahuarinënpoaꞌ. 2Napoaton yayaꞌconpachinaꞌ, nóya nipisopitaráchin yaꞌcoinaꞌ. Ama piyapiꞌsari pinocaiso marëhuëꞌ noyasáchin niinaꞌ. Aꞌna saꞌináchin yaꞌhuëchinaꞌ. Co monshihuanacaisoꞌ yaꞌhuërinhuëꞌ. Sano yonquiꞌinaꞌ. Ama nisha nisha yonquiꞌinasohuëꞌ. Yaꞌipi cancanëna quëran imainaꞌ. Niꞌtoroꞌsaꞌ huëꞌpachinaꞌ, noya nonchinaꞌ, oꞌshichinaꞌ. Aꞌchinacaisoꞌ noya nitochinaꞌ. 3Ama noꞌpiinasohuëꞌ. Ama yaahuëchinasohuëꞌ. Sano yonquiꞌinaꞌ. Ama yanoꞌhuichinasohuëꞌ. Ama coriquiráchin cancanchinasohuëꞌ. 4Yaꞌipi pëinënquë yaꞌhuëpisopita noya aꞌpaiatonaꞌ, aꞌchinchinaꞌ. Huiꞌninpita noya pënëinaꞌ noꞌtëquën natëcaiso marëꞌ. Sanoanan quëran pënënpachinaꞌ, noya natërapi. Paꞌpinaꞌ noya niꞌsapi. 5Co huiꞌninpita tërantaꞌ pënënpachinhuëꞌ, aꞌnapitarinta co yanatëponhuëꞌ. Napoaton co nanitërinhuë Yosë imapisopita noya catahuacasoꞌ. 6Huaꞌqui imapisopitaráchin ansiano yaꞌcoinaꞌ. Nasha imarinsoꞌ yaꞌconpachin, co noyahuëꞌ yonquiamara: “Casoꞌ ansianoco niꞌton, noya noyaco,” tapon nimara yonquinënquë. Iráca sopai huaꞌan ina pochin yonquihuachina, Yosëri anaꞌintërin. Niꞌcona inapochachin anaꞌintochinquëmaꞌ. 7Noya nininsoráchin yaꞌcoinaꞌ. Noya nipachinaꞌ, co imapisopitarihuëntaꞌ noya niꞌsapi: “Inasoꞌ noya quëmapi,” tosapi. Co noyahuëꞌ nicaponahuëꞌ, yaꞌconpachin, sopai huaꞌani nonpintaton, minsëarin. Piyapiꞌsarintaꞌ tëhuapi.
Tiaconoꞌsaꞌ acocasoꞌ yaꞌhuërinsoꞌ
8Ansianoꞌsaꞌ catahuarinsopitasoꞌ tiaconoꞌsaꞌ topi. Inapitantaꞌ natëtonoꞌsaꞌ niinaꞌ. Noꞌtëquënáchin noinaꞌ. Ama nisha nisha noinasohuëꞌ. Ama noꞌpiinasohuëꞌ. Ama nonpinatonaꞌ, coriqui canainasohuëꞌ. 9Yosë anitotërinpoasoꞌ nóya nitochinaꞌ. Nitotatonaꞌ, cancanëna quëran huarëꞌ natëinaꞌ. Inapohuachinaꞌ, noyápiachin cancantapi. 10Ama aꞌnaroáchin ayaꞌconcosohuëꞌ. Piꞌpian tënitomaꞌ, niꞌcoꞌ. Noya nipachinaꞌ, yaꞌcoinaꞌ. 11Tiaconaroꞌsantaꞌ natëtonoꞌsaꞌ niinaꞌ. Ama maꞌtona maꞌtona noinasohuëꞌ. Ama pinochinasohuëꞌ. Ama noꞌpiinasohuëꞌ. Noyasáchin niinaꞌ. 12Tiaconoꞌsasoꞌ, aꞌnaíchin saꞌinaꞌ yaꞌhuëchinaꞌ. Huiꞌninpita noya pënëinaꞌ noꞌtëquën natëcaiso marëꞌ. Yaꞌipi pëinënquë yaꞌhuëpisopita noya aꞌpaitonaꞌ, aꞌchinchinaꞌ. Ina pochin cancantërinsopitarachin yaꞌcoinaꞌ. 13Tiaconoꞌsaꞌ noya nipachinaꞌ, imapisopitari noya niꞌsapi. Noya Yosë marëꞌ sacatohuachinaꞌ, chini chiníquën cancantapi. Quisocristo noya natëtonaꞌ, nanamën aꞌchinapi.
Yosë huëntonënquë yaꞌconpisopita
14-15Naꞌcon yonquiatënquën api, nicaponquën yapaꞌsarahuë. “Co huaꞌquiya quëranhuëꞌ paꞌsarahuë topirahuëꞌ. Huaꞌqui quëran aꞌnaꞌ paꞌsamarahuë,” taꞌto, iso quirica ninshitaranquën pënënaꞌhuanquënso marëꞌ. Yosë huëntonënquë yaꞌconpatëhuaꞌ, onpopinsona nicacasoꞌ shaꞌhuitaranquën. Yosësoꞌ nanpiárin. Canpoarë chachin yaꞌhuërarin. Nanamën noꞌtëquën anitotërinpoaꞌ. Imarëhuasopita niyontonpatëhuaꞌ, noꞌtëquën aꞌchinarihuaꞌ. 16Iráca co Yosë nohuitopirëhuahuëꞌ, iporasoꞌ Quisocristo anohuitërinpoaꞌ: “Ma noyacha inaso paya,” tënëhuaꞌ.
Yosë huiꞌnin isoroꞌpaquë oꞌmaton, piyapi chachin nasitimarin.
Ispirito Santo chachin anitotërinpoaꞌ Yosë huiꞌnin nininsoꞌ.
Nanpiantahuachina, anquëniroꞌsarintaꞌ quënanpi.
Imapisopitari yaꞌipi parti paatonaꞌ, nanamën shaꞌhuiraꞌpiapi.
Naꞌa piyapiꞌsaꞌ natëpi.
Iporasoꞌ Yosëꞌpaꞌ noya yaꞌhuërin. Inatohuaꞌ Yosëri quëpantarin.
Currently Selected:
1 Timoteo 3: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.