1 Juan 3

Yosë huiꞌninpita

1Ma noya Tata Yosë nosororinpoaꞌ niꞌton, huiꞌninpita pochachin niꞌninpoaꞌ. Huëntonënquë chachin ayaꞌconinpoaꞌ. Co imapisopitasohuëꞌ nipirinhuëꞌ co nitotopihuëꞌ. “¿Onpoatontaꞌ Yosë pochin cancantacasoꞌ nohuantopi?” toconpi. Co Yosë nohuitatonahuëꞌ, napopi. 2Naꞌcon, iyaroꞌsaꞌ, nosororanquëmaꞌ. Iporasoꞌ Yosë huiꞌninpita pochin niꞌninpoaꞌ. Aꞌna tahuëri noya noya acoarinpoaꞌ. Onpopinsona nicarihuaꞌ nimara. Co yaꞌipi nitochatërarëhuahuëꞌ. Nipirinhuëꞌ, Quisocristo oꞌmantahuachin, nirayarihuaꞌ. Ina niꞌpatëhuaꞌ, ina pochachin nicarihuaꞌ. 3“Aꞌna tahuëri Quisocristo niꞌsarëhuaꞌ,” taꞌtëhuaꞌ, co noyahuëꞌ yonquirëhuasopita naniantarëhuaꞌ. Quisocristosoꞌ noyápiachin cancantërin niꞌton, canpoantaꞌ noyápiachin cancantacasoꞌ nohuantarihuaꞌ.

4Yosë pënëninpoaꞌ. Co ina natëhuatëhuahuëꞌ, oshahuanëhuaꞌ. Co noyahuëꞌ nipatëhuaꞌ, co Yosë natërëhuahuëꞌ. 5Noya nanan nani nitotëramaꞌ. Quisocristo oꞌmarin oshanënpoaꞌ inquitinpoaso marëꞌ. Inasoꞌ co piꞌpisha tërantaꞌ oshahuaninhuëꞌ. 6Tëhuënchachin imapatëhuaꞌ, nóya nisarëhuaꞌ. Co paꞌyatarihuahuëꞌ oshahuanacasoꞌ. Nani tahuëri co noyahuëꞌ nipatëhuaꞌ, co Yosë nohuitërëhuahuëꞌ. Co yaꞌcoancantërinpoahuëꞌ. 7Niꞌcona, apiaꞌhuaroꞌsaꞌ, nisha aꞌchinaꞌpiroꞌsaꞌ nonpintochinënquëmaꞌ. Noya nipatëhuaꞌ, noya cancantarëhuaꞌ. Quisocristo noya niꞌton, ina pochin cancantacasoꞌ yaꞌhuërin. 8Nani tahuëri co noyahuëꞌ nipatamaꞌ, sopai imaramaꞌ. Iráca quëran huarëꞌ sopai co noyahuëꞌ cancantaton, oshahuanin. Inasoꞌ nonpintohuachinpoaꞌ, canpoantaꞌ oshahuanarëhuaꞌ. Napoaton Yosë huiꞌnin oꞌmarin sopai minsëaton nichaꞌëinpoaso marëꞌ. Yaꞌipi oshanënpoaꞌ inquitohuachinpoaꞌ, co huachi sopai natëcasoꞌ yaꞌhuërinhuëꞌ.

9Huëntonënquë chachin Yosë ayaꞌconinpoaꞌ niꞌton, co iporasoꞌ paꞌyatarëhuahuëꞌ oshahuanacasoꞌ. Huiꞌnin pochachin cancantatonpoaꞌ, yonquinën chachin quëtërinpoaꞌ. Nasitantarëhuaso pochin ninëhuaꞌ. Napoaton co huachi nohuantarihuahuëꞌ oshahuanacasoꞌ. 10Co sacaihuëꞌ Yosë huiꞌninpita nohuitacasoꞌ. Noyasáchin nipatëhuaꞌ, Yosë huiꞌninpita pochin nisarëhuaꞌ. Nipirinhuëꞌ, co noyahuëꞌ nipachinaꞌ, co Yosë huëntonënquë yaꞌconpihuëꞌ. Co imapisopita nosorohuachinahuëꞌ, co Yosë huiꞌninpita pochin nisapihuëꞌ. Sopai huiꞌninpita pochin nisapi. Co noyahuëꞌ cancantopi quëran sopai huiꞌninpita nohuitarëhuaꞌ.

Ninosorocasoꞌ yaꞌhuërinsoꞌ

11Yaꞌnan imapoma quëran huarëꞌ Yosë nanamën natanamaꞌ. “Noya ninosorocoꞌ,” itërainquëmaꞌ. 12Iráca Cainosoꞌ sopai natëton, iin tëparin. ¿Maꞌmarëtaꞌ tëparin? Iinsoꞌ noya ninin niꞌton, noꞌhuiton, tëparin. Ama ina pochin cancantocosohuëꞌ.

