1 Juan 4
4
Nonpin nanan aꞌchinpisoꞌ
1Naꞌcon iyaroꞌsaꞌ nosororanquëmaꞌ niꞌton, pënënaranquëmaꞌ. Naꞌa nonpin nanan pënëntonaꞌpiroꞌsaꞌ nonpin nanan aꞌchinapi. “Yosë nanamën aꞌchinahuë,” topirinahuëꞌ, co noꞌtëquën aꞌchinpihuëꞌ. Napoaton aꞌchintohuachinënquëmaꞌ, ama aꞌnaroáchin natëtocosohuëꞌ. “Nonpin nanan nimara,” taꞌtomaꞌ, yonquicoꞌ. Yaꞌipi Yosë quiricanën quëran aꞌchintërinpoasoꞌ yonquiatomaꞌ, tantiacoꞌ. Co ina pochin aꞌchintohuachinënquëmahuëꞌ, ama natëcosohuëꞌ. 2Ispirito Santo noꞌtëquën anitotërinpoaꞌ. “Quisocristo Yosë huiꞌnin niponahuëꞌ, isoroꞌpaquë oꞌmaton, piyapi chachin nasitimarin. Nonën chachin yaꞌhuëtërin,” itërinpoaꞌ. Ina nanan aꞌchintohuachinënquëmaꞌ, noꞌtëquën aꞌchinapi. Ispirito Santori ayonquirin niꞌton, noya nonsapi. 3Aꞌnaquënso nipirinhuëꞌ sopai nohuanton, nonpinapi. Co Quisocristo nanamën noꞌtëquën aꞌchinpihuëꞌ. “Yosë huiꞌninsoꞌ co piyapi chachin nasitimarinhuëꞌ,” toconpi. Inapitasoꞌ Quisocristo inimicotopi. Co ina pochin Ispirito Santo anitotërinpoahuëꞌ. Iráca ninorinso chachin nani Cristo inimiconën natantërëhuaꞌ.
4Canpitasoꞌ apiaꞌhuaroꞌsaꞌ, Yosë huiꞌninpitanquëmaꞌ ninamaꞌ. Noꞌtëquën yonquiatomaꞌ, nisha aꞌchinaꞌpiroꞌsaꞌ minsëaramaꞌ. Sopai nohuanton, nonpin nananoꞌsaꞌ aꞌchintopirinënquëmahuëꞌ, Ispirito Santo nani yaꞌcoancantërinquëmaꞌ. Inasoꞌ sopai quëran chini chiníquën nanantarin niꞌton, catahuahuachinpoaꞌ, co nonpin nananoꞌsaꞌ natëtarihuahuëꞌ. 5Inapitaso nipirinhuëꞌ, co Yosë nohuitatonahuëꞌ, co nanamën chachin aꞌchinpihuëꞌ. Isoroꞌpaquë yaꞌhuërinsopitaráchin yonquiatonaꞌ, inahuara yonquinëna quëran aꞌchinpi. Napoaton co imapisopitasohuëꞌ nonpin nanan natëpi. 6Quiyaso nipirinhuëꞌ Yosë nohuitatoi, noꞌtëquën aꞌchinai. Yosë imapisopita noya nataninacoi. Inasoꞌ noꞌtën nanan, topi. Co imapisopitasohuëꞌ nipirinhuëꞌ, co yanatërinacoihuëꞌ. Ispirito Santosoꞌ noꞌtëquënáchin nonin. Napoaton nonpin nanan paꞌyatopisopitasoꞌ co Ispirito Santo yanatëpihuëꞌ. Ina quëran nonpin nananoꞌsaꞌ nohuitërëhuaꞌ.
Iráca quëran huarëꞌ Yosë nosororinpoasoꞌ
7Yosë paꞌpi nosororinpoaꞌ. Napoaton iyaroꞌsaꞌ, canpoantaꞌ noya ninosoroaꞌahuaꞌ. Huëntonënquë ayaꞌconpachinpoaꞌ, catahuarinpoaꞌ aꞌnapita nosorocasoꞌ. Nosorohuatëhuaꞌ, Yosë nohuitarihuaꞌ. Huiꞌninpita pochin niꞌninpoaꞌ. 8Inasoꞌ nosoromiatochinarinpoaꞌ. Napoaton canpoantaꞌ co aꞌnapita nosorohuatëhuahuëꞌ, co piꞌpisha tërantaꞌ ina nohuitarihuahuëꞌ. 9Nosoroatonpoaꞌ, huiꞌnin chachin isoroꞌpaquë aꞌpaimarin anoyacancantinpoaso marëꞌ. Aꞌnaíchin huiꞌnin yaꞌhuëtopirinhuëꞌ, aꞌpaimarin. Quisocristo anoyacancantohuachinpoaꞌ, Yosë nohuitatëhuaꞌ, nanpimiatarihuaꞌ. 10Co canpoarisoꞌ nosoropirëhuahuëꞌ, Yosësoꞌ naꞌcon nosororinpoaꞌ. Ina nohuanton, huiꞌnin chachin oꞌmarahuaton, chiminin. Yaꞌhuërënamënpoaꞌ chiminin niꞌton, oshanënpoaꞌ inquitatonpoaꞌ, nanan anoyatërinpoaꞌ.
11Yosë naꞌcon nosororinpoaꞌ niꞌton, canpoantaꞌ, iyaroꞌsaꞌ, inapochachin ninosoroaꞌahuaꞌ. Ina pochin cancantacasoꞌ yaꞌhuërin. 12Co inquënpoa tërantaꞌ Yosë quënanpirëhuahuëꞌ, noya ninosorohuatëhuaꞌ, Yosë nohuitarihuaꞌ, yaꞌcoancantomiatërinpoaꞌ. “Yosë naꞌcon nosororinpoaꞌ,” taꞌtëhuaꞌ, canpoantaꞌ noya noya ninosoroarihuaꞌ. 13Yosë huëntonënquë yaꞌconpatëhuaꞌ, Ispirito Santo aꞌpatimarinpoaꞌ yaꞌcoancantinpoaso marëꞌ. Huaꞌyanën chachin niꞌton, cancanënpoaquë ayonquirinpoaꞌ. “Tëhuënchachin Yosë yaꞌcoancantërinpoaꞌ,” tënëhuaꞌ. 14Tata Yosëri huiꞌnin isoroꞌpaquë aꞌpaimarin nichaꞌëinpoaso marëꞌ. Quiyarisoꞌ niꞌnai. Nani tahuëri piyapiꞌsaꞌ shaꞌhuitárai. 15“Quisocristosoꞌ Yosë huiꞌnin. Ina natërahuë,” topatëhuaꞌ, Yosë pochin cancantatëhuaꞌ, imamiatarihuaꞌ. Inantaꞌ yaꞌcoancantërinpoaꞌ.
16Yosë nohuitatëhuaꞌ, natërëhua. “Ma noyacha Yosë nosororinpoa paya,” tënëhuaꞌ. Inasoꞌ nosoromiatochinarinpoaꞌ. Canpoantaꞌ nosorohuatëhuaꞌ, Yosë nohuitarihuaꞌ. Yonquirinsoráchin imasarëhuaꞌ. Imapatëhuaꞌ, yaꞌcoancantomiatërinpoaꞌ. 17Yosë noya nohuitohuatëhuaꞌ, naꞌcon naꞌcon nosoroarihuaꞌ. Ina quëran ayaroꞌ tahuëri nanihuachin, co tëꞌhuatarihuahuëꞌ. Quisocristo nosororinpoaꞌ niꞌton, canpoarintaꞌ ina pochachin nosoroarihuaꞌ. Napoaton ayaroꞌ tahuëri co paꞌyanarihuahuëꞌ. 18Imarëhuasopita capini noya ninosorohuatëhuaꞌ, co nisaitarihuahuëꞌ. Inapochachin Yosërëꞌquënpoaꞌ ninosorohuatëhuaꞌ, co tëꞌhuatarihuahuëꞌ. Aꞌnaquën piyapiꞌsasoꞌ naꞌcon tëꞌhuapi. “Yosë anaꞌintarinco,” taꞌtonaꞌ, tëꞌhuatochinachin cancantopi. Canpoaso nipirinhuëꞌ “Yosë naꞌcon nosoroatonpoaꞌ, oshanënpoaꞌ inquitërinpoaꞌ,” topatëhuaꞌ, yaꞌipi tëꞌhua inquitarinpoaꞌ.
19Yosëꞌton naꞌcon nosororinpoaꞌ niꞌton, canpoarintaꞌ Yosë nosoroatëhuaꞌ, aꞌnapitantaꞌ nosoroarihuaꞌ. 20Aꞌnaquënsoꞌ “Yosë nosororahuë,” taponahuëꞌ, iin noꞌhuirin. Co inasoꞌ noꞌtëquën noninhuëꞌ, nonpiánin. Piyapi quënanëhuaꞌ. Yosëso nipirinhuëꞌ co quënanëhuahuëꞌ. Piyapi quënanarihuarahuëꞌ, co nosorohuatëhuahuëꞌ, aquëtë huarëꞌ Yosësoꞌ co nanitarëhuahuëꞌ nosorocasoꞌ. 21Quisocristo pënëninpoaꞌ. “Nosorohuatamaco, piyapintaꞌ nosorocoꞌ,” itërinpoaꞌ.
Currently Selected:
1 Juan 4: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.