13Napoaton iyaroꞌsaꞌ co natëpisopitahuëꞌ noꞌhuihuachinënquëmaꞌ, ama paꞌyancosohuëꞌ. 14Iráca canpoantaꞌ ina pochin co noyahuëꞌ cancantërëhuaꞌ. Co Yosë nohuitatëhuahuëꞌ, chimipi pochin nipirëhuahuëꞌ, Yosë anoyacancantërinpoaꞌ ina nohuitatëhuaꞌ nanpimiatacaso marëꞌ. Napoaton iporasoꞌ ninosororëhuaꞌ. Ina quëran Yosë huëntonënquë yaꞌconëhuasoꞌ nitotërëhuaꞌ. Co ninosorohuatamahuëꞌ, co Yosë anoyacancantërinquëmahuëꞌ. Chimipi pochin cancantaramaꞌ. 15Aꞌna piyapi noꞌhuihuatamaꞌ, tëpatonaꞌpiroꞌsa pochin Yosë niꞌsarinquëmaꞌ. Tëpatonapiroꞌsasoꞌ, co Yosë pochin nanpimiatacaiso yaꞌhuërinhuëꞌ. 16Quisocristoso nipirinhuëꞌ naꞌcon nosoroatonpoaꞌ, nichaꞌëinpoaso marëꞌ chiminin. Chiminaton, nosororinpoasoꞌ anitotërinpoaꞌ. Inapochachin iyaroꞌsaꞌ, yaꞌipi Quisocristo imapisopita nosorocasoꞌ yaꞌhuërin. Naꞌcon ninosoroaꞌahuaꞌ. Quisoso yaꞌhuërënamënpoaꞌ chimininso pochachin nosorocasoꞌ yaꞌhuërin. 17Quisocristo imarëhuasopita capini noya ninosorocasoꞌ yaꞌhuërin. Aꞌnapita maꞌsha pahuantohuachinaꞌ, catahuahuaꞌ. Capa capacaisoꞌ nipachin, capa aꞌmocaisoꞌ nipachin quëtahuaꞌ. Co inapita catahuahuatëhuahuëꞌ, co tëhuënchachin nosororëhuahuëꞌ. Co canpoa capini ninosorohuatëhuahuëꞌ, co Yosëntaꞌ nosororëhuahuëꞌ. 18“Yaꞌipi imapisopita nosororahuë,” topatëhuaꞌ, ama, apiaꞌhuaroꞌsaꞌ, topinan quëran napoaꞌhuasohuëꞌ. Cancanënpoa quëran huarëꞌ nosoroatëhuaꞌ, catahuahuaꞌ.

Co tëꞌhuatatëhuahuëꞌ Yosë nontërëhuasoꞌ

19Tëhuënchachin aꞌnapita nosorohuatëhuaꞌ, noꞌtëquën Yosë nanamën imasarëhuaꞌ. Ina quëran co huachi tëꞌhuatacasoꞌ yaꞌhuëtarinpoahuëꞌ. “Tatanpoa pochin niꞌton, noya niꞌninpoaꞌ,” taꞌtëhuaꞌ, noya cancantarihuaꞌ. 20Co noyahuëꞌ nipatëhuaꞌ, cancanënpoa quëran nitotatëhuaꞌ, sëtërëhuaꞌ. Co noyahuëꞌ ninëhuasoꞌ Yosëntaꞌ nitotërin. Napoaponahuëꞌ, cancanënpoa quëran huarëꞌ yaimapatëhuaꞌ, inantaꞌ nitotërin. Ina nitotaton, nosororinpoaꞌ. Ina yonquihuatëhuaꞌ, noya cancantatëhuaꞌ, Yosë nontarihuaꞌ. 21Napoaton iyaroꞌsaꞌ, cancanënpoa quëran aꞌnaya aꞌnayanpoaꞌ yonquiaꞌahuaꞌ. “Yosë noya niꞌsarinco,” topatëhuaꞌ, co Yosë tëꞌhuatarihuahuëꞌ. Co tëꞌhuatatëhuahuëꞌ, nani tahuëri ina nontarihuaꞌ. 22Yosë pënëninpoasoꞌ natëhuatëhuaꞌ, noya natanarinpoaꞌ. Ina nohuantërinsoáchin yonquihuatëhuaꞌ, catahuarinpoaꞌ. Ina pochin cancantohuatëhuaꞌ, maꞌpitaso nipatëhuaꞌ, quëtarinpoaꞌ. 23Yosë nani pënëninpoaꞌ huiꞌnin imacaso marëꞌ. Naporahuaton, ninosorocasontaꞌ shaꞌhuitërinpoaꞌ. “Quisocristontaꞌ inachachin shaꞌhuitërinpoaꞌ,” taꞌtëhuaꞌ, cancanënpoa quëran natëahuaꞌ. 24Yosë natëhuatëhuaꞌ, yonquirinsoráchin imasarihuaꞌ. Imapatëhuaꞌ, yaꞌcoancantomiatërinpoaꞌ. Ispirito Santo quëtërinpoaꞌ yaꞌcoancantinpoaso marëꞌ. Ina catahuahuachinpoaꞌ, noya nisarëhuaꞌ. Ina quëran Yosë nohuitërëhuasoꞌ nitotërëhuaꞌ.

Currently Selected:

1 Juan 3: cbt

Highlight

Copy